1. Heberu 12:1 hegeregerena, mauri ena heau helulu lalonai ita kwalimu totona dahaka ita karaia be namo?

 BAIBEL ese iseda Keristani maurina be heau helulu ida ia hahegeregerea. Heau helulu ai idia kwalimu taudia be mauri hanaihanai do idia abia. (2 Tim. 4:7, 8) Namona be ita heau goadagoada noho, badina heau helulu ena dokona be kahirakahira. Aposetolo Paulo, mauri ena heau helulu lalonai ia kwalimu tauna, ese ita dekenai heau helulu ai ita kwalimu dalana ena heduru herevadia ia henia. Ita ia hamaoroa ‘namona be ita idia hametaua gaudia ibounai ita negea bona iseda vairanai ia noho heau helulu lalonai ita heau mai haheauka ida.’​—Heberu 12:1 duahia.

2. Inai hereva ‘ita idia hametaua gaudia ibounai ita negea,’ ena anina be dahaka?

² Paulo ia gwau ‘ita idia hametaua gaudia ibounai ita negea’ neganai, ena anina be Keristani tauna be gau ta do ia huaia lasi, a? Lasi. To, anina lasi gaudia do ita negea. Unai bamona gaudia ese ita do idia hametaua bona ita hesiku haraga diba. Ita haheauka totona, namona be ita laloparara edena gaudia ese ita idia hametaua bona ita negedia. To danu, ita ura lasi ita huaia maduna haida ita negea. Bema unai ita karaia, do ita hegeregere lasi heau helulu lalonai ita kwalimu totona. (2 Tim. 2:5) Dahaka maduna haida ita huaia be namo?

3. (a) Galatia 6:5 hegeregerena, dahaka maduna haida ita huaia be namo? (b) Inai stadi ai dahaka do ita herevalaia bona dahaka dainai?

³ Galatia 6:5 duahia. Paulo ese do ita huaia maduna ta ia herevalaia. Ia gwau “ta ta ese sibona ena maduna do ia huaia.” Iniseniai, Paulo ia hahedinaraia Dirava vairanai ita ta ta be mai eda maduna, bona ita sibona ese unai maduna do ita huaia. Inai stadi ai, ita “ta ta sibona ena maduna” be dahaka bona ita  huaia dalana do ita herevalaia. Danu, ita idia hametaua anina lasi gaudia be dahaka bona ita negedia dalana do ita dibaia. Sibona iseda maduna ita huaia bona ita idia hametaua anina lasi gaudia ita negea neganai, mauri ena heau helulu dekenai ita kwalimu diba.

4. Dahaka dainai Dirava ita hesiai henia ena gwauhamata be ita ia hametaua lasi? (Laulau itaia danu.)

⁴ Dirava ita hesiai henia ena gwauhamata. Iehova dekenai iseda mauri ita gwauhamatalaia neganai, ita gwau ia do ita tomadiho henia bona iena ura do ita karaia. Unai gwauhamata ita badinaia be namo. Iseda gwauhamata ita badinaia be maduna badana, to ia be ita ia hametaua lasi, badina Iehova ese ita ia havaraia iena ura ita karaia totona. (Apok. 4:11) Ita be iena toana hegeregerena ia karaia dainai, ita ura ia ita dibaia bona tomadiho henia. Unai dainai, ia kahirakahira ita lao bona mai moale ida iena ura ita karaia. (Sal. 40:8) Ma danu, Dirava ena ura ita karaia bona iena Natuna ita badinaia neganai, “goada matamata” do ita davaria.​—Mat. 11:28-30.

5. Dahaka ese oi do ia durua emu gwauhamata oi hagugurua totona? (1 Ioane 5:3)

 ⁵ Edena dala ai emu maduna oi huaia diba? Gau rua ese oi idia durua diba. Ginigunana be emu lalokau Dirava dekenai do oi hagoadaia. Unai oi karaia totona, namona be hari oi totona ia karaia gau namodia bona nega vaira ai oi do ia henia hahenamo oi laloa dobu. Emu lalokau Dirava dekenai ia goada neganai, do ia auka lasi ia oi badinaia totona. (1 Ioane 5:3 duahia.) Iharuana be Iesu do oi tohotohoa. Ia be Dirava ena ura karaia dekenai ia kwalimu badina Iehova ena heduru totona ia guriguri bona iena ahuna ia laloa bada. (Heb. 5:7; 12:2) Iesu bamona Iehova dekenai goada totona oi guriguri bona mauri hanaihanai ena helaro do oi laloa noho. Emu lalokau Dirava dekenai ia goada bona iena Natuna oi tohotohoa neganai, emu gwauhamata oi hagugurua diba.

6. Dahaka dainai iseda famili ena maduna idauidau ita huaia be maoro? (Laulau itaia danu.)

⁶ Famili ena maduna idauidau. Mauri ena heau helulu lalonai, Iehova bona Iesu do ita ura henidia bada, bona iseda varavara do ita ura henia maragi. (Mat. 10:37) Namo lasi ita laloa, Dirava bona Keriso edia ura karaia dalana idia koua dainai, iseda famili ena maduna do ita huaia lasi. To, Dirava bona Keriso ese ita idia abia dae totona, iseda famili ena maduna ita huaia be gau badana. (1 Tim. 5:4, 8) Unai ita karaia neganai, do ita moale. Iehova ia diba famili do idia moale bema tau bona hahine be ta ta idia lalokau henia bona matauraia, tama sina be natudia idia lalokau henia bona hadibaia, bona natudia be edia tama sina idia kamonai henia.​—Efe. 5:33; 6:1, 4.

7. Edena dala ai famili lalonai emu maduna oi hagugurua diba?

⁷ Edena dala ai emu maduna oi huaia diba? Herevana oi be tau, hahine eiava natuna, namona be Baibel ena aonega herevadia oi abidadama henia, to emu hemami o kastom o diba bada taudia edia hereva oi badinaia lasi. (Aon. 24:3, 4) Namona be orea ena pablikeisen idauidau oi duahia, idia ese Baibel ena hakaua herevadia badinaia dalana idia hahedinaraia. Hegeregere, article series “Help for the Family” be headava taudia, tama sina bona matamata taudia totona hari idia davaria hekwakwanai dekenai sisiba namodia ia henia. b Oi hekwarahi Baibel ena hereva oi badinaia totona ena be famili taudia haida be unai idia karaia lasi. Unai oi karaia neganai, emu famili do ia moale bona Iehova ena hahenamo do oi moalelaia.​—1 Pet. 3:1, 2.

8. Edena dala ai ita karaia abia hidi be iseda mauri ia haidaua diba?

⁸ Ita karaia abia hidi dainai idia vara hekwakwanai. Iehova ese ita dekenai ura kwalimu ia henia abia hidi ita karaia totona, bona ia ura abia hidi maorodia ita karaia dainai idia vara gau namodia ita moalelaia. To, abia hidi kereredia ita karaia dainai idia vara hekwakwanai ia koua lasi. (Gal. 6:7, 8) Bema iseda abia hidi kererena, hereva kererena o kara kererena ta dainai hekwakwanai ia vara, namona be ita abia dae unai be iseda maduna. Ita karaia gauna dainai, reana iseda lalomamina ese ita ia kota henia. To bema ita abia dae, ita karaia abia hidi dainai idia vara hekwakwanai be iseda maduna neganai, iseda kara dika do ita gwauraia hedinarai, iseda kerere do ita hamaoromaoroa, bona do ita hekwarahi ita karaia lou lasi totona. Unai ita karaia neganai, mauri ena heau helulu ai do ita heau noho.

9. Dahaka do oi karaia bema abia hidi kererena oi karaia? (Laulau itaia danu.)

 ⁹ Edena dala ai emu maduna oi huaia diba? Bema oi karaia abia hidi kererena oi hanamoa diba lasi, dahaka do oi karaia? Namona be oi laloparara ia vara gauna oi haidaua diba lasi. Namo lasi emu nega bona goada bada oi haorea badina oi ura ma haida oi hadibaia oi be kerere lasi, eiava emu kerere be ma haida dekenai oi atoa. To, namona be emu kerere oi gwauraia hedinarai bona oi gaukara goada kara maorona oi karaia totona. Bema oi karaia kara dika ta dainai emu lalomamina ia dika, mai manau ida Iehova oi guriguri henia, emu kerere oi gwauraia hedinarai, bona oi noia emu dika ia gwauatao totona. (Sal. 25:11; 51:3, 4) Oi hahisia taudia dekenai sori herevana oi gwauraia, bona bema hegeregere, elda taudia edia heduru oi tahua. (Iam. 5:14, 15) Emu kerere amo gau haida oi dibaia bona oi hekwarahi oi karaia lou lasi totona. Unai bamona oi karaia neganai, do oi abia dae Iehova ese oi dekenai hebogahisi do ia hahedinaraia bona oi do ia durua.​—Sal. 103:8-13.

10. Dahaka dainai iseda ura gaudia idia guguru lasi karana ese ita ia hametaua? (Galatia 6:4)

¹⁰ Ita mamia ita karaia gaudia be hegeregere lasi. Bema ma haida ida sibona ita hahegeregerea, do ita mamia ita karaia gaudia be hegeregere lasi. (Galatia 6:4 duahia.) Bema hanaihanai ma haida ida sibona ita hahegeregerea, idia dekenai do ita mama bona kara helulu. (Gal. 5:26) Bema ita ura haida ese idia karaia bamona ita karaia, to ita hegeregere lasi, sibona ita hadikaia diba. Danu Baibel ia gwau: “Ta ena ura gauna ia guguru lasi neganai, ia lalohisihisi.” (Aon. 13:12) Oibe, bema ita ura henia gauna ita hagugurua lasi do ita lalohisihisi! Unai ese iseda goada do ia haorea bona mauri ena heau helulu dekenai do ita kwalimu lasi.​—Aon. 24:10.

11. Dahaka ese oi do ia durua?

¹¹ Edena dala ai unai metau gauna oi negea diba? Iehova ia ura oi karaia diba gauna oi karaia, bona oi ia doria lasi oi karaia diba lasi gauna oi karaia totona. (2 Kor. 8:12) Laloatao, Iehova ese emu gaukara be ma haida edia gaukara ida ia hahegeregerea lasi. (Mat. 25:20-23) Ia be emu mauri ibounai lalonai oi karaia hesiai gaukara, emu abidadama bona emu haheauka karana ia laloa bada. Namona be mai manau ida oi abia dae emu mauri lagani, helt, bona hekwakwanai haida dainai, guna oi karaia gaudia be hari oi karaia diba lasi. Namona be Barasilai bamona, bema oi buruka eiava oi gorere dainai asainmen ta oi karaia diba lasi, namona be oi gwau oi hegeregere lasi. (2 Sam. 19:35, 36) Mose bamona, heduru oi abia dae bona bema ia hegeregere ma haida dekenai gaukara haida oi haria. (Eso. 18:21, 22) Bema oi manau, oi karaia diba gauna do oi karaia, bona mauri ena heau helulu lalonai do oi hesiku lasi.

12. Haida ese abia hidi kereredia idia karaia be iseda maduna, a? Herevalaia.

¹² Ita laloa haida edia abia hidi kereredia be iseda maduna. Ita ese ma haida totona abia hidi ita karaia diba lasi; eiava edia abia hidi kereredia dainai, idia davaria hekwakwanai amo hanaihanai idia ita gimaia diba lasi. Hegeregere, natuna mero ta eiava kekeni ese abia hidi ia karaia Iehova tomadiho henia karana ia rakatania totona. Unai ese tama sina dekenai lalohisihisi bada ia havaraia diba. To, bema tama sina idia laloa edia kerere dainai, natudia ese unai abia hidi kererena idia karaia, sibona idia hametaua diba. Iehova ia gwau lasi unai metau do idia huaia.​—Roma 14:12.

13. Tama sina be natuna ena abia hidi kererena dainai dahaka ia karaia diba?

 ¹³ Edena dala ai unai metau gauna oi negea diba? Namona be ita laloparara Iehova ese ita ta ta dekenai ura kwalimu ia henia, bona ita ia koua lasi sibona iseda abia hidi ita karaia totona. Hegeregere, ia do ita tomadiho henia eiava lasi. Iehova ia diba oi be goevadae lasi tama sina, bona ia ura oi karaia diba gauna do oi karaia. Emu natuna ese ia karaia abia hidi be iena maduna, oiemu lasi. (Aon. 20:11) To, reana oi karaia kerere haida dainai oi lalohekwarahi. Bema oibe, Iehova dekenai emu hemami oi gwauraia bona oi noia emu dika ia gwauatao totona. Ia diba guna oi karaia karana oi haidaua diba lasi. Ma danu, ia ura lasi emu natuna ese ia karaia kererena dainai ia davaria hekwakwanai oi koua. Laloatao, bema emu natuna ia gaukara goada Iehova dekenai ia giroa lou totona, Iehova be mai moale ida ia do ia abia dae.​—Luka 15:18-20.

14. Dahaka dainai kara dika gunadia ita lalohisihisilaia bada karana ita negea be namo?

¹⁴ Kara dika gunadia lalohisihisilaia bada karana. Ita kara dika neganai, ita lalohisihisi bada. To, Iehova ia ura lasi kara dika gunadia ita lalohisihisilaia noho. Unai be hametaua gauna ta dainai, ita negea be namo. Bema iseda kara dika ita gwauraia hedinarai, ita helalo-kerehai bona ita gaukara goada ita karaia lou lasi totona, ita diba momokani Iehova be iseda dika do ia gwauatao. (Kara 3:19) Unai ita karaia murinai, Iehova ia ura lasi kara dika gunadia dainai do ita lalohisihisi noho. Ia diba hanaihanai ita lalohisihisi neganai, unai ese ita ia hadikaia diba. (Sal. 31:10) Bema ita lalohisihisi bada, mauri ena heau helulu dekenai ita hesiku diba.​—2 Kor. 2:7.

15. Dahaka ese oi ia durua diba kara dika gunadia dainai do oi lalohisihisi lasi totona? (1 Ioane 3:19, 20) (Laulau itaia danu.)

¹⁵ Edena dala ai unai metau gauna oi negea diba? Bema kerere gunadia dainai oi lalohisihisi noho, namona be Dirava ese ‘mai momokani ida taunimanima edia dika ia gwauatao’ karana oi laloa bada. (Sal. 130:4) Iehova be mai momokani ida idia helalo-kerehai taudia edia dika ia gwauatao neganai,  ia gwauhamata: “Lau ese . . . edia kara dika do lau laloatao lou lasi.” (Ier. 31:34) Anina be Iehova ese ia gwauatao kara dikana do ia laloatao lou lasi. Oi karaia kara dika dainai hekwakwanai oi davaria neganai, namo lasi oi laloa Iehova be emu dika ia gwauatao lasi. Bona namo lasi sibona dekenai oi badu badina kongrigeisen lalonai maduna haida oi haboioa. Iehova be emu kara dika ia laloa noho lasi bona oi danu be unai bamona oi karaia be maoro.​—1 Ioane 3:19, 20 duahia.

16. Heau helulu taudia bamona, dahaka ita lalopararalaia be namo?

¹⁶ Mauri ena heau helulu lalonai ita heau neganai, namona be ita heau noho ‘ita kwalimu totona.’ (1 Kor. 9:24) Unai ita karaia totona, namona be ita huaia maduna bona ita negea hametaua gaudia edia idau ita lalopararalaia. Inai atikol ai, ita huaia maduna bona ita negea gaudia edia haheitalai haida ita herevalaia. To ma haida ita herevalaia diba. Iesu ia gwau, “aniani momo, inuinu momo, bona mauri ena lalohekwarahi” ese iseda kudouna idia hametaua diba. (Luka 21:34) Inai bamona siri bona siri ma haida ese oi do idia durua senisi haida oi karaia totona, bona mauri ena heau helulu lalonai do oi heau noho.

17. Dahaka dainai ita abia dae momokani mauri ena heau helulu dekenai do ita kwalimu?

¹⁷ Ita abia dae momokani mauri ena heau helulu dekenai do ita kwalimu, badina Iehova ese ita dekenai goada do ia henia. (Isa. 40:29-31) Unai dainai ita hesiku lasi! Aposetolo Paulo ita tohotohoa, ia gaukara goada ena ahuna ia abia totona. (Fili. 3:13, 14) Tau ta be heau helulu lalonai oi totona do ia heau lasi, to Iehova ena heduru amo do oi kwalimu diba. Iehova ese oi do ia durua emu maduna oi huaia bona oi idia hametaua gaudia oi negea totona. (Sal. 68:19) Iehova be emu badinai ia gini dainai, mai haheauka ida mauri ena heau helulu dekenai do oi heau bona oi kwalimu diba!