1. Dahaka dainai haheauka taudia oi ura henia?

 HAHEAUKA karana idia hahedinaraia taudia ita ura henidia. Mai haheauka ida gau ta idia naria taudia ita matauraidia. Kerere ita karaia bona ta be ita dekenai ia haheauka neganai, unai ita laloa bada. Reana Baibel ena hahediba herevana ta ita dibaia, abia dae bona badinaia totona be auka, to iseda stadi naria tauna be ia haheauka dainai ita moale. To mai anina bada gauna be, Iehova Dirava ita tanikiu henia badina ia be ita dekenai ia haheauka!​—Roma 2:4.

2. Edena bamona negadia ai haheauka karana ita hahedinaraia be auka?

² Ena be ita ura ma haida ese haheauka karana do idia hahedinaraia, to ita sibona ese haheauka karana ita hahedinaraia be auka. Hegeregere, bema gabu ta oi lao totona oi leiti bona motuka ena trafik be lata herea, reana do oi haheauka lasi. Haida ese iseda lalona idia hahisia neganai, ita badu haraga diba. Bona nega haida, Iehova ese ia gwauhamatalaia tanobada matamatana totona ita naria be auka. Oi ura emu haheauka karana oi habadaia, a? Inai atikol ai, ita haheauka ena badina bona dahaka dainai ita haheauka be mai anina bada do ita herevalaia. Danu, do ita itaia dahaka ese ita ia durua haheauka karana ita habadaia totona.

3. Haida ese idia habadua neganai, haheauka tauna be dahaka do ia karaia?

³ Mani haheauka ita hahedinaraia daladia foa ita herevalaia. Ginigunana be haheauka tauna be ia badu haraga lasi. Bema haida ese idia habadua eiava kara dika henia neganai, ia manau bona edia dika davana ia haloua lasi. Inai hereva “badu haraga lasi” be Iehova ese ia gaukaralaia guna. Sibona ena kara ia herevalaia neganai, ia gwau: ‘Iehova be hebogahisi Diravana, ia badu haraga lasi, ena lalokau be bada herea bona nega ibounai ena hereva ia hamomokania.’​—Eso. 34:6.

4. Haheauka tauna be gau ta ia naria neganai, dahaka ia karaia?

⁴ Iharuana be haheauka tauna be mai manau ida gau ta  ia naria diba. Bema gau ta ia naria daudau, do ia badu lasi. (Mat. 18:26, 27) Gau momo dekenai mai manau ida ita naria be namo. Hegeregere, ta ia herevahereva lalonai, namona be mai manau ida ita kamonai bona ena hereva ita utua lasi. (Iobu 36:2) Danu, Baibel stiuden ta ita durua Baibel ena hahediba herevana ta do ia lalopararalaia eiava ena kara ta do ia haidaua neganai, namona be ita haheauka.

5. Haheauka ita hahedinaraia dalana ta be dahaka?

⁵ Ihatoina be haheauka tauna be ia laloa namonamo guna bena kara ta ia karaia. Momokani, nega haida ita karaharaga be namo. To, bema haheauka tauna be mai anina bada gaukarana ta ia ura karaia, do ia haraga lasi ia haorea totona. To, nega bada lalonai do ia karaia gauna ia palanilaia, bena ena gaukara ia karaia namonamo.

6. Haheauka tauna be hahetoho eiava metau ia davaria neganai, dahaka ia karaia?

⁶ Ihahanina be haheauka tauna be hahetoho ia davaria neganai, ia maumau lasi. Momokani, hekwakwanai ta ia vara dainai emu hemami be emu turana namona ta dekenai oi herevalaia be kerere lasi. To, haheauka tauna be ena mauri lalonai idia vara gau namodia do ia laloa bona ia gaukara goada mai moale ida Iehova ia hesiai henia totona. (Kol. 1:11) Ita be Keristani taudia dainai, namona be dala idauidau ai haheauka karana ita hahedinaraia. Dahaka dainai? Mani badina haida ita laloa.   

7. Iamesi 5:7, 8 hegeregerena, dahaka dainai haheauka be mai anina bada? (Laulau itaia danu.)

⁷ Mauri hanaihanai ita abia totona haheauka karana be mai anina bada. Idaunega abidadama taudia bamona, namona be mai haheauka ida ita naria noho Dirava ese ena gwauhamata ia hagugurua totona. (Heb. 6:11, 12) Baibel ese biru tauna ida ita ia hahegeregerea. (Iamesi 5:7, 8 duahia.) Biru tauna be  ia gaukara goada hadoa gaudia ia hadoa bona dairia totona, to do ia tubu negana be ia diba lasi. Unai dainai, biru tauna be mai haheauka ida ia naria, badina ia diba nega korikori ai uma ena anina do ia gogoa. Unai hegeregerena, hesiai gaukara lalonai ita bisi, ena be ita “diba lasi edena dina ai [iseda] Lohiabada do ia mai.” (Mat. 24:42) Mai haheauka ida ita naria noho, bona ita abia dae Iehova be ena nega korikori ai ia gwauhamatalaia gaudia ibounai do ia hagugurua. Bema ita haheauka lasi, do ita hesiku bona metairametaira hereva momokani ita rakatania. Bona, hari inai negai do ita moalelaia gaudia do ita tahua goadagoada. To bema ita haheauka ela bona dokona, mauri do ita abia.​—Mika 7:7; Mat. 24:13.

8. Edena dala ai haheauka karana ese ita ia durua ma haida ita tura henidia namonamo totona? (Kolose 3:12, 13)

⁸ Ma haida ita tura henidia namonamo totona, ita haheauka be gau badana. Haheauka karana ese ita ia durua ma haida idia hereva neganai, ita kamonai namonamo. (Iam. 1:19) Danu, haheauka karana ese maino ia havaraia. Hekwakwanai ta ia vara neganai, haheauka karana ese ita ia gimaia dainai, mai badu ida kara ta ita karaia haraga lasi eiava ta ita hereva dika henia lasi. Do ita badu haraga lasi, bona ta ena dika davana ita haloua lasi, to ‘ta ta ena kara do ita haheaukalaia noho bona mai kudouna ibounai ida do ita gwauatao heheni.’​—Kolose 3:12, 13 duahia.

9. Abia hidi ita karaia neganai, edena dala ai haheauka karana ese ita ia durua? (Aonega Herevadia 21:5)

⁹ Haheauka karana ese ita ia durua abia hidi maorodia ita karaia totona. Namo lasi ita kara haragaharaga, to namona be nega ita atoa tahua gaukara ita karaia bena abia hidi maorodia do ita karaia. (Aonega Herevadia 21:5 duahia.) Hegeregere, bema moni gaukara ta ita tahua, reana ita davaria gaukara ginigunana do ita abia dae, ena be unai gaukara ese iseda tomadiho karana do ia hadikaia. To, bema ita haheauka, nega do ita atoa inai gaudia hegeregere, gaukara gabuna ena daudau, hora hida do ita gaukara bona unai gaukara ese iseda famili bona hetura karana Iehova ida ia haidaua dalana do ita laloa. Ita haheauka neganai, abia hidi maorodia do ita karaia.

10. Edena dala ai Keristani tauna ese haheauka karana ia habadaia bona hagoadaia diba?

¹⁰ Haheauka karana habadaia totona ita guriguri. Haheauka karana be lauma helaga ena huahua ta. (Gal. 5:22, 23) Unai dainai, lauma helaga totona ita guriguri bona Iehova ita noia ita ia durua unai kara ita habadaia totona. Bema hekwakwanai ta ese iseda haheauka karana ia tohoa, namona be lauma helaga totona ita “noinoi noho” bona ita ia durua do ita haheauka. (Luka 11:9, 13) Danu, Iehova ena heduru do ita noia unai amo unai hekwakwanai be ia ese ia itaia dalanai do ita itaia. Ita guriguri murinai, namona be ita gaukara goada dina ta ta ai haheauka karana ita hahedinaraia totona. Bema hanaihanai ita guriguri, bona haheauka karana ita hahedinaraia noho, iseda kudouna ai do ia noho bona do ita manadalaia.

11-12. Edena dala ai Iehova ese haheauka karana ia hahedinaraia?

¹¹ Baibel lalonai idia noho haheitalai ita laloa dobu. Baibel lalonai idia haheauka taudia momo edia sivarai idia noho. Unai sivarai ita lalodia dobu neganai, haheauka ita hahedinaraia daladia do ita diba. Unai ita do herevalaia lasi neganai, mani Iehova, haheauka karana ia hahedinaraia tauna hereadaena, ena haheitalai ita herevalaia guna.

¹² Eden umana ai, Satani ese Iehova ena ladana bona iena Lohia dalana ia gwauraia dika.  Iehova be iena ladana ia hadikaia tauna ia hamasea haraga lasi, to haheauka bona sibona biagua karana ia hahedinaraia, badina ia diba nega maorona ai do ia hamomokania Iena lohia dalana sibona be maoro. Bona Iehova ia naria noho lalonai, Satani ese ena ladana ia hadikaia karana ia haheaukalaia. Danu, Iehova ia haheauka noho dainai, taunimanima momo be mauri hanaihanai idia abia diba. (2 Pet. 3:9, 15) Unai dainai hari, taunimanima milioni momo be ia idia dibaia noho. Iehova ena haheauka karana ena hahenamo idauidau ita laloa neganai, inai tanobada dikana do ia haorea negana be mai haheauka ida do ita naria noho.   

13. Edena dala ai Iesu ese ena Tamana ena haheauka karana ia tohotohoa? (Laulau itaia danu.)

¹³ Iesu be ena Tamana ena haheauka karana ia tohotohoa goevagoeva, bona tanobada ai ia noho neganai unai ia hahedinaraia. Hegeregere nega haida ia auka taravatu hadibaia taudia bona Farisea taudia dekenai haheauka karana ia hahedinaraia totona. (Ioa. 8:25-27) To, iena Tamana bamona, Iesu be ia badu haraga lasi. Idia hereva dika henia neganai, ia badu lasi eiava ia hereva dika henidia lasi. (1 Pet. 2:23) Iesu be hahetoho ia davaria neganai, ia haheauka bona ia maumau lasi. Oibe, unai dainai Baibel ia gwau “ia ese kara dika taudia edia hadikaia herevadia ia haheaukalaia, . . . Namona be ia umui laloa namonamo”! (Heb. 12:2, 3) Unai hegeregerena, ita danu Iehova ena heduru amo hahetoho ita haheaukalaia diba.

14. Aberahamo ena haheauka karana amo dahaka ita dibaia? (Heberu 6:15) (Laulau itaia danu.)

¹⁴ Reana ita haida ita ura tanobada dokona do ia mai negana ita itaia. To hari ita lalohekwarahi badina reana do ita noho daudau lasi unai ita itaia totona. Dahaka ese ita do ia  durua mai haheauka ida ita naria noho totona? Mani Aberahamo ena haheitalai ita laloa. Aberahamo ena mauri lagani be 75 bona natuna ta ia do havaraia lasi neganai, Iehova be ia dekenai ia gwauhamata: “Lau ese emu bese be bese badana ai do lau halaoa.” (Gen. 12:1-4) Aberahamo be unai gwauhamata ibounai ia guguru karana ia itaia lasi. Aberahamo be Euperate Sinavaina ia hanaia bona lagani 25 murinai, Isako ia vara ia itaia bena lagani 60 murinai iena tubudia memero Esau bona Iakobo idia vara ia itaia. (Heberu 6:15 duahia.) To, ena natudia be bese badana ai idia lao bona Gwauhamata Tanona idia abia be ia itaia lasi. To, unai abidadama tauna be iena Havaraia tauna ia tura henia namonamo. (Iam. 2:23) Bona Aberahamo ia toreisi lou neganai, do ia moale bada badina do ia itaia iena abidadama bona haheauka karana dainai, tanobada besedia ibounai be hahenamo idia davaria! (Gen. 22:18) Ita dibaia gauna be dahaka? Reana, ita be Iehova ena gwauhamata herevadia ibounai idia guguru do ita itaia lasi. To, bema Aberahamo bamona ita haheauka, ita abia dae momokani Iehova ese hari bona ia gwauhamatalaia tanobada matamatana ai ita do ia hanamoa.​—Mar. 10:29, 30.

15. Sibona iseda stadi lalonai dahaka ita laloa be namo?

¹⁵ Baibel lalonai haheauka taudia momo edia sivarai idia noho. (Iam. 5:10) Reana edia sivarai oi stadilaia diba. b Hegeregere, ena be Davida be mero matamata neganai Dirava ese ia horoa Israela besena ena king ai do ia lao, to lagani momo ia naria bena king dagina ia abia. Simeona bona Ana be mai abidadama ida Iehova  idia tomadiho henia bona gwauhamata Mesiana ena mai negana idia naria. (Luka 2:25, 36-38) Edia sivarai oi stadilaia neganai, mani inai henanadai edia haere oi tahua: Dahaka ese unai tauna ia durua ia haheauka totona? Ia haheauka dainai dahaka hahenamo ia abia? Edena dala ai ia lau tohotohoa diba? Haheauka idia hahedinaraia lasi taudia edia sivarai amo gau haida do oi dibaia danu. (1 Sam. 13:8-14) Reana sibona oi nanadaia: ‘Dahaka dainai idia haheauka lasi? Bona unai dainai dahaka ia vara?’

16. Haheauka karana ena namo haida be dahaka?

¹⁶ Haheauka karana ena namo haida ita laloa. Haheauka ita hahedinaraia neganai maino ai ita noho bona ita moale. Oibe, haheauka karana ese iseda lalohadai bona tauanina ia hanamoa diba. Ma haida dekenai haheauka karana ita hahedinaraia neganai, eda tura namodia ai do idia lao bona ita moale. Kongrigeisen lalonai mai lalotamona ida do ita noho. Ta ese iseda lalona ia hahisia neganai, iseda badu haraga lasi karana ese hekwakwanai do ia habadaia lasi. (Sal. 37:8; Aon. 14:29) To hahenamo badana be, ita haheauka neganai, iseda guba Tamana ita tohotohoa bona ia kahirakahira ita lao.

17. Namona be iseda lalona ita hadaia dahaka do ita karaia?

¹⁷ Haheauka karana be ita ibounai dekenai namo ia havaraia kara hereadaena! Ena be haheauka karana ita hahedinaraia be auka, to Iehova ena heduru amo unai kara ita habadaia diba. Bona tanobada matamatana ita naria noho lalonai, ita diba momokani “Iehova be ia dekenai idia gari taudia ia itaia noho. Bona iena lalokau dekenai idia naria noho taudia ia itaia danu.” (Sal. 33:18) Namona be ita ibounai ese iseda lalona ita hadaia haheauka karana ita hahedinaraia noho.