STADI ATIKOL 33
ANE 130 Dika Ita Gwauatao
Iehova Ia Ura Kongrigeisen ese Kara Dika Tauna Idia Kara Henia Dalana
“Bema ta ese kara dika ta ia karaia, ita be mai iseda durua tauna.”—1 IOA. 2:1.
STADI ENA BADINA
Korinto kongrigeisen lalonai kara dika badana ia karaia tadikaka ta idia kara henia dalana amo gau haida do ita dibaia.
1. Iehova ia ura taunimanima ibounai be dahaka do idia karaia?
IEHOVA ese taunimanima ia karaia neganai, idia dekenai ura kwalimu ia henia. Oi ese dina ta ta ai unai harihari gauna oi gaukaralaia, abia hidi oi karaia totona. Tau ta ese do ia karaia mai anina bada abia hidi ta be, Iehova dekenai ena mauri do ia gwauhamatalaia bona Iehova ena ruma bese lalonai ia vareai. Iehova ia ura taunimanima ibounai be unai bamona idia karaia. Dahaka dainai? Badina taunimanima ia lalokau henia bona ia ura namo idia davaria. Ia ura edia hetura karana ia ida idia moalelaia bona idia mauri hanaihanai.—Deu. 30:19, 20; Gal. 6:7, 8.
2. Helalo-kerehai lasi taudia dekenai Iehova ena lalohadai be dahaka? (1 Ioa. 2:1)
2 To, Iehova be taunimanima ia doria lasi Ia idia tomadiho henia totona. Taunimanima ta ta dekenai maoro ia henia sibona edia abia hidi idia karaia totona. To edena bamona bema, ia bapatiso Keristani tauna ta be Dirava ena taravatu ia utua, bona kara dika badana ta ia karaia? Bema ia helalo-kerehai lasi, namona be kongrigeisen amo idia kokia. (1 Kor. 5:13) To danu, Iehova ia ura bada unai kerere tauna be ia dekenai do ia giroa lou. Oibe, mauri davalaia boubouna ia henia ena badina badana be ia ura idia helalo-kerehai taudia edia dika ia gwauatao. (1 Ioane 2:1 duahia.) Iseda lalokau Diravana Iehova ese kara dika taudia ia noia idia helalo-kerehai totona.—Sek. 1:3; Roma 2:4; Iam. 4:8.
3. Inai atikol ai dahaka do ita stadilaia?
3 Iehova ese kara dika bona kara dika idia karaia taudia ia laloa dalana be ita ia hadibaia. Ia ura ita ese iena lalohadai do ita badinaia. Inai atikol oi duahia neganai, inai gaudia oi tahua (1) Korinto ai, Keristani ginigunadia edia kongrigeisen ta ese kara dika badana ia karaia tauna idia kara henia dalana, (2) kara dika badana ia karaia tauna ia helalo-kerehai neganai, aposetolo Paulo be dahaka sisiba ia henia, bona (3) unai Baibel sivarai ese ia hahedinaraia, Iehova be kara dika badana ta ia karaia Keristani tauna dekenai dahaka ia laloa.
IDAUNEGAI KARA DIKA BADANA IA KARAIA TAUNA DEKENAI DAHAKA IDIA KARAIA?
4. Korinto kongrigeisen dekenai dahaka ia vara? (1 Korinto 5:1, 2)
4 Korinto Ginigunana 5:1, 2 duahia. Paulo ena misinari loaloa ihatoina ai, Korinto kongrigeisen matamatana amo sivarai dikana ta ia kamonai. Tadikaka ta be iena tamana ena adavana ida ia heudahanai. Unai bamona matabodaga karana be “Dirava diba lasi taudia huanai danu ia vara lasi”! Kongrigeisen taudia idia laloa unai tadikaka be kongrigeisen lalonai ia noho be kerere lasi. Reana haida idia laloa unai be namo, badina unai amo Iehova ena hebogahisi karana idia tohotohoa. To, Iehova ese iena taunimanima huanai unai bamona kara dika ia abia dae lasi. Mai hemarai lasi ida unai kara dika ia karaia tauna be kongrigeisen ena ladana namona ia hadikaia noho. Bona ia idia bamoa Keristani taudia ma haida edia kara namona ia hadikaia diba. Unai dainai Paulo ese kongrigeisen dekenai dahaka sisiba ia henia?
5. Paulo ese kongrigeisen taudia ia sisiba henia dahaka do idia karaia, bona ena anina be dahaka? (1 Korinto 5:13) (Laulau itaia danu.)
5 Korinto Ginigunana 5:13 duahia. Lauma helaga ena siahu amo, Paulo ese revareva ta ia torea bona ia hadibaia, ia helalo-kerehai lasi tauna be kongrigeisen amo do idia kokia. Abidadama Keristani taudia ese ia helalo-kerehai lasi tauna be edena bamona do idia kara henia? Paulo ese idia ia hamaoroa “ia do umui bamoa lasi.” Unai ena anina be dahaka? Paulo ia gwau, “ia ida do umui aniani lasi danu.” (1 Kor. 5:11) Ta ida ita helai bona aniani hebou neganai, ia ida ita herevahereva bona bamoa momo diba. Vadaeni, ia hedinarai goevagoeva, Paulo ena hereva anina be kongrigeisen taudia ese unai tauna ida moale karadia do idia karaia lasi. Unai amo kongrigeisen taudia do idia gimaia. (1 Kor. 5:5-7) Ma danu, haida ese idia bamoa lasi dainai, kara dika tauna do ia laloparara iena kara ese Iehova ena lalona ia hahisia bona ia hemarai dainai do ia helalo-kerehai.
Lauma helaga ena siahu amo, Paulo ese revareva ta ia torea bona ia hadibaia, ia helalo-kerehai lasi tauna be kongrigeisen amo do idia kokia (Paragraf 5 itaia)
6. Paulo ese revareva ia siaia murinai, kongrigeisen bona kara dika tauna be dahaka idia karaia?
6 Paulo ese Korinto Keristani taudia dekenai revareva ia siaia murinai, ia laloa iena hereva do idia badinaia eiava lasi. Gabeai, Tito ese Paulo ia hamoalea sivaraina ia gwauraia. Kongrigeisen taudia ese Paulo ena sisiba idia badinaia bona kongrigeisen amo kara dika tauna idia kokia. (2 Kor. 7:6, 7) Hua haida murinai unai kara dika tauna ia helalo-kerehai! Iena kara bona laloa dalana ia haidaua bona Iehova ena hahemaoro maoromaoro taravatudia ia badinaia matamaia. (2 Kor. 7:8-11) Unai dainai hari Paulo ese kongrigeisen dekenai dahaka hakaua hereva do ia henia?
KONGRIGEISEN ESE HELALO-KEREHAI TAUNA DO IDIA KARA HENIA DALANA
7. Kara dika tauna be kongrigeisen amo idia kokia karana ese dahaka namo ia havaraia? (2 Korinto 2:5-8)
7 Korinto Iharuana 2:5-8 duahia. Paulo ia gwau: “Unai bamona tauna dekenai umui henia matahakani be hegeregere.” Anina be idia henia matahakani ese namo ia havaraia. Badina kara dika tauna be ena kara dika amo ia helalo-kerehai.—Heb. 12:11.
8. Paulo ese kongrigeisen elda taudia ia hamaoroa dahaka do idia karaia?
8 Paulo ese kongrigeisen elda taudia ia hamaoroa: Ia kara dika tadikaka be “mai hebogahisi ida . . . umui gwauatao bona umui hagoadaia,” bona “umui lalokau henia.” Ita itaia Paulo ia ura unai tauna be Iehova ena taunimanima huanai do idia abia vareai sibona lasi, to ia dekenai lalokau do idia hahedinaraia. Paulo ia ura kongrigeisen taudia be edia hereva bona kara amo idia hahedinaraia, helalo-kerehai tauna ena dika idia gwauatao bona idia lalokau henia. Unai amo ia mamia kongrigeisen be ia dekenai idia moale.
9. Ia helalo-kerehai tauna idia abia vareai lou neganai, dahaka dainai haida idia moale lasi?
9 Haida be kongrigeisen lalonai idia abia vareai lou tauna dekenai idia moale lasi, a? Baibel be unai ia sivarailaia lasi, to reana unai ia vara. Badina ena kara ese kongrigeisen ena ladana ia hadikaia bona reana tadikaka taihu haida idia lalohisihisi noho. Kongrigeisen tadikaka taihu haida idia laloa idia hekwarahi noho Iehova ena taravatu idia badinaia totona, unai dainai matabodaga tauna be kongrigeisen lalonai idia abia vareai lou be maoro lasi. (Luka 15:28-30 hahegeregerea.) To, dahaka dainai kongrigeisen ese ia giroa lou tadikaka dekenai lalokau korikorina idia hahedinaraia be mai anina bada?
10-11. Dahaka do ia vara bema elda taudia idia ura lasi helalo-kerehai tauna idia abia dae?
10 Mani oi laloa, bema elda taudia idia ura lasi helalo-kerehai tauna idia abia vareai lou, dahaka do ia vara? Eiava bema ta idia abia vareai lou, to kongrigeisen taudia ese ia dekenai lalokau idia hahedinaraia lasi, dahaka do ia vara? Unai tauna be do ia “lalohisihisi” bada. Do ia mamia ia be hegeregere lasi Iehova ia hesiai henia lou totona. Bona reana do ia laloa Iehova ida ena hetura karana ia hanamoa lou diba lasi.
11 Ma danu, bema kongrigeisen tadikaka taihu idia ura lasi helalo-kerehai tauna idia abia dae, idia sibodia edia hetura karana Iehova ida idia hadikaia diba. Dahaka dainai? Badina idia be Iehova ena dika gwauatao karana idia hahedinaraia lasi, to Satani ena kara auka bona hebogahisi lasi karana idia hahedinaraia. Oibe, idia be Satani ena tulu ai do idia lao, bona idia do ia gaukaralaia unai tauna ena hetura karana Iehova ida idia hadikaia totona.—2 Kor. 2:10, 11; Efe. 4:27.
12. Edena dala ai Korinto kongrigeisen taudia ese Iehova idia tohotohoa diba?
12 Vadaeni, edena dala ai Korinto kongrigeisen taudia ese Iehova idia tohotohoa diba, to Satani lasi? Iehova ese helalo-kerehai tauna ia kara henia dalana do idia badinaia. Baibel torea taudia haida ese Iehova idia herevalaia dalana mani ita itaia. Davida ia gwau, Dirava “be namo bona [ia] noho hegaegae dika gwauatao totona.” (Sal. 86:5) Mika ia gwau: “Edena Dirava be oi bamona, . . . kerere ia gwauatao bona edia dika ia laloaboio?” (Mika 7:18) Bona Isaia ia gwau: “Namona be kara dika tauna be ena dala kererena ia rakatania bona ena lalohadai ia haidaua. Namona be Iehova dekenai ia giroa lou, badina ia dekenai do ia hebogahisi. Iseda Dirava ese kara dika do ia gwauatao momokani.”—Isa. 55:7.
13. Dahaka dainai kongrigeisen lalonai helalo-kerehai tauna idia abia vareai lou be maoro? (Maua itaia “ Edena Negai Korinto Tauna Idia Abia Vareai Lou?”)
13 Korinto kongrigeisen ese Iehova idia tohotohoa totona, ia helalo-kerehai tauna do idia welkam henia bona lalokau henia be namo. Paulo ena sisiba idia badinaia dainai helalo-kerehai tauna idia welkam henia, bona idia ese “gau ibounai lalonai kamonai karana” idia hahedinaraia. (2 Kor. 2:9) Momokani, ia be hua haida sibona lalonai idia kokia, to unai matahakani ese ia durua bona ia helalo-kerehai. Unai dainai, kongrigeisen lalonai idia abia vareai lou haraga be namo.
IEHOVA ENA HAHEMAORO BONA HEBOGAHISI KARANA TOHOTOHOA
14-15. Korinto ai ia vara gauna idia hamaoromaoroa dalana ena sivarai amo dahaka ita dibaia? (2 Petero 3:9) (Laulau itaia danu.)
14 Korinto ai ia vara gauna idia hamaoromaoroa dalana ena sivarai be Baibel lalonai “ita hadibaia totona idia torea.” (Roma 15:4) Unai sivarai ese ita ia hadibaia, Iehova be ena taunimanima huanai kara dika idia karaia bona idia helalo-kerehai lasi taudia ia abia dae lasi. Haida idia laloa Iehova be hebogahisi Diravana dainai, kongrigeisen lalonai idia noho helalo-kerehai lasi taudia do ia abia dae, to Iehova be unai dala ai ena hebogahisi ia hahedinaraia lasi. Iehova be hebogahisi Diravana, to ia ese kara haida ia abia dae lasi; iena kara maoromaoro taravatudia be idia idau lasi. (Iuda 4) Unai dainai bema Iehova ese ia helalo-kerehai lasi tauna ia kokia, unai be hebogahisi karana, badina kongrigeisen taudia ibounai do ia gimaia.—Aon. 13:20; 1 Kor. 15:33.
15 To, ita dibaia gauna be Iehova ia ura lasi ta ia mase. Bema hegeregere, ia ura taunimanima ia hamauria. Edia laloa dalana bona kara idia haidaua bona edia hetura karana ia ida idia hanamoa taudia dekenai hebogahisi ia hahedinaraia. (Ese. 33:11; 2 Petero 3:9 duahia.) Unai dainai, Korinto ai unai kara dika tauna ia helalo-kerehai bona ena kara dika ia rakatania neganai, Iehova ese Paulo ia gaukaralaia kongrigeisen taudia ia hamaoroa unai tauna ena dika do idia gwauatao bona idia abia dae lou be namo.
Kongrigeisen taudia ese Iehova ena lalokau bona hebogahisi karana idia tohotohoa neganai, mai moale ida idia vareai lou taudia idia welkam henia (Paragraf 14-15 itaia)
16. Korinto ai ia vara gauna idia hamaoromaoroa karana dekenai emu hemami be dahaka?
16 Korinto ai ia vara gauna ena sivarai ita riviulaia karana amo Iehova ena lalokau, kara maoromaoro bona hahemaoro maoromaoro karana ita itaia. (Sal. 33:5) Iehova ena kara namodia ita dibaia dainai, ita ura ia ita hanamoa! Iena hebogahisi karana ita laloa bada, badina ita ibounai be goevadae lasi taudia bona ita ura iseda dika do ia gwauatao. Iehova ita tanikiu henia mauri davalaia boubouna dainai, badina unai dala amo iseda dika ia gwauatao diba. Unai ese ita ia hagoadaia bada, badina ita diba momokani, Iehova be iena taunimanima ia lalokau henidia bona ia ura namo idia davaria!
17. Atikol gabedia ai dahaka do ita herevalaia?
17 Hari iseda nega ai, ta be kara dika badana ia karaia neganai, edena dala ai elda taudia ese Iehova ena lalokau idia tohotohoa diba bona idia durua ia helalo-kerehai totona? Elda taudia ese kara dika tauna be kongrigeisen amo idia kokia o idia abia vareai lou neganai, kongrigeisen taudia ese edena bamona idia kara henia be namo? Unai henanadai be atikol gabedia ai do ita herevalaia.
ANE 109 Kudouna amo Lalokau Ita Hahedinaraia
