Aposetolo Paulo be Tesalonika ai idia noho Keristani taudia ia tore henia, ia gwau: “Bema ta be inai revareva lalonai ai torea herevana ia badinaia lasi, namona be unai tauna umui makaia.” (2 Tes. 3:14) Guna, ita gwau unai hakaua herevana be elda taudia totona. Bema ta be sisiba ia abia loulou, to Baibel ena hakaua herevadia ia dadaraia, elda taudia be kongrigeisen durua totona tok ta do idia henia. Unai murinai, pablisa ta ta be idia makaia tauna ida moale karadia do idia karaia lasi.

To, diba matamata ita abia. Hari ita laloparara Paulo ena sisiba be gau haida dekenai kongrigeisen taudia ta ta ese do idia karaia abia hidi ia herevalaia. Unai dainai elda taudia ese tok ta do idia henia lasi. Dahaka dainai unai senisi idia karaia? Paulo ena sisiba mani ita laloa.

Paulo ia itaia kongrigeisen taudia haida be “dala kererena ai idia raka” noho. Idia be Dirava ena sisiba idia dadaraia. Paulo ena vadivadi gunana ai, ia hahedinaraia bema ta ia gaukara lasi, do ia aniani lasi. Haida be unai sisiba idia badinaia lasi, badina idia be sibona idia durua totona gaukara haida idia karaia diba, to idia ura lasi idia gaukara. Danu, idia be haida edia mauri ai idia vara gaudia lalonai idia vareai kava. Keristani taudia ese dala kererena ai idia raka taudia be edena bamona do idia kara henia?—2 Tes. 3:6, 10-12.

Paulo ia gwau: “Namona be unai tauna umui makaia.” Grik herevana ese ia hahedinaraia, unai tauna oi diba bona ena kara oi laloa namonamo. Paulo ese unai sisiba be kongrigeisen taudia ibounai dekenai ia henia, elda taudia sibona lasi. (2 Tes. 1:1; 3:6) Unai dainai bema kongrigeisen tauna ta ese ia itaia Keristani tauna ta be Dirava ena taravatu ia badinaia lasi, ia sibona ese abia hidi do ia karaia unai tauna ia “bamoa lasi” totona.

Unai ena anina be unai tauna be kongrigeisen amo idia kokia tauna bamona do idia kara henia, a? Lasi, badina Paulo ma ia gwau: “Emui tadikaka bamona do umui sisiba henia noho.” Unai dainai Keristani taudia be hebou bona haroro gaukara ai unai tadikaka idia bamoa diba, to moale karadia lalonai idia sibona ese abia hidi do idia karaia ia idia bamoa lasi totona. Dahaka dainai? Paulo ia gwau: “Unai amo do ia hemarai.” Unai makaia karana dainai, dala kererena ai ia raka Keristani tauna be ena kara dainai do ia hemarai bona ena kara do ia haidaua.—2 Tes. 3:14, 15.

Hari, edena dala ai Keristani taudia ese unai sisiba idia badinaia diba? Ginigunana be, Paulo ena hereva bamona, namona be ita hamomokania unai tauna be ena kara amo ia hahedinaraia ia be ‘dala kererena ai ia raka’ noho. Paulo be edia lalomamina bona idia abia hidi gaudia be iseda amo ia idau taudia ia herevalaia lasi. Bona iseda hemami idia hahisia taudia ia herevalaia lasi. To, Paulo ese ia herevalaia taudia be mai ura ida Dirava ese ia henia sisiba idia badinaia lasi.

Hari, bema ita itaia Keristani tauna ta be Dirava ena sisiba ia badinaia lasi, a ita sibona ese abia hidi do ita karaia moale negadia ai ia ita bamoa lasi totona. Unai be sibona iseda abia hidi dainai, namona be iseda ruma bese taudia sibona be unai idia diba, to ma haida ita hamaoroa lasi. To iseda hebou bona haroro gaukara lalonai ia ita bamoa diba. Iena kara ia hamaoromaoroa neganai, moale karadia bona nega ma haida ai ia ita bamoa diba.