1-3. (a) Ita abia dae hahediba hereva badana ta be dahaka? (b) Dahaka dainai toreisi lou helarona be mai anina bada? (Laulau ginigunana herevalaia.)

BEMA ta ese oi ia nanadaia, ‘Edena hahediba herevadia oi abia dae?’ dahaka do oi gwau? Momokani, do oi gwau oi abia dae Iehova be Havaraia Tauna bona Mauri Henia Tauna. Danu, Iesu Keriso oi abidadama henia, badina ia be mauri davalaia boubouna bamona ia mase. Bona oi abia dae, vaira nega ai tanobada be paradaiso ai do ia lao, bona unuseniai Dirava ena taunimanima be do idia noho hanaihanai. To toreisi lou helarona do oi gwauraia danu, a?

² Badina maorodia dainai, ita gwau diba ita abia dae hahediba herevana ta be toreisi lou helarona, herevana ita ura hisihisi badana amo ita roho mauri bona tanobada ai ita noho hanaihanai. Aposetolo Paulo ese ia hahedinaraia toreisi lou helarona be mai anina bada, ia gwau: “Momokani, bema mase taudia be do idia toreisi lou lasi, vadaeni Keriso danu be ia toreisi lou lasi.” Bema Keriso be ia toreisi lou lasi, ia be iseda King bamona do ia lohia lasi, bona Keriso ena lohia ita harorolaia be anina lasi. (1 Korinto 15:12-19 duahia.) To ita diba Iesu be ia toreisi lou. Unai dainai, ita be Sadukea taudia bamona lasi, idia be toreisi lou idia abia dae  lasi. Ena be ita idia kirikirilaia, to toreisi lou helarona do ita abia dae momokani.​—⁠Mar. 12:18; Kara 4:2, 3; 17:32; 23:6-8.

³ Paulo ese “Keriso ena hahediba hereva ginigunadia” ia herevalaia neganai, ia ese “inai hadibaia herevadia hegeregere, . . . mase taudia idia toreisi lou” karana ia herevalaia danu. (Heb. 6:1, 2) Bona ia hahedinaraia ia be toreisi lou ia abidadama henia. (Kara 24:10, 15, 24, 25) Ena be toreisi lou karana be hahediba hereva badana, bona “Dirava ena hereva amo” ia be “hahediba hereva ginigunadia” ta, to namo lasi ita laloa unai sibona ita diba be hegeregere. (Heb. 5:12) Dahaka dainai?

4. Toreisi lou dainai dahaka henanadai idia vara?

⁴ Taunimanima be Baibel idia stadilaia matamaia neganai, momo be guna idia vara toreisi lou edia sivarai idia duahia, hegeregere Lasaro ena sivarai. Bona edia stadi amo idia diba Aberahamo, Iobu, bona Daniela be idia abia dae momokani vaira nega ai mase taudia be do idia mauri lou. To dahaka do oi gwau, bema ta ia ura diba idaunegai idia gwauhamatalaia toreisi louna be do ia vara momokani? Bona bema Baibel ese ia hahedinaraia edena nega ai toreisi lou do ia vara? Unai henanadai edia haere ese iseda abidadama do idia hagoadaia.

5. Dahaka do ita herevalaia guna?

⁵ Bema ta ia mase bona unai nega ai ia toreisi lou, unai ita lalopararalaia diba. (Ioa. 11:11; Kara 20:9, 10) To bema mase taudia be lagani handred momo murinai do idia toreisi lou be edena bamona? Unai gwauhamata do oi abia dae, herevana ia be hari ia mase tauna eiava nega daudau ia mase tauna totona? Momokani, lagani handred gunanai, Dirava ia gwauhamata toreisi lou be do ia vara, bona unai oi abia dae. Dahaka dainai? Bona unai ena anina vaira nega ai do ia vara toreisi louna dekenai be dahaka?

6. Iesu ese edena dala ai Salamo 118 ena hereva ia hagugurua?

⁶ Lagani momo gunanai idia perovetalaia toreisi louna mani ita laloa. Salamo 118 be reana Davida ese ia torea, unai karoa lalonai inai hereva ia noho: “Lohiabada e, oi dekenai ai noinoi noho, mani ai do oi hamauria. . . . Dirava ese, Lohiabada ena ladana dainai ia mai noho tauna, be do ia hanamoa.” Reana do oi laloatao, Nisan 9 ai, Iesu be doniki amo Ierusalema hanuana ia vareai neganai, taunimanima ese Mesia totona idia perovetalaia herevana idia boiboilaia. (Sal. 118:25, 26; Mat. 21:7-9) To edena dala ai Salamo 118 ese lagani momo murinai do ia vara toreisi louna ia perovetalaia? Salamo torea tauna ese ia gwauraia herevana ma ta mani ita laloa, ia gwau: “Inai nadi, ruma haginia taudia ese idia ura henia lasi, to hari ia be ruma ena kona nadi badana momokani ia gini noho.”​—⁠Sal. 118:22.

7. Iuda taudia ese Iesu dekenai dahaka idia karaia?

⁷ “Ruma haginia taudia,” Iuda gunalaia taudia unai, ese Mesia idia dadaraia. Oibe, idia ese Iesu idia dadaraia bona idia abia dae lasi ia be Keriso. To unai sibona lasi, Iuda taudia momo ese ia idia dadaraia bona Pilato idia noia ia idia hamasea totona. (Luka 23:18-23) Oibe, idia ese Iesu hamasea karana idia durua.

8. Edena dala ai Iesu be “kona nadi badana” ai ia lao?

⁸ Bema Iesu idia dadaraia bona hamasea, edena dala ai ia be “kona nadi badana” ai ia lao? Unai do ia vara bema Iesu ia toreisi lou. Unai hahedinaraia totona, Iesu ese parabole ta ia gwauraia. Unai parabole lalonai biru taudia be vain umana ena biaguna ese ia siaia taudia idia hahisia dalana ia gwauraia, Israela taudia be Dirava ese ia siaia peroveta  taudia idia hahisia hegeregerena. Dokonai, uma biaguna ese ena lalokau natuna ia siaia. Iena natuna idia abia dae, a? Lasi. Biru taudia ese ia idia hamasea. Unai parabole ia gwauraia murinai, ia ese Salamo 118:22 ai ia noho peroveta herevana ia gwauraia. (Luka 20:9-17) Aposetolo Petero be Ierusalema ai idia haboua “lohia taudia, tau badadia, bona taravatu hadibaia taudia” ia hereva henia neganai, unai siri ena hereva ia gwauraia danu. Ia ese “Nasareta tauna Iesu Keriso, au dekenai [idia] kokoa kau to Dirava ese mase amo ia hatorea isi lou tauna” ia herevalaia. Bena ia gwau: “Inai nadi be umui ruma haginia taudia ese umui dadaraia, to ia be kona nadi badana ai ia lao.”​—⁠Kara 3:15; 4:5-11; 1 Pet. 2:5-7.

9. Salamo 118:22 ese dahaka ia perovetalaia?

⁹ Oibe, lagani handred momo gunanai, Salamo 118:22 ai ia noho peroveta herevana ese ia hahedinaraia toreisi lou be do ia vara. Mesia be do idia dadaraia bona do ia mase, to ia be do ia mauri lou bona kona nadi badana ai do ia lao. Iesu ia toreisi lou neganai, “Dirava ese taunimanima huanai ladana ma ta ia abia hidi lasi, ita ia hamauria totona,” to ia sibona.​—Kara 4:12; Efe. 1:20.

10. (a) Salamo 16:10 be dahaka ia perovetalaia? (b) Dahaka dainai ita abia dae Salamo 16:10 be Davida dekenai ia guguru lasi?

¹⁰ Toreisi lou karana ia herevalaia siri ma ta mani ita laloa. Unai siri be lagani tausen mai kahana gunanai idia torea. Unai amo do oi abia dae momokani toreisi lou ia vara diba, herevana idaunegai idia perovetalaia o gwauhamatalaia. Salamo 16 ai, Davida ia gwau: “Oi Lohiabada ese, lau oi rakatania lasi. Mase taudia edia gabu dekena amo, oi ese lau oi gimaia noho. Bona oi ese oiemu Helaga Tauna do oi naria, ia ese mase ena bodaga do ia davaria lasi.” (Sal. 16:10) Davida ia gwau lasi ia be do ia mase lasi o mase taudia edia gabu ai do ia noho lasi. Baibel ese ia hahedinaraia goevagoeva, Davida be ia buruka danu. Ia mase murinai, ia be “Davida ena Hanua dekenai idia guria.” (1 Kin. 2:1, 10) Vadaeni, Salamo 16:10 ena hereva ena anina be dahaka?

11. Edena negai Petero ese Salamo 16:10 ia herevalaia?

¹¹ Davida ese unai salamo ia torea bena lagani tausen haida idia hanaia bona Iesu ia mase bona ia toreisi lou murinai, Petero ese Iuda taudia bona Keristani tomadiho idia abia taudia tausen momo dekenai Salamo 16:10 ena anina ia hahedinaraia. (Kara 2:29-32 duahia.) Ia gwau Davida be ia mase bona idia guria. Iena hereva idia kamonai taudia be unai idia diba. Ma ia gwau Davida be do ia mai Mesiana “ena toreisi lou be guna ia diba bona unai ia herevalaia,” bona momo be ena hereva dekenai idia lalotamona.

12. Salamo 16:10 be edena bamona ia guguru, bona toreisi lou karana dekenai dahaka ia hamomokania?

¹² Iena hereva durua totona, Petero ese Davida ena hereva Salamo 110:1 ai ia gwauraia. (Kara 2:33-36 duahia.) Petero ese Toretore Helagadia ia gaukaralaia dainai, hutuma idia abia dae Iesu be “Lohiabada bona Keriso.” Danu, taunimanima idia laloparara Iesu be mase amo ia toreisi lou neganai, Salamo 16:10 ia guguru. Gabeai Pisidia ena hanua, Antioka, ai aposetolo Paulo ese Iuda taudia ia hereva henia neganai, unai siri ia gaukaralaia danu. Momo be iena hereva dainai idia moale, bona idia ura hereva ma haida idia kamonai. (Kara 13:32-37, 42 duahia.) Namona be ita abia dae danu Baibel ese ia perovetalaia toreisi louna be do ia vara momokani, herevana lagani handred momo gunanai idia perovetalaia.

13. Toreisi lou dainai dahaka henanadai idia vara?

¹³ Ita moale badina lagani handred momo  gunanai idia perovetalaia toreisi louna be do ia vara momokani. To reana ta do ia henanadai: ‘Unai ena anina be nega daudau do lau naria egu lalokau mase tauna lau itaia totona, a? Edena nega ai toreisi lou do ia vara?’ Iesu ese ena aposetolo taudia ia hamaoroa idia be gau haida idia diba lasi. Hegeregere, “Tamana ese ena siahu henunai ia atoa nega eiava ia abia hidi dinadia.” (Kara 1:6, 7; Ioa. 16:12) To, ita moale badina hamomokania gaudia haida amo ita be toreisi lou do ia vara negana ita diba.

14. Iesu bona guna idia mase taudia edia toreisi lou be edena bamona ia idau?

¹⁴ Baibel ese ia sivarailaia toreisi lou hereadaena be Iesu ena toreisi lou. Bema ia be ia toreisi lou lasi, iseda lalokau mase taudia do ita itaia lou lasi. Iesu ia do toreisi lou lasi negana ai idia toreisi lou taudia, hegeregere Elia bona Elisaia ese idia hatorea isi lou taudia, be idia noho hanaihanai lasi. To, idia mase lou bona edia tauanina be guria gabuna ai ia bodaga. Oibe, Iesu be “mase amo ia toreisi lou vadaeni bona ia be do ia mase lou lasi bona mase ese do ia biagua lasi.” Guba ai, ia be ia “mauri noho ela bona hanaihanai,” bona ena tauanina be guria gabuna ai ia bodaga lasi.​—⁠Roma 6:9; Apok. 1:5, 18; Kol. 1:18; 1 Pet. 3:18.

15. Dahaka dainai Iesu be mase amo ia toreisi lou “tauna ginigunana”?

¹⁵ Iesu be mase amo ia toreisi lou bona guba dekenai ia daekau tauna ginigunana, unai dainai ena toreisi lou karana be mai anina bada. (Kara 26:23) To, ia sibona be ia toreisi lou bona guba dekenai ia daekau lasi. Iesu ia gwauhamata ena abidadama aposetolo taudia be ia ida guba dekenai do idia lohia. (Luka 22:28-30) Unai ahuna idia abia totona, idia be do idia mase guna. Unai murinai, Iesu hegeregerena, lauma tauanina ai do idia toreisi lou. Paulo ia gwau “Keriso be mase amo ia toreisi lou, ia be mase lalonai idia mahuta taudia amo ia toreisi lou tauna ginigunana.” Ma ia gwau haida danu be do idia toreisi lou bona guba dekenai do idia daekau, ia gwau: “Idia ta ta be edia nega ta ta ai mauri do idia abia: Keriso ia toreisi lou guna, unai murinai Keriso idia badinaia taudia be iena noho negana lalonai do idia toreisi lou.”​—⁠1 Kor. 15:20, 23.

16. Guba toreisi louna be edena nega ai do ia vara?

¹⁶ Hari ita diba edena nega ai guba toreisi louna do ia vara. Ia be Keriso ena noho negana lalonai do ia vara. Lagani momo lalonai, Iehova ena Witnes taudia be Baibel amo idia hamomokania Keriso ena “noho negana” be lagani 1914 ai ia matamaia. Bona ita be unai nega ai ita noho, bona inai tanobada dikana ena dokona be kahirakahira.

17, 18. Keriso ena noho negana lalonai, horoa taudia haida dekenai dahaka do ia vara?

 ¹⁷ Baibel ese guba toreisi louna ia herevalaia, ia gwau: “Tadikaka e, mase lalonai idia mahuta taudia dekenai do ia vara gauna umui lalopararalaia be namo . . . Bema ita abia dae Iesu ia mase bona ia toreisi lou, vadaeni ita abia dae danu, Iesu amo mase lalonai idia mahuta taudia be Dirava ese do ia hamauria . . . Lohiabada ena noho negana ai, ita huanai idia mauri noho taudia ese mase lalonai idia mahuta vadaeni taudia, do idia gunalaia lasi. Badina Lohiabada be mai boiboi bada ida guba amo do ia diho . . . Vadaeni Keriso ida idia hakapua taudia, idia mase vadaeni taudia unai, be do idia toreisi guna. Unai murinai, ita do mauri noho taudia be idia ida ori lalonai do ita daekau lao ataiai bona Lohiabada ida do ita hedavari, vadaeni ia ida do ita noho ela bona hanaihanai.”​—1 Tes. 4:13-17.

¹⁸ Toreisi lou ginigunana be Keriso ena “noho negana” ia matamaia murinai do ia vara. Hisihisi badana negana ai idia do mauri noho horoa taudia be “ori lalonai do [idia] daekau lao.” (Mat. 24:31) “Do [idia] daekau lao” taudia be “mase lalonai do [idia] mahuta lasi,” anina be nega daudau mase lalonai do idia mahuta lasi. Idia be “do [idia] idau, kibi dokona idia hiriria neganai, unai do ia vara haraga, ia be matana hakapua bona kehoa haraga bamona.”​—⁠1 Kor. 15:51, 52.

19. Vaira negana ai, edena “toreisi lou hereadaena” do ia vara?

¹⁹ Hari, abidadama Keristani taudia momo be horoa taudia lasi bona Keriso ida guba dekenai do idia lohia lasi. To, idia be inai tanobada dikana ena dokona negana idia naria noho, unai be “Iehova ena dina” ai do ia vara. Ta be unai nega ia diba lasi, to hamomokania gaudia ese idia hahedinaraia unai dina be ia kahirakahira. (1 Tes. 5:1-3) Unai murinai, toreisi lou idauna do ia vara, idia toreisi lou taudia be tanobada paradaisona ai do idia noho. Bona idia be do idia goevadae bona mase lou lasi. Unai be “toreisi lou hereadaena,” ia ese guna idia vara toreisi louna ia hereaia, unai nega ai “hahine edia lalokau taudia be mase amo idia toreisi lou,” to gabeai idia mase lou.​—Heb. 11:35.

20. Dahaka dainai ita abia dae toreisi lou be dala maorona ai do ia vara?

²⁰ Baibel ese guba toreisi louna ia herevalaia neganai, ia gwau unai do idia mamia taudia “ta ta be edia nega ta ta ai mauri do idia abia.” (1 Kor. 15:23) Unai dainai ita diba momokani tanobada ai do idia toreisi lou taudia dekenai unai bamona do ia vara danu. Reana do ita henanadai: Hari sibona idia mase taudia be Keriso ena Lagani 1,000 Lohia Negana ia matamaia negana ai do idia toreisi lou bona edia lalokau taudia ese do idia welkam henia, a? Guna Dirava ena taunimanima idia hakaua abidadama taudia be do idia toreisi lou guna, unai amo tanobada matamata ai Dirava ena taunimanima naria gaukarana do idia durua, a? Iehova idia hesiai henia lasi taudia be edena bamona? Idia be edena nega ai bona edeseniai do idia toreisi lou? Henanadai be momo, to hari unai ita laloa lasi be namo. To gau badana be ita naria bona itaia. Oibe, do ita moale bada bema Iehova ese gau ibounai ia karaia namonamo.

21. Oiemu helaro toreisi lou dekenai be dahaka?

²¹ Unai nega ita naria noho lalonai, namona be iseda abidadama Iehova dekenai ita hagoadaia. Iesu amo ia gwauhamata ia lalodiatao mase taudia be do idia toreisi lou. (Ioa. 5:28, 29; 11:23) Unai ese ia hamomokania Iehova be mase taudia ia hatorea isi lou diba, guna Iesu ia gwau ia dekenai Aberahamo, Isako, bona Iakobo be “idia mauri noho.” (Luka 20:37, 38) Vadaeni badina maorona dainai Paulo hegeregerena do ita gwau: “Lau be mai egu abidadama Dirava dekenai, . . . toreisi lou” be do ia vara.​—Kara 24:15.