1. Dahaka dainai bapatiso be mai anina bada? (Laulau ginigunana herevalaia.)

LAGANI ta ta ai, Baibel stiuden tausen momo idia bapatiso. Idia momo be matamata taudia​—mauri lagani 11 ia lao 19 lalonai. Idia be reana hereva momokani lalonai idia tubu. Oi be idia ta, a? Bema oibe, oi ai hanamoa. Keristani taudia ibounai idia bapatiso be namo, bona mauri idia abia totona unai be mai anina bada.​—Mat. 28:19, 20; 1 Pet. 3:21.

2. Dahaka dainai bapatiso karana oi garilaia o dadaraia lasi?

² Ena be bapatiso murinai hahenamo momo do ita abia, to ia be mai ena maduna danu. Edena dala ai? Emu bapatiso dinana ai, emu haere oibe ese inai henanadai ia haerelaia, “Iesu Keriso ena boubou karana dainai, emu kara dika amo oi helalo-kerehai vadaeni bona oi sibona be Iehova oi gwauhamata henia Iena ura do oi karaia, a?” Emu bapatiso ese emu gwauhamata ia hamomokania. Iehova dekenai oi gwauhamata ia do oi lalokau  henia bona Iena ura do oi atoa guna. Unai be gwauhamata badana. Unai gwauhamata oi karaia dainai oi lalohisihisi, a? Lasi. Iehova ena imana dekenai emu mauri oi atoa be abia hidi maorona. Mani oi laloa! Bema tau ta be Iehova amo ia daudau, ia be Satani ena lohia henunai ia noho. Diabolo be emu mauri ia laloa bada lasi. Ia be do ia moale, bema mauri hanaihanai helarona oi haboioa, badina ia ida Iehova ena lohia siahuna oi dadaraia.

3. Iehova dekenai emu mauri oi gwauhamatalaia murinai, dahaka hahenamo oi abia?

³ Satani oi durua lasi totona, namona be emu gwauhamata bona bapatiso murinai oi abia hahenamodia oi laloa. Emu mauri be Iehova dekenai oi henia dainai, mai lalogoada ida oi gwau: “Lohiabada be lau dekenai ia noho, vadaeni lau gari lasi. Taunimanima be edena bamona lau do idia hadikaia diba?” (Sal. 118:6) Dirava ena kahanai oi gini bona iena lalonamo oi abia be hahenamo badana.

4, 5. (a) Dahaka dainai gwauhamata karana be ta ta sibona edia abia hidi? (b) Matamata taudia be dahaka hahetoho idia davaria?

⁴ Oi be bapatiso Keristani tauna dainai, emu hetura karana Iehova ida be ‘ruma bese ena palani’ ta bamona lasi, hegeregere taunimanima ese telefon gaukaralaia totona davana idia henia bamona. Mauri abia totona, oi sibona do oi hekwarahi, herevana oi be emu tama sina edia henari henunai oi noho. Dahaka dainai unai ita laloatao be mai anina bada? Badina vaira nega ai do oi davaria hekwakwanai be oi diba lasi. Hegeregere, bema emu mauri lagani be 11 o 12 neganai oi bapatiso, reana emu mauri lagani ia bada noho lalonai, gau haida do idia idau. Mauri lagani 18 kekeni ta ia gwau: “Sikuli ai, natu maragina be do ia badu lasi, bema birthday keke ia ania lasi, badina ia be Iehova ena Witnes tauna ta. To lagani haida murinai, mahuta hebou urana ia goada neganai, namona be ia abia dae momokani Iehova ena taravatu badinaia karana be abia hidi maorona.”

⁵ Matamata taudia be nega ibounai hahetoho idia davaria. Bona idia bada neganai bapatiso idia abia taudia edia abidadama be gau haida ese ia tohoa diba danu. Hegeregere, headava ena hekwakwanai, gorere, eiava edia moni gaukara. Oibe, ita ibounai, herevana iseda mauri lagani be dahaka, to gau haida ese iseda abidadama Iehova dekenai ia tohoa diba.​—Iam. 1:12-14.

6. (a) Emu gwauhamata Iehova dekenai oi haidaua diba, a? (b) Filipi 4:11-13 amo dahaka oi dibaia?

⁶ Emu abidadama ia goada noho totona, namona be oi laloatao Iehova dekenai oi karaia gwauhamata be gau ta ese do ia haidaua lasi. Anina be guba bona tanobada edia Lohia oi hamaoroa oi be ia do oi hesiai henia, herevana emu turadia o tama sina ese oi idia koua. (Sal. 27:10) Herevana dahaka, Iehova ena heduru amo emu gwauhamata oi badinaia diba.​—Filipi 4:11-13 duahia.

7. Inai hereva “mauri oi abia totona mai gari bona mai heudeheude ida do umui noho” ena anina be dahaka?

⁷ Iehova ia ura iena turana ai oi lao. To, unai hetura karana ia goada bona mauri oi abia totona, oi hekwarahi be namo. Filipi 2:12 ia gwau: “Mauri abia totona umui hekwarahi lalonai, mai gari bona mai heudeheude ida do umui noho, unai amo Dirava ese umui do ia hamauria.” Unai ena anina be emu hetura karana Iehova ida bona emu abidadama hagoadaia dalana oi laloa be namo, herevana dahaka hahetoho oi davaria. Namo lasi sibona emu goada dekenai oi tabekau. Lagani momo lalonai Dirava idia hesiai taudia danu be Iehova ena orea idia rakatania. To, dahaka oi karaia diba mauri oi abia totona?

8. Baibel stadilaia karana be dahaka, bona dahaka dainai ia be mai anina bada?

⁸ Iehova tura henia karana be dala rua ai ia gaukara​—kamonai bona herevahereva. Sibona eda stadi amo ita be Iehova ita kamonai henia. Danu, Dirava ena Hereva bona Baibel pablikeisen idauidau duahia bona laloa dobu karana amo diba ita abia. To laloatao, Baibel stadilaia karana be sikuli ena eksam ta totona oi stadi karana bamona lasi. Ia be laolao ta bamona, unai laolao lalonai Iehova ena kara namodia do oi dibaia. Unai ese oi do ia durua bena Dirava kahirakahira do oi lao, bona ia be oi kahirakahira do ia mai.​—Iam. 4:8.

9. Sibona emu stadi ai, edena tulu ese oi idia durua?

⁹ Emu stadi karana durua totona, Iehova ena orea ese tulu idauidau ia hegaegaelaia. Hegeregere, jw.org ena kahana ta “Teenagers” henunai be “Bible Study Activities” idia noho, unai kahana ese oi do ia durua Baibel sivarai haida oi dibaia totona. Danu, kahana ta ladana “What Does the Bible Really Teach?” ese oi do ia durua emu abidadama oi hagoadaia totona. Bona emu abidadama be ma haida dekenai oi gwauraia hedinarai diba. Heduru daladia ma haida be April 2009 Awake! ena atikol ta ladana “Young People Ask . . . How Can I Make Bible Reading Enjoyable?” dekenai ia noho. Stadi bona laloa dobu karana be mai anina bada, bema oi ura mauri oi abia.​—Salamo 119:105 duahia.

10. Dahaka dainai bapatiso Keristani tauna dekenai guriguri be mai anina bada?

¹⁰ Iehova ita kamonai henia dalana ta be sibona eda stadi amo, to guriguri amo ia ita hereva henia diba. Namo lasi Keristani tauna ese guriguri karana ia laloa maragi, eiava ia laloa ia be namo ia mailaia karana ta sibona. To, guriguri be iseda Havaraia tauna ida ita herevahereva karana. Iehova ia ura emu hereva ia kamonai. (Filipi 4:6 duahia.) Gau ta oi lalohekwarahilaia neganai,  Baibel ia gwau emu “laloa hekwarahi be Lohiabada dekenai do oi henia.” (Sal. 55:22) Unai oi abia dae, a? Tadikaka taihu milioni momo be unai hereva idia hamomokania. Oi ia durua diba danu!

11. Dahaka dainai Iehova oi tanikiu henia be namo?

¹¹ Iehova ena heduru ita noia negana sibona ai ita guriguri lasi. Baibel ia gwau: “Tanikiu karana do umui hahedinaraia.” (Kol. 3:15) Nega haida iseda hekwakwanai sibona ita laloa dainai, ita abia hahenamo ita lalodia lasi. Inai oi tohoa: Dina ta ta ai, oi abia hahenamo toi oi laloa, bona guriguri amo Iehova oi tanikiu henia. Mauri lagani 18 kekenina ladana, Abigail, be 12 neganai, ia bapatiso, ia gwau: “Tanobada taudia ibounai amo ita ese Iehova ita tanikiu henia be gau badana. Ita dekenai ia henia harihari gaudia dainai, ia ita tanikiu henia be namo. Nega haida sibona lau nanadaia: Bema hari ita abia gaudia dainai Iehova ita tanikiu henia, bona murina dinana ai unai gaudia ita abia lou, dahaka do ita karaia?” *

12, 13. Dahaka dainai Iehova ena namo oi mamia karana oi laloa be namo?

¹² Iehova ese King Davida ia durua dainai, ia davaria hekwakwanai ia haheaukalaidia. Unai dainai ane amo ia gwau: “Lohiabada ena kara do umui tahua namonamo, iena dala do umui tohoa namonamo, vadaeni do umui diba momokani, Lohiabada be namo momokani.” (Sal. 34:8) Unai siri be Davida ese ia mamia gauna ia hahedinaraia. Baibel bona iseda pablikeisen idauidau oi duahia, bona Keristani heboudia oi lao neganai, Dirava ese haida ia durua daladia oi kamonai, bona edia ekspiriens ese oi do ia hagoadaia. To, emu abidadama ia goada ia lao neganai, emu mauri ai Iehova ena imana do oi itaia. Oi be Iehova ena namo oi mamia vadaeni, a?

¹³ Keristani taudia ibounai ese Iehova ena namo idia mamia vadaeni. Ia ese ita ta ta ia boiria ia bona ena Natuna kahirakahira do ita lao. Iesu ia gwau: “Tau ta be lau dekenai do ia mai diba lasi, bema Tamana, lau ia siaia tauna ese ia veria mai lasi.” (Ioa. 6:44) Unai siri be oi dekenai ia guguru, a? Matamata tauna ta be reana do ia gwau, ‘Iehova ese egu tama sina ia veridia mai guna, bona lau be idia lau badinaia sibona.’ To Iehova dekenai oi gwauhamata bona oi bapatiso neganai, oi hahedinaraia oi ura Iehova oi tura henia. Hari ia be oi ia diba. Baibel ia gwau: “Bema ta ese Dirava ia lalokau henia, Dirava be unai tauna ia diba.” (1 Kor. 8:3) Namona be nega ibounai Iehova ena orea lalonai oi noho ena hahenamo oi moalelaia.

14, 15. Edena dala ai haroro gaukara ese emu abidadama ia hagoadaia diba?

¹⁴ Iehova ena namo oi mamia diba, bema iena heduru amo emu abidadama be ma haida dekenai oi gwauraia. Unai oi karaia diba bema emu teritori ai o sikuli gabunai oi haroro. Reana do ia auka emu klas turadia oi haroro henia totona. Badina oi be edia lalohadai oi diba lasi. Danu, do oi gari bada emu abidadama be hutuma vairanai oi gwauraia hedinarai totona. To, dahaka ese oi ia durua diba?

¹⁵ Gau ginigunana be, oi abidadama henia gaudia oi abia dae ena badina oi laloa. Jw.org ai idia noho stadi gaudia be oi gaukaralaia gado ai idia hahanaia vadaeni, a?  Bema oi daradara, nega oi atoa unai kahana oi sekea totona. Unai kahana ese oi do ia durua oi abidadama henia gaudia, bona unai gaudia oi abia dae ena badina, bona ma haida dekenai emu abidadama oi gwauraia hedinarai daladia oi laloa totona. Bema emu abidadama be ia goada bona oi hegaegae namonamo, do oi ura ma haida dekenai Iehova ena ladana oi harorolaia.​—Ier. 20:8, 9.

16. Dahaka ese oi ia durua diba emu abidadama oi gwauraia hedinarai totona?

¹⁶ Ena be oi hegaegae, to reana do oi ura lasi ma haida dekenai emu abidadama oi herevalaia. Mauri lagani 18 taihu ta, be 13 neganai bapatiso ia abia, ia gwau: “Lau abidadama henia gaudia lau diba, to nega haida ia auka egu lalohadai be sibona egu hereva amo lau gwauraia hedinarai totona.” Unai hekwakwanai be edena bamona ia hanaia? Ia gwau: “Egu klas turadia be vaia idia karaia gaudia idia sivarailaia. Unai lau karaia danu be namo. Unai dainai hereva maragi amo lau gwau, ‘vanegai Baibel lau herevalaia, bona . . . ’ Bena egu sivarai lau gwauraia. Ena be Baibel lau herevalaia lasi, to nega momo Baibel lau herevalaia neganai lau karaia gauna dainai idia henanadai. Unai dala lau gaukaralaia momo neganai, ia auka lasi idia lau haroro henia totona. Bona unai ese nega momo lau ia hamoalea!”

17. Emu abidadama oi laloa karana ese edena bamona oi ia durua diba?

¹⁷ Ma haida oi matauraia bona oi hahedinaraia idia oi laloa bada neganai, do idia ura kamonai. Olivia ena mauri lagani be 17, to ia maragi neganai ia bapatiso, ia gwau: “Nega momo lau gari bema Baibel lau herevalaia, taunimanima do idia laloa lau ura egu diba Baibel dekenai lau hahedinaraia.” To, gabeai ena laloa dalana ia haidaua. Bona ia garilaia gauna ia laloa lasi, ia gwau: “Matamata taudia momo be Iehova ena Witnes taudia idia diba lasi. Idia momo dekenai ita sibona be Iehova ena Witnes taudia. Unai dainai iseda kara be mai anina bada. To bema ita hemarai o gari dainai, iseda abidadama ita gwauraia hedinarai lasi be edena bamona? Vadaeni do idia laloa ita abidadama henia gaudia ita laloa bada lasi. Ita boga-auka lasi dainai, hemataurai lasi dalanai ita idia hereva henia diba. To bema ita abidadama henia gaudia be mai gado namo bona lalogoada ida ita herevalaia, ita do idia matauraia.”

18. Mauri oi abia totona dahaka oi karaia diba?

¹⁸ Ita herevalaia bamona, mauri abia totona oi hekwarahi be mai anina bada. Heduru gaudia haida be Baibel duahia bona laloa dobu karana, Iehova guriguri henia karana, bona Iehova ese oi ia hanamoa dalana oi laloa dobu. Unai oi karaia neganai, unai ese oi do ia durua emu hetura karana Iehova ida oi hagoadaia totona. Bena ma haida dekenai emu abidadama oi gwauraia hedinarai diba.​—Salamo 73:28 duahia.

19. Dahaka dainai mauri abia totona oi hekwarahi be namo?

¹⁹ Iesu ia gwau: “Bema ta ia ura egu murinai ia raka, ia sibona ena ura ia dadaraia be namo, bona ena hisihisi auna do ia huaia bona egu murinai do ia raka noho.” (Mat. 16:24) Momokani, hahediba gaukarana​—⁠gwauhamata bona bapatiso danu​—be Keristani tauna ena maduna. Unai gaukara dainai, hahenamo momo do oi davaria bona Dirava ena tanobada matamata ai mauri hanaihanai do oi abia. Unai dainai mauri abia totona oi hekwarahi noho be gau badana!