1. Taunimanima momo ese gaukara be edena bamona idia laloa?

EMU gabu ai idia noho taudia momo ese gaukara be edena bamona idia laloa? Tano momo ai, taunimanima be hora momo lalonai idia gaukara noho guna bamona lasi. Idia gaukara momo taudia be idia laga-ani diba lasi, edia ruma bese idia bamoa lasi, eiava Dirava dibaia totona edia nega be lasi. (Had. 2:23) To, ma haida be idia ura lasi idia gaukara, unai dainai ekskius hereva idauidau idia gwauraia.​—⁠Aon. 26:13, 14.

2-3. Iehova bona Iesu ese gaukara be edena bamona idia laloa?

² Iehova bona Iesu ese gaukara idia laloa dalana be tanobada taudia edia laloa dalana amo ia idau. Ita diba Iehova ese gaukara karana ia moalelaia. Iesu ese unai ia hamomokania, ia gwau: “Lauegu Tamana be ia gaukara noho ema bona hari, bona lau danu lau gaukara noho.” (Ioa. 5:17) Mani Dirava ese ia karaia gaudia ibounai oi laloa, ia ese aneru momo bona iunives ibounai ia karaia. Danu, ita noholaia tanobada hairaina ai Dirava ese ia karaia gau namodia momo ita itaia. Salamo torea tauna ia gwau: “[Iehova] e, oi ese gau ibounai oi karaia vadaeni. Mai oiemu aonega bada danu idia ibounai oi karaia. Inai oi ese oi karaia gaudia ibounai ese, inai tanobada idia hahonua momokani.”​—⁠Sal. 104:24.

³ Iesu be ena Tamana ia tohotohoa. Dirava ese guba “ia karaia” neganai Iesu ese ia durua. Iesu be Iehova ida ia noho neganai, ia be “gaukara karaia namonamo tauna.” (Aon. 8:27-31, NWT) Gabeai, Iesu be tanobada dekenai ia mai neganai, ia be gaukara namona ia karaia. Ia dekenai unai gaukara be aniani bamona, bona ia karaia gaudia ese idia hahedinaraia ia be Dirava ese ia siaia.​—⁠Ioa. 4:34; 5:36; 14:10.

4. Iehova bona Iesu edia laga-ani karana amo dahaka ita dibaia?

 ⁴ Iehova bona Iesu idia gaukara goada karana ese ia hahedinaraia do ita laga-ani lasi, a? Lasi. Iehova be ia hesiku diba lasi, unai dainai ia laga-ani be anina lasi. To, Baibel ia gwau, Iehova be guba bona tanobada ia karaia murinai, ia “laga-ani.” (Eso. 31:17) Unai ese ia hahedinaraia Iehova be ia laga-ani ia karaia gaudia ia moalelaia totona. Bona, ena be Iesu be tanobada dekenai ia noho neganai ia gaukara goada, to nega ia atoa ia laga-ani bona ena turadia ida ia aniani hebou totona.​—⁠Mat. 14:13; Luka 7:34.

5. Momo be dahaka hekwakwanai idia davaria?

⁵ Baibel ese Dirava ena taunimanima ia hagoadaia edia gaukara idia moalelaia totona. Iena hesiai taudia idia gaukara goada be namo, to namo lasi idia hesiku. (Aon. 15:19) Reana moni gaukara oi karaia emu ruma bese oi naria totona. Bona Keriso ena hahediba taudia ibounai be mai edia maduna sivarai namona idia harorolaia totona. To, namona be nega oi atoa oi laga-ani totona. Nega haida oi hekwarahi nega oi atoa moni gaukara, haroro, bona laga-ani totona, a? Edena dala ai gaukara bona laga-ani totona emu nega oi haria?

6. Edena dala ai Mareko 6:30-34 ese ia hahedinaraia, Iesu be gaukara bona laga-ani karana dekenai lalohadai maorona ia abia?

⁶ Gaukara karana dekenai lalohadai maorona ita abia be mai anina bada. King Solomona ia gwau: ‘Inai tanobada dekenai kara ibounai be mai edia nega.’ Ia ese hadohado, ruma haginia, taitai, kiri, mavaru, bona gau ma haida ia herevalaia. (Had. 3:1-8) Ia hahedinaraia, iseda mauri lalonai gaukara bona laga-ani be mai anina bada. Iesu ese gaukara bona laga-ani karana dekenai lalohadai maorona ia abia. Nega ta, aposetolo taudia be haroro gaukara ai idia bisi bada bona idia giroa lou neganai, “idia be nega lasi idia aniani totona.” Unai dainai Iesu ia gwau: “Umui mai bona taunimanima lasi gabuna dekenai do ita lao bona laga-ani sisina.” (Mareko 6:30-34 duahia.) Ena be Iesu bona ena hahediba taudia be nega lasi idia laga-ani totona, to Iesu ia laloparara idia ibounai idia laga-ani be namo.

7. Edena dala ai Sabati taravatuna ita dibaia karana ese ita ia durua?

⁷ Nega haida, ita laga-ani eiava senisi haida ita karaia be namo. Dirava ese idaunegai Israela taudia totona ia hegaegaelaia gauna ta ese unai ia hahedinaraia​—⁠wiki ta ta ena Sabati. Ita be Mose ena Taravatu henunai ita noho lasi, to unai taravatu ese Sabati ia herevalaia dalana amo namo ita abia diba. Do ita dibaia gaudia ese ita do ia durua, gaukara bona laga-ani karana dekenai lalohadai maorona ita abia totona.

8. Esodo 31:12-15 ena hereva bamona, Sabati dinana ai dahaka idia karaia?

⁸ Baibel ia gwau, Dirava be “dina” siks lalonai tanobada ai gau ibounai ia karaia murinai, ia laga-ani. (Gen. 2:2) To, Iehova be gaukara karana ia moalelaia, bona dala idauidau ai “ia gaukara noho.” (Ioa. 5:17) Wiki ta ta ena Sabati be Genese bukana ese Iehova ena laga-ani dinana ia herevalaia karana ida ia hegeregere. Dirava ia gwau Sabati be ia bona Israela taudia huanai ia noho toa ta. Ia be laga-ani dinana bona Iehova dekenai ia be “Dina helaga.” (Esodo 31:12-15 duahia.) Unai dina ai taunimanima ta ia gaukara lasi, natudia, hesiai taudia bona idia naria animal danu. (Eso. 20:10) Unai amo taunimanima be tomadiho totona nega bada do idia atoa.

9. Iesu ena negai, ma haida be Sabati dekenai dahaka lalohadai kererena idia abia?

 ⁹ Dirava ena taunimanima ese Sabati dinana idia moalelaia; to Iesu ena negai, tomadiho gunalaia taudia ese Sabati taravatuna badinaia karana dekenai taravatu aukadia idia atoa. Idia gwau, Sabati dinana ai witi ena anina oi kokia eiava gorere tauna ta oi hanamoa, be taravatu utua karana. (Mar. 2:23-27; 3:2-5) To, unai be Dirava ena lalohadai hegeregerena lasi, bona Iesu ese ia idia kamonai henia taudia dekenai unai ia hahedinaraia goevagoeva.

10. Mataio 12:9-12 ai, Iesu ese Sabati ia laloa karana amo dahaka ita dibaia?

¹⁰ Iesu bona ena murinai idia raka Iuda taudia be Sabati ena taravatu idia badinaia badina idia be Mose ena Taravatu henunai idia noho. * To Iesu be ena hereva bona kara amo ia hahedinaraia Sabati dinana ai ma haida oi durua be kerere lasi. Ia gwau: “Sabati Dina dekenai kara namo karaia be ia maoro.” (Mataio 12:9-12 duahia.) Iesu dekenai, Sabati dinana ai ma ta durua totona kara namona ta oi karaia ese ia hahedinaraia lasi oi be Sabati ena taravatu oi utua. Sabati dinana ai Iesu ese ia karaia gaudia amo mai anina bada gauna ta ita dibaia. Dirava ena taunimanima be dina ta ta ai idia karaia gaukara amo idia laga-ani dainai, Dirava idia tomadiho henia diba. Iesu ena ruma bese taudia be Sabati dinana ai Dirava idia tomadiho henia. Unai ita dibaia badina Iesu be ena hanua Nasareta dekenai  ia noho neganai, “Sabati dinana ai ia karaia bamona, sinagoga lalonai ia vareai. Vadaeni ia gini tore, ia duahiduahi totona.”​—⁠Luka 4:15-19.

11. Iesu be gaukara dekenai daika ia tohotohoa?

¹¹ Iosepa be, Dirava ese gaukara ia laloa dalana hegeregerena, ena ubua natuna, Iesu dekenai kapenta gaukara ia hadibaia. (Mat. 13:55, 56) Bona, Iesu ia itaia Iosepa be dina ta ta ai ia gaukara goada ena ruma bese badana ia naria totona. Hoa gauna be, Iesu ese gabeai ena hahediba taudia ia hamaoroa: “Gaukara tauna ese davana ia abia be namo.” (Luka 10:7) Oibe, Iesu ese gaukara goada karana ia lalopararalaia.

12. Edena Baibel siridia ese gaukara goada karana idia herevalaia?

¹² Aposetolo Paulo danu be unai bamona. Ia dekenai Iesu ena ladana bona ena sivarai ia harorolaia karana be mai anina bada. To, Paulo be tauanina dalanai sibona ia naria totona ia gaukara danu. Tesalonika taudia idia diba, Paulo be ‘dina bona hanuaboi ai ia gaukara bona ia hekwarahi,’ unai amo ‘ta ese gau ta dainai davana ia karaia lasi ia durua totona.’ (2 Tes. 3:8; Kara 20:34, 35) Paulo be reana ena palai ruma turia gaukarana ia herevalaia. Ia be Korinto ai, Akwila bona Prisikila “edia ruma dekenai ia noho bona palai ruma turia gaukarana idia karaia hebou.” Paulo be “dina bona hanuaboi ai” ia gaukara karana ese ia hahedinaraia lasi ia be ia laga-ani lasi. Ia be ena palai ruma turia gaukarana ai ia laga-ani danu, hegeregere sabati dinana ai. Ia dekenai unai be dina namona Iuda taudia ia haroro henia totona, badina idia danu be sabati dinana ai idia gaukara lasi.​—⁠Kara 13:14-16, 42-44; 16:13; 18:1-4.

13. Paulo ena haheitalai amo dahaka ita dibaia?

¹³ Aposetolo Paulo be haheitalai namona ia hahedinaraia. Ia be sibona durua totona ia gaukara; to hanaihanai “Dirava ena sivarai namona harorolaia gaukarana” ia karaia danu. (Roma 15:16; 2 Kor. 11:23) Danu, ma haida ia hagoadaia haroro gaukara idia laloa bada totona. Oibe, Akwila bona Prisikila be ia ida “Keriso Iesu ena gaukara idia karaia.” (Roma 12:11; 16:3) Paulo ese Korinto taudia ia hagoadaia, namona be “Lohiabada ena gaukara idauidau lalonai do [idia] bisi.” (1 Kor. 15:58; 2 Kor. 9:8) Iehova ena hahekau henunai aposetolo Paulo ma ia gwau: “Bema ta ia ura lasi ia gaukara, vadaeni ia dekenai aniani umui henia lasi.”​—⁠2 Tes. 3:10.

14. Ioane 14:12 ai, Iesu ese ia gwauraia herevana ena anina be dahaka?

¹⁴ Inai dina gabedia ai, haroro bona hahediba taudia halaoa gaukarana be mai anina bada. Danu, Iesu ia peroveta iena hahediba taudia idia karaia gaukara ese ia karaia gaukara do ia hereaia! (Ioane 14:12 duahia.) Unai ese ia hahedinaraia lasi ita be ia hegeregerena hoa karadia do ita karaia. To, iena murinai idia raka taudia be teritori badadia ai, taunimanima momo dekenai, bona nega daudau lalonai haroro bona hahediba gaukarana do idia karaia.

15. Ita sibona dekenai edena henanadai ita henia bona dahaka dainai?

¹⁵ Bema oi be moni gaukara oi karaia, sibona oi nanadaia: ‘Egu gaukara gabuna ai, momo ese lau be gaukara goada tauna bamona idia laloa, a? Egu gaukara be nega korikori ai lau haorea, bona mai lalona ibounai ida lau karaia, a?’ Bema emu haere be oibe, emu bosi ese oi do ia abidadama henia. Unai amo oi idia itaia taudia ese Basileia ena sivarai namona idia abia dae diba. Haroro bona hadibaia gaukara oi laloa neganai, sibona oi  nanadaia: ‘Momo idia diba lau be haroro gaukara lau goadalaia, a? Haroro gaukara totona, hamatamaia hereva lau hegaegaelaia namonamo, a? Kamonai taudia lau lou henia haraga, a? Bona hanaihanai haroro daladia idauidau lau tohoa, a?’ Bema emu haere be oibe, emu gaukara do oi moalelaia.

16. Laga-ani karana dekenai, Iesu bona ena aposetolo taudia bona hari taunimanima edia lalohadai be dahaka?

¹⁶ Iesu ia diba nega haida ia bona ena aposetolo taudia idia laga-ani be namo. To, idaunegai bona hari idia noho taudia momo be Iesu ese ena haheitalai lalonai ia herevalaia taga tauna bamona. Unai tauna be inai bamona ia laloa: “Do lau laga-ani, do lau aniani, do lau inuinu, bona sibona do lau hamoalea.” (Luka 12:19; 2 Tim. 3:4) Ia be ena mauri lalonai laga-ani bona moale karadia ia laloa bada. To, Iesu bona ena aposetolo taudia be idau, badina edia mauri lalonai moale karadia idia atoa guna lasi.

17. Edena dala ai iseda holidei ena nega ita gaukaralaia namonamo diba?

¹⁷ Hari inai negai, Iesu ita tohotohoa dalana ta be iseda gaukara amo ita laga-ani ena nega ita gaukaralaia, ma haida ita haroro henia bona Keristani heboudia dekenai ita lao. Momokani, ita dekenai hahediba taudia halaoa gaukarana bona hebou lao henia karana be mai anina bada dainai, iseda nega bona goada ita henia unai gaukara idauidau lalonai ita vareai totona. (Heb. 10:24, 25) Ena be holidei totona gabu ma ta dekenai ita lao, to namona be hebou ita reaia lasi, bona ita hedavari henia taudia ita haroro henia.​—⁠2 Tim. 4:2.

18. Iseda King, Keriso Iesu, ia ura dahaka ita karaia?

¹⁸ Ita moale bada badina iseda King, Keriso Iesu, be ita ia laloa bada bona ita ia durua gaukara bona laga-ani karana ai, lalohadai maorona ita abia totona! (Heb. 4:15) Ia ura ita laga-ani be namo. Ia ura sibona durua totona ita gaukara goada, bona hahediba taudia halaoa gaukarana ita moalelaia danu. Stadi atikol 50 ai, Iesu ese igui hesiai amo ita ia hamauria totona ia karaia gauna do ita herevalaia.