Deuteronomi 22:25-27 dekenai ia noho sivarai ese tau ena kerere ia herevalaia lasi. To, unai taravatu ese hahine ia kerere lasi ena badina ia hahedinaraia. Mani unai ita herevalaia.

Siri 23 bona 24 ese tau ta be “hanua lalonai” maoheni kekeni ta ida ia mahuta hebou karana ia herevalaia. Unai ia karaia neganai, unai tau be ia heudahanai badina maoheni kekeni be headava hahine bamona idia laloa. To, unai kekeni be edena bamona? “Ia be hanua lalonai, to ia boiboi lasi.” Bema ia boiboi ma haida ese ia idia durua diba. To ia boiboi lasi. Unai ese ia hahedinaraia ia be heudahanai karana ia abia dae bona idia ruaosi idia kerere.​—⁠Deu. 22:23, 24.

Danu, Taravatu ese gau ma ta ia herevalaia: “To sedira tau ta ese rami hebou kekeni, tau ta dekenai ia maoheni vadaeni kekeni be hanua ena murimurinai tano dekenai ia davaria, bona ia ese ia fosia, bona ia sihari henia kava. Unai neganai unai tau sibona do umui alaia mase. Unai kekeni dekenai panisia kara do umui karaia lasi, badina ia ese, ena davana mase kerere ta ia karaia lasi. Unai tau ena kara dika, be tau ta ia toreisi, iena badibadinai tauna ia alaia mase bamona. Badina be hanua ena murimurinai tano dekenai unai tau ese unai kekeni ia davaria, bona unai kekeni madi ia boiboi bada, to tau ta ese ia durua lasi.”​—⁠Deu. 22:25-27.

Unai dainai, hahemaoro taudia idia laloa kekeni be kerere lasi. Edena dala ai? Idia laloa kekeni “ia boiboi bada, to tau ta ese ia durua lasi.” Unai dainai kekeni be ia heudahanai lasi. To, reipi karana ia karaia tauna be ia heudahanai, badina maoheni kekeni “ia fosia, bona ia sihari henia kava.”

Ena be taravatu ese kekeni ia kerere lasi ena badina ia herevalaia, to ia hahedinaraia goevagoeva tau be reipi karana ia karaia bona ia heudahanai. Ita diba momokani, hahemaoro taudia ese kerere idia “tahua namonamo” bona Dirava ena taravatu hegeregerena abia hidi idia karaia.​—⁠Deu. 13:14; 17:4; Eso. 20:14.