1-2. Angelito ena ekspiriens bamona, ita ta ta ese dahaka ita karaia be namo?

EMU tama sina be Iehova ena Witnes taudia, a? Bema oibe, namo lasi oi laloa idia dainai oi be Iehova ena turana ai do oi lao. Ena be iseda tama sina be Dirava idia hesiai henia o lasi, to namona be ita ta ta ese iseda hetura karana Iehova ida ita hagoadaia.

² Tadikaka ta ladana Angelito ena sivarai mani oi laloa. Ia be Witnes ruma besena ai ia tubu daekau. To, ia be mero matamata neganai ia mamia Dirava kahirakahira ia lao lasi. Ia gwau: “Iehova lau hesiai henia badina lau ura egu ruma bese lau bamoa.” To, Angelito be nega ia atoa Dirava ena Hereva ia duahia bona ia laloa dobu, bona hanaihanai Iehova ia guriguri henia. Dahaka ia vara? Angelito ia gwau: “Lau dibaia gauna be inai, bema lau ura egu lalokau Tamana, Iehova kahirakahira lau lao, lau sibona ese ia lau dibaia be namo.” Angelito ena ekspiriens dainai inai mai anina bada henanadai ita lalodia: Iehova ita diba sibona bona ia ita dibaia namonamo karana edia idau be dahaka? Bona edena dala ai Iehova do ita dibaia?

3. Iehova oi diba sibona bona ia oi dibaia namonamo ena idau be dahaka?

³ Ita gwau diba ta ese Iehova do ia dibaia, bema Dirava ena  ladana eiava Ia karaia o gwauraia gaudia haida ia diba. To, unai sibona be hegeregere lasi, Iehova ita dibaia namonamo totona gau ma haida ita karaia be namo. Namona be nega ita atoa Iehova bona ena kara namodia ita dibaia totona. Unai dala amo ia gwauraia gaudia o ia karaia gaudia edia badina do ita lalopararalaia. Unai amo do ita diba bema ia ese iseda lalohadai, abia hidi, bona iseda kara ia abia dae. Iehova ena ura ita lalopararalaia neganai, ita dibaia gaudia ita badinaia be namo.

4. Edena dala ai Baibel ese ia herevalaia taudia edia haheitalai ese ita ia durua?

⁴ Iehova ita ura hesiai henia neganai taunimanima ese ita do idia kirikirilaia, bona ena hesiai taudia ita bamoa neganai ita idia dagedage henia. To, bema Iehova ita abidadama henia, ita do ia rakatania lasi. Bona iseda hetura karana namona Dirava ida be do ia noho hanaihanai. Iehova ita dibaia namonamo diba, a? Oibe! Goevadae lasi taudia rua hegeregere Mose bona King Davida edia haheitalai ese unai ia hamomokania. Idia ruaosi edia kara ita laloa neganai, henanadai rua do ita haerelaia: Edena dala ai Iehova idia dibaia? Bona edia haheitalai amo dahaka ita dibaia?

5. Mose be dahaka abia hidi ia karaia?

⁵ Mose be ia dibaia gaudia ia badinaia. Mose ena mauri lagani be 40 bamona neganai, ia ese Dirava ena taunimanima, Heberu taudia ia bamoa, to ia ura lasi ia idia gwauraia “Farao ena natuna kekeni ena natuna.” (Heb. 11:24) Mose be dagi badana ia dadaraia. Ia ese Aigupito ai Heberu igui hesiai taudia ia bamoa neganai, ia diba Farao​—⁠king badana bona Aigupito taudia ese dirava ta bamona idia laloa tauna​—⁠be do ia badu dikadika. Unai ese ia hahedinaraia Mose ena abidadama be ia goada! Mose be Iehova ia abidadama henia dainai edia hetura karana ia noho daudau.​—⁠Aon. 3:5.

6. Mose ena haheitalai amo dahaka ita dibaia?

⁶ Dahaka ita dibaia? Mose bamona, ita ibounai be abia hidi do ita karaia: Dirava do ita hesiai henia bona iena taunimanima do ita bamoa, a? Reana Dirava ita hesiai henia totona gau haida do ita dadaraia, bona Iehova idia dibaia lasi taudia ese ita idia dagedage henia diba. To, bema iseda guba Tamana ita abidadama henia, ita diba ia ese ita do ia durua!

7-8. Mose be dahaka ia dibaia noho?

⁷ Mose be Iehova ena kara namodia ia dibaia noho bona ia ura Iehova ena ura ia karaia. Hegeregere, Iehova ese Mose ia noia Israela taudia be Aigupito amo do ia hakaua lasi neganai, Mose ia gari bona Iehova ia hadibaia loulou ia hegeregere lasi. Dirava ese Mose dekenai hebogahisi karana ia hahedinaraia bona ia durua. (Eso. 4:10-16) Unai amo Mose ese hahemaoro hereva aukadia be Farao dekenai ia gwauraia. Mose ia itaia Iehova be ena siahu ia gaukaralaia Israela taudia ia hamauria, to Davara Kakakakana ai Farao mai ena tuari oreana ia hamasea.​—⁠Eso. 14:26-31; Sal. 136:15.

⁸ Mose ese Israela taudia be Aigupito amo ia hakaua lasi murinai, idia be hanaihanai gau momo dainai idia maumau. To, ia itaia Iehova be mai haheauka ida igui hesiai amo ia ruhaia taudia ia kara henidia. (Sal. 78:40-43) Danu, ia itaia Iehova ese manau karana ia hahedinaraia, badina Mose ese ia noia Israela taudia ia hadikaia lasi neganai, Iehova be ena lalohadai ia haidaua.​—⁠Eso. 32:9-14.

9. Heberu 11:27 ena hereva bamona, Mose bona Iehova edia hetura karana be edena bamona?

⁹ Mose be Aigupito ia rakatania murinai  ena hetura karana Iehova ida be ia goada momokani, unai be hegeregere iena guba Tamana ia itaia bamona. (Heberu 11:27 duahia.) Baibel ese unai hetura karana be inai bamona ia herevalaia, ia gwau: “[Iehova] ese Mose ia hereva henia, tau ta ese iena turana ia hereva henia bamona.”​—⁠Eso. 33:11.

10. Iehova ita dibaia namonamo totona, dahaka ita karaia be namo?

¹⁰ Dahaka ita dibaia? Iehova ita dibaia namonamo totona, iena kara namodia ita diba sibona be hegeregere lasi, to iena ura ita karaia danu be namo. Iehova ena ura hari inai negai be “taunimanima idauidau do ia hamauria bona hereva momokani ena diba maoromaoro do idia abia.” (1 Tim. 2:3, 4) Dirava ena ura ita karaia dalana ta be ma haida ita durua Iehova idia dibaia totona.

11. Ma haida dekenai Iehova ita herevalaia neganai, edena dala ai ita danu be Iehova ita dibaia namonamo?

¹¹ Nega momo ma haida dekenai Iehova ita herevalaia neganai, ita danu be Iehova ita dibaia namonamo. Hegeregere, Iehova ese ita ia hakaua kudou maoro taudia ita davaria neganai, iena hebogahisi karana ita itaia. (Ioa. 6:44; Kara 13:48) Iseda stadi taudia ese kara dikadia idia dadaraia bona mauri matamata idia badinaia neganai, Dirava ena Hereva ena siahu ia gaukara dalana ita itaia. (Kol. 3:9, 10) Bona Dirava ena haheauka karana ita itaia, badina nega momo ita ia siaia iseda teritori ai idia noho taudia ita durua Iehova idia dibaia bona mauri idia abia totona.​—⁠Roma 10:13-15.

12. Esodo 33:13 ena hereva bamona, Mose be dahaka totona ia noinoi, bona dahaka dainai?

¹² Mose ese ena hetura karana Iehova ida ia laloa bada. Ena be Mose ese Dirava ena ladana ai hoa karadia momo ia karaia, to mai manau ida Iehova ia noia ia ura Ia ia dibaia namonamo totona. (Esodo 33:13 duahia.) Mose ese unai noinoi herevana ia gwauraia neganai, iena mauri lagani be 80 mai kahana, to ia ura ena lalokau guba Tamana ena kara ia dibaia noho.

13. Iseda hetura karana Dirava ida ita laloa bada dalana ta be dahaka?

¹³ Dahaka ita dibaia? Herevana lagani momo lalonai Iehova ita hesiai henia, to namo lasi iseda hetura karana Ia ida ita laloa maragi. Iseda hetura karana Dirava ida ita laloa bada dalana ta be guriguri amo ia ita hereva henia.

14. Dahaka dainai Dirava dibaia karana dekenai guriguri be mai anina bada?

¹⁴ Herevahereva namonamo karana ese emu hetura karana ma haida ida ia hagoadaia diba. Unai dainai guriguri hanaihanai karana amo Dirava kahirakahira oi lao, bona mai gari lasi ida ia dekenai emu lalohadai ibounai oi gwauraia hedinarai. (Efe. 6:18) Turkey dekenai ia noho taihu ta ladana Krista ia gwau: “Nega ta ta ai Iehova lau guriguri henia bona lau ia durua dalana lau itaia neganai, egu lalokau bona abidadama karana ia dekenai ia hagoadaia. Iehova ese egu guriguri ia haerelaia karana amo lau diba Iehova be Tama ta bona Tura ta bamona lau laloa.”

15. Iehova ese King Davida be edena bamona ia herevalaia?

¹⁵ King Davida ena bese taudia ibounai be Iehova Dirava idia tomadiho henia. To, Davida ia laloa lasi iena bese taudia dainai Iehova do ia tomadiho henia. Ia be sibona ena hetura karana Iehova ida ia hagoadaia, bona Iehova ese ia lalokau henia bada. Iehova sibona ese Davida ia gwauraia, “egu lalohadai hegeregerena gau ibounai ia karaia.” (Kara 13:22) Edena dala ai Davida be Iehova ena turana namona ai ia lao?

16. Davida ese havaraia gaudia ia itaia neganai, Iehova amo dahaka ia dibaia?

 ¹⁶ Davida be havaraia gaudia amo Iehova ia dibaia. Davida be mero matamata neganai, hora momo lalonai murimuri ai ena tamana ena mamoe ia naria. Reana unai negai ia ese Iehova ia havaraia gaudia ia itaia bona ia laloa dobu. Hegeregere, Davida be hanuaboi ai guba dekenai hisiu momo ia itaia sibona lasi, to hisiu ia karaia Tauna ena kara ia laloa danu. Unai dainai ia gwau: “Guba ese Dirava ena hairaina ia hedinaraia, bona guba dekenai noho gaudia ese, Dirava ia karaia gaudia idia hedinaraia noho.” (Sal. 19:1, 2) Danu, Davida be Iehova ese taunimanima ia havaraia dalana ia laloa neganai, Iehova ena aonega ia gaukara dalana ia dibaia. (Sal. 139:14) Davida be Iehova ena gaukara ia laloa neganai, sibona ia hamanaua.​—⁠Sal. 139:6.

17. Dahaka do ita dibaia bema havaraia gaudia ita laloa dobu?

¹⁷ Dahaka ita dibaia? Havaraia gaudia oi laloa bada be namo. Tanobada hairaina ai oi noho sibona lasi to gau ma haida oi karaia danu! Hegeregere, emu dina ta ta maurina ai, havaraia gaudia​—⁠tubutubu gaudia, animal, bona taunimanima​—⁠oi itaia neganai Iehova amo oi dibaia gaudia oi laloa dobu. Bena dina ta ta ai emu lalokau Tamana amo gau momo do oi dibaia. (Roma 1:20) Bona dina ta ta ai emu lalokau Dirava dekenai do ia goada ia lao.

18. Salamo 18 ena hereva bamona, Davida be dahaka ia lalopararalaia?

¹⁸ Davida ia diba Iehova ese ia durua noho. Hegeregere, Davida ese laiona ta bona bea ta amo ena Tamana ena mamoe ia gimaia neganai, ia laloparara Iehova ese ia durua unai dagedage animal ia alaia totona. Davida ese tuari tauna badana Goliata ia alaia neganai, ia laloparara Iehova ese ia hakaua noho. (1 Sam. 17:37) Bona Davida be King Saulo ena mama karana dainai ia heau neganai, ia diba Iehova ese ena roho mauri dalana ia karaia. (Sal. 18) Hekokoroku tauna be do ia laloa sibona ena goada amo unai ia karaia. To, Davida be ia manau, bona ia laloparara ena mauri lalonai Iehova ese ia durua.​—⁠Sal. 138:6.

19. Davida ena haheitalai amo dahaka ita dibaia?

¹⁹ Dahaka ita dibaia? Iehova ena heduru totona ita noinoi sibona be hegeregere lasi. To, heduru ia henia negadia bona daladia ita lalopararalaia be namo. Bema iseda goada ena hetoana ita lalopararalaia, do ita diba Iehova ena heduru ita abia be namo. Bona dina ta ta ai Iehova ese ita ia durua dalana ita itaia neganai, iseda hetura karana ia ida do ia goada. Fiji dekenai lagani momo lalonai Iehova ia hesiai henia tadikaka ta ladana Isaac ese unai ia hamomokania. Ia gwau: “Egu mauri dalana lau laloa neganai, lau mamia momokani Baibel lau stadilaia negana amo ema bona hari Iehova ese lau ia durua. Unai dainai lau abia dae momokani Iehova be ia noho.”

20. Davida bona Iehova edia hetura karana amo dahaka ita dibaia?

²⁰ Davida be Iehova ena kara ia tohotohoa. Iehova ese ita ia karaia iena kara ita tohotohoa totona. (Gen. 1:26) Hanaihanai Iehova ena kara namodia ita dibaia neganai, ia do ita tohotohoa diba. Davida ese ena guba Tamana ia dibaia namonamo, unai dainai ma haida ia kara henidia neganai Dirava ia tohotohoa. Mani ia karaia gauna ta ita herevalaia. Davida be Iehova vairanai ia kara dika badina Bataseba ida ia heudahanai bona ena adavana Uria ia alaia. (2 Sam. 11:1-4, 15) To, Iehova ese Davida ia hebogahisi henia badina Davida be ma haida dekenai hebogahisi ia hahedinaraia.  Davida be Iehova ena turana namona ai ia lao dainai Israela taudia ese ia idia lalokau henia bona Iehova ese iena haheitalai ia gaukaralaia King ma haida ia durua totona.​—⁠1 Kin. 15:11; 2 Kin. 14:1-3.

21. Efeso 4:24 bona 5:1 edia hereva bamona, ‘Dirava ita tohotohoa’ neganai dahaka do ia vara?

²¹ Dahaka ita dibaia? Namona be ‘Dirava ita tohotohoa.’ Unai ita karaia neganai, namo ita abia sibona lasi, to ita ia durua Dirava ita dibaia namonamo. Bema Dirava ena kara ita tohotohoa, ita hahedinaraia ita be iena natudia.​—⁠Efeso 4:24; 5:1 duahia.

22-23. Dahaka ia vara diba bema Iehova amo ita dibaia gaudia ita badinaia?

²² Ita itaia vadaeni bamona, Iehova ese ia havaraia gaudia bona iena Hereva, Baibel amo ia ita dibaia namonamo. Baibel lalonai, Dirava ena abidadama hesiai taudia momo hegeregere Mose bona Davida edia haheitalai idia noho, bona idia ita tohotohoa diba. Iehova be heduru daladia ia hegaegaelaia vadaeni. Namona be iseda matana, taiana, bona kudouna ita kehoa, ia amo heduru ita abia totona.

²³ Iehova ita dibaia noho karana be do ia doko lasi. (Had. 3:11) Mai anina bada gauna be, ia ita dibaia sibona lasi to unai diba ita gaukaralaia namonamo. Bema ita dibaia gaudia ita badinaia bona iseda lalokau Tamana ita tohotohoa, ia be ita kahirakahira ia noho diba. (Iam. 4:8) Iena Hereva amo ita ia hadibaia, ia idia ura dibaia namonamo taudia be do ia rakatania lasi.