Gima Kohorona 2019 ai idia noho henanadai oi haerelaia diba, a?

Dirava ena gwauhamata ena anina be dahaka: “Tuari gauna ta ese oi do ia hadikaia diba lasi.” (Isa. 54:17)

Ita diba momokani Dirava ese “bogahisihisi lasi taudia edia badu” amo ita ia gimaia diba. (Isa. 25:4, 5) Iseda inai taudia ese ita idia hadikaia diba lasi.​—w19.01, rau 6-7.

Dirava ese Kanana taudia bona gwau-edeede Israela taudia ia kara henia dalana amo ena hahemaoro dalana dekenai dahaka ita dibaia?

Dirava ese matabodaga karadia lalonai idia vareai taudia eiava Natudia bona Vabu idia dagedage henia taudia do ia hahemaoro henidia. Bema iena taunimanima be ia idia badinaia bona ma haida idia kara namo henia, idia do ia hanamoa.​—w19.02, rau 22-23.

Dahaka do ita karaia bema tomadiho idauna tauna be guriguri ia gwauraia?

Edia guriguri dokonai “amen” ita gwauraia lasi, eiava guriguri lalonai ta ta iseda imana ita dogoatao lasi. Unai bamona negadia ai sibona eda lalona ai guriguri ita gwauraia diba.​—w19.03, rau 31.

Edena dala ai natuna hadikaia karana be kara dikana momokani?

Sex amo natu maragina hadikaia karana be kara dikana momokani, kongrigeisen ai, gavamani ena taravatu henunai, bona Dirava vairanai danu. Elda taudia ese unai kara dikana ia karaia tauna ena sivarai be gavamani henunai taravatu idia atoa taudia dekenai do idia ripotilaia.​—w19.05, rau 9-10.

Edena dala ai emu kara oi haidaua diba?

Ita do ia durua daladia: Iehova oi guriguri henia. Laloa dobu. Tura namodia oi abia hidi.​—w19.06, rau 11.

Hari dagedage ia do vara lasi lalonai ita hegaegae totona, dahaka ita karaia?

Namona be emu hetura karana Iehova ida oi hagoadaia. Oi abia dae momokani Iehova ese oi ia lalokau henia bona oi do ia rakatania lasi. Danu dina iboudiai Baibel oi duahia, hanaihanai oi guriguri. Namona be oi abia dae Dirava ena Basileia ese do ia havaraia hahenamo ibounai be do idia vara momokani. Oi ura henia Baibel siridia bona anedia oi laloaboio lasi.​—w19.07, rau 2-4.

Dahaka ita karaia diba iseda varavara ita durudia totona?

Mai anina bada gauna be ma haida ita laloa bada, haheitalai namona ita hahedinaraia, ita haheauka bona ita aonega.​—w19.08, rau 15-17.

Edena dala ai Mataio 11:28 ai Iesu ena gwauhamata amo goada matamata ita abia?

Ita be mai iseda hakaua taudia namodia, tura namodia, bona gaukara namo hereana ita karaia.​—w19.09, rau 23.

Edena dala ai Dirava ese ita dekenai gau ta ita karaia ena ura bona goada ia henia diba? (Fili. 2:13)

Baibel ita duahia bona laloa dobu neganai, Dirava ese ita dekenai goada ia henia diba iena ura ita karaia totona. Ia ese lauma helaga amo diba bona aonega ia henia diba.​—w19.10, rau 21.

Abia hidi ta ita do karaia lasi lalonai dahaka ita karaia be namo?

Dala faiv be inai: Research namona oi karaia. Aonega totona oi guriguri. Oi karaia abia hidi ena badina oi laloa. Tahua gaudia oi atoa.​—w19.11, rau 27-29.

Satani ese Heva dekenai souli ia mase diba lasi lalohadaina ia gwauraia, a?

Lasi. Satani ese Heva ia hamaoroa do ia mase lasi, to ia gwau lasi ena tauanina ena kahana ta be gabu ma ta dekenai do ia mauri. Tomadiho koikoi ibounai be Noa ena negai ia vara Abata ese ia hadikaia ore. Souli ia mase diba lasi lalohadaina be reana Babela kohorona idia haginia taudia be Dirava ese tanobada ena kahana ibounai dekenai ia do siaia lasi neganai ia hamatamaia.​—w19.12, rau 15.