Lasi. Diabolo ia gwau lasi, bema Heva ese Dirava ia taravatua au huahua ia ania, do ia mase diba to ena tauanina ena kahana ta (hari momo ese idia abia dae mase diba lasi souli) be gabu ma ta dekenai do ia mauri. Satani be gaigai amo Heva ia hereva henia, bema au huahua ia ania, ‘dohore ia mase lasi.’ Danu, ia gwau, Heva be do ia mauri noho, bona tanobada dekenai mauri namona do ia moalelaia, bona Dirava ese do ia biagua lasi.​—⁠Gen. 2:17; 3:3-5.

Bema souli ia mase diba lasi lalohadaina ena hahediba hereva koikoi be Eden ai ia hamatamaia lasi, edena negai ia hamatamaia? Unai ita diba lasi. Ita dibaia gauna be tomadiho koikoi ibounai be Noa ena negai ia vara Abata ese ia hadikaia ore. Unai dainai tomadiho koikoi ta ia noho lasi, to Noa bona ena ruma bese​—tomadiho momokani idia badinaia taudia​—⁠sibona idia mauri.

Unai dainai ita gwau diba taunimanima edia souli ia mase diba lasi lalohadaina ena hahediba koikoi herevana be reana Abata ia vara murinai ia matamaia. Dirava ese Babela hanuana ai taunimanima edia gado ia haidaua bona “tanobada kahana kahana ibounai dekenai idia lao” neganai, idia ese taunimanima edia souli ia mase diba lasi lalohadaina idia abia lao. (Gen. 11:8, 9) Ena be ita diba lasi unai koikoi herevana be edena negai ia matamaia, to ita diba momokani “koikoi ena tamana,” Satani Diabolo, ese unai ia gunalaia bona ia moale unai koikoi herevana be ia bada ia lao noho.​—⁠Ioa. 8:44.