1. Iehova ia diba momokani tama sina be dahaka do idia karaia?

IEHOVA ese tau bona hahine ginigunadia ia havaraia neganai idia dekenai natuna havaraia ena ura ia atoa. Baibel ia gwau: “Natudia be [Iehova] ena harihari gauna.” (Sal. 127:3) Unai ena anina be dahaka? Mani inai oi laloa, emu turana namona ta be oi dekenai moni sisina bada ia henia do oi naria totona. Emu hemami be edena bamona? Momokani, do oi moale badina oi ia abidadama henia. To, reana do oi lalohekwarahi edena bamona unai moni do oi naria namonamo. Iseda Turana namona Iehova, ese tama sina dekenai moni ia hereaia momokani gauna ta ia henia idia naria totona. Ia diba momokani tama sina ese edia natudia do idia naria bona hamoalea diba.

2. Edena henanadai do ita herevalaidia?

² Daika ese abia hidi do ia karaia headava tau bona hahine ese natudia idia havaraia bona edena negai? Bona tama sina be dahaka idia karaia diba edia natudia idia durua mauri idia moalelaia totona? Keristani headava taudia ese abia hidi maorodia idia karaia totona, Baibel ena hakaua herevadia ese idia ia durua daladia mani ita herevalaia.

3. (a) Natuna havaraia ena abia hidi be daidia ese idia karaia? (b) Headava taudia edia turadia bona ruma bese ese edena Baibel ena hakaua herevadia idia laloatao be namo?

³ Tano haida ai, momo idia laloa tau bona hahine idia headava matamata murinai natudia idia havaraia diba. Nega haida ruma bese taudia eiava ma haida ese idia doria unai kastom idia  badinaia totona. Asia ai ia noho tadikaka ta, ladana Jethro, * ia gwau: “Kongrigeisen lalonai, mai edia natudia headava taudia ese natuna lasi headava taudia idia doria natudia idia havaraia totona.” Asia ai ia noho tadikaka ma ta, ladana Jefri, ia gwau: “Haida ese natuna lasi headava taudia idia hamaoroa idia buruka neganai, ta ese idia do ia naria lasi.” To, headava taudia ta ta sibona ese abia hidi do idia karaia natudia idia havaraia eiava lasi. Unai be edia maduna dainai idia sibona ese abia hidi do idia karaia. (Gal. 6:5) Momokani, turadia bona ruma bese idia ura headava matamata tau bona hahine idia moale. To namona be idia laloatao natuna havaraia eiava lasi ena abia hidi be headava taudia edia.​—⁠1 Tes. 4:11.

4-5. Headava tau bona hahine ese dahaka gau rua idia herevalaia be namo, bona edena negai unai idia herevalaia? Herevalaia.

⁴ Idia ura natuna idia havaraia headava taudia ese inai mai anina bada henanadai rua idia herevalaia be namo: Ginigunana, edena negai idia ura natudia do idia havaraia? Iharuana, natudia hida do idia havaraia? Edena nega be namo headava tau bona hahine ese unai idia herevalaia totona? Bona dahaka dainai unai henanadai rua be mai anina bada?

⁵ Nega momo, tau bona hahine idia do headava lasi lalonai, natudia idia havaraia eiava lasi karana do idia herevalaia. Dahaka dainai? Badina ta be, idia ruaosi idia lalotamona be namo. Danu, do idia laloa bema idia hegeregere unai mai anina bada maduna idia huaia totona. Headava taudia haida be edia lalona idia hadaia headava murinai lagani ta eiava rua idia naria gabeai natudia idia havaraia, badina tama sina ai idia lao neganai edia nega bona goada bada do idia gaukaralaia. Idia laloa idia naria sisina karana ese idia do ia durua headava maurina idia manadalaia bona idia gaukara hebou namonamo totona.​—⁠Efe. 5:33.

6. Headava taudia haida be ita noholaia negana dainai dahaka abia hidi idia karaia?

⁶ Keristani taudia ma haida be Noa ena natudia toi bona edia adavana edia haheitalai idia badinaia. Unai headava taudia toi be maoromaoro natudia idia havaraia lasi. (Gen. 6:18; 9:18, 19; 10:1; 2 Pet. 2:5) Iesu ese iseda nega be “Noa ena nega” ida ia hahegeregerea, bona momokani ita be “nega aukadia” lalonai ita noho. (Mat. 24:37; 2 Tim. 3:1) Unai dainai headava taudia haida be abia hidi idia karaia natuna do idia havaraia haraga lasi, unai amo edia nega bada idia henia Keristani hesiai gaukara idia karaia totona.

7. Luka 14:28, 29 bona Aonega Herevadia 21:5 edia hakaua herevana ese edena dala ai headava taudia ia durua?

 ⁷ Natudia do idia havaraia eiava lasi, o natudia hida idia havaraia karana dekenai abia hidi idia ura karaia neganai, aonega headava taudia be Luka 14:28, 29 ena hakaua herevana idia badinaia. (Duahia.) Gau badana be kohoro ta ia ura haginia tauna bamona, do idia laloa bema edia moni be hegeregere eiava lasi. Ekspiriens tama sina idia hamomokania natudia idia naria totona moni sibona ia noho be hegeregere lasi to edia nega bona goada idia henia danu be namo. Unai dainai headava taudia ese inai mai anina bada henanadai idia lalodia be namo: ‘Ai ruaosi be moni gaukara do ai karaia emai ruma bese ena dabu gaudia ai hoia totona, a? Do ai hoia “dabu gaudia” dekenai ai lalotamona, a? Bema ai ruaosi ai gaukara, daika ese emai natuna do ia naria? Daika ena lalohadai bona kara do idia badinaia?’ Mai manau ida unai henanadai idia herevalaia headava taudia ese Aonega Herevadia 21:5 ena hakaua herevana idia badinaia.​—⁠Duahia.

8. Keristani headava taudia dekenai dahaka hekwakwanai idia vara diba, bona mai ena lalokau tau be dahaka do ia karaia?

⁸ Tama bona sina ese natudia naria karana dekenai edia nega bona goada idia henia be namo. Unai dainai bema headava taudia be nega kwadogi lalonai natudia momo idia havaraia, do idia hekwarahi natudia ta ta idia durua namonamo totona. Mai edia natuna momo headava taudia haida idia gwau, nega haida idia hesiku. Sina ta be ena goada do ia ore bona ia lalohekwarahi diba. Unai dainai do ia hegeregere lasi, hanaihanai iena stadi, guriguri bona haroro gaukara ia karaia totona. Danu, hekwakwanai ta be do ia auka Keristani heboudia dekenai ia kamonai namonamo bona heduru ia abia totona. Momokani, mai ena lalokau tau ese ena adavana do ia durua hebou gabudia bona ruma dekenai natudia ia naria totona. Hegeregere, hahine durua totona ruma gaukaradia do ia karaia. Ia be do ia gaukara goada hanaihanai Ruma Bese ena Tomadiho ia karaia unai amo ena ruma bese ibounai do ia durua. Bona Keristani tama ese hanaihanai haroro gaukara ai edia ruma bese idia bamoa be namo.

9-10. Tama sina ese edia natuna idia durua totona, dahaka idia karaia be namo?

⁹ Tama sina be dahaka idia karaia diba edia natudia idia durua Iehova idia lalokau henia totona? Edena dala ai inai tanobada ena kara dika idauidau amo edia natudia idia gimaia diba? Tama sina ese do idia karaia gaudia haida mani ita herevalaia.

¹⁰ Iehova ena heduru totona oi guriguri. Samson ena tama sina, Manoa bona ena adavana  edia haheitalai mani oi laloa. Manoa ia diba ena hahine be natuna mero ta do ia havaraia neganai, ia be Iehova ia noia natuna naria dalana ia hadibaia totona.

11. Gunalaia Taudia 13:8 ena hereva bamona, tama sina ese edena dala ai Manoa ena haheitalai idia tohotohoa diba?

¹¹ Nihad bona Alma be Bosnia bona Herzegovina amo, idia ese Manoa ena haheitalai amo diba idia abia. Idia gwau: “Manoa hegeregerena, Iehova ai noia ai ia durua tama sina namodia ai ai lao totona. Bona Iehova ese dala idauidau amo emai guriguri ia haerelaia, hegeregere Baibel, Baibel pablikeisen, kongrigeisen heboudia, bona hebouhebou idauidau amo ai ia durua.”​—⁠Gunalaia Taudia 13:8 duahia.

12. Iosepa bona Maria be edia natudia dekenai dahaka haheitalai namona idia hahedinaraia?

¹² Emu haheitalai amo idia oi hadibaia. Emu hereva be mai anina bada; to emu natudia be oi karaia gaudia amo diba idia abia. Ita diba Iosepa bona Maria be Iesu bona edia natudia ma haida dekenai haheitalai namona idia hahedinaraia. Iosepa be ia gaukara goada ena ruma bese durua totona. Danu, Iosepa ese idia ia hagoadaia Dirava tomadiho henia karana idia laloa bada totona. (Deu. 4:9, 10) Ena be Taravatu ia gwau lasi Iosepa ese “lagani ta ta ai” ena ruma bese ia abia lao Ierusalema ena Pasova aria dekenai, to unai ia karaia. (Luka 2:41, 42) Reana Iosepa ena negai idia noho tama haida idia laloa, edia ruma bese ida gabu ma ta dekenai do idia lao totona be ia auka, nega do idia haorea kava bona moni be do ia hegeregere lasi. To, Iosepa be Dirava tomadiho henia karana ia laloa bada bona ena natudia ia hadibaia unai bamona idia karaia totona. Danu Maria be Baibel ia diba namonamo. Ena kara bona hereva amo, ena natudia ia hadibaia Dirava ena hereva idia lalokau henia totona.

13. Edena dala ai headava tau bona hahine ta be Iosepa bona Maria edia haheitalai idia tohotohoa?

¹³ Matamanai ita herevalaia taudia, Nihad bona Alma, idia ura Iosepa bona Maria edia haheitalai idia tohotohoa. Edena dala ai unai ese idia ia durua edia natuna mero dekenai Dirava lalokau henia bona hesiai henia karana idia hadibaia totona? Idia gwau, “Emai kara amo, ai ura emai natuna mero dekenai ai hahedinaraia Iehova ena hakaua dalana badinaia karana be namo herea.” Nihad ma ia gwau, “Namona be emu natudia dekenai oi be haheitalai namona.”

14. Dahaka dainai tama sina be natudia ese idia bamoa taudia idia diba be namo?

¹⁴ Emu natudia oi durua tura namodia idia abia hidi totona. Namona be tama bona sina idia diba edia natudia be daidia idia bamoa bona dahaka idia karaia noho. Danu tama sina be natudia ese social media bona mobael fon amo idia hereva henia taudia idia dibaia be namo. Natudia be idia bamoa taudia edia lalohadai bona kara idia tohotohoa diba.​—⁠1 Kor. 15:33.

15. Tama sina ese Jessie ena haheitalai amo dahaka idia dibaia?

¹⁵ Bema tama sina be kompiuta bona mobael fon gaukaralaia dalana idia diba lasi, dahaka idia karaia diba? Philippines ai ia noho tama ta ladana, Jessie ia gwau: “Teknoloji gaukaralaia dalana ai diba namonamo lasi. To, unai ese ai ia koua lasi emai natudia dekenai elektronik gaudia gaukaralaia kerere ena dika ai herevalaia totona.” Ena be Jessie ese unai gaudia gaukaralaia dalana ia diba namonamo lasi, to ena natudia ia koua lasi elektronik gaudia idia gaukaralaia totona. Ia gwau: “Egu natudia lau hagoadaia elektronik gaudia idia gaukaralaia gado matamata ta idia dibaia, hebou gaudia idia stadilaia, bona dina ta ta ai Baibel idia duahia totona.” Bema oi be tama eiava sina ta, emu natudia ida iseda websait jw.org^® amo kahana ladana “Teenagers” ai, text meseij siaia bona intanet amo foto siaia karana umui duahia bona herevalaia, a? Danu, emu natudia  ida vidio ladana Daika ese Oi Ia Biagua​—⁠Oi Eiava Emu Mobael? bona Mai Aonega ida Intanet Gaukaralaia * umui riviulaia vadaeni, a? Unai gaudia ese oi do idia durua emu natudia dekenai mai aonega ida elektronik gaudia gaukaralaia daladia oi hadibaia totona.​—⁠Aon. 13:20.

16. Tama sina momo be dahaka idia karaia, bona dahaka ia vara?

¹⁶ Tama sina momo be dala idia karaia edia natudia ese Dirava ena hesiai gaukara lalonai haheitalai namona idia hahedinaraia taudia idia bamoa totona. Côte d’Ivoire dekenai idia noho headava taudia Dani bona Bella be nega momo sekit tauna idia boiria edia ruma dekenai ia noho totona. Dani ia gwau: “Unai kara ese emai natuna mero ginigunana ia hagoadaia. Ia be painia gaukara ia hamatamaia bona hari substitute sekit gaukara ia karaia noho.” Unai bamona dala oi badinaia emu natudia oi durua totona, a?

17-18. Tama sina ese edena negai edia natudia dekenai treinini idia henia matamaia?

¹⁷ Natudia idia do maragi neganai treinini oi henia. Natudia idia do maragi neganai tama sina ese treinini idia henia be namo. (Aon. 22:6) Mani Timoteo ita laloa, ia do mero matamata neganai aposetolo Paulo ia bamoa. Timoteo ena sinana, Eunike, bona ena tubuna hahine Loi ese Timoteo be “beibi negana amo” treinini idia henia.​—⁠2 Tim. 1:5; 3:15.

¹⁸ Côte d’Ivoire dekenai idia noho headava tau bona hahine, John bona Paula, be edia natudia siks dekenai Iehova lalokau henia bona hesiai henia karana idia hadibaia. Dahaka ese idia ia durua? Idia ese Eunike bona Loi edia haheitalai idia tohotohoa. Idia gwau, “Emai natudia be beibi negana amo, Dirava ena hereva be idia dekenai ai hadibaia matamaia.”​—⁠Deu. 6:6, 7.

19. Emu natudia dekenai Dirava ena Hereva oi hadibaia ena anina be dahaka?

¹⁹ Iehova ena Hereva be emu natudia dekenai oi “hadibaia goada” ena anina be dahaka? “Hadibaia goada” ena anina be “idia oi hadibaia bona oi gwauraia loulou.” Tama sina ese unai idia karaia totona, nega idia atoa be namo hanaihanai edia natu maragidia ida idia hebamo totona. Nega haida edia natudia dekenai unai hadibaia herevadia idia gwauraia loulou dainai idia lalomanoka diba. To, namona be  tama sina idia diba bema idia hekwarahi edia natudia idia durua Dirava ena hereva idia lalopararalaia bona badinaia diba.

20. Edena dala ai natudia naria karana dekenai Salamo 127:4 ena sisiba ita badinaia diba?

²⁰ Idia oi diba namonamo. Salamo 127 ese natudia be diba (arrow) ida ia hahegeregerea. (Salamo 127:4 duahia.) Diba be gau idauidau amo idia karaia bona edia toana be idauidau hegeregerena, natudia danu be idauidau. Unai dainai tama sina ese edia natudia ta ta do idia hadibaia dalana idia laloa be namo. Israel ai, headava tau bona hahine ta ese edia natudia rua ese Iehova idia hesiai henia totona, idia ia durua dalana be inai bamona idia herevalaia, “Emai natudia ta ta edia Baibel stadi ai karaia.” Momokani, ruma bese kwaradia ta ta ese abia hidi idia karaia be namo bema unai bamona stadi dalana idia badinaia eiava lasi.

21. Tama sina be Iehova amo dahaka heduru idia abia diba?

²¹ Tama sina be nega haida idia davaria hekwakwanai dainai do idia lalohekwarahi bada, to natudia be Iehova ena harihari gaudia. Ia be ia noho hegaegae heduru ia henia totona. Bona mai ura ida tama sina edia guriguri ia kamonai henia. Danu, ia ese unai guriguri ia haerelaia totona Baibel, iseda pablikeisen idauidau bona kongrigeisen ai idia noho ekspiriens tadikaka taihu edia haheitalai bona sisiba namodia ia gaukaralaia.

22. Tama sina ese natudia dekenai dahaka heduru idia henia diba?

²² Momo idia gwau natu tamona be lagani 20 lalonai oi naria diba, to tama sina be edia mauri ibounai lalonai natudia idia naria. Tama sina ese edia natudia idia durua totona, namona be idia lalokau henia, edia nega idia henia, bona Baibel ena hakaua hereva amo treinini idia henia. Natu ta ta ese unai treinini idia lalopararalaia dalana be idauidau. To, Iehova idia lalokau henia tama sina ese idia naria natudia momo edia hemami be Asia ai ia noho taihu ta ladana Anna ena hemami bamona, ia gwau: “Egu tama sina amo lau abia treinini lau laloa lou neganai, lau moale bada badina lau idia matahakani henia bona Iehova ena dala idia hadibaia. Lau dekenai mauri idia henia sibona lasi, to mai anina bada mauri dalana idia hadibaia.” (Aon. 23:24, 25) Keristani taudia milioni momo edia hemami danu be unai bamona.