OI BE tanikiu karana oi hahedinaraia tauna, a? Ita ta ta ese unai henanadai ita laloa be namo. Baibel ia peroveta hari iseda negai, taunimanima momo be “tanikiu karana do idia hahedinaraia lasi.” (2 Tim. 3:2) Reana oi hedavari henia taudia haida be idia ura ma haida ese idia totona gaukara idia karaia, eiava idia dekenai gau haida idia henia. Toana be idia ura lasi idia abia gaudia dainai tanikiu karana idia hahedinaraia. Reana do oi ura lasi unai bamona taudia oi bamoa, ani?

To, Iehova ese ena hesiai taudia ia hamaoroa: “Tanikiu karana do umui hahedinaraia.” (Kol. 3:15) Unai dainai tanikiu karana ita hahedinaraia be namo. Badina idauidau dainai unai ita karaia diba.

Tanikiu karana ita hahedinaraia neganai lalohadai maorona ita abia diba. Tanikiu karana ia hahedinaraia tauna be do ia moale, bona tanikiu karana ia abia dae tauna danu ia moale. Dahaka dainai tanikiu karana ese ita bona ma haida dekenai moale ia havaraia? Mani inai haheitalai oi laloa: Bema oi itaia haida be mai ura ida oi totona gau ta idia karaia, unai ese dahaka ia hahedinaraia? Idia be oi idia laloa bada. Unai oi dibaia neganai do oi moale. Ruta dekenai unai ia vara danu. Boasi be Ruta dekenai hariharibada karana ia hahedinaraia. Momokani, Ruta ia moale bada badina ia mamia ta ese ia ia laloa.​—Ruta 2:10-13.

Dirava dekenai emu tanikiu karana oi hahedinaraia be namo. (1 Tes. 5:18) Momokani, reana nega haida oi dekenai ia henia harihari gaudia momo oi laloa. (Deu. 8:17, 18; Kara 14:17) Dirava ena kara namodia oi laloa sibona lasi, to nega oi atoa Dirava ese oi bona emu lalokau taudia dekenai ia henia hahenamo idauidau oi laloa totona. Emu Havaraia Tauna ena hariharibada karana oi laloa dobu neganai, unai ese oi do ia hagoadaia ia oi hanamoa bona ena lalokau karana oi laloa bada totona.​—⁠1 Ioa. 4:9.

Iehova ena hariharibada karana bona ia henia hahenamo sibona oi laloa be hegeregere lasi; to iena kara namodia dainai oi tanikiu henia. (Sal. 100:4, 5) Tanikiu karana ese taunimanima dekenai moale bada ia havaraia.

Tanikiu karana ena namo ma ta be emu hetura karana ma haida ida do ia hagoadaia. Ita ibounai ita ura ma haida ese ita idia laloa bada. Bema mai kudouna ibounai ida ta ena kara namona dainai oi tanikiu henia, umui ruaosi be tura namodia ai do umui lao. (Roma 16:3, 4) Danu, tanikiu karana idia laloa bada taudia be ma haida idia durua. Haida ese idia dekenai tanikiu karana idia hahedinaraia neganai, unai ese idia ia durua ma haida dekenai unai bamona idia karaia totona. Oibe, ma haida durua karana ese moale ia havaraia. Unai be Iesu ena hereva hegeregerena, ia gwau: “Henia kara ena moale be bada, to abia kara ena moale be maragi.”​—⁠Kara 20:35.

University of California ena profesa ta ladana, Robert Emmons ia gwau: “Tanikiu karana ita hahedinaraia totona, heduru heheni karana be mai anina bada. Nega haida ita henia bona nega ma haida ita abia.” Iseda mauri ita moalelaia totona, ma haida ese dala idauidau ai ita idia durua be namo. Hegeregere, ita dekenai aniani do idia henia eiava medikol dalanai heduru do idia henia. (1 Kor. 12:21) Tanikiu karana ia abia dae tauna be ma haida ese ia totona idia karaia gaudia ia laloa bada. Unai dainai haida ese oi totona gau ta idia karaia neganai, hanaihanai tanikiu karana oi hahedinaraia, a?

Tanikiu karana oi hahedinaraia ena badina ma ta be oi ia durua lalohadai namodia oi abia totona. Ita gwau diba emu lalona be filter ta bamona. Oi ia durua lalohadai dikadia ia koua bona gau namodia sibona oi laloa. Bona hekwakwanai do oi laloa momo lasi. Hanaihanai tanikiu karana oi hahedinaraia neganai, gau namodia momo do oi laloa bona do oi moale. Tanikiu karana oi laloa bada neganai, unai ese oi ia durua aposetolo Paulo ena hereva oi badinaia totona: “Nega ibounai Lohiabada dainai do umui moale.”​—⁠Fili. 4:4.

Tanikiu karana oi hahedinaraia neganai, lalohadai kereredia do oi dadaraia. Tanikiu karana oi hahedinaraia be auka lasi, to nega haida oi mama, hebogahisi bona oi badu danu, a? Tanikiu karana idia hahedinaraia taudia be kohu momo idia haboua lasi. Idia dekenai ia noho vadaeni gaudia idia moalelaia, bona kohu ma haida abia karana idia laloa bada lasi.​—⁠Fili. 4:12.

Oi be Keristani tauna ta dainai, do oi laloparara Satani ia ura inai nega dokona ai idia vara hekwakwanai idauidau dainai oi lalometau. Do ia moale bema idia vara gaudia dainai lalohadai kereredia oi abia bona oi maumau momo. Bema unai bamona kara oi hahedinaraia, sivarai namona harorolaia gaukarana do oi karaia namonamo lasi. Momokani, tanikiu karana be Dirava ena lauma helaga ena huahua ida ia gaukara hebou, hegeregere Dirava ese ia henia gau namodia dainai oi moale bona ia gwauhamatalaia gaudia ibounai oi abidadama henia.​—⁠Gal. 5:22, 23.

Oi be Iehova ena Witnes ta dainai, reana inai atikol ese tanikiu karana ia herevalaia dalana oi abia dae. Danu, oi diba tanikiu karana hahedinaraia totona be mai ena hekwarahi. To, namo lasi oi lalomanoka. Tanikiu karana oi hahedinaraia diba. Edena dala ai? Dina ta ta ai nega oi atoa emu mauri ai oi moalelaia diba gaudia haida oi laloa totona. Bema unai bamona oi karaia, do oi hekwarahi lasi tanikiu karana oi hahedinaraia totona. Bona do oi abia moale ese mauri ena hekwakwanai idia laloa momo taudia edia moale ia hereaia. Dirava bona ma haida ese idia karaia gau namodia oi laloa, unai ese oi do ia hagoadaia bona hamoalea. Eiava unai gau namodia oi torea diba. Bona oi ia hamoalea gaudia rua eiava toi oi torea diba.

Tanikiu karana idia stadilaia taudia haida idia gwau, “hanaihanai tanikiu karana ita hahedinaraia karana ese iseda harana ia durua diba gau namodia sibona ita laloa totona.” Tanikiu karana ia hahedinaraia tauna be ia moale. Unai dainai oi abia hahenamo idauidau oi laloa, emu mauri ai idia vara gau namodia oi moalelaia, tanikiu karana oi hahedinaraia noho! Oi abia gau namodia oi moalelaia sibona lasi, to ‘[Iehova] do oi tanikiu henia! [Iehova] do oi hanamoa, badina iena kara be namo.’ Oibe, ‘tanikiu karana do oi hahedinaraia.’​—⁠1 Siv. 16:34; Kol. 3:15.