1-2. Atikol 48 ai dahaka ita herevalaia, bona inai atikol ai dahaka do ita herevalaia?

ATIKOL 48 ai, ita ese Levitiko karoa 19 ena hakaua daladia haida ita herevalaia. Hegeregere, siri 3 ai ita dibaia, Iehova ese Israela taudia ia hagoadaia tama sina idia matauraia totona. Bona unai sisiba ita badinaia daladia ita herevalaia, hegeregere tama sina ita naria, idia ita hagoadaia, bona ita durua Iehova kahirakahira idia noho totona. Unai siri tamona ai, Dirava ese ena taunimanima ia hadibaia Sabati idia badinaia be mai anina bada. Ena be hari Sabati taravatuna ita badinaia lasi, to bema dina ta ta ai Iehova totona nega ita atoa, ita be unai taravatu ena hakaua herevana ita badinaia. Unai bamona ita karaia neganai, ita hahedinaraia ita ura ita helaga, Levitiko 19:2 bona 1 Petero 1:15 edia hereva bamona.

² Inai atikol ai, ita ese Levitiko karoa 19 ena siri ma haida do ita herevalaia. Unai karoa amo tauanina kahana ta ia dika taudia ita laloa bada, bisinesi karadia lalonai ita kara momokani, bona ma haida dekenai lalokau ita hahedinaraia daladia do ita dibaia. Ita helaga be namo badina Dirava be helaga, unai dainai inai stadi ai unai do ita dibaia.

3-4. Levitiko 19:14 hegeregerena, edena dala ai taia kudima bona matakepulu taudia idia kara henia be namo?

³ Levitiko 19:14 duahia. Iehova ia ura ena taunimanima ese tauanina kahana ta ia dika taudia idia kara namo henia. Hegeregere, Israela taudia ese taia kudima tauna idia gwauraia dika lasi be namo. Ena anina be edia kara o hereva amo ia idia hagaria o  hereva dika henia lasi. Badina unai be taia kudima tauna kara dika henia karana! Idia be ita gwauraia herevadia do idia kamonai lasi dainai, sibona gimaia totona do idia hereva lasi.

⁴ Danu, siri  14 ai Dirava ese ena hesiai taudia ia hamaoroa ‘koua gauna ta idia atoa’ lasi be namo. Buka ta ese tauanina ena kahana ia dika taudia ia herevalaia, ia gwau: “Middle East tanodia ai, nega momo unai bamona taudia idia hahisia bona kara namo henia lasi.” Reana haida be matakepulu tauna ena raka gabuna ai gau ta idia atoa, badina idia ura ia idia hahisia eiava kirikirilaia. Unai be kara dikana! Siri 14 ai ia noho taravatu ese Iehova ena taunimanima ia durua, tauanina ena kahana ta ia dika tauna dekenai hebogahisi idia hahedinaraia totona.

5. Edena dala ai tauanina ena kahana ia dika taudia dekenai hebogahisi ita hahedinaraia?

⁵ Iesu ese tauanina ena kahana ta ia dika tauna dekenai hebogahisi ia hahedinaraia. Ioane Bapatiso dekenai ia siaia herevana oi laloatao, ia gwau: “Matakepulu taudia be hari idia itaia, aena dika taudia be idia raka, lepera taudia be idia goeva, taia kudima taudia be idia kamonai, [bona] mase taudia be idia toreisi lou.” Iesu ena hoa karadia idia itaia murinai, “taunimanima ibounai ese . . . Dirava idia hanamoa.” (Luka 7:20-22; 18:43) Keristani taudia idia ura Iesu idia tohotohoa bona tauanina ena kahana ia dika taudia dekenai hebogahisi idia hahedinaraia. Unai dainai, idia ese unai bamona taudia idia laloa bada, idia kara namo henia, bona haheauka karana idia hahedinaraia. Iehova ese ita dekenai siahu ia henia lasi Iesu bamona hoa karadia ita karaia totona. To hahenamo ia henia, matakepulu taudia bona Dirava idia diba lasi taudia dekenai sivarai namona ita harorolaia bona ita hadibaia, paradaiso ai ibounai be do idia goevadae bona Dirava do idia tura henia. (Luka 4:18) Unai sivarai namona ese momo ia durua Dirava idia hanamoa totona.

6. Edena dala ai Levitiko karoa 19 ese ita ia durua Taravatu 10 ita lalopararalaia totona?

⁶ Levitiko karoa 19 ena siri haida ese Taravatu 10 ai idia noho hereva haida edia anina ia habadaia. Hegeregere, taravatu namba 8 ia gwau:  “Namo lasi umui henaohenao.” (Eso. 20:15) Ta ia laloa unai taravatu ia badinaia dalana be, ma ta ena gaudia do ia abia lasi. To, reana ia be dala ma haida ai ia henaohenao diba.

7. Edena dala ai bisinesi tauna ia henaohenao diba?

⁷ Reana bisinesi tauna be do ia hekokoroku, badina ia laloa ma ta ena kohu ia abia lasi. To ma haida ida bisinesi gaukaradia ia karaia neganai, ia kara momokani, a? Levitiko 19:35, 36 ai, Iehova ia gwau: “Namo lasi hahetohoa gaudia kereredia umui gaukaralaia, gau haida edia lata, edia metau, bona ranu gaudia umui hahetohoa totona. Namona be sikele maorodia, metau gaudia maorodia, hahetohoa bosea maorona bona ranu gaudia hahetohoa hodu maorona umui gaukaralaia.” Bisinesi tauna ese hoihoi taudia ia koia totona sikele kereredia ia gaukaralaia lasi be namo, unai be henaohenao karana. Levitiko karoa 19 ena siri haida ese unai ia hahedinaraia.

8. Edena dala ai Levitiko 19:11-13 ese Iuda taudia ia durua taravatu namba 8 idia badinaia totona, bona edena dala ai unai ese ita ia durua?

⁸ Levitiko 19:11-13 duahia. Levitiko 19:11 ena hamatamaia herevana be inai: “Namo lasi umui henaohenao.” Siri 13 ese henaohenao karana be koikoi dalanai bisinesi karaia dalana ida ia hahegeregerea, ia gwau: “Namo lasi emu varavara ena kohu be koikoi dalana amo oi abia.” Unai dainai, ta be bisinesi lalonai ia kara momokani lasi, unai tauna be ia henaohenao. Taravatu namba 8 ia gwau henaohenao karana be dika. To Levitiko bukana ese Iuda taudia ia durua, unai taravatu ena hakaua dalana idia lalopararalaia totona, unai be gau ibounai lalonai idia kara momokani. Iehova ena lalohadai koikoi bona henaohenao karana dekenai ita laloa namonamo be gau badana. Reana sibona ita nanadaia: ‘Levitiko 19:11-13 lau laloa neganai, egu bisinesi eiava moni gaukara dekenai senisi haida lau karaia be namo, a?’

9. Edena dala ai Levitiko 19:13 ena taravatu ese gaukara taudia ia durua?

⁹ Bisinesi ia karaia Keristani tauna ese kara momokani dekenai inai ia laloa be namo. Levitiko 19:13 ia gwau: “Davana abia totona ia gaukara tauna ena moni be hanuaboi ai oi dogoatao lasi ela bona dabai.” Israela ai, momo be biru taudia, bona idia totona idia gaukara taudia be dina ta ta ena dokonai edia gaukara ena davana idia henia. Bema unai gaukara tauna dekenai ena davana idia henia lasi, reana unai dina ai do ia hegeregere lasi ena famili ia ubua totona. Iehova ia gwau: “Ia be ia dabu bona ia ura momokani ena gaukara davana ia abia.”​—Deu. 24:14, 15; Mat. 20:8.

10. Levitiko 19:13 ai dahaka ita dibaia?

¹⁰ Hari inai negai, moni gaukara idia karaia taudia be hua ta eiava rua murinai pei idia abia, to dina ta ta ai lasi. To, Levitiko 19:13 ena hakaua herevana be mai anina bada. Bisinesi taudia haida be edia gaukara taudia dekenai pei maorona idia henia lasi. Idia diba edia gaukara taudia be do idia gaukara noho, ena be pei maragina idia abia. Unai be hegeregere, bisinesi tauna ese ‘gaukara tauna ena moni ia dogoatao’ noho. Bisinesi ia karaia Keristani tauna ese ena gaukara taudia dekenai pei maorona ia henia be namo. Levitiko karoa 19 amo gau ma haida do ita dibaia.

11-12. Levitiko 19:17, 18 amo Iesu be dahaka ia gwau?

¹¹ Dirava ia ura taunimanima ita kara namo henia, to unai sibona lasi, gau ma ta ita karaia danu. Levitiko 19:17, 18 dekenai unai ita itaia diba. (Duahia.) Iehova ia gwau: “Emu varavara do oi lalokau henia, oi sibona oi lalokau henia hegeregerena.” Bema Keristani tauna ia ura Dirava ia hamoalea, unai bamona ia karaia be namo.

¹² Iesu ese ia hahedinaraia Levitiko 19:18 ai ia  noho taravatu be mai anina bada. Nega ta Farisea tauna ese Iesu ia nanadaia: “Taravatu dekenai, edena be mai anina bada?” Iesu ia gwau Iehova ita lalokau henia mai kudouna ibounai, mauri ibounai, bona lalona ibounai ida, unai “taravatu be mai anina bada bona ginigunana.” Bena Iesu be Levitiko 19:18 ena hereva ia gwauraia, ia gwau: “Iharuana be inai: ‘Namona be emu dekena tauna oi lalokau henia, oi sibona oi lalokau henia hegeregerena.’” (Mat. 22:35-40) Dala idauidau ai ma haida dekenai lalokau ita hahedinaraia diba. Levitiko karoa 19 ai unai dala haida do ita dibaia.

13. Iosepa ena sivarai ita laloa neganai, edena dala ai Levitiko 19:18 ita lalopararalaia diba?

¹³ Iseda dekena taudia dekenai lalokau ita hahedinaraia dalana ta be Levitiko 19:18 ese ia hahedinaraia. Ia gwau: “Namo lasi emu taunimanima edia dika davana oi henia eiava idia oi badu henia noho.” Ita momo ita diba, reana ta be lagani daudau ena gaukara turana, sikuli turana, eiava ena famili memba ta ia badu henia! Namona be oi laloatao, Iosepa ena tadikaka 10 be ia dekenai idia badu dikadika dainai, gabeai kara dikana ta idia karaia. (Gen. 37:2-8, 25-28) To Iosepa be idia ia kara namo henia! Bona dagi badana ia abia neganai, ena tadikakadia edia dika davana ia henia diba, to idia dekenai hebogahisi ia hahedinaraia. Bona idia ia badu henia noho lasi. Ia ese Levitiko 19:18 ena hakaua herevana ia badinaia.​—Gen. 50:19-21.

14. Dahaka ese ia hahedinaraia Levitiko 19:18 ena hakaua herevadia ita badinaia noho be namo?

¹⁴ Keristani taudia ese Dirava idia hamoalea totona, Iosepa idia tohotohoa be namo, ia ese ena tadikaka edia dika davana ia haloua lasi, to idia ia gwauatao. Unai be Iesu ena guriguri hegeregerena, ita ia hagoadaia ita idia kara dika henia taudia edia dika do ita gwauatao. (Mat. 6:9, 12) Unai hegeregere, aposetolo Paulo ese Keristani taudia ia sisiba henia: “Egu lalokau taudia e, ta ena dika davana umui haloua lasi.” (Roma 12:19) Danu idia ia hagoadaia: “Bema ta be badina ta dainai ma ta dekenai ia maumau, ta ta emui kara do umui haheaukalaia noho bona mai kudouna ibounai ida do umui gwauatao heheni.” (Kol. 3:13) Iehova ena hakaua herevadia be idia idau lasi. Levitiko 19:18 ai ia noho taravatu ena hakaua herevadia ita badinaia be namo.

15. Edena haheitalai ese ia hahedinaraia ta ena dika ita gwauatao bona laloaboio be namo?

 ¹⁵ Mani inai haheitalai ita laloa. Hemami hadikaia karana be tauanina ai ia noho bero hegeregere. Bero haida be maragi, bona haida be bada. Hegeregere, kaia amo aniani ita hegaegaelaia lalonai, imana ita utua diba. Hisihisi do ita mamia, to do ia noho daudau lasi. Dina ta o rua murinai, reana imana ita utua gabuna do ita laloaboio. Unai hegeregerena, haida be gau maragidia dekenai ita idia hahisia diba. Reana, iseda turana ta ena hereva o kara ese ita ia hahisia, to ia ita gwauatao haraga diba. To bema ita utua gabuna be bada, reana doketa ese do ia turia bona kumia. Bema unai toto gabuna ita dogoatao loulou, reana sibona do ita hahisia. Madi, unai hegeregerena ta be ena lalona idia hahisia bada neganai, unai bamona ia karaia diba. Reana ia idia hahisia karadia do ia laloa loulou. To unai bamona ia karaia tauna be sibona ia hahisia noho. Oibe, Levitiko 19:18 ena hakaua herevana ita badinaia be mai ena namo!

16. (a) Levitiko 19:33, 34 bamona, Israela taudia ese idau tano taudia be edena bamona do idia kara henia? (b) Unai amo dahaka ita dibaia?

¹⁶ Iehova ese Israela taudia ia oda henia edia dekena taudia do idia lalokau henia neganai, ia gwau lasi edia iduhu o bese taudia sibona dekenai lalokau do idia hahedinaraia. To idia ia hamaoroa edia huanai idia noho idau tano taudia do idia lalokau henia danu. Unai hereva be Levitiko 19:33, 34 ai ia noho. (Duahia.) Iehova ia ura Israela taudia ese idau tano tauna be edia “bese tauna ta bamona” do idia kara henia bona “lalokau henia,” idia sibona idia lalokau henia bamona. Hegeregere, Taravatu ia gwau Israela taudia ese idau tano taudia bona ogogami taudia do idia koua lasi edia uma dekenai aniani oredia idia gogoa totona. (Lev. 19:9, 10) Idau tano taudia lalokau henia ena hakaua herevana be hari Keristani taudia ese idia badinaia be namo. (Luka 10:30-37) Edena dala ai? Taunimanima milioni momo be tano ma ta dekenai idia noho, bona reana haida be emui tano ai idia noho. Unai bamona tatau, hahine, bona natudia ita matauraia be mai anina bada.

17-18. (a) Levitiko 19:2 bona 1 Petero 1:15 ese ita ia hagoadaia dahaka ita karaia totona? (b) Aposetolo Petero ese ita ia hagoadaia dahaka mai anina bada gaukara ita karaia totona?

¹⁷ Levitiko 19:2 bona 1 Petero 1:15 ese Dirava ena taunimanima ia hagoadaia idia helaga  totona. Levitiko karoa 19 ena siri haida ese ita ia durua gau haida do ita karaia, unai amo Iehova ena lalonamo ita abia diba. Ita stadilaia vadaeni siridia ese ita karaia diba gaudia bona ita dadaraia gaudia haida ia herevalaia. * Keristani Grik Toretoredia ese idia hahedinaraia, Iehova ia ura unai hakaua herevadia ita badinaia noho. To aposetolo Petero ese hereva ma ta ia gwauraia danu.

¹⁸ Dina ta ta ai, Iehova ita tomadiho henia bona ma haida dekenai kara namodia ita karaia. To Petero ese Keristani taudia ia hagoadaia mai anina bada gauna ta idia karaia totona. Petero ese ita ia hagoadaia iseda kara ibounai idia helaga, to unai ita do karaia lasi lalonai ia gwau: “Gaukara badana totona emui lalona umui hegaegaelaia.” (1 Pet. 1:13, 15) Unai gaukara be dahaka? Petero ia gwau Keriso ena horoa tadikakadia ese ‘Dirava ena kara hereadaedia be gabu ibounai dekenai idia gwauraia hedinarai be namo, ia ese idia ia boiria mai.’ (1 Pet. 2:9) Bona Keristani taudia ese unai mai anina bada gaukarana idia karaia, unai ese taunimanima ia durua. Dirava ena helaga taudia be hanaihanai mai ura bada ida haroro bona hahediba gaukara idia karaia, unai be hahenamo badana! (Mar. 13:10) Ita gaukara goada Levitiko karoa 19 ena hakaua herevadia ita badinaia neganai, ita hamomokania Dirava bona iseda dekena taudia ita lalokau henia. Bona ita hahedinaraia ita ura iseda kara ibounai lalonai ‘ita helaga.’