1. Edena dala ai Iehova ese ena hesiai taudia edia guriguri ia haerelaia?

 OI DIBA Iehova ese oi ia gaukaralaia diba ma ta ena guriguri ia haerelaia totona, a? Ena be oi be elda, hesiai tauna, painia, eiava pablisa, ma ta oi durua diba. Ena be oi be matamata o buruka eiava tadikaka o taihu, unai oi karaia diba. Iehova ia lalokau henia tauna ta ese heduru totona ia noinoi neganai, Dirava ese elda taudia bona abidadama hesiai taudia ia gaukaralaia, unai tauna idia “hagoadaia bada” totona. (Kol. 4:11) Ita moale badina Iehova bona iseda tadikaka taihu ita hesiai henia diba! Unai ita karaia diba bema daihanai gorere, disasta eiava dagedage idia vara.

2. Dahaka dainai daihanai gorere ia vara neganai, ia auka ma haida ita durua totona?

² Emu gabu o tanobada hegegemadai ai daihanai gorere ia vara neganai, ia auka ta ta ita durua totona. Hegeregere, ita ura iseda turadia ita vadivadi to ita gari badina dika ita gorere. Reana ita ura moni ena hekwakwanai idia davaria taudia ita boiria aniani totona, to unai danu be hegeregere lasi. Reana ita ura ma haida ita durua, to iseda famili danu be idia gorere eiava iseda moni be hegeregere lasi. To, ita ura iseda tadikaka taihu ita durudia bona Iehova be ita karaia gauna dekenai do ia moale. (Aon. 3:27; 19:17) Dahaka ita karaia diba?

3. Desi ena kongrigeisen elda taudia amo dahaka ita diba? (Ieremia 23:4)

³ Elda taudia be inai idia karaia diba. Bema oi be elda ta, namona be mamoe oi diba namonamo. (Ieremia 23:4 duahia.) Desi, matamanai ita herevalaia taihu ta ia gwau, “Emai  haroro grup ai idia noho elda taudia be guna haroro gaukara bona moale negadiai lau bona ma haida idia bamoa.” b Unai idia karaia dainai, COVID-19 gorerena ia vara bona Desi ena famili taudia haida idia mase neganai, ia auka lasi elda taudia ese Desi idia durua totona.

4. Dahaka dainai elda taudia be Desi idia durua diba, bona unai sivarai amo elda taudia be dahaka idia dibaia?

⁴ Desi ia gwau, “Elda taudia dekenai lau manada dainai ia auka lasi idia dekenai egu hemami bona lalohekwarahi lau gwauraia totona.” Elda taudia idia dibaia gauna be inai: Dika ta ia do vara lasi neganai, emui mamoe umui naria namonamo. Oi tura henidia. Bema daihanai gorere ta ia vara bona ia auka emu tadikaka taihu oi vadivadi henia totona, dala ma haida ai idia oi durua. Desi ia gwau: “Nega haida elda idauidau be dina tamona lalonai lau idia rini henia o teks mesiji idia siaia. Idia gaukaralaia siridia ese egu kudouna ia hamarerea ena be unai siri lau diba namonamo.”   

5. Elda taudia be edena dala ai tadikaka taihu edia dabu gaudia do idia diba bona idia durudia?

⁵ Emu tadikaka taihu edia dabu gaudia oi diba totona, idia dekenai henanadai oi henia to namo lasi idia oi hahemaraia. (Aon. 20:5) Idia be mai edia aniani, muramura bona heduru gaudia ma haida, a? Edia moni gaukara bona ruma do idia haboioa, a? Gavamani ena heduru idia abia totona idia ita durua diba, a? Desi be tadikaka taihu amo heduru ia abia. To, elda taudia edia lalokau bona hagoadaia herevadia ese Desi ia durua ia haheauka totona. Ia gwau: “Elda taudia be lau ida idia guriguri. Edia guriguri herevana lau laloatao lasi to lau abia hemami lau laloatao diba. Unai be hegeregere Iehova ia gwau, ‘Lau be oi ida.’”​—Isa. 41:10, 13.

6. Kongrigeisen turadia be ma haida durua totona dahaka idia karaia diba? (Laulau herevalaia.)

⁶ Haida be inai idia karaia diba. Ita diba elda taudia be tadikaka taihu do idia naria. To Iehova ia ura ita ibounai ese ma haida ita hagoadaia bona durua danu. (Gal. 6:10) Herevana gorere tauna ta durua totona gau maragina ta ita karaia, to unai ese ia do ia hagoadaia bada. Natu maragina ta be ena tamana ida ia lao diba tadikaka ma ta vadivadi henia totona. Tadikaka o taihu matamata ta ese taihu ta totona stoa ia lao o dala ma ta ai ia durua diba. Kongrigeisen turadia ese gorere tauna  totona aniani idia nadua bona ena ruma dekenai idia abia lao diba, a? Oibe, daihanai gorere ia vara neganai, kongrigeisen taudia ibounai be ta ta idia hagoadaia be namo. Reana Kingdom Hall ai eiava zoom amo, hebou murinai ita noho bona tadikaka taihu ida ita herevahereva. Bona elda taudia dekenai hagoadaia herevadia ita gwauraia diba. Daihanai gorere ia vara negadiai, elda taudia be idia bisi bada, unai dainai tadikaka taihu haida be elda taudia dekenai tanikiu revareva idia siaia. Ita gaukara goada noho ‘ta ta do ita durua bona ta ta do ita hagoadaia noho’ be moale gauna!​—1 Tes. 5:11.

7. Disasta ta ese taunimanima dekenai dahaka ia havaraia diba?

⁷ Disasta ese karaharaga taunimanima edia mauri ia hadikaia diba. Dika idia davaria taudia be edia kohu, edia ruma bona edia famili tauna ta idia haboioa diba. Iseda tadikaka taihu be unai bamona dika idia davaria danu. Dahaka ita karaia diba idia ita durua totona?

8. Disasta ia do vara lasi neganai, elda taudia bona ruma bese kwarana be dahaka idia karaia diba?

⁸ Elda taudia be inai idia karaia diba. Elda taudia e, dika ta ia do vara lasi neganai, emui tadikaka taihu umui durua idia hegaegae totona. Namona be kongrigeisen taudia umui hadibadia dahaka do idia karaia dika idia davaria lasi totona bona elda taudia do idia rini henia. Atikol 51 ai ita herevalaia taihu, Margaret ia gwau: “Emai elda taudia ese kongrigeisen durua herevana ta idia karaia bona ai idia hadibaia lahi negana ia do ore lasi. Idia gwau bema gavamani ena gaukara taudia idia gwau lahi ia bada eiava emai ruma do ai rakatania, namona be karaharaga unai do ai badinaia.” Unai hadibaia herevana be nega korikori ai idia henia, badina wiki faiv murinai lahi badana ia vara. Ruma bese tomadiho lalonai, tamana be famili taudia ta ta ese do idia karaia gaudia ia riviulaia be namo. Bema oi bona emu natudia umui hegaegae vadaeni, disasta ta ia vara neganai do umui gari lasi.

9. Disasta ia do vara lasi neganai bona ia vara murinai, elda taudia be dahaka idia karaia diba?

⁹ Bema oi be grup naria tauna, namona be disasta ia do vara lasi neganai, emu haroro grup taudia edia telefon namba oi abia. Lista ta karaia bona hanaihanai oi sekea bema edia namba be maoro. Unai amo disasta ta ia vara neganai, pablisa ta ta oi rini henia bona oi sekea dahaka heduru oi henia diba. Elda oreana ena kodineita dekenai pablisa edia dabu gaudia oi herevalaia diba bona ia ese sekit naria tauna do ia hadibaia. Tadikaka idia gaukara hebou neganai, heduru namona idia henia diba. Lahi badana murinai, Margaret ena sekit naria tauna be hora 36 ia mahuta lasi. Ia ese elda taudia edia gaukara ia gunalaia, bona ruma lasi tadikaka taihu 450 bamona idia rini henia bona durua. (2 Kor. 11:27) Unai dala amo, momo idia durua noho gabuna idia davaria totona.

10. Dahaka dainai elda taudia idia abia dae mamoe naria gaukarana be mai anina bada? (Ioane 21:15)

¹⁰ Keristani elda taudia edia maduna ta be Baibel ena hereva amo hekwakwanai idia davaria tadikaka taihu do idia hagoadaia. (1 Pet. 5:2) Disasta ia vara neganai, namona be elda taudia ese tadikaka taihu ta ta idia sekea bema idia be mai edia aniani, dabua bona noho gabuna. Disasta ia ore bona hua haida lalonai, dika idia davaria taudia be Baibel ena hereva amo do idia hagoadaia noho. (Ioane 21:15 duahia.) Harold be Brens Komiti tauna ta bona disasta amo dika idia davaria tadikaka taihu ia vadivadi henia. Harold ia gwau: “Inai bamona dika idia davaria taudia be nega daudau lalonai do idia lalohisihisi  noho. Reana edia mauri do ia namo lou, to idia haboioa kohu, edia lalokau taudia, mai anina bada kohu ta, eiava unai dika amo idia heau mauri karana do idia laloa dainai do idia lalohisihisi lou lou. Unai be vaia do ia vara gauna.”

11. Famili ta ta be dahaka gaudia idia karaia be namo?

¹¹ Elda taudia ese inai hakaua herevana idia laloa bada, “idia taitai taudia ida umui taitai.” (Roma 12:15) Namona be elda taudia ese dika amo idia roho mauri taudia idia hadibaia, Iehova bona tadikaka taihu ese idia lalokau henidia. Elda taudia ese famili ta ta idia durua edia tomadiho karadia do idia goadalaia hegeregere, guriguri, stadi, hebou lao henia karana bona haroro gaukara. Danu elda taudia ese tama sina do idia hagoadaia edia natudia idia durua edia hetura karana Iehova ida idia laloa bada totona. Tama sina e, emui natudia umui hadibaia Iehova be edia Turana bona hanaihanai idia do ia durua. Bona tanobada hegegemadai tadikaka taihu idia noho hegaegae idia dekenai heduru idia henia totona.​—1 Pet. 2:17.

12. Disasta idia vara gabudia ai haida ese dahaka heduru idia henia diba? (Laulau herevalaia.)

¹² Haida be inai idia karaia diba. Bema emu gabu kahirakahira ai disasta ta ia vara, elda taudia oi noia edena dala ai heduru oi henia diba. Reana emu ruma ai konstraksen volantia taudia eiava noho gabuna be lasi taudia oi abia dae diba. Reana pablisa taudia dekenai aniani bona gau ma haida oi abia lao diba. Bema gabu daudau ai disasta ta ia vara, heduru oi henia diba. Edena dala ai? Dika idia davaria taudia totona oi guriguri diba. (2 Kor. 1:8-11) Reana, kontribusen oi henia diba. (2 Kor. 8:2-5) Bema oi ura disasta gabudia dekenai oi lao heduru oi henia totona, elda taudia oi nanadaia edena bamona heduru oi henia diba. Bema oi idia abia dae, reana treinini haida do oi abia, unai amo heduru idia ura gabudia bona negadiai oi gaukara diba.

13. Iseda gaukara idia taravatua tanodia ai tadikaka taihu be dahaka hekwakwanai idia davaria?

¹³ Iseda gaukara idia taravatua tanodia ai, tadikaka taihu be dagedage idia davaria dainai mauri ia auka. Unai gabu ai tadikaka taihu be moni lasi, idia gorere bona edia lalokau taudia idia mase. Unai taravatu dainai, ia auka elda taudia ese idia lalomanoka tadikaka  taihu idia vadivadi eiava idia hereva henia totona. Andrei, atikol 51 ai ita herevalaia elda tadikakana dekenai unai ia vara. Ena haroro grup ai, taihu ta ena moni be bada lasi, bena motuka amo aksiden ia davaria. Opereisen momo do ia abia dainai, ia auka ia gaukara totona. Herevana taravatu ia noho bona daihanai gorere ia vara, to Iehova be unai ia itaia dainai tadikaka ia gaukaralaia unai taihu idia durua totona.

14. Edena dala ai elda taudia ese idia hahedinaraia Iehova dekenai idia tabekau?

¹⁴ Elda taudia be inai idia karaia diba. Tadikaka Andrei ia guriguri bona ia karaia diba gauna ia karaia. Edena dala ai Iehova ese ena guriguri ia haerelaia? Iehova ese kongrigeisen tadikaka taihu ma haida ia gaukaralaia unai taihu idia durua totona. Haida ese edia motuka amo hospital dekenai taihu idia abia lao. Haida be moni idia henia. Iehova ese edia lalona ia veria dainai unai idia karaia, bona mai gari lasi bona lalotamona ida idia gaukara hebou dainai Iehova ese ia hanamodia. (Heb. 13:16) Elda taudia e, iseda gaukara idia taravatua neganai ma haida oi noia gaukara haida idia karaia totona. (Ier. 36:5, 6) Mai anina bada gauna be, Iehova dekenai oi tabekau. Ia ese oi do ia durua tadikaka taihu edia dabu gaudia oi henia totona.

15. Iseda gaukara idia taravatu negadiai, edena dala ai Keristani lalotamona ita hagoadaia diba?

¹⁵ Haida be inai idia karaia diba. Iseda gaukara idia taravatu lalonai, reana grup maragidia ai iseda tadikaka taihu ida do ita hebou. Unai dainai ma haida ida maino ai ita noho be gau badana. Satani ita tuari henia, to ta ta dekenai lasi. Emu tadikaka ena kerere oi laloaboio eiava dala oi tahua hekwakwanai umui hamaoromaoroa totona. (Aon. 19:11; Efe. 4:26) Umui hegaegae ta ta umui durua totona. (Tito 3:14) Paragraf 13 ai ita herevalaia taihu be ma haida ese idia durua bona unai ese edia haroro grup taudia ia hagoadaia bada. Idia ibounai be famili ta bamona idia hetura namonamo.​—Sal. 133:1.

16. Kolose 4:3, 18 hegeregerena, edena dala ai dibura ruma ai idia noho tadikaka taihu ita durua diba?

¹⁶ Ena be gavamani ese iseda gaukara idia taravatua, to Keristani tadikaka taihu tausen momo be Iehova idia hesiai henia noho. Idia haida be edia abidadama dainai dibura ruma dekenai idia atodia. Ita ese idia bona edia famili totona ita guriguri. Danu tadikaka haida be mai gari lasi ida dibura ruma ai idia  noho tadikaka taihu idia durudia, ena be idia diba pulisi ese idia do idia dogoatao. Idia ese dibura ruma ai idia noho taudia idia durua Iehova idia abidadama henia noho, edia dabu gaudia idia henia bona kota ai idia totona idia hereva. c Namona be idia totona ita guriguri. (Kolose 4:3, 18 duahia.) Emu guriguri ese do ia havaraia namo oi laloa maragi lasi!​—2 Tes. 3:1, 2; 1 Tim. 2:1, 2.

17. Edena dala ai hari dagedage totona oi hegaegae diba?

¹⁷ Oi bona emu famili be hari dagedage totona umui hegaegae diba. (Kara 14:22) Do idia vara gau dikadia oi lalohadailaia lasi. To Iehova ida emu hetura karana oi hagoadaia bona emu natudia oi durua unai bamona idia karaia totona. Bema nega haida oi lalohekwarahi, Dirava dekenai oi laloa gaudia ibounai oi gwauraia. (Sal. 62:7, 8) Emu famili ida Iehova umui abidadama henia ena badina idauidau umui herevalaia. d Disasta negadiai oi karaia hegeregerena, oi hegaegae bona Iehova oi abidadama henia karana ese emu natudia do ia durua idia gari lasi bona maino ai idia noho totona.

18. Vaira nega ai dahaka do ita moalelaia?

¹⁸ Dirava ena maino dainai gau ta dekenai ita gari lasi. (Fil. 4:6, 7) Unai dainai, ena be hari daihanai goreredia, disasta bona dagedage idia vara, to Iehova ese ita dekenai lalomaino ia henia. Ia ese idia gaukara goada elda taudia ia gaukaralaia ita idia naria totona. Bona ia ese ita dekenai dala ia kehoa ta ta ita durua totona. Hari ita mamia maino ese ita do ia durua vaira nega ai do idia vara hahetoho bona “hisihisi badana” ita haheaukalaia totona. (Mat. 24:21) Unai nega ai, ita gaukara goada maino ai ita noho bona ma haida ita durua unai bamona idia karaia totona. To hisihisi badana murinai, hekwakwanai badadia do ita lalohekwarahilaia lasi. Oibe, Iehova ese ena ura ita totona do ia hagugurua, bona maino ai do ita noho ela bona hanaihanai.​—Isa. 26:3, 4.