1. Iesu be kahirakahira do ia mase neganai, kara dika tauna dekenai dahaka ia gwau? (Luka 23:39-43)

 IESU bona ia badinai idia tauadae kara dika taudia rua be hisihisi bada herea idia mamia bona kahirakahira do idia mase. (Luka 23:32, 33) Idia ruaosi be Iesu idia gwauraia dika dainai, ia hedinarai idia be Iesu ena hahediba taudia lasi. (Mat. 27:44; Mar. 15:32) To idia ta be ena lalohadai ia haidaua. Ia gwau: “Iesu e, emu Basileia lalonai oi vareai neganai mani lau oi laloa.” Iesu ia haere: “Hari dina oi lau hamaoroa momokani, oi be lau ida Paradaiso ai do ita noho.” (Luka 23:39-43 duahia.) Baibel ia hahedinaraia lasi, unai kara dika tauna be Iesu ese ia harorolaia “guba Basileia” ena sivarai ia abia dae. Bona Iesu be ia gwau lasi unai tauna be Basileia lalonai do ia vareai. (Mat. 4:17) To, Iesu be vaira negai tanobada ai do ia vara paradaisona ia herevalaia. Dahaka dainai unai bamona ita hereva?

2. Edena bamona ita diba ia helalo-kerehai kara dika tauna be Iuda tauna?

² Ia helalo-kerehai kara dika tauna be reana Iuda tauna. Unai kara dika tauna be ma ta dekenai ia gwau: “Oi be Dirava oi gari henia lasi, a? Hari oi be ia ida hahemaoro tamona oi abia.” (Luka 23:40) Iuda taudia be Dirava tamona idia tomadiho henia, to bese ma haida taudia be dirava momo idia abidadama henia. (Eso. 20:2, 3; 1 Kor. 8:5, 6) Bema unai kara dika taudia be idau bese taudia, reana inai bamona do ia henanadai, “Oi be dirava oi gari henidia lasi, a?” Ma danu, Dirava ese Iesu be bese ma haida dekenai ia siaia lasi, to “Israela besena ena boio mamoe” dekenai ia siaia. (Mat. 15:24) Dirava ese Israela taudia ia hadibaia ia ese mase taudia do ia hatorea isi lou. Ia helalo-kerehai kara dika tauna be reana unai ia diba, bona ena hereva amo ia hahedinaraia, ia abia dae Iehova ese Iesu do ia hatorea isi lou bona Dirava ena Basileia do ia lohiaia.  Unai tauna ena helaro be Dirava ese ia do ia hatorea isi lou danu.

3. Iesu ese Paradaiso ia herevalaia neganai, unai helalo-kerehai kara dika tauna be dahaka ia laloa? Herevalaia. (Genese 2:15)

³ Ia helalo-kerehai kara dika tauna be Iuda tauna ta dainai, reana Adamu bona Heva bona Iehova ese Paradaiso ai ia atodia ena sivarai ia diba. Unai dainai, reana unai kara dika tauna ia laloparara, Iesu ese ia gwauraia Paradaiso be tanobada ai do ia vara uma gabu namo hereana ta.​—Genese 2:15 duahia.

4. Iesu ena hereva unai kara dika tauna dekenai ese ita ia durua dahaka ita lalohadailaia totona?

⁴ Iesu ena hereva unai kara dika tauna ta dekenai ese ita ia durua Paradaiso ai edena bamona mauri do ita noholaia ita lalohadailaia totona. Mani King Solomona ena lohia negana ita laloa. Unai nega ai taunimanima be maino ai idia noho, bona unai sivarai amo Paradaiso totona gau ta ita dibaia. Ita diba Solomona ia hereaia tauna, Iesu, be ia ida do idia lohia taudia danu do ia gaukara hebou tanobada be paradaiso ai idia halaoa totona. (Mat. 12:42) Unai dainai, “mamoe ma haida” be idia ura diba dahaka do idia karaia be namo, unai amo Paradaiso ai mauri hanaihanai do idia abia.​—Ioa. 10:16.

5. Oi laloa Paradaiso ai edena bamona mauri do ita noholaia?

⁵ Paradaiso ena mauri oi lalohadailaia neganai, dahaka oi laloa? Reana uma gabu hairaina ta oi laloa, Eden umana bamona. (Gen. 2:7-9) Reana Mika ena peroveta herevana oi laloatao, ia gwau Dirava ena taunimanima ta ta be edia “vain bona fig au henunai do idia helai.” (Mika 4:3, 4) Reana oi laloatao, Baibel ena siri momo ese idia hahedinaraia, unai negai aniani be do ia momo herea. (Sal. 72:16; Isa. 65:21, 22) Reana sibona do oi piksaia, oi be uma gabu hairaina ta dekenai oi helai bona teibolo latanai aniani namodia momo idia noho. Danu tubutubu gaudia bona flaoaflaoa edia bonana namona be gabu ibounai dekenai oi bonaia diba. Bona emu ruma bese, turadia bona toreisi lou taudia edia herevahereva bona kiri regena oi kamonai diba. Unai gaudia be nihi sibona lasi, to tanobada ai do idia vara momokani. Danu, Paradaiso ai gaukara namodia do ita moalelaia.

6. Paradaiso ai dahaka do ita karaia? (Laulau itaia.)

⁶ Iehova ese ita ia havaraia, iseda gaukara ita moalelaia totona. (Had. 2:24) Keriso ena Lohia Lagani 1,000 lalonai, do ita bisi bada herea. Hisihisi badana amo idia roho mauri bona toreisi lou taudia milioni momo be do idia ura dabua, aniani bona ruma idia abia. Edia dabu gaudia ita henia totona, gaukara namodia momo do ita karaia. Dirava ese Adamu bona Heva ia hamaoroa Eden umana do  idia birulaia hegeregerena, ita ese mai moale ida tanobada be Paradaiso ai do ita halaoa. Mani oi laloa, toreisi lou taudia milioni momo dekenai Iehova bona ena ura do ita hadibaia, bona danu Iesu ia do vara lasi negana ai idia noho abidadama taudia do ita durua, gau ma haida idia dibaia totona!

7. Ita diba momokani dahaka do ia vara, bona dahaka dainai?

⁷ Ita diba momokani, Paradaiso ai maino ai do ita noho, gau ta dekenai do ita dabu lasi, bona gau ibounai do idia gaukara namonamo. Dahaka dainai? Badina Iehova ese iena Natuna ena Basileia henunai do ia karaia gaudia be ita dekenai ia hahedinaraia vadaeni. King Solomona ena lohia negana ena sivarai amo unai do ita dibaia.

8. King Davida ese Salamo 37:10, 11, 29 ai ia torea herevadia be edena dala ai idia guguru? (Inai magasin ai “Duahia Taudia Edia Henanadai” itaia.)

⁸ King Davida ese aonega bona abidadama king ta be vaira nega ai do ia lohia bona taunimanima be mauri do idia moalelaia negana ia perovetalaia. (Salamo 37:10, 11, 29 duahia.) Nega momo kamonai taudia dekenai vaira negai do ia vara Paradaiso ita herevalaia neganai, Salamo 37:11 ita duahia. Unai be maoro, badina Iesu ena Ororo Harorona ai unai siri ena hereva ia gwauraia, bona ia hahedinaraia vaira negai unai do ia guguru. (Mat. 5:5) To Davida ena hereva ese King Solomona ena lohia negana ia herevalaia danu. Solomona be Israela tanona ia lohiaia neganai, Dirava ena taunimanima be “milika bona hani amo ia honu” tanona dekenai maino ai idia noho. Dirava ia gwau: “Bema egu taravatu . . .  umui badinaia noho, lau ese emui tano ai maino do lau havaraia, bona do umui hekure neganai ta ese umui do ia hagaria lasi.” (Lev. 20:24; 26:3, 6) Unai gwauhamata herevadia be Solomona ena Lohia negana ai idia guguru. (1 Siv. 22:9; 29:26-28) Bona Iehova ia gwauhamata, kara dika taudia “do idia noho lasi.” (Sal. 37:10) Oibe, Salamo 37:10, 11, 29 edia hereva be idaunegai idia guguru bona vaira negai do idia guguru danu.

9. Sieba ena kwini ese King Solomona ena lohia dalana be edena bamona ia herevalaia?

 ⁹ Sieba ena kwini ia kamonai Solomona ena lohia henunai Israela taudia be maino ai idia noho. Unai dainai, ia be gabu daudau amo Ierusalema dekenai ia lao unai ia hamomokania totona. (1 Ki. 10:1) Solomona ena basileia ia itaia murinai, ia gwau: “Lau dekenai sivarai ena kahana sibona idia gwauraia. . . . Emu taunimanima be idia moale, bona nega ibounai oi ida idia noho hesiai taudia be idia moale, badina idia ese emu aonega herevadia idia kamonai noho!” (1 Ki. 10:6-8) To Solomona ena lohia henunai idia moalelaia mauri be haheitalai sibona. Unai ese Iehova ena Natuna, Iesu ena lohia henunai do ia karaia gaudia ia hahedinaraia.

10. Edena dala ai Iesu ese Solomona ia hereaia?

¹⁰ Iesu ese Solomona ia hereaia. Solomona be goevadae lasi dainai kerere badadia ia karaia, bona unai ese Dirava ena taunimanima dekenai hekwakwanai momo ia havaraia. To Iesu be lohia tauna goevadaena bona kerere ia karaia diba lasi. (Luka 1:32; Heb. 4:14, 15) Ena be Satani ese hahetoho badadia ia havaraia to Iesu ese Dirava ia badinaia noho. Keriso ia hamomokania ia be do ia kara dika lasi, eiava ena taunimanima hahisia karana ta do ia karaia lasi. Iesu be iseda King be hahenamo badana.

11. Daidia ese Iesu do idia durua?

¹¹ Iesu be 144,000 taudia ida do ia lohia. Idia ese Iesu do idia durua taunimanima idia naria bona Iehova ena ura tanobada totona do idia hagugurua. (Apok. 14:1-3) Unai 144,000 taudia be tanobada ai idia noho neganai, hahetoho bona hisihisi momo idia haheaukalaia, unai dainai taunimanima edia hemami do idia lalopararalaia. Vadaeni, Iesu ida do idia lohia taudia edia gaukara be dahaka?

12. Iehova ese 144,000 taudia dekenai dahaka gaukara ia henia?

¹² Iesu bona ia ida do idia lohia 144,000 taudia edia gaukara be Solomona ese ia karaia gaukara ia hereaia. Unai Israela king be tano tamona ai idia noho taunimanima milioni momo sibona ia lohiaia. To, Dirava ena Basileia lalonai do idia lohia taudia ese tanobada ibounai dekenai idia noho taudia bilioni momo do idia lohiaia. Iehova ese 144,000 taudia dekenai hahenamo badana ia henia!

13. Iesu ida do idia lohia taudia be dahaka gaukara idauna do idia karaia?

¹³ Iesu bamona, 144,000 taudia be king bona hahelaga gaukara do idia karaia. (Apok. 5:10) Mose ena Taravatu henunai, hahelaga taudia edia gaukara badana be taunimanima idia naria unai amo gorere idia davaria lasi bona idia durudia Iehova kahirakahira idia noho totona. Taravatu be “do idia mai gau namodia edia laulau,” unai dainai ita gwau diba Iesu ida do idia lohia taudia ese Dirava ena taunimanima do idia gimaia unai amo gorere idia davaria lasi bona Iehova kahirakahira do idia noho. (Heb. 10:1) Ita diba lasi edena dala ai unai king bona hahelaga taudia be tanobada ai do idia noho taudia do idia hereva henidia. Herevana Iehova be edena dala do ia hegaegaelaia, to ita diba vaira nega ai tanobada Paradaisona dekenai idia noho taudia be hakaua herevadia do idia abia.​—Apok. 21:3, 4.

14. Edena dala ai “mamoe ma haida” bona Iesu ena tadikaka be orea tamona ai idia noho?

¹⁴ Iesu be ia ida do idia lohia taudia ia gwauraidia “orea maragi.” (Luka 12:32) Ia ese orea ma ta ia herevalaia bona ia gwauraidia  “mamoe ma haida.” Unai orea rua be mamoe orea tamona lalonai idia noho. (Ioane 10:16) Hari idia gaukara hebou noho bona tanobada be Paradaiso ai ia lao neganai, do idia gaukara noho. Oibe, unai nega ai, “orea maragi” taudia be guba ai do idia lohia bona “mamoe ma haida” be tanobada ai mauri hanaihanai do idia moalelaia. To “mamoe ma haida” be Paradaiso ai idia noho totona, gau haida idia karaia be namo.

15. (a) Mamoe ma haida be edena dala ai Keriso ena tadikaka ida idia gaukara hebou? (b) Edena dala ai stoa dekenai ia noho tadikaka ena haheitalai ita tohotohoa diba? (Laulau itaia.)

¹⁵ Idia tauadae kara dika tauna be dala lasi Iesu ese ia totona ia karaia gaudia ia laloa bada karana ia hahedinaraia totona. To, ita, “mamoe ma haida,” be dala momo ai ita hahedinaraia diba Iesu ita lalokau henia. Hegeregere, iena horoa tadikaka ita kara henidia dalana amo ita hahedinaraia ia ita lalokau henia. Iesu ia gwau iena horoa tadikaka idia kara henidia hegeregerena mamoe do ia hahemaoro henidia. (Mat. 25:31-40) Mai iseda ura bada ida haroro bona hahediba gaukarana ita karaia neganai, Iesu ena horoa tadikaka ita durua unai. (Mat. 28:18-20) Unai ita karaia totona, Baibel stadi karaia bukadia idauidau hegeregere, Mauri Moalelaia Hanaihanai! bukana do ita gaukaralaia be namo. Bema oi be ta oi stadi henia lasi, namona be emu tahua gauna be ma haida dekenai Baibel stadilaia karana do oi herevalaia.

16. Hari dahaka ita karaia diba Dirava ena Basileia henunai ita noho totona?

¹⁶ Namo lasi ita naria ela bona Paradaiso ai ita noho, bena iseda kara ita haidaua bona Iehova ese ia ura henia tauna ai ita lao. Hari inai negai do ita hekwarahi iseda hereva bona kara amo kara momokani ita hahedinaraia bona iseda kara do ita biagua namonamo. Bona namona be Iehova, iseda adavana bona Keristani tadikaka taihu dekenai badinaia karana do ita hahedinaraia. Bema inai tanobada dikana ai Iehova ena taravatu ita badinaia, Paradaiso ai do ia auka lasi unai ita karaia totona. Danu hari, gaukara haida bona kara namodia do ita dibaia unai amo ita hahedinaraia ita hegaegae noho Paradaiso ai ita noho totona. Inai magasin  lalonai Atikol ladana “Oi Hegaegae ‘Tanobada do Oi Abia’ Totona, A?” itaia.

17. Guna ita karaia kara dikadia dainai do ita lalometau noho, a? Herevalaia.

¹⁷ Namona be ita hekwarahi guna ita karaia kara dikadia dainai ita lalohisihisi karana ita hadokoa totona. To, namo lasi ita laloa Iesu be iseda mauri davana ia karaia vadaeni dainai, “mai ura ida kara dika ita karaia noho.” (Heb. 10:26-31) To namona be ita abia dae momokani, bema kara dika badana ta dainai ita helalo-kerehai, Iehova bona elda taudia edia heduru ita tahua bona iseda kara ita haidaua, Iehova be eda kara dika ia gwauatao vadaeni. (Isa. 55:7; Kara 3:19) Namona be Iesu ena hereva Farisea taudia dekenai ita laloatao: “Kara maoromaoro taudia boiria totona lau mai lasi, to kara dika taudia boiria totona lau mai.” (Mat. 9:13) Mauri davalaia boubouna be mai ena siahu iseda kara dika ibounai ia kokia totona.

18. Oi ura Iesu badinai ia mase kara dika tauna ida dahaka do oi herevalaia?

¹⁸ Mani oi laloa oi be Paradaiso ai Iesu ese ia hereva henia kara dika tauna ida oi herevahereva. Umui ruaosi umui abia dae Iesu ena boubou gauna umui laloa bada. Reana oi nanadaia Iesu ena hora ginigabedia ai idia vara gaudia do ia herevalaia, bona Iesu ese ena noinoi ia haerelaia neganai ena hemami be edena bamona do ia gwauraia. Ma danu, ia ese oi do ia noia Satani ena tanobada ena nega dokona ai oi noho maurina ena sivarai do oi gwauraia. Unai bamona taudia ida Dirava ena Hereva do ita stadilaia be hahenamo badana!​—Efe. 4:22-24.

19. Dahaka dainai Paradaiso ai mauri do ita hesikulaia lasi. (Rau 1 ena laulau itaia.)

¹⁹ Paradaiso ai mauri do ita hesikulaia lasi. Taunimanima idauidau do ita hedavari henidia bona gaukara namodia do ita karaia. To gau namo hereana be, dina ta ta ai iseda guba Tamana do ita dibaia bona ia henia gaudia do ita moalelaia. Hanaihanai Iehova ena kara momo bona ia havaraia gaudia idauidau do ita dibaia. Ita mauri daudau lalonai, iseda lalokau Dirava totona do ia bada ia lao. Iehova bona Iesu dekenai do ita tanikiu bada, badina Paradaiso ai do ita mauri hanaihanai ena gwauhamata idia karaia!