1. Aberahamo ena sivarai ita duahia neganai, edena henanadai ita laloa?

 HEREVANA taunimanima momo be Aberahamo ena sivarai idia kamonai, to ia idia diba namonamo lasi. To, oi be Aberahamo oi diba namonamo. Hegeregere, oi diba Baibel ese Aberahamo ia gwauraia “abidadama taudia ibounai edia tamana.” (Roma 4:11) Reana do oi laloa, ‘Aberahamo bamona egu abidadama lau hagoadaia diba, a?’ Oibe, unai oi karaia diba.

2. Dahaka dainai Aberahamo ena sivarai ita stadilaia be namo? (Iamesi 2:​22, 23)

² Aberahamo ena abidadama ita tohotohoa dalana ta be iena kara ita stadilaia. Dirava ese ia hamaoroa gaudia ia karaia, hegeregere gabu daudau dekenai ia lao, lagani momo palai rumadia dekenai ia noho, bona ia hegaegae ena natuna lalokauna Isako ia bouboulaia totona. Unai ia karaia badina Iehova dekenai ena abidadama be goada. Aberahamo be ena abidadama bona kara dainai, Iehova ia hamoalea bona iena turana ai ia lao. (Iamesi 2:​22, 23 duahia.) Iehova ia ura ita ibounai, oi danu, be ia ita hamoalea bona iena turana ai ita lao. Unai dainai, Baibel idia torea taudia, Paulo bona Iamesi ia gaukaralaia Aberahamo ena sivarai idia torea totona. Mani Roma karoa 4 bona Iamesi karoa 2 ai, ena sivarai ita itaia. Unai karoa rua ai, Paulo bona Iamesi be Aberahamo totona mai anina bada gauna ta idia gwauraia.

3. Paulo bona Iamesi be edena siri idia herevalaia?

³ Paulo bona Iamesi be Genese 15:6 ena hereva idia gaukaralaia, ia gwau: “Aberamo ese Iehova ia abidadama henia, bona ia ese Aberamo ia gwauraia maoromaoro.” Inai hereva maoromaoro ena anina be, Dirava ese ta ia lalonamo henia, bona ia gwauraia kara maoromaoro eiava kerere lasi tauna. Mani oi laloa,  Dirava ese goevadae lasi tauna be kara maoromaoro tauna bamona ia gwauraia, unai be idau momokani! Oibe, oi ura Dirava ese oi ia gwauraia kara maoromaoro tauna, bona unai ia karaia diba. Inai stadi ai dahaka dainai Iehova ese Aberahamo ia gwauraia maoromaoro, bona Iehova ese ita ia gwauraia maoromaoro dalana do ita herevalaia.

4. Dahaka dainai kara maoromaoro ita karaia be auka?

⁴ Paulo ese Roma taudia totona ia torea revareva ai, ia hahedinaraia taunimanima ibounai be kara dika taudia. (Roma 3:23) To, dahaka dainai Dirava be ita ia lalonamo henia bona ia gwauraia kara maoromaoro taudia? Keristani momokani taudia be unai henanadai ena haere idia diba totona, Paulo ese Aberahamo ena haheitalai ia gaukaralaia.

5. Dahaka dainai Iehova ese Aberahamo ia gwauraia kara maoromaoro tauna? (Roma 4:​2-4)

⁵ Aberahamo be Kanana tanona ai ia noho neganai, Iehova ese ia gwauraia kara maoromaoro tauna. Dahaka dainai? Aberahamo ese Mose ena Taravatu ia badinaia namonamo dainai, a? Lasi. (Roma 4:13) Dirava ese Aberahamo ia gwauraia kara maoromaoro tauna, bena lagani 400 mai kahana murinai, Israela besena dekenai Mose ena Taravatu ia henia. Vadaeni dahaka dainai Iehova ia gwau Aberahamo be kara maoromaoro tauna? Aberahamo ena abidadama dainai, Iehova ese ia dekenai hebogahisi hereadaena ia hahedinaraia, bona ia gwauraia kara maoromaoro tauna.—Roma 4:​2-4 duahia.

6. Edena dala ai Iehova ese kara dika tauna ia gwauraia maoromaoro?

⁶ Paulo ia gwau ta be “iena abidadama dainai Dirava ese ia do ia gwauraia maoromaoro.” (Roma 4:5) Paulo ma ia gwau: “Davida danu be Dirava ese ia gwauraia maoromaoro tauna ena moale ia herevalaia, bona unai moale be ia karaia gaudia dainai ia vara lasi. Ia gwau: ‘Dirava ese taravatu idia utua taudia edia kerere bona edia kara dika ia gwauatao neganai, unai taudia idia moale. Iehova ese ta ena kara dika ia laloatao noho lasi neganai, unai tauna ia moale.’” (Roma 4:​6-8; Sal. 32:​1, 2) Dirava ese ia idia abidadama henia taudia edia dika ia gwauatao. Bona edia kara dika ia laloatao noho lasi. Edia abidadama dainai, Iehova ese idia be kerere lasi taudia bamona ia laloa.

7. Edena dala ai Dirava idia abidadama henia taudia be kara maoromaoro taudia?

⁷ Dirava ese Aberahamo, Davida, bona abidadama taudia ma haida ia gwauraia kara maoromaoro taudia, herevana idia be goevadae lasi. To edia abidadama dainai, taunimanima huanai idia be kerere lasi taudia bamona ia laloa. (Efe. 2:12) Paulo ena revareva ai ia hahedinaraia, Dirava ena turana ai ita lao totona abidadama be mai anina bada. Aberahamo bona Davida be unai idia karaia bona Dirava ena turana ai idia lao, ita danu be unai bamona ita karaia diba.

8-9. Dahaka dainai haida ese Paulo bona Iamesi edia hereva idia lalopararalaia lasi?

⁸ Lagani handred momo lalonai, dubu gunalaia taudia ese abidadama bona kara idia gaukara hebou dalana idia hepapahuahulaia. Haida idia gwau mauri hanaihanai oi abia totona, gau badana be Lohiabada Iesu Keriso sibona oi abidadama henia. Reana oi kamonai idia gwau: “Iesu oi abia dae bona do oi mauri.” Reana dubu gunalaia taudia ese Paulo ena hereva idia gwauraia: “Dirava ese ia gwauraia maoromaoro tauna ena moale . . . be ia karaia gaudia dainai ia vara lasi.” (Roma 4:6) To,  haida idia gwau, helaga gabudia dekenai oi loaloa bona kara namodia oi karaia, unai amo “sibona oi hamauria.” Bona reana Iamesi 2:24 idia gaukaralaia, ia gwau: “Tau ta be ena abidadama sibona amo lasi, to ena kara dainai ia do idia gwauraia kara maoromaoro tauna.”

⁹ Unai bamona hahediba herevadia dainai, Baibel idia diba momo taudia haida idia laloa, abidadama bona kara idia gaukara hebou herevana dekenai Paulo bona Iamesi be idia lalotamona lasi. Dubu gunalaia taudia haida idia gwau, Paulo ia abia dae tau ta be ena kara dainai lasi, to ena abidadama dainai Dirava ese ia gwauraia kara maoromaoro tauna. Bona Iamesi ia abia dae tau ta be Dirava ese ia lalonamo henia totona, kara namodia ia karaia be namo. Profesa ta ia gwau: “Iamesi ia laloparara lasi, dahaka dainai Paulo ia gwau tau ta be ena abidadama dainai Dirava ese [ia gwauraia kara maoromaoro tauna], to iena kara dainai lasi.” To, Iehova be ena lauma helaga amo Paulo bona Iamesi ia hasiahua idia karaia gaudia idia torea totona. (2 Tim. 3:16) Unai dainai, reana dala ta ia noho idia gwauraia herevadia ita lalopararalaia totona. Oibe, edia revareva ai idia torea herevadia ita laloa dobu neganai, edia anina do ita lalopararalaia diba.

10. Paulo ese edena ‘kara’ ia herevalaia? (Roma 3:​21, 28) (Laulau itaia danu.)

¹⁰ Roma karoa 3 bona 4 ai, Paulo be edena bamona “kara” ia herevalaia? Ia ese “taravatu badinaia karana” ia herevalaia, unai be Mose ena taravatu, Sinai Ororona dekenai Dirava ese ia henia gauna. (Roma 3:​21, 28 duahia.) Toana be Paulo ena negai, Iuda Keristani taudia haida idia laloa Mose ena Taravatu idia badinaia noho be namo. Unai dainai, Paulo ese Aberahamo ena haheitalai ia gaukaralaia, bona ia hahedinaraia ta ese Dirava ena lalonamo ia abia totona, Mose ena Taravatu ia badinaia  be gau badana lasi. To ia hahedinaraia abidadama karana be mai anina bada. Unai ese ita ia hagoadaia, badina ita laloparara bema Dirava bona Keriso ita abidadama henia, Dirava ese ita do ia lalonamo henia.

11. Iamesi ese edena “kara” ia herevalaia?

¹¹ To, Iamesi karoa 2 ese ia herevalaia “kara” be Paulo ese ia gwauraia “taravatu badinaia karana” amo ia idau. Iamesi ese ia herevalaia kara, eiava gaukara idauidau, be Keristani taudia ese dina ta ta maurina ai idia karaia gaudia. Unai kara idauidau ese idia hahedinaraia Keristani tauna be Dirava ia abidadama henia momokani eiava lasi. Iamesi ese ia gaukaralaia haheitalai rua mani ita herevalaia.

12. Iamesi ese abidadama bona kara be edena bamona ia herevalaia? (Laulau itaia danu.)

¹² Haheitalai ginigunana ai, Iamesi ia gwau namona be Keristani taudia ese taunimanima ibounai be maka tamona ai do idia kara henia. Haheitalai ta amo ia hahedinaraia, tau ta be taga tauna ia kara namo henia, to ogogami tauna ia dadaraia. Iamesi ia gwau ena be unai tauna ia laloa ia be mai ena abidadama, to ena kara amo ia hahedinaraia ia be abidadama lasi tauna. (Iam. 2:​1-5, 9) Haheitalai iharuana ai, Iamesi ia gwau tau ta be ia itaia ena ‘tadikaka eiava taihu ta be dabua lasi bona unai dina ena aniani totona ia hegeregere lasi,’ to heduru ia henia lasi. Ena be unai tauna ia gwau ia be mai ena abidadama, to ena kara amo ia hahedinaraia lasi, unai dainai ena abidadama be anina lasi. Iamesi ia gwau bamona, “abidadama mai ena kara lasi be mase gauna.”—Iam. 2:​14-17.

13. Iamesi ese daika ena sivarai ia gaukaralaia, abidadama mai ena kara ia herevalaia totona? (Iamesi 2:​25, 26)

¹³ Iamesi ia gwau Rahaba be ena kara amo ia hahedinaraia ia be abidadama hahinena. (Iamesi 2:​25, 26 duahia.) Rahaba be Iehova ese Israela taudia ia durua sivaraina ia  kamonai bona ia laloparara Iehova be idia ida. (Ios. 2:​9-11) Rahaba ena abidadama be ena kara amo ia hahedinaraia, ia ese Israela spai taudia rua ia durua idia heau mauri totona. Unai dainai, ena be Rahaba be goevadae lasi bona Israela hahinena lasi, to Dirava ese ia gwauraia maoromaoro, Aberahamo ia gwauraia hegeregerena. Rahaba amo ita dibaia gauna be, iseda abidadama be eda kara amo ita hahedinaraia be gau badana.

14. Edena dala ai Paulo bona Iamesi edia hereva be idia hegeregere?

¹⁴ Baibel torea taudia rua Paulo bona Iamesi ese abidadama bona kara be dala idaudia rua amo idia herevalaia. Paulo ese Iuda Keristani taudia ia hamaoroa, Mose ena Taravatu idia badinaia karana amo Iehova ena lalonamo do idia abia lasi. Bona Iamesi ia gwau Keristani taudia ibounai ese edia abidadama idia hahedinaraia totona, ma haida idia kara namo henidia be gau badana.

15. Edena dala ai iseda kara namodia amo iseda abidadama ita hahedinaraia diba? (Laulau itaia danu.)

¹⁵ Iehova ia gwau lasi Aberahamo ese ia karaia gaudia ibounai do ita karaia, unai amo ita do ia gwauraia kara maoromaoro taudia. Oibe, dala momo idia noho iseda kara amo eda abidadama ita hahedinaraia totona. Hegeregere, kongrigeisen ai nega ginigunana hebou idia mai taudia ita welkam henidia, iseda tadikaka taihu ita durudia, bona iseda famili ita kara namo henidia, unai kara iboudiai be Dirava ese ia moalelaia bona do ia hanamoa. (Roma 15:7; 1 Tim. 5:​4, 8; 1 Ioa. 3:18) To eda abidadama ita hahedinaraia dala badana be, mai ura ida sivarai namona do ita harorolaia. (1 Tim. 4:16) Ita ibounai be iseda kara amo ita hahedinaraia, ita abia dae Iehova ena gwauhamata  ibounai be do idia guguru bona iena dala ibounai be hereadae. Bema unai bamona ita karaia, ita diba momokani Dirava ese ita do ia gwauraia kara maoromaoro taudia bona ita do ia boiria iena turadia.

16. Aberahamo be dahaka helaro ia abidadama henia?

¹⁶ Roma karoa 4 ai Aberahamo ena haheitalai amo mai anina bada gauna ma ta do ita dibaia: Unai be iseda helaro. Iehova be Aberahamo dekenai ia gwauhamata ia amo “bese momo” be hahenamo do idia abia. Mani oi laloa, Aberahamo be mai ura ida unai gwauhamata namodia ia naria! (Gen. 12:3; 15:5; 17:4; Roma 4:17) To, Aberahamo ena mauri lagani be 100 bona Sara be 90 neganai, idia be natuna mero ta idia do havaraia lasi. Reana taunimanima idia laloa, Aberahamo bona Sara be natuna ta do idia havaraia diba lasi. Aberahamo dekenai unai be hahetoho badana. To, “ia diba momokani ia be bese momo edia tamana ai do ia lao.” (Roma 4:​18, 19) Bona ia abidadama henia gauna be ia vara momokani. Ia be Isako ena tamana ai ia lao.—Roma 4:​20-22.

17. Edena dala ai ita diba, Dirava ese ita ia gwauraia maoromaoro bona iena turadia ai ita lao?

¹⁷ Ita danu Dirava ita hamoalea diba bona Dirava ese ita do ia gwauraia iena turadia, Aberahamo bamona. Paulo ia gwau: “Toretore Helagadia lalonai inai hereva, ‘Dirava ese ia gwauraia maoromaoro,’ be [Aberahamo] sibona totona lasi, to ita totona danu, Dirava ese ia gwauraia maoromaoro taudia unai, badina mase amo . . . Iesu ia hatorea isi Diravana ita abidadama henia.” (Roma 4:​23, 24) Aberahamo bamona, namona be Iehova ita abidadama henia, kara namodia ita karaia bona ita abia dae Iehova ena gwauhamata be do idia guguru momokani. Roma karoa 5 ai, Paulo be iseda helaro ma ia herevalaia, bona atikol 51 ai unai do ita herevalaia.