MOMOKANI, Iehova ese oi dekenai ia henia harihari gaudia oi laloa bada bona unai gaudia oi moalelaia totona, oi dekenai ura kwalimu ia henia. Baibel ia hahedinaraia wain be Dirava ena harihari gauna, ia gwau: “Taunimanima be paraoa idia ania neganai idia kiri, bona wain idia inua neganai idia moale.” (Had. 10:19; Sal. 104:15) To, reana oi itaia, haida be alkahol inua karana dekenai hekwakwanai idia davaria. Danu, tanobada hegegemadai alkahol inua karana dekenai taunimanima edia lalohadai be idauidau. Dahaka ese Keristani taudia do ia durua alkahol inua karana dekenai abia hidi maorona idia karaia totona?

Herevana edeseniai ita noho o iseda mauri dalana be idauidau, to bema iseda abia hidi lalonai Dirava ena lalohadai ita badinaia, namo do ita davaria bona iseda mauri do ita moalelaia.

Reana oi itaia, taunimanima be hanaihanai alkahol idia inua bona idia kekero. Haida be idia inuinu edia hemami idia hanamoa totona. Haida idia inuinu edia hekwakwanai idia laloaboio totona. Bona tano haida dekenai idia laloa alkahol bada herea ia inua tauna be tau badana eiava tau goadana.

To, Keristani taudia be edia Havaraia Tauna lalokauna amo hakaua hereva namodia idia abia. Hegeregere, ita ia hamaoroa inuinu momo karana ese dika ia havaraia. Aonega Herevadia 23:​29-35 ese inuinu kekero tauna bona ia davaria hekwakwanai ia herevalaia. a Europe ai elda ta ladana Daniel be Keristani tauna ai ia do lao lasi neganai ena mauri ia herevalaia, ia gwau: “Lau inuinu momo dainai abia hidi kereredia lau karaia. Unai dainai hekwakwanai badadia lau davaria bona lau lalohisihisi.”

Edena dala ai Keristani taudia ese abia hidi maorona idia karaia, alkahol inua momo karana ese ia havaraia hekwakwanai idia dadaraia totona? Namona be Dirava ena lalohadai hegeregerena abia hidi ita karaia.

Mani Baibel ena hereva alkahol dekenai bona taunimanima ese alkahol idia inua ena badina ita herevalaia.

Dirava ena Hereva ese alkahol sisina inua karana ia gwauraia dika lasi. To, ia hahedinaraia taunimanima ese wain idia inua neganai idia moale diba. Baibel ia gwau: “Mai moale ida oi aniani bona emu wain oi inua.” (Had. 9:7) Nega ta ta ai Iesu be wain ia inua, bona Iehova ena hesiai taudia haida danu be unai bamona idia karaia.—Mat. 26:​27-29; Luka 7:34; 1 Tim. 5:23.

Ena be Dirava ena Hereva ese alkahol sisina inua karana ia taravatua lasi, to kekero karana ia taravatua. Ia gwau: “Wain amo do umui kekero lasi.” (Efe. 5:18) Bona ia hahedinaraia “kekero momo taudia . . . be Dirava ena Basileia do idia abia lasi.” (1 Kor. 6:10) Oibe, Iehova be inuinu momo bona kekero karana ia taravatua. Namo lasi, ita badinai idia noho taudia edia kara ita tohotohoa, to abia hidi ita karaia Dirava ita hamoalea totona.

Haida idia mamia alkahol momo idia inua, to idia kekero lasi. Unai ese dika bada ia havaraia diba. Baibel ia hahedinaraia “wain momo inua karana” ese tau ta (o hahine ta) ia hakaua kerere matabodaga karadia ia karaia bona iena hetura karana Iehova ida ia hadikaia diba. (Tito 2:3; Aon. 20:1) Iesu ia gwau, bema tau ta be ia “inuinu momo,” Dirava ena tanobada matamatana lalonai  do ia vareai lasi. (Luka 21:​34-36) Dahaka ese Keristani tauna ia durua diba, alkahol inua momo karana ese ia havaraia hekwakwanai ia dadaraia totona?

Alkahol inua totona, namo lasi iseda gabu ai idia noho taudia edia kara ita tohotohoa, unai ese dika do ia havaraia diba. Keristani taudia idia ura edia aniani o alkahol inua karana dekenai Iehova idia hamoalea. Baibel ese ita ia hadibaia: “Herevana umui aniani, umui inuinu eiava gau ma ta umui karaia, namona be gau ibounai do umui karaia Dirava umui hanamoa totona.” (1 Kor. 10:31) Mani inai henanadai bona Baibel ena hakaua herevadia haida ita laloa:

Alkahol lau inua badina lau ura haida ese lau idia abia dae, a? Esodo 23:2 ia gwau: “Namo lasi hutuma umui badinaia.” Unai siri ai, Iehova be Israela taudia ia hadibaia ia idia hamoalea lasi taudia do idia tohotohoa lasi. Hari inai negai, Keristani taudia ese unai sisiba herevana idia badinaia danu be namo. Bema alkahol inua karana dekenai haida ese ita totona abia hidi idia karaia, unai ese Iehova ida eda hetura karana do ia hadikaia bona iena taravatu do ita utua.—Roma 12:2.   

Alkahol lau inua unai amo haida do idia laloa lau be goada tauna, a? Tano haida ai, inuinu momo bona alkahol momo inua karana be kerere lasi. (1 Pet. 4:3) To mani 1 Korinto 16:13 ena hereva ita itaia, ia gwau: “Umui noga noho, abidadama dekenai umui gini goada, umui boga-auka, bona umui goada umui lao.” Alkahol ese ta dekenai goada ia henia diba, a? Lasi. Alkahol ese ta ena laloa dalana bona abia hidi karaia dalana ia hadikaia diba. Unai dainai, alkahol momo inua karana be goada ena toana lasi, to ia be kavakava karana. Isaia 28:7 ai ia hahedinaraia, alkahol ia inua tauna be ia kekero bona ia raka kerere dainai, hahemaoro maorodia ia karaia lasi.     

Iehova ese goada korikorina ia henia, anina be ‘ita noga noho, bona abidadama dekenai ita gini goada.’ (Sal. 18:32) Keristani momokani tauna be abia hidi maorodia ia karaia, unai amo ia naria namonamo bona iena hetura karana Iehova ida ia gimaia. Iesu be tanobada ai ia noho neganai unai bamona ia karaia bona taunimanima momo  ese idia matauraia, badina mai gari lasi ida abia hidi maorodia ia karaia.

Alkahol lau inua egu lalohekwarahi lau laloaboio totona, a? Salamo torea tauna ia gwau: “Lau lalohekwarahi bada neganai, oi [Iehova] ese lau oi hagoadaia bona egu lalona oi hanamoa.” (Sal. 94:19) Bema hekwakwanai ta oi davaria, Iehova dekenai heduru oi tahua, alkahol lasi. Dala namona be Iehova oi guriguri henia loulou. Danu, momo idia davaria kongrigeisen lalonai lo tadikaka taihu edia sisiba namodia idia abia dae neganai, idia ia durua bada. Momokani, alkahol momo inua karana ese ta ena laloa maoromaoro karana ia hadikaia diba bona abia hidi kereredia do ia karaia. (Hos. 4:11) Matamanai ita herevalaia tadikaka, Daniel, ia gwau: “Lau lalohekwarahi bona lau karaia kerere dainai lau lalohisihisi bada. Lau inuinu egu hekwakwanai lau laloaboio totona, to ia habadaia sibona bona egu turadia ese lau idia dadaraia bona lau laloa lau be anina lasi.” Dahaka ese Daniel ia durua? Ia gwau: “Lau laloparara Iehova ena heduru lau abia be namo, to alkahol lasi. Unai bamona lau karaia neganai, hekwakwanai lau haheaukalaia.” Ita dibaia gauna be inai: Ena be ita mamia dala ta be lasi iseda hekwakwanai ita hamaoromaoroa, to Iehova be hanaihanai ia noho hegaegae ita ia durua totona.—Fili. 4:​6, 7; 1 Pet. 5:7.

Bema oi ura alkahol oi inua, reana sibona oi sekea bona senisi haida oi karaia, hegeregere sibona oi nanadaia, ‘Egu famili memba ta eiava egu tura namona be egu inuinu karana dainai ia laloa momo, a?’ Bema oibe, unai ese ia hahedinaraia reana oi diba lasi, to oi be alkahol inua karana oi manadalaia matamaia noho. ‘Hari alkahol momo lau inua, guna bamona lasi, a?’ Unai be reana ta dekenai ia vara noho. ‘Dina haida eiava nega daudau lalonai alkahol lau inua lasi be ia auka, a?’ Bema oibe, reana alkahol inua karana oi ura henia eiava oi manadalaia. Unai hekwakwanai oi hanaia totona, reana doketa edia heduru oi tahua be namo.

Inuinu karana ese hekwakwanai momo ia havaraia dainai, Keristani taudia haida be alkahol inua karana idia dadaraia. Ma haida be abia hidi idia karaia alkahol do idia inua lasi badina ena mamina  idia ura henia lasi. Bema emu turana ta be unai bamona abia hidi ia karaia, namona be oi kirikirilaia lasi, to oi matauraia.

Eiava alkahol inua karana dekenai taravatu haida oi atoa ena namo oi itaia. Keristani tauna be reana hida do ia inua ena maka ia atoa. Eiava reana taravatu ia atoa nega hida do ia inuinu, hegeregere, wiki ta lalonai nega tamona sibona eiava aniani negadiai sisina do ia inua. Haida be abia hidi idia karaia edena alkahol do idia inua. Hegeregere, wain eiava bia sisina idia inua diba to alkahol goadadia, eiava idia mikisia alkahol idauidau do idia inua lasi. Bema ta ese unai bamona taravatu ia karaia, do ia auka lasi ia badinaia totona. Bona lo Keristani tauna be do ia hemarai lasi, unai bamona taravatu ia badinaia totona.

Danu, ma haida edia hemami ita laloa be gau badana. Roma 14:21 ia gwau: “Bema vamu oi ania eiava wain oi inua eiava kara ma ta amo emu tadikaka oi hahekwakwanaia, namo lasi unai gaudia oi karaia.” Edena dala ai unai sisiba oi badinaia diba? Namona be lalokau oi hahedinaraia. Bema oi itaia alkahol oi inua karana ese ma ta ia hahekwakwanaia, ia oi lalokau henia dainai reana do oi inua lasi, ani? Bema unai oi karaia oi hahedinaraia ma haida oi lalokau henia bona matauraia bona edia namo oi atoa guna.—1 Kor. 10:24.

Danu, gavamani be alkahol inua karana dekenai taravatu ia atoa, bona Keristani tauna ese unai ia badinaia be namo. Gavamani ese alkahol inua taudia dekenai mauri lagani ena taravatu ia atoa. Eiava tau ta be alkahol ia inua neganai motuka o masini haida do ia taria lasi.—Roma 13:​1-5.

Iehova ese ita dekenai harihari gaudia momo ia henia bona unai gaudia ita moalelaia totona, ura kwalimu ia henia. Anina be dahaka do ita ania bona inua, ita abia hidi diba. Namona be abia hidi maorodia ita karaia, unai amo iseda guba Tamana ita hamoalea diba.