New Zealand ai, dina ta taihu ta be jw.org ai vidio ta ia itaia, unai vidio ese ia hahedinaraia Iehova be hebogahisi ia mamia sibona lasi to kara ta ia karaia danu. (Isa. 63:​7-9) Taihu ese lalona ia hadaia ia dibaia gauna do ia badinaia bona haida dekenai heduru do ia henia. Gabeai, sitoa dekenai ia lao neganai, dala ai ia mahuta hahinena ta ia hedavari henia bona ia hamaoroa ena aniani do ia hoia. Unai hahine ese ena hereva ia abia dae. Taihu be ena aniani ia abia lao bona miniti haida lalonai pepapepa ladana Hisihisi Do Idia Ore, A? amo ia haroro henia.

Unai hahine ia tai bona ia gwau, ia be maragi neganai ena tama sina be Witnes maurina amo idia habadaia, to lagani momo gunanai hereva momokani ia rakatania. To, vanegai, Iehova dekenai ia giroa lou totona ia guriguri. Taihu be ia dekenai Baibel ta ia henia bona Baibel stadi ia abia dae. a

Iehova ena hebogahisi karana ita tohotohoa be namo, taunimanima haida, iseda varavara bona kongrigeisen tadikaka taihu dekenai unai ita hahedinaraia. Bona hebogahisi ita hahedinaraia dalana ta be ma haida dekenai Baibel ena sivarai ita harorolaia.