Inai lagani ena Gima Kohorona idauidau oi duahia namonamo vadaeni, a? Mani ita itaia bema inai henanadai oi haerelaidia diba:

Iseda ‘lalona ita hamatamataia’ ena anina be dahaka? (Roma 12:2)

Iseda mauri ai kara namodia haida sibona ita hahedinaraia karana ese iseda lalohadai ia hanamoa lasi. To, iseda kudouna ai idia noho gaudia ita diba be namo. Unai amo iseda kara ita haidaua bona Iehova ena taravatu hegeregerena ita noho.—w23.01, rau 8-9.

Niusi ita itaia neganai edena dala ai lalohadai maorona ita badinaia diba?

Ita ura diba tanobada ai idia vara gaudia be edena dala ai Baibel ena peroveta herevadia idia hagugurua. To, namo lasi sibona iseda lalohadai ita gwauraia, badina ita ura lasi kongrigeisen ena lalotamona ia hadikaia. Ita kiki neganai, iseda buka bona magasin lalonai idia noho gaudia ita herevalaia be namo. (1 Kor. 1:10)—w23.02, rau 16.

Edena dala ai Iesu ena bapatiso be ia murinai idia raka taudia edia bapatiso amo ia idau?

Iesu be Dirava dekenai idia gwauhamata vadaeni besena lalonai ia vara dainai, iena mauri be Iehova dekenai ia gwauhamatalaia lasi, ita karaia bamona. Ia be goevadae tauna bona kara dika ta ia karaia lasi dainai, ia helalo-kerehai be anina lasi.—w23.03, rau 5.

Edena dala ai haida ita durua diba hebou dekenai idia haere totona?

Iseda haere do ia kwadogi, unai amo nega ita henia haida idia haere totona. Namo lasi point momo oi herevalaia. Point haida oi rakatania ma haida ese idia haerelaia totona.—w23.04, rau 23.

Isaia 35:8 ese ia herevalaia “Helaga Dalana” be dahaka?

Idaunegai, unai haiwei be Iuda taudia ese Babulonia idia rakatania bona edia hanua dekenai idia giroa lou dalana ia laulaulaia. Hari, be edena bamona? Lagani momo gunanai ema bona lagani 1919 ai, Dirava ena taunimanima be dala idia hegaegaelaia, unai be Baibel idia hahanaia bona printaia gaukarana, bona gaukara ma haida. Idia be “Helaga Dalana” ai idia raka noho bona mai lalotamona ida Dirava idia tomadiho henia, unai amo Dirava ena Basileia ena hahenamo idia abia.—w23.05, rau 15-19.

Aonega Herevadia karoa 9 ena sisiba herevana ese laulau dalanai edena hahine rua ia herevalaia?

Aonega Herevadia ese “kavakava hahinena” ia herevalaia, iena boiboi idia kamonai taudia be “Mase Gurina” dekenai ia hakaudia lao. Ma hahine ta be “aonega korikori,” iena boiboi idia kamonai taudia be “laloparara ena dala ai [idia] raka lao” bona mauri idia abia. (Aon. 9:​1, 6, 13, 18)—w23.06, rau 22-24.

Edena dala ai Dirava ese Lota dekenai manau bona laloa maoromaoro karana ia hahedinaraia?

Iehova be Lota ia hamaoroa ororo gabudia dekenai do ia heau lao. Lota ese Iehova ia noia Soara tanona dekenai do idia lao neganai, Iehova ese ena noinoi ia kamonai.—w23.07, rau 21.

Hahine be dahaka do ia karaia bema ena tau be ponografi ia itaia?

Namona be sibona ia bleim lasi. To, Iehova kahirakahira ia lao bona Baibel lalonai hekwakwanai idia davaria bona Iehova ese idia ia durua hahine edia sivarai ia duahia bona laloa dobu be namo. Ena adavana ia durua diba lalona veria gaudia ia dadaraia totona.—w23.08, rau 14-17.

Ita abia dae gaudia be haida ese idia hepapahuahulaia neganai, edena dala ai laloa namonamo karana ese ita ia durua ita manau totona?

Ta ena henanadai amo iena lalohadai eiava ia laloa bada gauna do ita dibaia. Unai amo mai gado namo ida ita haere henia diba.—w23.09, rau 17.

Maria ese goada ia abia dalana amo dahaka ita dibaia?

Maria ia kamonai ia be Mesia ena sinana ai do ia lao neganai, haida amo goada ia abia. Aneru Gabriela bona Elisabeta be Baibel siridia amo Maria idia hagoadaia. Ita danu be iseda tadikaka taihu ese ita idia hagoadaia diba.—w23.10, rau 15.

Edena dala ai Iehova ese iseda guriguri do ia haerelaia?

Iehova ia gwauhamata iseda guriguri do ia kamonai bona ia itaia edena dala ai iena ura ida idia hegeregere. (Ier. 29:12) Ita ibounai be gau tamona totona ita guriguri, to Iehova ese dala idauidau ai iseda guriguri do ia haerelaia, bona hanaihanai ita do ia durua.—w23.11, rau 21-22.

Roma 5:2 ese “helaro” ia gwauraia vadaeni, unai dainai dahaka dainai siri 4 ai ia herevalaia lou?

Ta be sivarai namona ia kamonai neganai, tanobada paradaisona ai mauri hanaihanai do ia moalelaia ena helaro ia abia dae. To hisihisi ia davaria, ia haheaukalaidia bona Dirava ena lalonamo ia abia neganai, ena helaro ia goada bona ia abia dae Dirava ese ia gwauhamatalaia gaudia be do idia vara momokani.—w23.12, rau 12-13.