1. Keristani tauna be ‘taunimanima badana bamona ia laloa’ totona, dahaka ia karaia be namo?

 APOSETOLO Paulo ese Korinto tadikaka ia hamaorodia: “Tadikaka e, natudia maragidia bamona umui laloa lasi, to . . . taunimanima badana bamona umui laloa.” (1 Kor. 14:20) Unai be sisiba namona Keristani tatau ibounai dekenai. ‘Taunimanima badana bamona idia laloa’ totona, namona be edia mauri ibounai lalonai Dirava ena taravatu bona hakaua herevadia idia badinaia. (Luka 2:52) Dahaka dainai tadikaka matamata be lo Keristani tatau ai idia lao be mai anina bada?

2-3. Dahaka dainai tadikaka matamata be lo Keristani tauna ai ia lao be namo?

² Ruma bese bona kongrigeisen lalonai Keristani tauna be mai ena maduna badana. Tadikaka matamata e, reana vaira nega ai do oi huaia maduna idauidau oi laloa vadaeni. Reana oi ura painia tauna, hesiai tauna, bona gabeai elda tauna ai oi lao. Reana oi ura do oi headava bona natudia oi havaraia. (Efe. 6:4; 1 Tim. 3:1) Unai tahua gaudia oi hagugurua bona emu gaukara oi huaia namonamo totona, lo Keristani tauna ai oi lao be namo. b

³ Dahaka ese oi do ia durua lo Keristani tauna ai oi lao totona? Mai anina bada gaukara haida oi dibaia bona oi manadalaia be namo. Vadaeni, edena bamona oi hegaegae diba vaira nega ai do oi huaia maduna idauidau oi hagugurua totona?

4. Edeseniai haheitalai namodia oi davaria diba? (Laulau itaia danu.)

⁴ Haheitalai namodia oi abia hidi bona tohotohoa. Baibel lalonai oi tohotohoa diba tatau matamata edia haheitalai namodia idia noho. Idaunegai, idia be Dirava idia lalokau henia  bona iena taunimanima idia naria totona maduna idauidau idia huaia. Emu ruma bese eiava kongrigeisen lalonai lo Keristani tatau edia haheitalai namodia oi itaia diba. (Heb. 13:7) Bona haheitalai goevadaena Iesu Keriso oi tohotohoa diba. (1 Pet. 2:21) Unai haheitalai namodia oi stadilaia neganai, edia kara namodia oi laloa dobu. (Heb. 12:​1, 2) Bena edia haheitalai oi tohotohoa dalana oi laloa.

5. Edena dala ai laloa namonamo karana oi habadaia diba bona dahaka dainai ia be mai anina bada? (Salamo 119:9)

⁵ “Laloa namonamo karana” oi habadaia bona “gimaia.” (Aon. 3:21) Laloa namonamo tauna be ia kara haraga lasi, to gau ibounai ia lalohadailaia namonamo guna bena kara ta ia karaia. Unai dainai, namona be unai kara oi dibaia bona oi badinaia noho. Dahaka dainai? Badina inai tanobada ai tatau matamata be sibodia edia lalohadai eiava hemami ese edia kara ia biaguna. (Aon. 7:7; 29:11) Danu, TV, muvi, Intanet bona social media ese oiemu lalohadai bona kara ia biagua diba. To, edena dala ai laloa namonamo karana” oi habadaia diba? Namona be Baibel ena hakaua herevadia oi dibaia bona oi idia durua dalana oi laloa guna. Bena unai hakaua herevadia amo disisen maorodia oi karaia Iehova oi hamoalea totona. (Salamo 119:9 duahia.) Unai kara oi dibaia neganai, oi do ia durua lo Keristani tauna ai oi lao totona. (Aon. 2:​11, 12; Heb. 5:14) Inai dala rua ai (1) taihu oi kara henidia bona (2) emu toana bona dabua totona abia hidi oi karaia neganai, laloa namonamo karana ese oi ia durua daladia mani ita herevalaia.

6. Edena dala ai laloa namonamo karana ese tadikaka matamata do ia durua taihu ia matauraidia totona?

⁶ Laloa namonamo karana ese oi do ia durua hahine oi matauraidia totona. Tadikaka matamata be vaia do ia ura Keristani taihu ta ia tura henia, bona unai be kerere lasi. To, bema ia be taihu do ia adavaia lalohadaina ia abia lasi, laloa namonamo karana ese do ia durua hereva ta do ia gwauraia kava lasi, hereva ta do ia torea kava lasi, eiava kara ta do ia karaia kava lasi taihu ia ha-uraia totona. (1 Tim. 5:​1, 2) Bema ia be taihu ta ia tura henia, idia loa  hebou negadiai ta ese idia ia bamoa be namo. Unai kara amo ia ese taihu ena ladana namona ia hadikaia lasi.—1 Kor. 6:18.

7. Edena dala ai laloa namonamo karana ese tadikaka matamata do ia durua ena toana bona dabua ia abia hidi totona?

⁷ Tau matamata ia hahedinaraia ia be laloa namonamo tauna bema dabua namodia ia abia hidi bona ena toana ia namo. Hari, dabua idia turia taudia be Dirava idia matauraia lasi bona matabodaga maurina idia noholaia. Edia matabodaga lalohadai be idia turia dabua edia sitaelo dekenai idia hedinarai. Hegeregere, idia turia dabua be kopina dekenai idia kamokau eiava tatau ese idia hahedokilaia neganai, edia toana be hahine bamona. Lo Keristani tauna ai ia ura lao tau matamata be dabua ia abia hidi neganai, Baibel ena hakaua herevadia bona tadikaka taihu edia haheitalai namodia do ia badinaia. Sibona do ia nanadaia: ‘Lau abia hidi dabua edia toana ese idia hahedinaraia lau be laloa namonamo tauna, bona ma haida edia hemami lau matauraia, a? Egu dabua ena sitaelo amo haida do idia abia dae lau be Dirava lau tomadiho henia merona, a?’ (1 Kor. 10:​31-33; Tito 2:6) Laloa namonamo ia hahedinaraia tau matamatana be ena guba Tamana bona tadikaka taihu ese do idia matauraia.

8. Edena dala ai tadikaka matamata be ena maduna ia huaia namonamo diba?

⁸ Maduna oi huaia namonamo. Tau matamata be iena maduna ibounai ia huaia namonamo neganai, haida ese do idia abidadama henia. (Luka 16:10) Mani Iesu ena haheitalai goevadaena ita laloa. Ia be ena gaukara ia karaia kava lasi eiava ia hadikaia lasi. To, Iehova ese ia henia asainmen idauidau ia hagugurua, ena be idia auka. Iesu be taunimanima ia lalokau henia bona iena aposetolo taudia danu, unai dainai mai lalona ibounai ida idia totona ena mauri ia bouboulaia. (Ioa. 13:1) Namona be Iesu oi tohotohoa bona oi gaukara goada oi abia asainmen idauidau oi hagugurua totona. Bema gaukara ta karaia dalana dekenai oi daradara, namona be oi manau bona lo tadikaka edia heduru oi tahua. Namo lasi oi lahedo bona gaukara oi karaia namonamo lasi. (Roma 12:11) To, namona be emu asainmen idauidau oi hagugurua, “Iehova totona [oi] karaia bona taunimanima totona lasi.” (Kol. 3:23) Momokani, oi be goevadae lasi dainai, gaukara dekenai kerere haida do oi karaia, to namona be oi gwauraia hedinarai, unai be manau karana.—Aon. 11:2.

9. Dahaka dainai tadikaka matamata be gaukara idauidau ia diba be namo?

⁹ Lo Keristani tauna ai oi lao totona, gaukara idauidau karaia dalana oi diba be namo. Unai ese oi do idia durua kongrigeisen lalonai maduna idauidau do oi huaia, oi sibona o emu ruma bese durua totona moni gaukara do oi karaia, bona tura namodia do oi davaria. Mani unai gaukara idauidau ita herevalaia.

10-11. Edena dala ai tadikaka matamata be duahiduahi bona toretore ia dibaia karana amo sibona bona kongrigeisen ia durua diba? (Salamo 1:​1-3) (Laulau itaia danu.)

 ¹⁰ Duahiduahi bona toretore oi diba namonamo. Baibel ia gwau, ia moale bona kwalimu tauna be dina ta ta ai Dirava ena Hereva ia duahia bona ia laloa dobu. (Salamo 1:​1-3 duahia.) Unai ia karaia neganai, Iehova ena laloa dalana do ia dibaia bona unai ese ia durua siri ia lalopararalaia bona ia badinaia totona. (Aon. 1:​3, 4) Ita ura unai bamona tatau be kongrigeisen lalonai idia noho. Dahaka dainai?

¹¹ Iseda tadikaka taihu be unai bamona tadikaka amo Baibel ena sisiba bona hakaua herevadia edia heduru idia tahua. (Tito 1:9) Bema oi duahiduahi bona toretore namonamo, oi ese ma haida edia abidadama do ia hagoadaia tok bona heduru herevadia oi hegaegaelaia diba. Danu sibona emu stadi, o kongrigeisen heboudia, hebouhebou maragidia bona badadia dekenai point badadia oi toredia diba. Unai point ese oi do idia durua emu abidadama oi hagoadaia bona ma haida oi durua totona.

12. Dahaka ese oi ia durua diba herevahereva namonamo tauna ai oi lao totona?

¹² Herevahereva namonamo karana oi dibaia. Keristani tauna be herevahereva namonamo karana ia diba be namo. Ia ese ma haida edia hereva ia kamonai bona edia lalohadai bona hemami ia abia dae. (Aon. 20:5) Ia ese ma ta ena gado regena, ena vairana toana bona ena kara amo ta ena hemami do ia diba. Unai do oi karaia bema haida oi bamoa. Bema haida oi hereva henia totona elektronik gaudia, hegeregere e-mail bona teks mesiji oi gaukaralaia momo, unai ese taunimanima ida oi herevahereva karana do ia hadikaia diba. Unai dainai, namona be nega oi atoa taunimanima ida oi herevahereva totona.—2 Ioa. 12.

13. Tau matamata be dahaka ia dibaia danu be namo? (1 Timoteo 5:8) (Laulau itaia danu.)

¹³ Sibona naria karana oi dibaia. Lo Keristani tauna be ia sibona bona ena ruma bese do ia naria be namo. (1 Timoteo 5:8 duahia.) Tano haida ai, tadikaka matamata be edia tamana o varavara ma ta amo gaukara ta karaia dalana idia dibaia. Tano ma haida ai, tau matamata be haisikuli dekenai gaukara ta karaia dalana ia dibaia. Unai bamona gaukara oi dibaia be namo, badina gabeai oi do ia durua moni gaukara ta oi davaria totona. (Kara 18:​2, 3; 20:34; Efe. 4:28) Namona be oi gaukara goadagoada bona oi hamatamaia gauna oi haorea. Haida be unai do idia itaia bona emu gaukara do idia hanamoa. Unai bamona oi karaia neganai, oi be gaukara ta do oi davaria  bona do idia ura oi gaukara noho. Keristani tauna totona hari ita herevalaia kara namodia bona gaukara idauidau be mai anina bada, badina unai ese do idia durua vaira nega ai maduna ma haida ia huaia totona. Mani unai maduna haida ita herevalaia.

14. Edena dala ai tadikaka matamata be ful-taim hesiai gaukara totona ia hegaegae diba?

¹⁴ Ful-taim hesiai gaukara. Lo Keristani tadikaka momo be idia matamata neganai ful-taim hesiai gaukara idia hamatamaia. Painia gaukara ese tau matamata ia durua taunimanima idauidau ida ia gaukara namonamo totona. Danu, moni ia naria bona gaukaralaia namonamo dalana ia dibaia. (Fili. 4:​11-13) Ful-taim hesiai gaukara hamatamaia dalana namona be heduru painia gaukara. Haida be nega sisina lalonai heduru painia idia karaia, bona unai amo regula painia totona idia hegaegae. Painia gaukara ese dala ia kehoa ful-taim hesiai gaukara ma haida, hegeregere konstraksen o Betele ai idia gaukara totona.

15-16. Edena dala ai tadikaka matamata do ia hegeregere kongrigeisen lalonai maduna ia huaia totona?

¹⁵ Hesiai o elda tauna. Namona be Keristani tatau ibounai idia gaukara goada elda tauna ai idia lao bona tadikaka taihu idia hesiai henia totona. Baibel ia gwau, unai bamona tahua gauna idia atoa taudia “be gaukara namona ia ura henia unai.” (1 Tim. 3:1) Elda gaukara ia do abia lasi neganai, namona be tadikaka ia hegeregere hesiai tauna ena maduna ia abia totona. Hesiai taudia be dala idauidau ai elda taudia idia durua. Elda bona hesiai taudia be mai manau ida haroro gaukara idia goadalaia bona edia tadikaka taihu idia durua. Ena be tadikaka edia mauri lagani be 20 ia do abia lasi, to idia hegeregere diba hesiai tauna ena maduna ia abia totona. Bona mauri lagani 20 ia hanaia tadikaka be hesiai tauna ena maduna ia huaia namonamo neganai, elda tauna ena maduna idia henia diba.

¹⁶ Edena dala ai unai maduna totona oi hegeregere diba? Baibel ese do oi hanamoa kara namodia ia herevalaia. Unai ese oi do idia durua Iehova, ruma bese, bona kongrigeisen taudia dekenai lalokau oi hahedinaraia totona. (1 Tim. 3:​1-13; Tito 1:​6-9; 1 Pet. 5:​2, 3) Oi gaukara goada unai kara ta ta oi lalopararalaia totona. Unai kara namodia oi habadaia totona Iehova ena heduru oi noia be namo. c

17. Edena dala ai tadikaka matamata do ia hegaegae headava tauna bona ruma bese kwarana ena maduna ia huaia totona? (Laulau itaia danu.)

¹⁷ Headava tauna bona ruma bese kwarana.  Iesu ia hereva bamona, lo Keristani tatau haida be do idia headava lasi. (Mat. 19:12) To, bema oi ura headava, oi ese headava tauna bona ruma bese kwarana ena maduna do oi huaia. (1 Kor. 11:3) Iehova ia ura headava tauna be iena adavana do ia lalokau henia bona tauanina dalanai ena dabu gaudia ia henia, ia tura henia namonamo, bona ia durua Iehova kahirakahira ia noho totona. (Efe. 5:​28, 29) Matamanai ita herevalaia kara namodia bona gaukara idauidau, hegeregere laloa namonamo karana, hahine matauraidia karana, bona maduna huaia namonamo karana ese emu headava lalonai oi do idia durua. Do oi hegeregere headava tauna bona ruma bese kwarana ena maduna oi huaia totona.

18. Edena dala ai tadikaka matamata do ia hegaegae tama namona ai ia lao totona?

¹⁸ Tamana. Oi headava murinai, reana tama ta ai do oi lao. Tama namona ai oi lao totona, Iehova amo gau momo do oi dibaia. (Efe. 6:4) Iehova be iena Natuna, Iesu, ia hamaoroa ia lalokau bona lalonamo henia. (Mat. 3:17) Bema tama ta ai do oi lao, namona be hanaihanai emu natudia oi hamaoroa idia oi lalokau henia. Nega momo idia karaia gau namodia dainai oi hanamodia. Iehova ena haheitalai idia tohotoho tama ese edia natudia idia durua lo Keristani tau bona hahine ai idia lao totona. Tama namona ai oi lao totona, namona be mai lalokau ida emu ruma bese bona kongrigeisen taudia oi naria, bona oi hamaorodia idia oi lalokau henidia bada. (Ioa. 15:9) Unai ese oi do ia durua vaira nega ai headava tauna bona tama namona ai oi lao totona. To hari, oi be Iehova, emu ruma bese bona kongrigeisen dekenai heduru namona oi henia diba.

19-20. Dahaka ese tadikaka matamata do ia durudia lo Keristani tauna ai idia lao totona? (Rau 1 ena laulau itaia.)

¹⁹ Tadikaka matamata e, do oi gaukara goada lo Keristani tauna ai oi lao totona. Haheitalai namodia do oi tohotohoa, laloa namonamo karana do oi habadaia, emu maduna oi huaia namonamo, gaukara idauidau oi dibaia bona vaira nega ena maduna haida totona do oi hegaegae be namo.

²⁰ Unai gaukara ibounai oi laloa neganai, reana do oi laloa unai be auka. To oi kwalimu diba. Laloatao, Iehova ia ura bada oi do ia durua. (Isa. 41:​10, 13) Bona, kongrigeisen ai tadikaka taihu be oi do idia durua danu. Lo Keristani tauna ai oi lao neganai, emu mauri do ia namo bona oi moale. Tadikaka matamata e, umui ai lalokau henia! Lo Keristani tatau ai umui lao totona emui hekwarahi be Iehova ese do ia hanamoa.—Aon. 22:4.