1. Lo Keristani tauna ai ita lao totona, dahaka ita karaia be namo?

 ITA ITAIA natu maragina ta be ia tubu haraga bona tau badana ai ia lao be hoa gauna. Ena be gau ta idia karaia lasi to idia tubu daekau haraga. To, lo Keristani tauna ai ita lao totona, ita gaukara goada be namo. b (1 Kor. 13:11; Heb. 6:1) Unai tahua gauna ita hagugurua totona, Iehova ita tura henia be namo. Danu, iena lauma helaga ita abia, kara namodia ita habadaia, gaukara idauidau ita dibaia, bona vaira nega ena maduna idauidau totona ita hegaegae.—Aon. 1:5.

2. Genese 1:27 amo dahaka ita dibaia, bona inai atikol ai dahaka do ita herevalaia?

² Iehova ese tau bona hahine ia karaia. (Genese 1:27 duahia.) Ita diba tau bona hahine edia tauanina be idau, to dala ma haida ai idia idau danu. Hegeregere, Iehova ese tau bona hahine dekenai maduna idauidau ia henia, unai dainai kara namodia bona gaukara haida idia dibaia be namo edia maduna ta ta idia hagugurua totona. (Gen. 2:18) Inai atikol ai, taihu matamata be lo Keristani hahinena ta ai ia lao totona ia karaia diba gaudia do ita herevalaia. Atikol 53 ai, tadikaka matamata ese idia karaia diba gaudia do ita herevalaia.

3-4. Taihu matamata be edeseni amo haheitalai namodia idia tohotohoa diba? (Laulau itaia danu)

³ Baibel ese Iehova idia lalokau bona hesiai henia hahine namodia haida edia sivarai ia gwauraia. (Inai atikol “Women in the  Bible—What Can We Learn From Them?” be jw.org ai oi itaia.) Inai stadi ena siri badana ena hereva hegeregerena, idia be “edia kara idia biagua, bona gau ibounai idia karaia namonamo.” Ma danu, taihu matamata be edia kongrigeisen lalonai idia noho lo Keristani taihu edia haheitalai idia tohotohoa diba.

⁴ Taihu matamata e, umui be umui tohotohoa diba lo Keristani taihu haida umui diba, a? Namona be edia kara namodia umui itaia, bena do umui tohotohoa dalana umui laloa. Paragraf gabedia ai, taihu ese idia hahedinaraia be namo kara namodia rua do ita herevalaia.

5. Dahaka dainai lo Keristani hahinena dekenai manau karana be mai anina bada?

⁵ Manau karana be lo Keristani hahinena ena kara badana ta. Bema hahine ta be ia manau, ia be Iehova bona ma haida do ia tura henidia namonamo. (Iam. 4:6) Hegeregere, Iehova ia lalokau henia hahinena be 1 Korinto 11:3 ese ia herevalaia kwara dagina ena hakaua herevana do ia badinaia. Kongrigeisen bona ruma bese lalonai unai hakaua herevana be mai anina bada. c

6. Taihu matamata be Rebeka ena manau karana amo dahaka idia dibaia?

⁶ Mani Rebeka ena haheitalai ita laloa. Ia be aonega hahinena bona iena mauri lalonai abia hidi badadia ia karaia. (Gen. 24:58; 27:​5-17) To, ia be hemataurai karana ia hahedinaraia bona mai lalona ibounai ida hakaua herevadia ia badinaia. (Gen. 24:​17, 18, 65) Bema mai manau ida Iehova ena hakaua daladia oi badinaia, Rebeka hegeregerena, emu ruma bese bona kongrigeisen dekenai oi be haheitalai namona.

7. Edena dala ai taihu matamata ese Eseta ena manau karana idia tohotohoa diba?

⁷ Lo Keristani taudia ibounai ese hekokoroku lasi karana idia hahedinaraia be mai anina bada. Baibel ia gwau, “manau taudia be aonega idia abia noho.” (Aon. 11:2) Eseta be manau bona Dirava ia abidadama henia hahinena.  Ia manau dainai kwini ai ia lao neganai, ia hekokoroku lasi. Ena kasin Modekai ena sisiba ia kamonai bona ia badinaia. (Est. 2:​10, 20, 22) Eseta bamona manau karana oi hahedinaraia diba bema haida amo sisiba oi tahua bona edia hereva namodia oi badinaia.—Tito 2:​3-5.

8. Timoteo Ginigunana 2:​9, 10 hegeregerena, edena dala ai manau karana ese taihu ta do ia durua abia hidi maorona ia karaia totona?

⁸ Eseta ese manau karana be dala ma ta amo ia hahedinaraia. Ia be “mai ena hairai bona ena toana be namo herea,” to haida edia lalona ia veria lasi ia idia laloa bada eiava ia sibona idia itaia totona. (Est. 2:​7, 15) Edena dala ai Eseta ena haheitalai ese Keristani hahinena ta ia durua diba? Dala ta be 1 Timoteo 2:​9, 10 ese ia herevalaia. (Duahia.) Aposetolo Paulo ese Keristani hahine ia hamaorodia mai hemataurai bona mai laloa maoromaoro ida dabua do idia hahedokilaia. Ai moale badina umui lo Keristani taihudia be mai hemataurai ida emui dabua umui hahedokilaia!

9. Abigaila ena haheitalai amo dahaka ita dibaia?

⁹ Lo Keristani taihu ibounai ese laloa maoromaoro karana idia hahedinaraia be mai anina bada. Laloa maoromaoro ena anina be dahaka? Unai kara ese oi ia durua dahaka be maoro bona dahaka be kerere oi lalopararalaia, bena abia hidi maorona oi karaia. Mani Abigaila ena haheitalai ita laloa. Ena tau ese abia hidi kererena ia karaia, unai dainai iena ruma bese taudia ibounai be dika idia davaria diba. Abigaila be kara ta ia karaia haraga. Iena laloa maoromaoro karana dainai ibounai ia hamauria. (1 Sam. 25:​14-23, 32-35) Laloa maoromaoro karana ese ita ia durua dainai, ita diba edena negai do ita hereva eiava ita hereva lasi totona. Danu, ma haida ita durua neganai, ita ura lasi edia hemami ita hadikaia.—1 Tes. 4:11.

10-11. Edena dala ai toretore bona duahiduahi oi diba namonamo karana ese oi bona ma haida ia durua diba? (Laulau itaia danu)

¹⁰ Keristani hahinena ta ese gaukara idauidau ia diba be namo. Kekeni be ia maragi negana ai ia dibaia gaudia haida ese ena mauri ibounai lalonai do ia durua. Mani haheitalai haida ita itaia.

¹¹ Toretore bona duahiduahi oi diba namonamo. Tano haida ai idia laloa hahine be toretore bona duahiduahi idia diba be anina lasi. To Keristani taudia ibounai ese unai idia diba be mai anina bada. d (1 Tim. 4:13) Namona be gau ta ese oi ia koua lasi toretore bona duahiduahi oi diba namonamo totona. Dahaka namo do oi davaria? Unai diba ese oi do ia durua moni gaukara oi davaria totona. Dirava  ena Hereva do oi stadilaia namonamo bona ma haida oi hadibaia diba. To gau badana be, Iehova ena Hereva oi duahia bona laloa dobu neganai, unai ese oi do ia durua ia kahirakahira oi lao totona.—Ios. 1:8; 1 Tim. 4:15.

12. Edena dala ai Aonega Herevadia 31:26 ese herevahereva namonamo dalana dekenai oi ia durua diba?

¹² Herevahereva namonamo dalana oi dibaia. Keristani taudia dekenai unai be mai anina bada. Hahediba tauna Iamesi be unai kara dekenai sisiba namona ia henia, ia gwau: “Taunimanima ibounai be do idia kamonai haraga, to do idia hereva haraga lasi.” (Iam. 1:19) Ma haida idia hereva neganai oi kamonai namonamo, unai be hebogahisi, eiava ‘ta ta laloa bada’ karana. (1 Pet. 3:8) Bema ta ena hereva eiava hemami oi lalopararalaia lasi, namona be oi nanadaia. Bena oi laloa namonamo guna bona gabeai oi hereva. (Aon. 15:28) Sibona oi nanadaia: ‘Do lau gwauraia herevana be momokani bona do ia durua, eiava? Ia be hemataurai herevana, a?’ Namona be idia kamonai namonamo bona mai hemataurai ida idia herevahereva lo taihu oi tohotohodia. (Aonega Herevadia 31:26 duahia.) Idia abia hidi herevadia bona gwauraia dalana oi itaia namonamo. Unai kara namona oi dibaia neganai, emu hetura karana ma haida ida do ia hanamoa.

13. Edena dala ai ruma gaukara haida oi dibaia diba? (Laulau itaia danu)

¹³ Ruma gaukara oi dibaia. Gabu momo ai, hahine ese ruma gaukara momo idia karaia. Emu sinana eiava taihu ma ta ese oi ia durua diba, gaukara idauidau oi dibaia totona. Taihu ta ladana Cindy ia gwau: “Egu sinana amo lau dibaia mai anina bada gauna ta be gaukara goadagoada karana amo moale ita davaria. Aniani nadua, ruma hagoevaia, dabua turia bona aniani hoia dalana lau diba dainai, unai ese lau ia durua bona dala ia kehoa Iehova ena hesiai gaukara lau karaia totona. Egu sinana ese lau ia hadibaia heabidae karana lau hahedinaraia totona. Unai kara amo tadikaka bona taihu namodia momo lau hedavari henidia bona edia haheitalai lau tohotohoa.” (Aon. 31:​15, 21, 22) Ia gaukara goadagoada bona heabidae karana ia hahedinaraia hahinena be ena ruma bese bona kongrigeisen lalonai hahenamo badana.—Aon. 31:​13, 17, 27; Kara 16:15.

14. Crystal ena haheitalai amo dahaka oi dibaia, bona dahaka gaudia oi atoa guna be namo?

¹⁴ Sibona naria karana oi dibaia. Lo Keristani taudia ibounai do idia hekwarahi sibona idia naria be mai anina bada. (2 Tes. 4:11) Taihu ta ladana Crystal, ia gwau: “Egu tama sina ese haisikuli ai do lau abia kosi idia abia hidi, unai amo gaukara idauidau karaia daladia lau dibaia. Egu tamana ese lau ia hagoadaia akaun gaukara ena kosi lau karaia totona, bona unai ese lau ia durua bada.” Moni oi davaria dalana oi dibaia be namo, to oi gaukaralaia dalana oi  dibaia danu, unai amo emu moni do oi haorea kava lasi. (Aon. 31:​16, 18) Bema kohu momo lasi maurina oi noholaia bona anina lasi gaudia oi hoia lasi, unai ese oi do ia durua Iehova ena hesiai gaukara oi atoa guna totona.—1 Tim. 6:8.

15-16. Singul taihu be edena dala ai kongrigeisen idia durua diba? (Mareko 10:​29, 30) (Laulau itaia danu)

¹⁵ Iehova ia hamoalea karadia bona gaukara idauidau oi dibaia neganai, unai ese oi do ia durua gabeai abia hidi maorodia oi karaia totona. Oi karaia diba gaudia haida mani ita herevalaia.

¹⁶ Lagani haida singul maurina oi noholaia. Iesu ena hereva hegeregerena, hahine haida be abia hidi idia karaia idia headava lasi totona, ena be edia hanua ai headava be gau badana. (Mat. 19:​10-12) Haida be badina haida dainai idia headava lasi. Namona be oi diba Iehova bona Iesu be singul Keristani taudia idia laloa bada. Tanobada hegegemadai, kongrigeisen lalonai singul taihudia be hahenamo badana. Unai Keristani hahine be haida idia lalokau henia bona lalodia bada dainai, tadikaka taihu dekenai idia be taihu bona sina bamona ai idia lao.—Mareko 10:​29, 30 duahia; 1 Tim. 5:2.

17. Edena dala ai taihu matamata ta be ful-taim hesiai gaukara totona ia hegaegae diba?

¹⁷ Ful-taim hesiai gaukara oi karaia. Tanobada hegegemadai be haroro gaukara lalonai Keristani hahine be gaukara badana idia karaia. (Sal. 68:11) Hari palani oi karaia diba ful-taim hesiai gaukara oi karaia totona, a? Reana painia, konstraksen volantia o Betele gaukara oi karaia diba. Emu tahua gauna oi gurigurilaia. Unai tahua gauna idia hagugurua vadaeni taudia oi nanadaia, dahaka do oi karaia ful-taim hesiai gaukara lalonai oi vareai totona. Bena palani oi karaia unai tahua gauna oi hagugurua totona. Unai oi hagugurua neganai, dala ia kehoa Iehova ena hesiai gaukara ma haida oi karaia diba.

18. Dahaka dainai taihu ta be ia ura adavaia tauna do ia abia hidi namonamo? (Laulau itaia danu)

¹⁸ Reana oi ura do oi headava. Ita herevalaia kara namodia bona gaukara idauidau ese oi do idia durua headava hahine ai oi lao totona. Momokani, bema oi ura headava, namona be mai laloa maoromaoro ida abia hidi ia karaia. Ia be mai anina bada abia hidi ta. Laloatao, oi adavaia tauna ena kwara dagina  henunai do oi noho. (Roma 7:2; Efe. 5:​23, 33) Unai dainai sibona oi nanadaia: ‘Ia be lo Keristani tauna, a? Iena mauri lalonai Iehova ia atoa guna, a? Disisen namodia ia karaia, a? Iena kerere ia gwauraia hedinarai, a? Hahine ia matauraidia, a? Lau do ia durua egu hetura karana Iehova ida ia goada totona, tauanina dalanai lau ia naria, bona egu turana namona ai do ia lao, a? Ena maduna ia huaia namonamo, a? Hegeregere, kongrigeisen lalonai dahaka maduna ia abia, bona ia huaia namonamo, a?’ (Luka 16:10; 1 Tim. 5:8) Oibe, bema oi ura tau namona oi davaria, namona be oi danu oi hegaegae hahine namona ai oi lao totona.

19. Dahaka dainai hahine ena maduna tau do ia durua karana ia moalelaia diba?

¹⁹ Baibel ia gwau hahine namona be ena adavana ena “durua tauna” bona iena “bamoa” tauna. (Gen. 2:18) Unai ese ia hahedinaraia hahine be anina lasi, a? Lasi! Hahine ena maduna ena tau do ia durua karana be hahenamo ta. Laloatao, Baibel ese Iehova be “durua tauna” bamona ia herevalaia danu. (Sal. 54:4; Heb. 13:6) Hegeregere, tau be ruma bese totona disisen ia karaia neganai, hahine ese ia durua ena disisen idia hagugurua totona. Bona ia be Iehova ia lalokau henia dainai, ia gaukara goada ma haida ese ena tau ena kara namodia idia itaia totona. (Aon. 31:​11, 12; 1 Tim. 3:11) Emu lalokau Iehova totona oi habadaia, ruma bese bona kongrigeisen ai ma haida oi durua karana amo, vaira nega ena maduna haida totona oi hegaegae diba.

20. Sina ta ena kara ese ruma bese be edena bamona ia hanamoa diba?

²⁰ Reana sina ta ai do oi lao. Umui headava murinai, reana oi bona emu adavana do umui ura natudia umui havaraia. (Sal. 127:3) Unai dainai, sina namona ta ai oi lao dalana oi lalohadailaia guna. Ita herevalaia kara namodia bona gaukara idauidau ese oi do idia durua headava hahine bona sina ta ai oi lao totona. Lalokau, hebogahisi bona haheauka karadia oi hahedinaraia neganai, emu ruma bese oi durua idia moale bona natudia be gau ta dekenai do idia gari lasi.—Aon. 24:3.

21. Iseda taihu be edena bamona ita lalodia, bona dahaka dainai? (Rau 1 ena laulau itaia.)

²¹ Taihu e, Iehova bona iena taunimanima totona umui karaia gaukara dainai, umui ai lalokau henia. (Heb. 6:10) Umui gaukara goada Dirava hamoalea karadia umui karaia, emui mauri umui hanamoa bona ma haida umui durua totona gaukara idauidau umui dibaia, bona vaira nega ena maduna idauidau totona umui hegaegae. Iehova ena orea lalonai umui be mai anina bada!