Lau be lagani 1927 ai lau vara, Chicago, Illinois, U.S.A. kahirakahira ia noho taoni ta ai. Egu tama sina edia natudia be faiv—Jetha, Don, lau, Karl, bona Joy. Ai ibounai be emai lalona ai hadaia mai kudouna ibounai ida Iehova ai hesiai henia totona. Lagani 1943 ai, Jetha be Gilead ena klas iharuana dekenai ia lao. Lagani 1944, 1947, bona 1951 ai, Don, Karl, bona Joy be Brooklyn, New York ena Betele dekenai idia lao. Edia haheitalai bona egu tama sina edia haheitalai ese lau ia hagoadaia bada.

Tamana bona sinana be Baibel idia duahia bona Dirava idia lalokau henia, bona ai idia hagoadaia unai ai karaia totona. To, tamana be Tanobada Tuari Ginigunana ai Europe dekenai ia tuari. Sinana be ia moale badina tuari amo ia giroa mai, bona sinana ia gwau: “Karl, namona be dubu dekenai ita lao guna ita karaia bamona.” Tamana ia haere: “Oi do lau hakaua lao, to lau be dubu dekenai do lau vareai lasi.” Sinana ia henanadai: “Dahaka dainai?” Ia gwau: “Tuari lalonai, ena be dubu gunalaia taudia be tomadiho tamona, to idia be kahana kahana tuari taudia bona edia tuari gaudia idia hanamoa noho! Dirava be kahana kahana idia noho tuari taudia ia durua noho, a?”

Gabeai sinana be dubu dekenai ia noho neganai, Iehova ena Witnes taudia rua be emai ruma dekenai idia mai. Idia ese tamana dekenai volium rua Baibel stadi buka ladana Light idia henia, unai buka be Apokalupo bukana ia herevalaia. Tamana be ia ura dainai unai buka ia abia. Sinana be unai buka ia itaia neganai, ia duahia matamaia. Bena dina ta niuspepa ta ai notist ta ia itaia, ia gwau Light bukana amo Baibel stadi idia ura taudia idia boiria. Ena lalona ia hadaia ia lao totona. Unai gabu ai ia ginidae neganai, hahine buruka ta ese iduara ia kehoa. Sinana be buka ia hahedinaraia bona ia henanadai, “Umui be iniseniai inai buka umui stadilaia, a?” Hahine ia haere? “Oibe, lalokau, vareai mai.” Vaira wiki ai sinana be ai natudia ia abia lao danu. Gabeai hanaihanai unai hebou dekenai ai lao.

Hebou ta ai, hebou naria tauna be lau ia hamaoroa Salamo 144:15 lau duahia totona, unai siri ia gwau Iehova idia tomadiho henia taudia be idia moale. Siri ma ta be, 1 Timoteo 1:11, ia gwau Iehova be “moale Diravana,” bona ta be Efeso 5:1,  ia gwau “Dirava umui tohotohoa.” Unai siri toi dainai lau moale. Egu lalona lau hadaia egu Havaraia Tauna dainai do lau moale bona unai hahenamo dainai ia lau tanikiu henia. Egu mauri ai hereva momokani be mai anina bada gauna ai lau halaoa.

Kahirakahira ia noho kongrigeisen be Chicago ai, ena daudau be 32 kilomita. To, hebou dekenai ai lao, bona egu diba Baibel dekenai ia bada ia lao. Lau laloatao nega ta hebou naria tauna be Jetha ia abia hidi ia haere totona. Ena haere lau kamonai bona lau laloa: ‘Unai haere lau diba. Haere totona imana lau abia isi be namo.’ Egu haere lau hegaegae. Mai anina bada gauna be, egu taihu rua bona tadikaka rua hegeregerena, egu hetura karana Iehova ida ia goada ia lao. Lagani 1941 ai lau bapatiso.

Lagani 1942 ai, Cleveland, Ohio ena hebouhebou lau laloatao. United States ena gabu ibounai 50 bamona be telefon amo idia konek. Emai famili be iseda tadikaka ese idia hegaegaelaia “trailer city” ena kompaun ai palai ruma dekenai idia noho. Tanobada Tuarina Iharuana ia vara noho, bona Iehova ena Witnes taudia dagedage henia karana ia bada. Gabu ia dibura noho lalonai, lau itaia tadikaka haida be edia motuka ena laiti idia kehoa noho. Ibounai idia lalotamona motuka ta ta ai ta do ia noho hanuaboi ai gabu ia naria totona. Bema hekwakwanai haida do idia vara, unai tadikaka be motuka edia lait do idia kehoa unai dagedage taudia edia matana idia hadiburaia totona bona motuka ena kibi do idia hiriria. Bena haida do idia mai durua totona. Lau laloa, ‘Iehova ena taunimanima be gau ibounai totona idia hegaegae!’ Unai dainai lau mahuta namonamo bona hekwakwanai ta ia vara lasi.

Lagani haida murinai, unai hebouhebou lau laloa neganai, lau laloparara egu sinana be gari toana ia hahedinaraia lasi. Ia be Iehova bona ena orea ia abidadama henia momokani. Ena haheitalai namona do lau laloaboio lasi.

Unai hebouhebou negana ia do ginidae lasi neganai, Sinana be painia gaukara ia matamaia. Unai dainai tok be spesel ful-taim hesiai gaukara ia herevalaia neganai, tok edia hereva be nouti buk ai ia torea. Ruma dekenai ai giroa lou neganai, ia gwau: “Lau ura painia gaukara lau karaia noho, to unai do lau karaia lasi bema iseda ruma lau naria namonamo lasi.” Bena ai ia nanadaia bema heduru ai henia diba. Ai gwau oibe, unai dainai ai ta ta dekenai daiutu ta eiava rua ia henia ai hagoevaia totona. Sikuli dekenai ai lao murinai, do ia sekea bema ruma ena gaudia idia noho namonamo bona gabeai haroro gaukara totona ia lao. Ia be bisi hahine, to ena natudia ia naria namonamo. Bema dina tubu eiava sikuli murinai ruma dekenai ai mai neganai, hanaihanai ia noho vadaeni ai ia durua totona. Dina haida sikuli murinai, ia ida haroro gaukara dekenai ai lao, unai ese ai ia durua painia gaukara ena anina ai laloparara totona.

Egu mauri lagani be 16 neganai, painia lau matamaia. Ena be tamana be Witnes tauna ai ia do lao lasi, to ia ura diba bema lau namo. Adorahi ta ia lau hamaoroa, lau gaukara goada Baibel stadi ta lau davaria totona, to ta lau davaria lasi.  Nega sisina murinai, ia lau nanadaia, “Oi ura lau ida oi stadi, a?” Nega sisina lalonai ia laloa bona ia gwau, “Gau ta ia noho lasi stadi amo lau ia koua totona.” So egu Baibel stadi ginigunana be egu tamana. Unai be hahenamo badana!

“The Truth Shall Make You Free” bukana ai stadilaia. Emai stadi ai, lau itaia Tamana be lau ia durua noho stiuden bona hadibaia tauna namona ai lau lao totona. Hegeregere, adorahi ta paragraf ta ai duahia murinai, ia gwau: “Buka ia gwauraia gauna lau itaia. To edena bamona oi diba buka ena hereva be maoro?” Ena henanadai haere totona lau hegaegae lasi dainai, lau gwau: “Hari oi dekenai unai do lau hahedinaraia lasi, to iseda stadi gabena ai, emu haere do lau henia.” Bona stadi gabena ai ena haere lau henia. Ai herevalaia gaudia edia Baibel siri lau davaria. Unai murinai, emai stadi totona lau hegaegae namonamo, reseach karana lau dibaia. Unai ese lau bona egu tamana ena diba Baibel dekenai ia habadaia. Ia dibaia gaudia ia badinaia bona lagani 1952 ai ia bapatiso.

Egu mauri lagani be 17 neganai, ruma lau rakatania. Jetha a be misinari ai ia lao, bona Don be Betele dekenai ia gaukara. Idia ruaosi be edia asainmen idia moalelaia, unai ese lau ia hagoadaia bada. Unai dainai Betele bona Gilead Sikuli totona aplikeisen lau atoa bona Iehova ena imana dekenai lau rakatania. Dahaka ia vara? Lagani 1946 ai Betele dekenai lau idia boiria.

Lagani momo idia hanaia lalonai, Betele asainmen idauidau lau karaia, unai dainai gau momo lau dibaia. Momokani, Betele ai lagani 75 lau noho neganai, lau idia hadibaia buka karaia bona akauntin gaukara lau karaia totona. Import bona export gaukara lau dibaia danu. To, unai ibounai amo, Betele ai idia karaia daba tomadiho bona Baibel tok ese egu diba Baibel dekenai ia habadaia momokani.

Egu tadina, Karl, amo gau haida lau dibaia, ia be lagani 1947 ai Betele dekenai ia mai. Ia be stiuden namona bona Baibel ia hadibaia tauna namona. Nega ta egu tok ta totona ia lau noia lau do ia durua. Karl lau hadibaia egu tok totona infomeisen momo lau abia vadaeni, to ia auka idia ibounai lau gaukaralaia totona. Henanadai tamona amo lau ia durua, “Joel, emu sinado be dahaka?” Ena hereva ena anina lau lalopararalaia—tok ena point do ia durua hereva sibona abia, point haida be rakatania. Unai lau laloaboio diba lasi.

 Betele gaukara oi moalelaia totona, haroro gaukara ita karaia be namo, bona unai amo ekspiriens namodia oi davaria diba. Lau laloatao gauna ta be New York City, Bronx ai ia vara. Tadikaka ta bona lau be Watchtower bona Awake! Magasin ia abia hahine ta ai vadivadi henia. Ia dekenai ai gwau, “Inai adorahi ai, taunimanima ai durua noho Baibel amo gau namodia idia dibaia totona.” Ia gwau, “Bema oi ura Baibel oi herevalaia, namo, vareai mai.” Dirava ena Basileia bona do ia mai tanobada matamata ai herevalaia. Unai ese ia hamoalea, badina gabeai ena turadia haida ia boiria unai hebou ai idia helai totona. Unai hahine bona ena adavana be gabeai Iehova ena hesiai taudia goadadia ai idia lao.

Lagani 10 lalonai lau be turana ta lau tahua lau adavaia totona, gabeai egu adavana lau davaria. Dahaka ese lau ia durua adavana namona lau davaria totona? Mai guriguri ida inai henanadai lau laloa, ‘Lau headava murinai lau ura dahaka lau karaia?’

Lagani 1953 ai, Yankee Stadium ena hebouhebou murinai, taihu ta ladana Mary Aniol lau hedavari. Ia bona Jetha be Gilead sikuli ena klas iharuana ai idia noho, bona Mary be egu taihuna ena misinari turana. Mary be mai moale ida lau dekenai ena misinari gaukara Caribbean dekenai ia herevalaia. Bona idia hanaia laganidia lalonai ia karaia Baibel stadi momo ia herevalaia. Ta ta ai dibaia noho lalonai, ai laloparara emai tahua gaudia be tamona. Emai lalokau ta ta dekenai ia bada ia lao, bona lagani 1955, April ai emai headava ai karaia. Dala momo ai, Mary be Iehova amo ia mai harihari gauna bamona bona haheitalai namona. Herevana dahaka asainmen ia abia, mai moale ida ia karaia. Ia gaukara goada, ma haida ia durua, bona hanaihanai Basileia ia atoa guna. (Mat. 6:33) Lagani toi lalonai sekit gaukara ai karaia, bona lagani 1958 ai, Betele dekenai ai idia boiria.

Mary amo gau momo lau dibaia. Hegeregere, emai headava ena matamana ai, Baibel duahiduahi ai karaia hebou, nega ta ta ai siri 15 ai duahia. Ai be siri haida ai duahia murinai, siri ena hereva be emai mauri ai do ai badinaia dalana ai herevalaia. Nega momo Mary be Gilead eiava ena misinari gaukara ai ia dibaia gaudia be lau dekenai ia herevalaia. Unai ese lau ia durua siri lau lalopararalaia bona egu tok henia dalana lau hanamoa totona. Bona lau ia durua edena dala ai taihu taudia lau hagoadaia totona.—Aon. 25:11.

Egu lalokau adavana Mary be lagani 2013 ai ia mase. Lau ura bada tanobada matamata ai ia do lau itaia! To hari, egu lalona lau hadaia diba ma haida do lau abia noho, bona mai kudouna ibounai ida Iehova do lau abidadama henia. (Aon. 3:5, 6) Iehova ena taunimanima be tanobada matamata ai dahaka do idia karaia lau laloa neganai, unai ese lau ia hagoadaia bona lau moale. Hadibaia Tauna Badana ese gau matamata do ia hadibaia bona ia do ita dibaia namonamo! Oibe, ia lau tanikiu henia bada badina lau dekenai gau momo ia hadibaia bona dala momo ai lau ia kara namo henia.