1. Taunimanima haida be mauri hanaihanai dekenai dahaka idia laloa?

 TAUNIMANIMA momo be aniani namodia idia ania bona hanaihanai idia eksasais, badina idia ura edia helt ia namo bona idia mauri daudau. To, idia diba do idia buruka bona idia mase. Reana idia laloa ta ia mauri hanaihanai diba lasi. To, Ioane 3:16 bona 5:24 ai Iesu ia gwau taunimanima be mauri hanaihanai idia abia diba.

2. Ioane karoa 6 ese mauri hanaihanai be edena bamona ia herevalaia? (Ioane 6:39, 40)

² Dina ta ai, Iesu be hoa dalana ai beredi bona gwarume amo taunimanima tausen momo ia ubua. a To, murinai dinana ai ia gwauraia herevana dainai taunimanima idia hoa. Iesu be Kaperanauma dekenai ia lao, unai be Galilea ena kone badinai, bona hutuma be ia murinai idia lao. Unuseniai idia ia hamaoroa taunimanima be do idia toreisi lou bona mauri hanaihanai do idia abia. (Ioane 6:39, 40 duahia.) Mani idia mase vadaeni turadia bona famili taudia oi laloa. Iesu ena hereva ese ia hahedinaraia idia mase taudia momo be do idia toreisi lou. Bona oi bona emu lalokau taudia be mauri hanaihanai umui moalelaia diba. Ioane karoa 6 ai Iesu ena hereva  be taunimanima momo ese idia lalopararalaia lasi. Iesu be dahaka ia gwau?

3. Ioane 6:51 hegeregerena, Iesu be ia sibona totona dahaka ia gwau?

³ Iesu be hoa dalanai paraoa amo hutuma ia ubua murinai, idia ese taunimanima lasi gabuna ai Iehova be Israela taudia dekenai ia henia mana idia laloa. Baibel ia gwau mana be ‘guba amo ia henia paraoa.’ (Sal. 105:40; Ioa. 6:31) Iesu be hutuma idia diba gauna mana ia gaukaralaia, mai anina bada gauna ta ia hadibaia totona. Ena be hoa dalanai Dirava ese mana ia henia, to mana idia ania taudia be gabeai idia mase. (Ioa. 6:49) To, Iesu be sibona ia gwauraia ‘guba amo ia mai paraoa momokanina.’ Unai be “Dirava ena paraoa” bona “mauri paraoana.” (Ioa. 6:32, 33, 35) Iesu be ia sibona bona mana edia idau ia hahedinaraia. Ia gwau: “Lau be guba amo ia diho mai mauri paraoana. Bema ta ese inai paraoa ia ania, do ia mauri ela bona hanaihanai.” (Ioane 6:51 duahia.) Unai Iuda taudia be idia daradara. Iesu ia gwau ia be guba amo ia mai “paraoa” bona unai paraoa be Dirava ese edia tubudia dekenai ia henia mana ia hereaia? Bena Iesu ese idia ia hamaoroa “do lau henia paraoa be egu tauanina.” Ena hereva ena anina be dahaka? Iesu ena hereva ita lalopararalaia be namo, badina ena haere ese ia hahedinaraia edena dala ai ita bona iseda lalokau taudia be mauri hanaihanai ita abia diba. Mani ena hereva ena anina ita itaia.

MAURI PARAOANA BONA ENA TAUANINA

4. Dahaka dainai taunimanima haida be Iesu ena hereva dekenai idia hoa?

⁴ Iesu ia gwau ena tauanina do ia henia “tanobada taudia ese mauri idia abia” totona, unai hereva idia kamonai taudia haida idia hoa. Reana idia laloa Iesu be idia ia hamaoroa ena tauanina idia ania totona. (Ioa. 6:52) Bena Iesu ese hereva ma ta ia gwauraia bona idia hoa. Ia gwau: “Bema taunimanima ena natuna ena tauanina umui ania lasi bona ena rara umui inua lasi, umui be mauri do umui abia lasi.”—Ioa. 6:53.

5. Dahaka dainai ita diba Iesu ia gwau lasi taunimanima be ena rara do idia inua?

⁵ Noa ena negai, Dirava ese taunimanima ia taravatua rara idia ania lasi totona. (Gen. 9:3, 4) Gabeai Iehova ese Israela taudia ia oda henia rara do idia ania lasi. Rara ia ania tauna be do idia “hamasea be namo.” (Lev. 7:27) Iesu be Iuda taudia ia hadibaia Dirava ese Mose amo ia henia Taravatu ibounai idia badinaia totona. (Mat. 5:17-19) Unai dainai ia ese Iuda taudia do ia noia lasi iena tauanina do idia ania bona ena rara do idia inua totona. To Iesu be unai bamona ia hereva neganai, ia ura taunimanima dekenai “mauri hanaihanai” abia dalana ia hadibaia.—Ioa. 6:54.

6. Edena bamona ita diba Ioane 6:53 ai Iesu be haheitalai ia gaukaralaia?

⁶ Iesu ena hereva ena anina be dahaka? Ia hedinarai goevagoeva Iesu be hutuma ia hereva henia neganai, haheitalai ia gaukaralaia. Guna ia ese Samaria hahinena ia hereva henia bamona ia gwau: “To lau henia ranuna ia inua tauna be do ia ranu mase lou lasi. Unai ranu be ia lalonai ranu guri ta bamona ai do ia lao bona do ia lohilohi dae, mauri hanaihanai ia henia totona.” (Ioa. 4:7, 14) b Iesu ia gwau lasi Samaria hahinena be ranu do ia inua bena mauri hanaihanai  do ia abia. Unai hegeregerena, ia gwau lasi Kaperanauma dekenai ia hereva henia taudia be mauri hanaihanai do idia abia bema iena tauanina bona rara idia ania.

IESU BE LOHIABADA ENA ANIBOU IA HEREVALAIA, A?

7. Haida be Iesu ena hereva Ioane 6:53 dekenai dahaka idia gwau?

⁷ Dubu taudia haida idia gwau, Ioane 6:53 ai Iesu be taunimanima dekenai Lohiabada Ena Anibou ai do ia karaia gauna ia hahedinaraia, badina unai nega ai ia ese ena tauanina bona ena rara ena haheitalai ia gaukaralaia. (Mat. 26:26-28) Idia gwau Lohiabada Ena Anibou dekenai idia lao taudia ibounai be paraoa bona wain idia inua be namo. Unai be maoro, a? Namona be haere maorona ita tahua be mai anina bada. Badina lagani ta ta ai tanobada ibounai lalonai taunimanima milioni momo be ita ida idia hebou Lohiabada Ena Anibou ita karaia totona. Do ita itaia Iesu ese Ioane 6:53 ai ia gwauraia herevana ena anina be Lohiabada Ena Anibou ai ia gwauraia herevana amo ia idau.

8. Unai nega rua lalonai idia vara gaudia edia idau be dahaka? (Laulau itaia danu.)

⁸ Mani inai nega rua lalonai idia vara gaudia ita herevalaia. Ginigunana be, edena nega ai bona edena gabu ai Iesu ese Ioane 6:53-56 ena hereva ia gwauraia? Lagani 32 C.E ai Galilea dekenai unai hereva ia gwauraia. Bena lagani ta bamona murinai Iesu ese  Ierusalema ai Lohiabada Ena Anibou ia matamaia. Iharuana be, inai hereva be daika dekenai ia gwauraia? Iesu ese Galilea ai ia hereva henia taudia momo be aniani idia laloa bada, to Iehova bona ena Basileia dibaia karana idia laloa bada lasi. (Ioa. 6:26) Momokani, Iesu ese ia gwauraia gaudia idia lalopararalaia lasi dainai, idia ura lasi Iesu ena hereva idia kamonai lou. Danu ena hahediba taudia haida be ia idia rakatania. (Ioa. 6:14, 36, 42, 60, 64, 66) Unai taudia be Iesu ena aposetolo taudia 11 amo idia idau. Iesu be lagani 33 C. E ai Lohiabada Ena Anibou ia hamatamaia neganai, ena aposetolo taudia 11 be ia ida idia noho, ena be ia hadibaia gaudia haida be idia lalopararalaia lasi. To, ena aposetolo taudia be Galilea taudia bamona lasi, badina idia abia dae momokani Iesu be Dirava ena Natuna guba amo ia diho mai. (Mat. 16:16) Iesu ese idia ia hamaoroa: “Hahetoho lau davaria negadiai, umui be lau umui rakatania lasi.” (Luka 22:28) Unai gaudia rua ese ia hahedinaraia Ioane 6:53 ai Iesu be Lohiabada Ena Anibou karaia dalana ia herevalaia lasi.

IESU ENA HEREVA BE OI TOTONA DANU

9. Iesu ese Lohiabada Ena Anibou negana ai ia gwauraia herevana be daidia totona?

⁹ Lohiabada Ena Anibou idia karaia neganai, Iesu ese isti lasi paraoa be ena aposetolo taudia dekenai ia henia bona idia ia hamaoroa unai be iena tauanina ia laulaulaia. Bena idia dekenai wain ia henia bona ia gwau, “inai be egu rara ia laulaulaia, egu rara amo gwaubou do ita hamomokania.” (Mar. 14:22-25; Luka 22:20; 1 Kor. 11:24) Unai gwaubou be mai anina bada. Unai gwaubou matamata “be [lauma] Israela bese” ida ia karaia, idia be “Dirava ena Basileia” lalonai do idia noho. To taunimanima ibounai ida ia karaia lasi. (Heb. 8:6, 10; 9:15) Ena be aposetolo taudia be unai gwaubou ena anina haida idia lalopararalaia lasi, to daudau lasi murinai Dirava ese idia do ia horoa. Unai amo idia be mai edia gabu Iesu ida idia lohia totona.—Ioa. 14:2, 3.

10. Iesu ese Lohiabada Ena Anibou negana ai ia gwauraia herevana bona Galilea ai ia gwauraia herevana edia idau be dahaka? (Laulau itaia danu.)

¹⁰ Lohiabada Ena Anibou negana ai, Iesu be “orea maragi” ia herevalaia. Iesu ida idia noho kamonai aposetolo taudia be unai orea maragi taudia ginigunadia. (Luka 12:32) Idia bona gabeai unai orea ena kahana ai idia lao taudia haida be paraoa idia ania bona wain idia inua diba. Unai taudia be guba ai Iesu ida do idia lohia. Unai ese Lohiabada Ena Anibou negana ai ena aposetolo taudia dekenai ia gwauraia hereva bona Galilea ai ia gwauraia hereva ena idau ma ta ia hahedinaraia. Iesu be Lohiabada Ena Anibou negana ai ia gwauraia herevana be orea maragi taudia sibona ia herevalaia. To Galilea dekenai ia gwauraia herevana be taunimanima momo totona ia gwauraia.

11. Edena dala ai ita diba Iesu ese Galilea ai ia gwauraia herevana be orea maragina totona lasi?

¹¹ Lagani 32 C.E. ai, Iesu ese Galilea ai ia hereva henia taudia momo be aniani sibona idia ura. To Iesu ia ura idia dekenai aniani ia hereaia mai anina bada gauna ta ia hadibaia. Unai ese idia dekenai mauri hanaihanai ia henia diba. Bona Iesu ia gwau idia mase vadaeni taudia be dina dokona ai do idia toreisi lou bona mauri hanaihanai do idia abia. Ia be Lohiabada Ena Anibou ai ia gwauraia gauna, orea maragina ese do idia abia hahenamo ia herevalaia lasi. To Galilea ai ia  gwauraia gauna be taunimanima ibounai ese idia abia diba. Unai dainai ia gwau: “Do lau henia paraoana be egu tauanina, unai amo tanobada taudia ese mauri idia abia diba.”—Ioa. 6:51.

12. Dahaka ita karaia be namo mauri hanaihanai ita abia totona?

¹² Iesu ena hereva ena anina be taunimanima ibounai ese mauri hanaihanai do idia abia, a? Lasi. Paraoa idia ania taudia sibona, Iesu idia abidadama henia taudia unai, be unai hahenamo do idia abia. Hari inai negai, taunimanima momo idia gwau Iesu idia abidadama henia bona ia idia gwauraia edia hamauria tauna. (Ioa. 6:29) To, taunimanima haida be matamanai Iesu idia abidadama henia bena gabeai ia idia rakatania. Dahaka dainai?

13. Ta be Iesu ena hahediba tauna momokani ai ia lao totona dahaka ia karaia be namo?

¹³ Iesu ese ia ubua taudia momo be idia moale ia idia badinaia totona. Badina idia ura Iesu ese edia gorere do ia hanamoa, aniani do ia henia, eiava idia ura kamonai gaudia do ia hadibaia. To, Iesu ese ia hahedinaraia iena hahediba taudia momokanidia be gau haida idia karaia be namo. Ia be taunimanima edia ura gaudia henia totona tanobada dekenai ia mai lasi. Idia be Iesu ‘dekenai do idia lao’ anina be ia hadibaia gaudia ibounai idia abia dae bona badinaia be namo.—Ioa. 5:40; 6:44.

14. Iesu ena tauanina bona rara amo namo ita abia totona dahaka ita karaia be namo?

¹⁴ Iesu ese taunimanima ia hadibaia abidadama idia hahedinaraia be gau badana.  Edena dala ai? Idia ia hadibaia iena tauanina bona rara ia bouboulaia karana, ese dala do ia kehoa, idia be mauri hanaihanai idia abia totona. Idia ese unai hereva momokani idia abidadama henia be namo. Hari danu unai bamona ita karaia be gau badana. (Ioa. 6:40) Oibe, Ioane 6:53 ese ia gwauraia Iesu ena tauanina bona rara amo namo ita abia totona, mauri davalaia boubouna ita abidadama henia be namo. Unai hahenamo be taunimanima momo ese idia abia diba.—Efe. 1:7.

15-16. Ioane karoa 6 amo dahaka mai anina bada gaudia ita dibaia?

¹⁵ Ioane karoa 6 ai ita dibaia gaudia momo be mai anina bada bona ita ibounai ia hagoadaia. Ia hahedinarai Iesu be taunimanima ia laloa bada. Galilea ai ia noho neganai, gorere taudia ia hanamoa, taunimanima dekenai Basileia ia hadibaia, bona idia hitolo neganai idia ia ubua. (Luka 9:11; Ioa. 6:2, 11, 12) Bona mai anina bada gauna be, idia ia hadibaia ia “be mauri paraoana.”—Ioa. 6:35, 48.

¹⁶ Iesu ese ia gwauraia mamoe ma haida be lagani ta ta ai Lohiabada Ena Anibou ai paraoa idia ania lasi bona wain idia inua lasi be namo. (Ioa. 10:16) To, idia be Iesu Keriso ena tauanina bona rara amo namo idia abia danu. Unai dainai Iesu ena mauri davalaia boubouna idia abidadama henia be namo. (Ioane 6:53) To, paraoa idia ania bona wain idia inua taudia ese idia hahedinaraia idia be gwaubou matamatana lalonai idia noho, anina be guba Basileia ai do idia lohia. To, ena be ita be horoa taudia eiava mamoe ma haida, Ioane karoa 6 ena sivarai ena anina ita diba be gau badana. Unai karoa ese ita ia hadibaia mauri hanaihanai ita abia totona, ita ibounai ese mauri davalaia boubouna ita abidadama henia be namo.