1-2. Dahaka badina haida dainai ita tai?

 ITA IBOUNAI be nega haida ita tai. Gau ta dainai ita moale bada neganai, nega haida mata ranu idia diho danu. Hegeregere, emu natuna ia vara, eiava mai anina bada gauna ta oi laloatao, eiava nega daudau oi itaia lasi turana namona ta oi itaia lou.

² To, nega momo ita tai, badina ita hebogahisi bona hisihisi ita mamia. Hegeregere, ita tai bema ta ese ita ia hahisia. Eiava ita abia gorere dainai hisihisi ita mamia bona iseda lalokau tauna ta ia mase neganai ita tai. Unai bamona negadia ai, reana peroveta tauna Ieremia bamona do ita mamia. Babulonia ese Ierusalema ia hadikaia neganai, Ieremia ia gwau: “Egu matana ranu be sinavai bamona idia heau noho. Egu taitai be ia doko lasi.”—Lal. 3:48, 49.

3. Iehova ena hesiai taudia be hisihisi idia davaria neganai, ena hemami be edena bamona? (Isaia 63:9)

³ Ita davaria hekwakwanai dainai, nega momo ita tai, bona Iehova be inai ia diba. Baibel ese ia hahedinaraia, Iehova be ena hesiai taudia ese idia davaria hisihisi ia itaia, bona heduru totona ia dekenai ita noinoi neganai ia kamonai. (Sal. 34:15) To Iehova be ita ia itaia eiava kamonai sibona lasi. Ia  be iseda Tamana bona ita ia lalokau henia bada, unai dainai ita tai neganai, ia hebogahisi bona ia ura ita ia durua haraga.—Isaia 63:9 duahia.

4. Baibel ai edena haheitalai do ita herevalaia, bona Iehova amo dahaka ita dibaia?

⁴ Iehova be Baibel amo ia hahedinaraia, ena hesiai taudia idia taitai neganai, edia hisihisi ia mamia bona idia ia durua. Hana, Davida, bona King Hesekaia edia haheitalai amo unai do ita itaia. Dahaka dainai idia taitai? Iehova dekenai idia noinoi neganai, ia be dahaka ia karaia? Hebogahisi mamina ita abia, ta ese ita ia hahisia, bona ita laloa ita hegeregere lasi neganai, edena dala ai edia haheitalai ese ita ia hagoadaia diba?

EMU LALOKAU TAUNA IA MASE DAINAI OI TAITAI

5. Hana dekenai idia vara gaudia dainai ena hemami be edena bamona?

⁵ Hana be hekwakwanai haida ia davaria dainai, ia lalohisihisi bona ia tai. Hana ena adavana be hahine ma ta ia adavaia danu, ena ladana be Penina. Ia ese Hana ia inai henia. Danu, Hana be natuna lasi, to Penina be mai ena natudia. (1 Sam. 1:1, 2) Hana be natuna ia havaraia diba lasi dainai, Penina ese ia kirikirilaia. Bema unai be oi dekenai ia vara, dahaka do oi karaia? Hana ia “taitai bona ia aniani lasi” badina “ia lalohisihisi bada herea.”—1 Sam. 1:6, 7, 10.

6. Hana be Iehova dekenai ena hemami ia gwauraia dainai, dahaka namo ia davaria?

⁶ Hana be dahaka ia karaia ena hemami ia namo totona? Ia karaia gauna ta be Iehova ia tomadiho henia totona, dubu helaga dekenai ia lao. Unuseniai, reana dubu helaga ena aria gabuna badinai, “Iehova dekenai ia guriguri matamaia bona ia taitai bada herea.” Bona Iehova ia noia: “Emu hesiai hahinena ena lalohisihisi oi itaia bona lau oi laloatao.” (1 Sam. 1:10b, 11) Hana be guriguri amo Iehova dekenai ena hemami ibounai ia gwauraia. Iehova be ia lalohisihisi bada badina ena lalokau natuna, Hana ena mata ranu ia itaia!

7. Hana be Iehova dekenai ena hemami ia gwauraia dainai dahaka namo ia davaria?

⁷ Hana ese Iehova dekenai ena hemami ia gwauraia murinai, Hahelaga Tauna Badana Eli ese ia hamaoroa, Iehova ese ena guriguri do ia haerelaia. Unai murinai, Hana ena hemami be edena bamona? Baibel ia gwau: “Hana ia lao bona ia aniani, bona lalohisihisi toana ia hahedinaraia lou lasi.” (1 Sam. 1:17, 18) Ena be Hana ena hekwakwanai ia ore lasi, to ena hemami ia namo. Iena lalohekwarahi ibounai be Iehova dekenai ia rakatania. Ia ese Hana ena lalometau ia itaia, ena taitai ia kamonai, bona gabeai ia hanamoa dainai natuna ta ia havaraia.—1 Sam. 1:19, 20; 2:21.

8-9. Heberu 10:24, 25 hegeregerena, dahaka dainai Keristani heboudia dekenai ita lao be namo? (Laulau itaia danu.)

 ⁸ Ita dibaia gaudia. Oi dekenai hekwakwanai ta ia vara dainai oi lalohisihisi bona oi tai, a? Reana emu famili tauna ta eiava emu turana ta ia mase dainai oi lalohisihisi noho. Unai bamona negadiai, reana do oi ura sibona oi noho. To Hana be heduru ia abia totona dubu helaga dekenai ia lao hegeregerena, oi danu, ena be emu hemami ia namo lasi, to Keristani heboudia dekenai oi lao neganai heduru do oi abia. (Heberu 10:24, 25 duahia.) Hebou dekenai Baibel ena hagoadaia herevadia ita kamonai neganai, Iehova ese ita do ia durua lalohadai namodia ita abia totona. Unai amo iseda hemami do ia namo, ena be iseda hekwakwanai idia ore lasi.

⁹ Iseda hebou ai tadikaka bona taihu ese ita idia hagoadaia bona idia hahedinaraia ita idia lalokau henia. Bona idia ida ita noho neganai iseda hemami ia namo. (1 Tes. 5:11, 14) Spesel painia tadikaka ta be ena adavana ia mase neganai, ia dekenai ia vara gauna mani ita laloa. Ia gwau: “Lau do taitai noho. Nega haida kona ta dekenai lau helai bona lau taitai. To hebou dekenai lau lao neganai, goada lau abia. Tadikaka taihu edia hereva namodia bona edia haere ese lau ia hagoadaia bada. Ena be lau lalohekwarahi, to hebou dekenai lau noho neganai, egu hemami ia namo.” Hebou dekenai ita noho neganai, Iehova ese tadikaka taihu do ia gaukaralaia ita idia durua totona.

10. Ita lalohisihisi neganai, edena dala ai Hana ena haheitalai ita tohotohoa diba?

¹⁰ Hana be guriguri amo Iehova dekenai ena hemami ibounai ia gwauraia neganai goada ia abia. Oi danu, emu ‘lalohekwarahi ibounai be Iehova dekenai oi negea lao’ bona namona be oi abia dae oi do ia kamonai henia. (1 Pet. 5:7) Taihu ta ena adavana be raskol taudia ese idia hamasea neganai, ia gwau: “Egu kudouna ia makohia momokani bona lau laloa do lau moale lou lasi. To lau ia lalokau henia bada Tamana, Iehova lau guriguri henia neganai egu hemami ia namo. Nega haida, lau diba lasi dahaka do lau gurigurilaia, to ia be lau ia lalopararalaia. Lau lalohisihisi bada neganai, ia do lau noia lalomaino ia henia totona. Bena karaharaga egu hemami ia namo, bona unai dina dekenai gau ta lau karaia diba.” Iehova dekenai emu lalohekwarahi ibounai oi gwauraia neganai, ia hebogahisi bona emu hemami ia lalopararalaia. Ena be emu hekwakwanai be ia do noho, to Iehova ese oi do ia durua bona lalomaino ia henia. (Sal. 94:19; Fili. 4:6, 7) Bona Iehova ese mai abidadama ida ita haheauka noho karana ia itaia bona davana namona do ia henia.—Heb. 11:6.

TA ESE OI IA HAHISIA DAINAI OI TAITAI

11. Ma haida ese Davida idia kara namo henia lasi dainai, edena bamona ia mamia?

¹¹ Davida ena mauri lalonai, hekwakwanai badadia haida ia haheaukalaia bona unai dainai ia lalohisihisi bada bona ia taitai. Taunimanima momo ese ia idia inai henia. Danu ena turadia bona ruma bese taudia haida be ia idia badinaia lasi bona idia ura ia idia hamasea. (1 Sam. 19:10, 11; 2 Sam. 15:10-14, 30) Nega ta, Davida ia gwau: “Lau lalohisihisi noho dainai lau manoka vadaeni, hanuaboi ibounai lalonai lau taitai dainai, egu bedi be mata ranu amo ia paripari, bona lau taitai dainai egu helai gauna ia paripari momokani.” Dahaka dainai Davida be unai bamona ia mamia? Ia gwau: “Lau idia hahisia taudia dainai.” (Sal. 6:6, 7) Ma haida ese  Davida idia kara namo henia lasi dainai, ia lalohisihisi bada bona ia taitai.

12. Salamo 56:8 hegeregerena, Davida be dahaka ia abia dae?

¹² Ena be Davida ese unai hekwakwanai ia davaria, to ia diba Iehova ese ia lalokau henia. Ia gwau: “Iehova ese egu taitai do ia kamonai.” (Sal. 6:8) Nega ma ta ai, Davida ese Salamo 56:8 ai inai hereva namodia ia torea. (Duahia.) Unai hereva ese idia hahedinaraia, Iehova be ita ia lalokau henia bada bona iseda hemami ia laloa bada. Davida ia mamia Iehova ese ena mata ranu be kavabu ta lalonai ia haboua eiava buka ta ai ia torea. Davida ia diba Iehova ese ena hisihisi ia itaia bona laloatao. Davida ia abia dae ena lalokau guba Tamana ese ena hekwakwanai bona ena hemami ia lalopararalaia.

13. Bema haida ese iseda lalona idia hahisia, dahaka ita laloatao be namo? (Laulau itaia danu.)

¹³ Ita dibaia gaudia. Oi lalometau badina oi trast henia tauna ta ese emu lalona ia hahisia eiava oi ia koia, a? Reana oi lalohisihisi badina ta ida emu hetura karana eiava headava ia dika, eiava oi lalokau henia tauna ta be Iehova ia rakatania. Tadikaka ta, ena adavana be tau ma ta ida ia heudahanai, ia gwau: “Lau hoa bada bona unai lau hamomokania lasi. Lau mamia lau be anina lasi, lau lalohisihisi bona lau badu.” Bema ta ese oi ia koia dainai emu lalona ia hisihisi, namona be oi laloatao Iehova be oi do ia rakatania lasi. Tadikaka ia gwau: “Lau laloparara taunimanima ida emu hetura karana ia dika diba, to Iehova be iseda Nadi. Ena be dahaka ia vara, ia be hanaihanai ita ida ia noho. Bona ia idia badinaia taudia do ia rakatania lasi.” (Sal. 37:28) Laloatao, Iehova ese oi ia lalokau henia bada, unai be taunimanima edia lalokau ia hereaia. Ena be oi trast henia tauna ta ese oi ia rakatania, to unai ese Iehova ena lalokau oi dekenai ia haidaua lasi. Ia dekenai oi be mai anina bada. (Roma 8:38, 39) Ita laloatao gauna be inai: Ena be ta ese oi ia kara namo henia lasi, to emu guba Tamana be oi ia lalokau henia bada.

14. Edena dala ai Salamo 34:18 ese ita ia hagoadaia?

¹⁴ Ta ese iseda lalona ia hahisia neganai, Salamo 34:18 ai Davida ena hagoadaia herevadia ese ita idia durua diba. (Duahia.) Buka ta ia gwau “daradoko taudia” be “idia laloa edia mauri be anina lasi taudia” ia herevalaia. Lalohisihisi dainai unai bamona idia mamia taudia dekenai, Iehova be dahaka ia karaia? Tama o sina ese ia tai noho natuna ia rosia bona ia durua bamona, Iehova be ita “kahirakahira ia noho” bona ita lalohisihisi neganai ia be mai hebogahisi ida ita do ia  durua haraga. Ia ura ita ia hagoadaia bona iseda lalona ia hanamoa. Bona ita dekenai gau momo ia henia, unai ese ita idia hagoadaia ita davaria hahetoho ita haheaukalaia totona.—Isa. 65:17.

GORERE DAINAI OI TAITAI NEGANAI

15. Dahaka dainai Hesekaia ia tai dikadika?

¹⁵ Iuda ena King Hesekaia ena mauri lagani be 39 neganai, gorere badana ta ia abia. Peroveta tauna Isaia ese Iehova ena hadibaia hereva be Hesekaia dekenai ia gwauraia, ia be gorere dainai do ia mase. (2 Ki. 20:1) Hesekaia be unai hadibaia hereva ia kamonai neganai, ia tai dikadika. Bena Iehova ena heduru totona ia noinoi.—2 Ki. 20:2, 3.

16. Iehova be Hesekaia totona dahaka ia karaia?

¹⁶ Iehova be Hesekaia ena guriguri ia kamonai bona ena mata ranu ia itaia neganai, ia hebogahisi bona ia gwau: “Lau ese emu guriguri lau kamonai vadaeni. Emu matana ranu lau itaia vadaeni. Oi be emu gorere amo do lau hanamoa.” Iehova be Isaia amo, Hesekaia dekenai ia gwauhamata ena mauri do ia halataia bona Asuria taudia edia imana amo Ierusalema do ia hamauria.—2 Ki. 20:4-6.

17. Gorere badana ta ita abia neganai, edena dala ai Iehova ese ita ia durua? (Salamo 41:3) (Laulau itaia danu.)

¹⁷ Ita dibaia gauna. Dahaka do oi karaia bema oi abia gorere be ia namo diba lasi? Iehova dekenai emu hemami oi gwauraia, ena be oi guriguri lalonai oi tai danu. Baibel ese ita ia hadibaia “hebogahisi Tamana bona lalogoada ibounai ia henia Diravana” be ita davaria hahetoho ibounai lalonai ita do ia hagoadaia. (2 Kor. 1:3, 4) Hari Iehova be iseda hekwakwanai ibounai do ia kokia lasi, to ia be hanaihanai ita do ia durua. (Salamo 41:3 duahia.) Iehova be ena lauma helaga amo, ita dekenai goada, aonega, bona lalomaino ia henia ita haheauka totona. (Aon. 18:14; Fili. 4:13) Danu, ia ese ita dekenai helaro ia henia, vaira nega ai gorere ibounai do ia haorea.—Isa. 33:24.

18. Hekwakwanai ta oi davaria neganai, edena Baibel siri namona ta ese oi ia hagoadaia? (Maua itaia, “ Iehova ese Ita Ia Hagoadaia Herevadia.”)

¹⁸ Hesekaia be Iehova ena hereva ese ia durua. Unai hegeregerena ita danu be Dirava ena Hereva ese ita ia hagoadaia diba. Ita lalohisihisi neganai, Iehova ena Hereva, Baibel ese ita ia hagoadaia bona lalomaino ita abia. (Roma 15:4) West Africa ai, taihu ta be kensa gorere ia abia neganai, nega momo ia taitai. Ia gwau: “Lau ia hagoadaia bada siri ta be Isaia 26:3. Ena be idia vara hekwakwanai ita kokia diba lasi, to unai siri ia gwau Iehova ese ita dekenai lalomaino ia henia diba, bona unai ese ita do ia durua ita haheauka totona.” Hekwakwanai ta oi davaria bona oi laloa oi hegeregere lasi neganai, edena Baibel siri namona ta ese oi ia hagoadaia?

19. Vaira nega ai dahaka hahenamo do ita abia?

 ¹⁹ Ita be nega ena dokona ai ita noho dainai, ita be hekwakwanai momo do ita davaria bona do ita hisihisi bona taitai. To Hana, Davida, bona King Hesekaia edia haheitalai amo ita diba, Iehova be iseda mata ranu ia itaia bona ia hebogahisi. Ia ese iseda mata ranu ia laloa bada. Unai dainai hekwakwanai ita davaria neganai, ita ura Iehova dekenai iseda lalometau ibounai ita gurigurilaia. Namona be iseda tadikaka bona taihu kahirakahira ita noho. Danu hanaihanai Baibel ita duahia karana amo goada do ita abia. Ita diba, bema mai abidadama ida ita haheauka noho, Iehova be ita dekenai ahuna namona do ia henia. Bona ia gwauhamata hegeregerena, nega vaira ai mase, ta ese ita ia hahisia eiava lalometau dainai idia vara mata ranu ibounai do ia dahua ore. (Apok. 21:4) Unai nega ai moale ena mata ranu sibona do ia diho.