1. Baibel negadia ai, edena dala ai paraoa be mai anina bada?

 BAIBEL negadia ai, paraoa be mai anina bada aniani. (Gen. 14:18; Luka 4:4) Unai dainai Baibel ese aniani ia herevalaia neganai, nega haida inai hereva paraoa ia gaukaralaia. (Mat. 6:11) Iesu ena hoa karadia rua lalonai paraoa ia gaukaralaia. (Mat. 16:9, 10) Unai sivarai ta be Ioane karoa 6 ai ia noho. Unai sivarai ita stadilaia neganai, hari ita badinaia diba gaudia do ita dibaia.

2. Dahaka dainai aniani idia abia be namo?

² Iesu ena aposetolo taudia be edia haroro gaukara ia ore murinai, Iesu ida bouti ta amo Galilea gohuna idia hanaia, unai amo idia laga-ani diba. (Mar. 6:7, 30-32; Luka 9:10) Betesaida ena gabu ta dekenai idia ginidae. To daudau lasi murinai, taunimanima tausen momo idia ginidae, bona Iesu dekenai idia mai. Iesu ese idia ia dadaraia lasi. Idia ia hebogahisi henia dainai, idia dekenai Basileia ia herevalaia bona gorere taudia ia hanamoa. Adorahi dainai, hahediba taudia be idia laloa inai taunimanima be dahaka do idia ania. Idia haida be mai edia aniani sisina, to momo be hanua dekenai do idia giroa aniani idia hoia totona. (Mat. 14:15; Ioa. 6:4, 5) Iesu be dahaka do ia karaia?

IESU ESE HOA DALANAI PARAOA IA HENIA

3. Iesu be dahaka ia gwau? ( ena laulau itaia danu.)

³ Iesu be ena aposetolo taudia ia hamaoroa: “Umui ese idia dekenai aniani umui henia.” (Mat. 14:16) To dahaka  do idia karaia? Badina tatau ibounai be 5,000. Bona hahine taudia bona natudia ita haboua neganai, anina be taunimanima 15,000 bamona idia ubua. (Mat. 14:21) Andrea ia gwau: “Inai mero maragina be mai ena bali paraoa 5 bona gwarume maragidia rua. To inai aniani amo hutuma be edena bamona ita ubua diba?” (Ioa. 6:9) Bali paraoa be taunimanima ese idia ania aniani, bona unai gwarume maragidia be mai ena damena bona idia gabua vadaeni. To, unai mero ena aniani amo taunimanima momo idia ubua diba lasi?

4. Ioane 6:11-13 amo dahaka ita dibaia? (Laulau itaia danu.)

⁴ Iesu ia ura taunimanima dekenai heabidae karana ia hahedinaraia dainai, idia ia hadibaia grup ta ta ai do idia helai. (Mar. 6:39, 40; Ioane 6:11-13 duahia.) Ita itaia Iesu be paraoa bona gwarume dainai ena Tamana ia tanikiu henia. Unai amo ia hahedinaraia aniani be Dirava amo ia mai. Unai ese ita ia hadibaia ita ese Iesu ena haheitalai ita badinaia be namo. Aniani ita do ania lasi neganai, ita guriguri guna, ena be ita be sibona ita noho eiava ma haida ida ita noho. Gabeai Iesu ese aniani ia haria, bona hutuma idia aniani bona idia bogakunu. Aniani oredia idia noho, to Iesu ia ura lasi unai aniani idia negea. Unai dainai unai aniani idia haboua gabeai idia gaukaralaia totona. Iesu be ita dekenai haheitalai namona ia hahedinaraia, badina ia abia gaudia ia gaukaralaia namonamo. Bema oi be tama o sina, unai sivarai oi gaukaralaia diba emu natudia dekenai inai gaudia oi herevalaia totona,  hegeregere aniani idia do ania lasi neganai idia guriguri, bona haida dekenai heabidae karana bona hariharibada karana idia hahedinaraia.

5. Unai dina ai Iesu ese ia karaia gaudia dainai taunimanima be dahaka idia karaia, bona Iesu be dahaka ia karaia?

⁵ Taunimanima be Iesu ena hadibaia dalana bona hoa karadia dekenai idia hoa. Idia diba Mose ia gwauhamata Dirava ese peroveta tauna ta do ia siaia. Reana idia henanadai, ‘Iesu be unai peroveta tauna, a?’ (Deu. 18:15-18) Bema oibe, reana idia laloa ia be lohia tauna namona ai ia lao diba. Unai dainai taunimanima be idia ura ia idia dogoatao bona king ai idia halaoa. (Ioa. 6:14, 15) Bema Iesu be unai ia abia dae, ia be Roma gavamani henunai idia noho Iuda taudia edia politik lalonai do ia vareai. To unai ia karaia, a? Lasi. Siri ia gwau, Iesu be ‘ororo dekenai ia daekau lao.’ Ena be haida ese idia doria, to ia be politik lalonai ia vareai lasi. Unai sivarai amo dahaka ita dibaia!

6. Edena dala ai Iesu ena haheitalai ita tohotohoa diba? (Laulau itaia danu.)

⁶ Oibe, taunimanima ese ita do idia noia lasi hoa dalanai aniani ita henia eiava edia gorere ita hanamoa totona. Eiava ita do idia doria lasi edia king o lohia tauna ai ita lao totona. To reana iseda lalona do idia veria ita vouti eiava idia ura henia politik tauna ita sapot totona. To Iesu ena haheitalai amo diba  ita abia. Ia be politikol karadia lalonai ia vareai lasi, bona ia gwau: “Lauegu Basileia be inai tanobada ena lasi.” (Ioa. 17:14; 18:36) Ita be Keristani taudia dainai, Iesu ena laloa dalana bona kara ita tohotohoa. Ita be Dirava ena Basileia ita sapot, bona ma haida dekenai unai ita harorolaia, bona ita guriguri unai Basileia ia mai totona. (Mat. 6:10) Iesu ese hoa dalanai paraoa ia henia ena sivarai amo gau momo ita dibaia.

PARAOA ENA ANINA

7. Iesu bona ena aposetolo taudia be dahaka idia karaia? (Ioa. 6:16-20)

⁷ Iesu be hutuma ia ubua murinai, ena aposetolo taudia be bouti amo ia siaia, bona Kaperanauma dekenai idia giroa lou. Iesu be ororo dekenai ia daekau lao, unai amo hutuma ese ia do idia doria lasi king ai ia lao totona. (Ioane 6:16-20 duahia.) Aposetolo taudia be idia lao noho lalonai, lai bada ia toa dainai hurehure ia bada. Bena Iesu be idia dekenai davara latanai ia raka lao. Bona aposetolo Petero ia hamaoroa davara latanai do ia raka danu. (Mat. 14:22-31) Iesu be bouti dekenai ia guia neganai, maoromaoro lai ia doko. Bena hahediba taudia idia hoa bona idia gwau: “Momokani, oi be Dirava ena Natuna.” a (Mat. 14:33) To hutuma ia ubua neganai, idia be unai bamona idia hereva lasi. Mareko be unai ia herevalaia, ia gwau: “[Aposetolo taudia be] unai idia itaia neganai idia hoa bada, badina idia laloparara lasi hoa dalanai hutuma dekenai paraoa ia henia tauna be inai hoa karana ia karaia diba danu.” (Mar. 6:50-52) Oibe, idia laloparara lasi Iehova ese Iesu dekenai siahu ia henia hoa karadia ia karaia totona. Unai murinai Iesu be hoa dalanai ia karaia paraoa ia herevalaia lou, unai amo ita dekenai gau ma ta ia hadibaia.

8-9. Dahaka dainai hutuma ese Iesu idia tahua? (Ioane 6:26, 27)

⁸ Iesu ese ia ubua taudia be aniani bona edia dabu gaudia sibona idia laloa bada. Edena dala ai? Murina dinana ai, idia itaia Iesu bona ena aposetolo taudia idia lao. Vadaeni taunimanima be Tiberia amo idia mai bouti haida dekenai idia guia bona Kaperanauma dekenai idia lao Iesu idia tahua totona. (Ioa. 6:22-24) Unai idia karaia badina idia ura Basileia sivaraina idia kamonai, a? Lasi. Idia be aniani idia laloa bada. Edena bamona unai ita diba?

⁹ Kaperanauma kahirakahira ai, taunimanima ese Iesu idia davaria neganai, ia vara gauna mani ita laloa. Iesu ese idia ia hamaoroa, ia dekenai idia mai badina idia ura aniani sibona idia ania. Ia gwau idia be ia bodaga diba ‘paraoa idia ania bona idia bogakunu.’ Unai dainai, idia ia hagoadaia ia bodaga diba lasi bona “mauri hanaihanai ia henia aniani totona” do idia gaukara. (Ioane 6:26, 27 duahia.) Iesu ia gwau ena Tamana ese unai aniani do ia henia. Reana taunimanima idia hoa, badina idia kamonai aniani ta ese mauri hanaihanai ia henia diba! Unai aniani be dahaka, bona edena dala ai idia abia diba?

10. Taunimanima ese dahaka do idia karaia mauri hanaihanai idia abia totona?

¹⁰ Unai Iuda taudia idia laloa, gau haida do idia karaia be namo unai aniani idia abia totona. Reana idia be Mose ena Taravatu henunai do idia karaia gaudia idia laloa. To Iesu ese idia ia hamaoroa: “Dirava ena ura be inai, ia siaia tauna do umui abidadama henia.”  (Ioa. 6:28, 29) Taunimanima be “mauri hanaihanai do idia abia” totona, Dirava ese ia siaia tauna idia abidadama henia be namo. Iesu ese guna unai ia gwauraia vadaeni. (Ioa. 3:16-18, 36) Iesu ese gabeai mauri hanaihanai do ita abia totona ita karaia gaudia haida ia herevalaia.—Ioa. 17:3.

11. Edena dala ai Iuda taudia idia hahedinaraia idia be edia dabu gaudia idia laloa bada? (Salamo 78:24, 25)

¹¹ Iuda taudia be Iesu ena hereva idia abia dae lasi. Ia idia nanadaia: “Edena toa do oi hahedinaraia, unai amo ai itaia bona oi ai abidadama henia diba?” (Ioa. 6:30) Idia gwau Mose ena nega ai, edia sene taudia be mana idia abia bona unai be edia aniani. (Neh. 9:15; Salamo 78:24, 25 duahia.) Idia hahedinaraia, idia be aniani korikori idia laloa bada. Idia be “guba amo ia mai paraoa” ena anina idia diba totona Iesu idia nanadaia lasi. Unai paraoa be guba amo ia mai mana, mauri ia henia gauna. (Ioa. 6:32) Idia be edia dabu gaudia sibona idia laloa dainai, idia ura lasi Iesu ese ia gwauraia hereva momokani idia abia dae. Inai sivarai amo dahaka ita dibaia?

MAI ANINA BADA GAUNA

12. Edena dala ai Iesu ia hahedinaraia dahaka be mai anina bada?

¹² Ioane karoa 6 ai ita dibaia gauna be inai. Dirava badinaia karana bona ia ida iseda hetura ita laloa bada be gau badana. Laloatao, Iesu be Satani ena hahetoho ia dadaraia neganai, ena hereva amo unai point ia hahedinaraia. (Mat. 4:3, 4) Bona Ororo Harorona ai ia hahedinaraia iseda hetura karana Dirava ida ia goada be namo. (Mat. 5:3) Unai dainai sibona ita nanadaia diba, ‘Egu mauri dalana ese ia hahedinaraia lau be egu hetura karana Dirava ida lau laloa bada, a? Eiava lau be aniani bona kohu lau laloa bada, a?’

13. (a) Dahaka dainai aniani ita moalelaia be kerere lasi? (b) Paulo be ita dekenai dahaka sisiba ia henia? (1 Korinto 10:6, 7, 11)

¹³ Iseda dabu gaudia totona ita guriguri bona unai gaudia ita moalelaia be kerere lasi. (Luka 11:3) Ita gaukara goada dainai ‘ita aniani bona ita inuinu,’ unai ese moale ia havaraia, bona unai be “Dirava momokani na ena imana amo.” (Had. 2:24; 8:15; Iam. 1:17) To, namo lasi iseda mauri lalonai kohu be mai anina bada gaudia ai idia lao. Aposetolo Paulo be Keristani taudia ginigunadia ia tore henia neganai, unai gaudia ia herevalaia. Ia ese Sinai Ororona ai Israela taudia dekenai ia vara gauna ia herevalaia. Bona Keristani taudia ia sisiba henia, “gau dikadia do [idia] ura henia lasi, [Israela taudia] ese idia ura henia bamona.” (1 Korinto 10:6, 7, 11 duahia.) Iehova ese hoa dalanai mana amo Israela taudia ia ubua, to aniani idia mataganigani henia dainai, unai mana be “gau dikadia” ai idia lao. (Num. 11:4-6, 31-34) Golo boromakau kaivakuku idia tomadiho henia neganai, Israela taudia be idia aniani, idia inuinu bona moale karadia idia karaia. (Eso. 32:4-6) Paulo be unai sivarai ia gwauraia, lagani 70 C.E. ai Ierusalema bona dubu helaga hadikaia negana kahirakahira idia noho Keristani taudia ia sisiba henia totona. Ita be nega oromana ena dokona kahirakahira ita noho, unai dainai Paulo ena sisiba ita laloa bada be mai anina bada.

14. Tanobada matamata ai aniani be edena bamona?

¹⁴ Iesu ese “hari dina ena aniani” ia gwauraia neganai, ia be Dirava ena ura ‘tanobada dekenai do ia vara, guba dekenai ia vara bamona’ ia laloa. (Mat. 6:9-11) Oi laloa unai nega ai tanobada ena toana be edena bamona? Baibel ese ia hahedinaraia, Dirava ena ura be tanobada dekenai aniani namodia do  idia noho. Isaia 25:6-8 hegeregerena, Iehova ena Basileia henunai, aniani namodia momo do ita moalelaia. Salamo 72:16 ia gwau: “Tanobada ai aniani be do ia momo herea, ororo latanai witi be do idia momo herea.” Unai nega ai, oi ura aniani namodia do oi nadua, bona oi do tohoa lasi aniani do oi ania. Unai sibona lasi, to oi karaia vain umadia edia huahua do oi ania bona moalelaia. (Isa. 65:21, 22) Tanobada ai idia noho taudia ibounai ese unai gaudia do idia moalelaia.

15. Idia toreisi lou taudia be dahaka do idia dibaia? (Ioane 6:35)

¹⁵ Ioane 6:35 duahia. Vaira nega ai, Iesu ese hoa dalanai ia ubua taudia dekenai dahaka do ia vara? Do ia vara toreisi lou negana ai, reana unai taudia haida ida do oi hedavari. Ena be guna Iesu idia abidadama henia lasi, to idia be do idia toreisi lou. (Ioa. 5:28, 29) To idia ese Iesu ena hereva ena anina idia dibaia be namo, ia gwau: “Lau be mauri paraoana. Lau dekenai ia mai tauna be do ia hitolo lasi momokani.” Namona be Iesu ena mauri davalaia boubouna do idia abidadama henia, unai be idia totona ena mauri ia henia. Unai nega ai do idia toreisi lou taudia bona tanobada matamatana ai do idia vara natudia ese Iehova bona ena ura do idia dibaia. Ita ese unai hadibaia gaukarana do ita durua be moale bada gauna! Unai ese aniani idauidau ania karana ena moale do ia hereaia.

16. Atikol 49 ai dahaka do ita herevalaia?

¹⁶ Ita ese Ioane karoa 6 ena sivarai haida ita herevalaia vadaeni, to Iesu ese “mauri hanaihanai” totona gau momo do ia hadibaia. Iesu ese ia hereva henia Iuda taudia be ena hereva idia kamonai be namo bona ita danu be unai bamona ita karaia be namo. Atikol 49 ai Ioane karoa 6 do ita herevalaia noho.