1-2. Natudia be Dirava bona Baibel totona henanadai idia henia neganai, tama sina be dahaka idia karaia be namo?

 TAUNIMANIMA momo idia diba natudia naria karana be gaukara badana. Bema oi be tama o sina ta, oi ai hanamoa badina oi gaukara goada emu natudia edia abidadama oi hagoadaia totona. (Deu. 6:6, 7) Natuna ia bada lalonai, Baibel amo ita abia dae kara maoromaoro taravatudia do ia henanadailaia matamaia.

² Matamanai, reana emu natuna ena henanadai dainai do oi laloa momo. Reana do oi laloa emu natuna ia henanadai, badina ena abidadama Dirava bona Baibel dekenai be maragi. To natudia idia bada idia lao neganai, henanadai idia henia be namo, unai amo edia abidadama idia hagoadaia diba. (1 Kor. 13:11) Unai dainai oi laloa momo lasi. Henanadai idia henia neganai, unai nega oi gaukaralaia, idia oi durua edia abidadama Dirava bona Baibel dekenai idia hagoadaia totona.

3. Inai atikol ai dahaka do ita herevalaia?

³ Inai atikol ai tama sina ese natudia idia durua daladia toi do ita herevalaia: (1) Sibona edia abidadama idia hagoadaia, (2) Baibel ena kara maoromaoro taravatudia idia badinaia, bona (3) idia abia dae gaudia idia gwauraia hedinarai. Danu, dahaka dainai natudia ese henanadai idia henia be namo bona emu natudia ida ita abia dae gaudia oi herevalaia totona oi karaia diba gaudia do ita herevalaia.

EMU NATUDIA DURUA EDIA ABIDADAMA IDIA HAGOADAIA TOTONA

4. Natuna be dahaka henanadai ia henia diba, bona dahaka dainai?

⁴ Keristani tama sina idia diba, edia natudia idia durua be namo Dirava idia abidadama henia totona. Badina oi vara neganai,  Iehova abidadama henia karana oi do diba lasi. Emu natuna danu be unai bamona. Unai dainai, natuna be inai bamona henanadai do ia henia diba: ‘Edena bamona do lau diba Dirava ia noho? Baibel ena hereva lau abia dae momokani diba, a?’ Momokani, Baibel ese ita ia hagoadaia ita “laloa namonamo” bona ‘gau ibounai ita tahua namonamo’ totona. (Roma 12:1; 1 Tes. 5:21) To, edena dala ai emu natuna oi durua diba ena abidadama ia hagoadaia totona?

5. Tama sina be dahaka idia karaia diba, edia natudia idia durua Baibel ena hereva idia abidadama henia totona? (Roma 12:2)

⁵ Emu natuna oi hagoadaia Baibel be ia sibona ese ia hamomokania totona. (Roma 12:2 duahia.) Emu natuna be henanadai ia henia neganai, unai be nega namona ia dekenai iseda stadi tulu idauidau amo haere davaria dalana oi hahedinaraia, hegeregere Watch Tower Publications Index bona Research Guide for Jehovah’s Witnesses oi gaukaralaia. Research Guide ai, inai hereva “The Bible” henunai, “Inspired by God” oi tahua, unuseniai ia hahedinaraia Baibel be taunimanima ese idia torea bukana ta sibona lasi. To ia be “Dirava ena hereva.” (1 Tes. 2:13) Hegeregere, natuna ese iseda pablikeisen amo Asuria ena idaunegai siti, Nineva totona tahua gaukara ia karaia diba. Guna, Baibel ena hereva idia hakoikoia taudia haida idia gwau Nineva ena siti be ia noho lasi. To lagani 1850 bamona ai, saiens taudia haida ese tano lalonai unai siti ena momoru haida idia davaria, unai ese Baibel ena hereva ia hamomokania. (Sef. 2:13-15) Emu natuna ese Nineva idia hadikaia ena peroveta herevana ia guguru dalana ia diba totona, November 2021 Gima Kohorona ai atikol ia itaia, “Inai Oi Diba, A?” Ia ese encyclopedia bona buka ma haida amo ia dibaia gaudia be iseda pablikeisen ida ia hahegeregerea neganai, unai ese ia do ia durua Baibel ena hereva ia abidadama henia noho totona.

6. Edena dala ai tama sina ese edia natudia idia durua Baibel ena hereva idia hamomokania totona? Haheitalai gwauraia. (Laulau itaia danu.)

⁶ Emu natuna oi durua Baibel ena hereva ia hamomokania totona. Dala idauidau momo idia noho emu natudia ida Baibel eiava Dirava abidadama henia karana oi herevalaia totona. Miusiam, gabu namona ta eiava Betele umui vadivadi neganai, emu natudia oi hadibaia. Hegeregere, buka haida edia laulau eiava vidio haida ai, idaunegai sivarai eiava gau gunadia amo emu natudia oi hadibaia unai be Baibel ese ia herevalaia danu. Unai amo emu natuna do ia diba Baibel ena hereva be momokani. Reana emu natuna dekenai, Moaba Nadi oi herevalaia diba, unai nadi ai Iehova ena ladana idia torea bona lagani 3,000 ia noho.  Unai nadi be France ai, Louvre Museum dekenai idia noho. Danu, New York ai, Iehova ena Witnes taudia edia Hedikwota, Warwick dekenai, “The Bible and the Divine Name” ena kahana ai Moaba Nadi idia haheitalaia laulau ta ia noho. Moaba nadi ai ia noho hereva ese ia hahedinaraia Moaba ena King Mesa ese Israela taudia ia tuari henia. Bona unai be Baibel ena hereva ida ia hegeregere. (2 Ki. 3:4, 5) Bema emu natuna be hamomokania gaudia amo ia itaia Baibel ena hereva be maoro, unai ese ena abidadama do ia hagoadaia.—2 Sivarai 9:6 hahegeregerea.

7-8. (a) Havaraia gaudia edia toana amo dahaka ita dibaia? Haheitalai gwauraia. (Laulau itaia danu.) (b) Dahaka henanadai ese emu natuna ia durua diba, Havaraia Tauna dekenai ena abidadama ia hagoadaia totona?

⁷ Emu natuna oi durua Iehova ese ia havaraia gaudia ia laloa totona. Gabu namona ta ai oi raka eiava uma gabu oi karaia neganai, emu natuna dekenai umui itaia gaudia oi herevalaia. Dahaka dainai? Emu natudia oi durua, unai amo do idia laloparara aonega tauna ta ese unai gau idauidau ia karaia. Hegeregere, havaraia gaudia momo dekenai spiral ena toana ia noho. Lagani momo lalonai, saiens taudia ese spiral gaudia idia stadilaia. Saiens tauna ta ladana Nicola Fameli ia gwau, havaraia gaudia lalonai unai spiral ta ta oi duahia neganai, do oi itaia edia namba be hegeregere. Unai namba idia gwauraia Fibonacci sequence. Spiral ena toana be mauri gaudia idauidau, hegeregere galaksi haida, davara ena bisisi o shell haida, au raurau bona sunflower dekenai do oi itaia diba. a

⁸ Sikuli ai emu natuna be havaraia gaudia haida edia toana ida ia hegeregere pattern ma haida ia dibaia. Hegeregere, au momo be mai edia pattern tamona. Edia gabana amo rigi idia vara bona unai rigi amo rigi ma haida idia vara bena edia raurau idia noho. Unai bamona pattern be havaraia gaudia momo ai idia hedinarai. To daika ese unai gaudia idauidau ia havaraia? Emu natuna ese unai bamona henanadai ia laloa neganai, do ia abia dae Dirava ese gau ibounai ia havaraia. (Heb. 3:4) Emu natuna ia bada lalonai, ia oi durua dahaka dainai Dirava ena taravatu badinaia karana be mai anina bada. Hegeregere oi nanadaia, “Bema Dirava be ita ia havaraia, ita ia hamoalea dalana ia diba, a?” Bena natuna oi hadibaia, Dirava ese Baibel be ita dekenai ia henia, unai amo moale ita abia dalana be ita dekenai ia hadibaia.

BAIBEL ENA TARAVATU LALOA BADA

9. Dahaka dainai natuna be nega haida Baibel ena taravatu do ia henanadailaia?

⁹ Emu natuna be Baibel ena taravatu ia henanadailaia neganai, namona be oi tahua dahaka  dainai unai henanadai ia henia. Emu natuna be Baibel ena taravatu dekenai ia lalotamona lasi, a? Eiava ma haida dekenai ia abia dae gaudia ia gwauraia be auka, a? Emu natuna oi durua Baibel ena taravatu ia laloa bada totona, Mauri Moalelaia Hanaihanai! bukana umui stadilaia. b

10. Edena dala ai emu natuna oi durua diba Iehova ida ena hetura karana ia hagoadaia totona?

¹⁰ Emu natuna oi hagoadaia Iehova ida ena hetura karana ia laloa bada totona. Emu natuna ida Baibel oi stadilaia lalonai, Mauri Moalelaia Hanaihanai! bukana ai idia noho henanadai bona haheitalai oi gaukaralaia amo oi durua ena lalohadai ia gwauraia totona. (Aon. 20:5) Hegeregere, leseni 8 ai Iehova be turana namona ta ida ia hahegeregerea, ia ese hadibaia herevadia ia henia, unai be ita do ia gimaia bona iseda namo totona. Ioane Ginigunana 5:3 umui herevalaia murinai, oi nanadaia, “Iehova be Turana namona dainai, ita ia hamaoroa gaudia dekenai dahaka ita karaia be namo?” Unai henanadai amo emu natuna do ia laloparara Dirava be ita ia lalokau henia dainai unai taravatu ia atoa.—Isa. 48:17, 18.

11. Edena dala ai emu natuna oi durua diba, Baibel ena hakaua herevadia ia laloa bada totona? (Aonega Herevadia 2:10, 11)

¹¹ Baibel ena hakaua herevadia badinaia karana ena namo umui herevalaia. Baibel umui duahia eiava dina siri umui herevalaia hebou neganai, Baibel ena hakaua herevadia ese emu ruma bese ia durua dalana umui herevalaia. Hegeregere, emu natuna ia gaukara goada bona mai momokani ida ia kara dainai, unai ena namo ia itaia, a? (Heb. 13:18) Danu, oi hahedinaraia Baibel ena hakaua herevadia ita badinaia neganai, unai ese iseda helt ia durua bona ita moale. (Aon. 14:29, 30) Unai bamona hakaua herevadia be emu natuna ida umui herevalaia neganai, ia do ia durua Baibel ena sisiba ia laloa bada totona.—Aonega Herevadia 2:10, 11 duahia.

12. Tama ta ese edena dala ai ena natuna ia durua, Baibel ena hakaua herevadia badinaia karana ena namo ia lalopararalaia totona?

¹² France ai tamana ta ladana Steve, bona ena adavana ese edia natuna Ethan, ena mauri lagana 16 merona idia durua, unai amo do ia itaia, Iehova be lalokau dainai taravatu ia henia, Steve ia gwau: “Inai bamona henanadai ai henia, ‘Dahaka dainai Iehova ia ura ena hakaua herevadia ita matauraia? Edena dala ai unai ese ia hahedinaraia ita ia lalokau henia? Dahaka do ia vara bema unai hakaua herevadia oi badinaia lasi?’” Unai bamona herevahereva karana ese Ethan ia durua Iehova ena kara maoromaoro taravatudia ia badinaia totona. Steve ma ia gwau: “Emai tahua gauna be Ethan do ai durua, unai amo do ia itaia Baibel ai idia noho aonega herevadia ese taunimanima edia aonega ia hereaia.”

13. Edena dala ai tama sina ese edia natuna idia durua diba, Baibel ena hakaua herevadia ia badinaia totona? Haheitalai gwauraia.

¹³ Emu natuna oi durua Baibel ena hakaua herevadia ia badinaia totona. Hegeregere, emu natuna be sikuli ai asainmen ta ia abia, bona unai be buka ta do ia duahia. Unai buka ese ia hahedinaraia matabodaga karadia idia karaia eiava idia badu momo taudia edia kara ita tohotohoa be kerere lasi. Emu natuna oi nanadaia diba taunimanima be unai bamona idia karaia neganai, Iehova ena hemami be edena bamona. (Aon. 22:24, 25; 1 Kor. 15:33; Fili. 4:8) Unai ese ia do ia durua, ena tisa bona ena klas turadia dekenai ia abia dae gaudia ia herevalaia totona.

 EMU NATUNA DURUA ENA ABIDADAMA IA GIMAIA TOTONA

14. Keristani matamata taudia be edena topik dainai idia gari diba, bona dahaka dainai?

¹⁴ Nega haida Keristani matamata taudia idia gari, edia abidadama idia gwauraia hedinarai totona. Hegeregere, sikuli ai evolusen idia herevalaia neganai, reana natuna do ia gari ia abia dae gaudia ia herevalaia totona. Dahaka dainai? Reana tisa do ia gwau evolusen be ia vara momokani. Bema oi be tama eiava sina ta, edena dala ai emu natuna oi durua diba ia abia dae gaudia be mai gari lasi ida ia herevalaia totona?

15. Dahaka ese Keristani matamata ta do ia durua, mai gari lasi ida ia abia dae gaudia ia gwauraia totona?

¹⁵ Emu natuna oi durua ia abia dae gaudia be mai gari lasi ida ia herevalaia totona. Emu natuna ia hemarai lasi be namo, badina ia diba havaraia tauna ia noho. (2 Tim. 1:8) Danu, saiens taudia momo idia abia dae mauri gaudia be idia vara kava lasi. Unai taudia idia laloparara aonega bada tauna ta ese mauri gaudia ibounai ia havaraia. Unai dainai tanobada ena sikuli ibounai dekenai idia hadibaia evolusen herevana idia abia dae lasi. Emu natuna ena abidadama ia goada bona do ia gari lasi dalana ta be, tadikaka bona taihu haida ese Havaraia Tauna idia abia dae ena badina do ia laloa. c

16. Edena dala ai tama sina ese edia natuna idia durua diba, ma gari lasi ida Havaraia Tauna ia herevalaia totona? (1 Pet. 3:15) (Laulau itaia danu.)

¹⁶ Emu natuna oi durua mai gari lasi ida Havaraia Tauna ia noho ia herevalaia totona. (1 Petero 3:15 duahia.) Umui ese jw.org ai, havaraia gaudia bona evolusen idia herevalaia atikol haida umui herevalaia. Bena natuna ese ia ura henia point umui herevalaia diba, unai ese ia do ia durua ena sikuli turadia dekenai, Havaraia Tauna ia herevalaia totona. Hadibaia ena sikuli turadia ida ia hepapahuahu be anina lasi. Danu bema haida idia ura unai topik idia herevalaia, namona be emu natuna oi hagoadaia auka lasi dalanai ia hereva bona badina namodia ia gaukaralaia. Hegeregere, sikuli turana ta do ia gwau: “Lau be lau itaia gaudia sibona lau abia dae, bona Dirava lau itaia lasi.” Matamata Keristani tauna be inai bamona ia haere diba: “Mani oi laloa, oi be taunimanima idia noho lasi uda gabuna ta dekenai oi raka lalonai, nadi amo idia karaia ranu  guri ta oi davaria. Dahaka do oi gwau? Do oi gwau taunimanima ese unai ranu guri idia karaia, unai hegeregerena ta ese iseda tanobada bona mauri gaudia ibounai ia havaraia!”

17. Edena dala ai tama sina ese edia natuna idia hagoadaia diba dala idauidau ai Baibel ia herevalaia totona? Haheitalai gwauraia.

¹⁷ Emu natuna oi durua dala idauidau ai Baibel ena hereva momokani ia herevalaia totona. (Roma 10:10) Ma haida dekenai Baibel ena hereva hadibaia karana be miusiki gauna ta dibaia karana ida ia hegeregere. Matamanai, auka lasi anena ta amo miusiki gadaralaia karana do ia dibaia matamaia. Nega ia hanaia lalonai, miusiki gadaralaia karana do ia dibaia. Unai hegeregerena, Keristani matamata tauna ta be ia haroro matamaia neganai, auka lasi dalanai do ia hereva. Hegeregere, sikuli turana ia nanadaia diba: “Inai oi diba, a? Engineer taudia be nega momo havaraia gaudia edia toana hegeregerena gau ta idia karaia. Mani unai ena vidio ta lau hahedinaraia.” Was It Designed? ena kahana amo vidio ta ia hahedinaraia murinai, ia gwau diba: “Bema saiens tauna ta be unai design dainai, hanamoa ia abia, daika be unai havaraia gaudia dainai hanamoa ia abia be namo?” Unai bamona henanadai ese matamata tauna ta ia hagoadaia, bona do ia ura gau ma haida ia dibaia.

EMU NATUNA OI DURUA NOHO ENA ABIDADAMA IA HAGOADAIA TOTONA

18. Edena dala ai tama sina ese edia natuna do idia durua noho Dirava dekenai ena abidadama ia goada totona?

¹⁸ Inai tanobada ai taunimanima momo be Iehova idia abidadama henia lasi. (2 Pet. 3:3) Unai dainai tama sina e, emu natuna ida Baibel umui stadilaia neganai, ia umui hagoadaia topik haida ia stadilaia totona. Unai ese ia do ia durua Dirava ena hereva ia matauraia bona ena taravatu ia badinaia totona. Iehova ena havaraia gaudia umui herevalaia hebou neganai, ia umui durua Iehova dekenai ena abidadama ia hagoadaia totona. Danu, ia umui durua idia guguru vadaeni peroveta herevadia ia laloa bada totona. Bona mai anina bada gauna be, emu natuna ida oi guriguri bona ia totona oi guriguri. Bema unai bamona oi karaia, Iehova ese emu hekwarahi do ia hanamoa bona emu natuna do ia durua ena abidadama ia goada totona.—2 Siv. 15:7.