Inai lagani ena Gima Kohorona idauidau oi duahia namonamo vadaeni, a? Mani ita itaia bema inai henanadai oi haerelaia diba:

Hahine kara henia dalana dekenai Iehova be dahaka haheitalai ia hahedinaraia?

Ia ese maka tamona ai idia ia kara henia, tatau ia kara henia hegeregerena, hahine taudia ia kara henia. Dirava be idia ia kamonai henia, bona edia hemami bona lalohadai ia laloa bada. Bona idia ia abidadama henia ena gaukara idia karaia totona.—w24.01, rau 15-16.

Efeso 5:7 ia gwau: “Namo lasi idia umui tura henia.” Edena dala ai unai sisiba ita badinaia diba?

Aposetolo Paulo ese ita ia hadibaia, Dirava ena taravatu idia badinaia lasi taudia do ita bamoa lasi. Badina idia ese ita do idia koua Dirava ita badinaia totona. Unai be ita bamoa turadia sibona ia herevalaia lasi, to social media ai ita tura henia taudia dekenai ita naria namonamo danu.—w24.03, rau 22-23.

Edena koikoi sivaraidia dekenai ita naria namonamo be namo?

Namona be iseda tura namodia amo ita abia sivaraidia, ita diba lasi taudia amo ita abia email, bona aposteit taudia be koikoi dalanai hereva momokani idia ura henia karadia dekenai ita naria namonamo.—w24.04, rau 12.

Iehova ese King Solomona bona Sodoma bona Gomora ai idia mase taudia, bona Abata Badana ai idia mase taudia do ia hahemaoro henia karana amo dahaka ita diba bona dahaka ita diba lasi?

Ita diba lasi bema Iehova ese idia ia haorea momokani eiava lasi. To, ita diba ia be gau ibounai ia diba bona ia be hebogahisi bada Diravana.—w24.05, rau 3-4.

Dirava be “Nadi Badana” dainai, ia dekenai dahaka ita dibaia? (Deu. 32:4)

Iehova be iseda heau mauri gabuna ai ita halaoa diba. Ia dekenai ita tabekau diba, bona hanaihanai ena gwauhamata ia badinaia. Bona iena kara ia haidaua diba lasi, iena kara bona ura be idia idau diba lasi.—w24.06, rau 26-28.

Dahaka ese oi ia durua diba kongrigeisen matamata oi manadalaia totona?

Iehova dekenai oi tabekau, ia ese oi do ia durua, ena idaunegai hesiai taudia ia durua bamona. Emu kongrigeisen matamata be kongrigeisen gunana ida oi hahegeregerea lasi. Emu kongrigeisen matamata lalonai oi bisi, bona tura matamatadia oi tahua.—w24.07, rau 26-28.

Mataio karoa 25 ai idia noho parabole toi amo dahaka ita dibaia?

Mamoe bona nanigosi ena parabole ese ia hahedinaraia abidadama bona badinaia karana ita hahedinaraia be namo. Aonega bona kavakava kekenidia ena parabole ia hahedinaraia ita hegaegae bona gima noho be namo. Bona talent ena parabole ia hahedinaraia ita be gaukara goada taudia be mai anina bada.—w24.09, rau 20-24.

Solomona ena dubu helaga ena vareai gabuna ena lata be edena bamona?

Sivarai Iharuana 3:4 ai, toretore gunadia idia gwau “120 kiubit,” anina be ena lata be 53 mita. To idia abidadama henia toretore haida idia gwau “20 kiubit,” anina be ena lata be 9 mita. Unai 20 kiubit be dubu helaga ena vareai gabuna ena haba ida ia hegeregere.—w24.10, rau 31.

Hesiai tauna ena “adavana be tamona” ena anina be dahaka? (1 Tim. 3:12)

Anina be ia be hahine tamona sibona do ia adavaia bona matabodaga karadia ia karaia lasi be namo. Ma danu, namo lasi ia ese ma hahine haida ia ura henia.—w24.11, rau 19.

Dahaka dainai ita gwau Ioane 6:53 be Lohiabada Ena Anibou karaia dalana ia hahedinaraia lasi?

Ioane 6:53 ia hahedinaraia Iesu ena tauanina ania bona ena rara inua karana be mai anina bada. Lagani 32 C.E. ai, Galilea dekenai Iesu ese unai hereva be Iuda taudia dekenai ia gwauraia, idia be ia idia abidadama henia be namo. To, Lohiabada Ena Anibou be vaira lagani ai Ierusalema dekenai ia karaia. Unuseniai Iesu be guba ai ia ida do idia lohia taudia dekenai ia hereva.—w24.12, rau 10-11.