LAUEGU tamana, Arthur, be ia matamata neganai, ia be Dirava gari henia merona, bona ia ura Metodis ena haroro tauna ai ia lao. To, Bible Student taudia edia buka ta ia duahia bona idia ia bamoa matamaia murinai, iena palani ia haidaua. Lagani 1914 ai, iena mauri be 17 neganai bapatiso ia abia. Unai nega ai Tanobada Tuarina Ginigunana ia matamaia, bona ia idia boiria tuari lalonai ia vareai totona. To, tuari lalonai ia vareai lasi dainai, Kingston Penitentiary, Ontario, Canada dekenai ia idia siaia, bona unuseniai hua ten ia noho. Ia idia ruhaia murinai, ia be kolpota (painia) gaukara ia karaia matamaia.

Lagani 1926 ai, Arthur Guest be Hazel Wilkinson ia adavaia. Hazel Wilkinson ena sinana be lagani 1908 ai hereva momokani ia dibaia. Lau be April 24, 1931 ai lau vara, natudia 4 amo lau be iharuana. Emai ruma bese lalonai Iehova tomadiho henia karana ai laloa bada, bona egu tamana be Baibel ia matauraia bada dainai, ai danu ese Dirava ena Hereva ai laloa bada. Nega ibounai ruma-ta-ruma-ta haroro gaukara ai karaia hebou.—Kara 20:20.

Lagani 1939 ai, Tanobada Tuarina Iharuana ia vara, bona unai lagani murinai, Canada ai Iehova ena Witnes taudia edia gaukara idia koua. Sikuli momo dekenai bese abia isi karadia idia karaia, hegeregere pepe idia saluti bona bese ena ane idia abia. Unai bamona negana ta ai, lau bona egu kakana, Dorothy, be klasrum amo idia lulua. Dina ta, lau hoa badina egu tisa be lau hahemaraia totona ia gwau lau be kavakava. Sikuli murinai, ai sikuli hebou natudia haida ese lau idia heatu henia bona tano dekenai lau moru. Unai dagedage karana dainai, egu lalona lau hadaia Dirava do lau kamonai henia, to taunimanima lasi.—Kara 5:29.

 July 1942 ai, egu mauri lagani be 11 neganai, animal idia naria gabuna ta ena ranu tanika ta lalonai lau bapatiso. Sikuli ena holidei negadiai, mai moale ida heduru painia gaukara lau karaia. Lagani ta ai, tadikaka toi lau bamoa bona Ontario ena not kahanai idia noho au utua taudia ai haroro henia.

May 1, 1949 ai, regula painia gaukara lau hamatamaia. Brens ai konstraksen gaukara idia karaia dainai, heduru totona lau idia boiria bona December  1 ai Canada ena Betele famili ena memba ta ai lau lao. Printa gabuna dekenai lau idia siaia bona flatbed press gaukaralaia dalana lau dibaia. Wiki haida lalonai, lau be hanuaboi ai lau gaukara, Canada ai Iehova ena taunimanima ese idia davaria dagedage karana ia herevalaia pepapepana ai printaia totona.

Gabeai, Haroro Naria Dipatmen ai lau gaukara neganai, haroro totona Quebec dekenai idia ura lao painia taudia haida lau hereva henidia, idia ura lao gabuna ai dagedage be bada. Idia ta be Mary Zazula, ia be Edmonton, Alberta amo. Ia bona ena kakana, Joe, be Baibel stadilaia karana idia rakatania lasi dainai, edia tama sina ese ruma amo idia luludia, badina idia be Otodoks taudia. June 1951 ai, idia ruaosi idia bapatiso, bona hua 6 murinai painia gaukara idia matamaia. Idia ida lau herevahereva neganai, lau itaia Mary ena abidadama be goada momokani. Sibona dekenai lau gwau, ‘Bema gau ta ia idau lasi, toana be inai kekeni do lau adavaia.’ Hua 9 murinai ai headava, unai be January 30, 1954 ai. Wiki ta murinai, ai idia boiria sekit gaukara ena treinini ai abia totona, bona lagani rua lalonai Ontario ena not kahanai sekit gaukara ai karaia.

Tanobada hegegemadai haroro gaukara ia bada ia lao dainai, misinari gaukarana totona haida idia boiria. Ai laloa, bema Canada ena keru bada negana bona siahu negana ena nemo ai haheaukalaia diba, asainmen matamata ena hekwakwanai idauidau ai haheaukalaia diba danu. July 1956 ai, Gilead ena klas namba 27 ai haorea bena November ai emai asainmen matamata dekenai ai lao, unai be Brazil.

Brazil brens dekenai ai ginidae neganai, Portuguese gado ai dibaia. Hanamoa hereva kwadogidia bona miniti tamona lalonai magasin hariharilaia dalana ai dibaia murinai, ai haroro matamaia. Bema ruma tauna ia kamonai, siri haida amo Dirava ena Basileia henunai do ita noholaia maurina ai herevalaia. Emai haroro dina ginigunana ai, hahine ta be ia kamonai namonamo, vadaeni ia dekenai Apokalupo 21:3, 4 lau duahia—unai murinai lau maserea! Nega momo lau dekenai  unai ia vara, badina lau be siahu dekenai lau manada lasi.

Emai misinari gaukara be Campos siti dekenai ai matamaia, hari unuseniai kongrigeisen ibounai be 15. Unuseni ai ginidae neganai, grup maragina ta bona misinari ruma ta sibona idia noho. Unai misinari ruma ai taihu 4 idia noho: Esther Tracy, Ramona Bauer, Luiza Schwarz, bona Lorraine Brookes (hari be Wallen). Misinari ruma ai, lau be dabua huria gaukarana lau durua bona aniani nadua totona lahi au lau haboua danu. Monday hanuaboi ta ai, emai Gima Kohorona stadi murinai, gau ta ia vara. Egu adavana be sofa ai ia hekure bona dinai ai karaia gaudia ai herevalaia. Iena kwarana be pilo amo ia abia isi neganai, gaigai ta ia raka-lasi bona gari dainai regerege bada ia vara, gabeai lau alaia mase!

Lagani tamona lalonai Portuguese gado ai stadilaia murinai, lau idia abia hidi sekit gaukara lau karaia totona. Aiemai kohu be momo lasi—paoa be lasi, geda dekenai ai mahuta, bona hosi eiava hosi ese ia veria kariota amo ai laolao. Nega ta, haroro gaukara totona trein amo ororo ai ia noho taoni ta dekenai ai lao bona unuseniai ia noho ruma ta ena daiutu ta ai rentaia. Brens ofesi ese ai dekenai magasin 800 idia siaia, haroro gaukara dekenai ai gaukaralaia totona. Post ofesi dekenai ai giroa loulou magasin maua abidia totona bena ai noho gabuna dekenai ai huadia daekau.

Lagani 1962 ai, Brazil ena gabu momo dekenai tadikaka bona misinari taihudia totona Basileia Hesiai Gaukara Sikuli idia karaia. Hua 6 lalonai, unai gabu idauidau dekenai lau lao unai sikuli lau hadibaia totona—Mary be lau ida ia mai lasi. Sikuli idia abia gabudia be Manaus, Belém, Fortaleza, Recife, bona Salvador. Manaus ena ruma badana ta ai distrik hebouhebou lau hegaegaelaia. Medu bada herea ia diho dainai inua ranuna be ia miro bona aniani abia gabuna be ia dika danu. (Unai negadiai, hebouhebou ai aniani idia hegaegaelaia.) Unai dainai ami taudia lau rini henia, bona ofesa ta be mai moale ida hebouhebou totona ranu ia henia bona soldia taudia ia siaia kisini bona aniani abia gabuna totona palai ruma badadia rua idia haginia.

Gabu ta dekenai lau lao neganai, Mary be nega momo Portuguese taudia edia bisinesi gabudia dekenai ia haroro. Ta ida Baibel ia herevalaia be auka, unai dainai Betele taudia haida dekenai ia gwau, “Gabu ibounai amo Portugal be tano ginigabena do lau lao.” To daudau lasi murinai, revareva ta amo ai idia boiria Portugal dekenai ai lao totona. Unai nega ai, iseda haroro gaukara be unai gabu ai idia taravatua, to unai asainmen ai  abia dae, ena be Mary be matamanai ia ura lasi.

August 1964 ai, Lisbon, Portugal dekenai ai ginidae. Portuguese ena pulisi (PIDE) taudia ese iseda tadikaka idia dagedage henidia bada. Unai dainai, ai laloa unuseni ai ginidae neganai, tadikaka do ai hedavari henidia haraga lasi. Emai visa ai naria bona abia murinai, ruma ta ai rentaia. January 1965 ai, brens ofesi ai rini henia. Hua 5 murinai emai hebou ginigunana ai lao neganai, ai moale bada!

Ai kamonai dina ta ta ai pulisi ese iseda tadikaka edia ruma idia sekea. Kingdom Hall idia koudia dainai, kongrigeisen heboudia be tadikaka edia ruma dekenai ai karaia. Witnes taudia handred momo be pulisi steiseni dekenai idia abia lao, idia henanadai henia totona. Tadikaka idia dagedage henidia bada, badina idia ura tadikaka ese idia dekenai hebou idia naria tadikaka edia ladadia do idia henia. Unai dainai, tadikaka ese tadikaka edia ladadia sibona idia gaukaralaia, hegeregere José eiava Paulo, to edia tamadia edia ladana idia gaukaralaia lasi. Vadaeni ai danu be unai ai karaia.

Ai ura bada tadikaka dekenai Baibel ena hakaua herevadia ai henia. Mary ena gaukara be Gima Kohorona stadi ia taipia bona atikol ma haida be stencil ai ia taipia bona kopi ia karaia.

June 1966 ai, Lisbon dekenai kota ta idia karaia. Oibe, Feijó Kongrigeisen ena tadikaka taihu 49 be kota vairanai idia gini, badina ruma ta dekenai idia karaia hebouna dekenai idia lao. Unai kota dekenai idia do lao lasi neganai, idia durua totona henanadai haida lau henia, loea taudia ese idia henia henanadaidia bamona. Ai diba unai kota dekenai do ai kwalimu lasi, to danu ai laloparara unai be nega namona haroro namona ai henia totona. To emai loea ena hereva ena dokonai, ia ese aposetolo taudia edia negai ia noho tauna Gamaliela ena sivarai ia gwauraia. (Kara 5:33-39) Unai kota ena sivarai be nius ai idia halasia, bona unai tadikaka taihu 49 be dibura ruma ai idia atoa, haida be unuseniai dina 45 idia noho, ma haida be hua 5 mai kahana. Ai moale badina ai ia durua loea ia do mase lasi neganai, ia be Baibel stadi ia abia dae bona hebou ia lao henia danu.

December 1966 ai, lau be brens naria tauna ai lau lao bona legal dipatmen lau durua. Bona Iehova ena Witnes taudia be maoro idia abia edia tomadiho idia karaia totona. (Fili. 1:7) December 18, 1974 ai, kota ese unai gwaumaoro ia henia. Oporto bona Lisbon siti dekenai hebou badana ta ai karaia, bona hedikwota amo tadikaka Nathan Knorr bona Frederick Franz idia mai, unai hebou idia mai taudia ibounai be 46,870.

 Iehova ese dala ia kehoa dainai, Portuguese gado idia herevalaia motumotu haida dekenai ai haroro diba, Azores, Cape Verde, Madeira, São Tomé bona Príncipe dekenai danu. Unai dainai lagani 1988 ai, brens ofesi ai habadaia. Bona April 23 ai, Tadikaka Milton Henschel ese unai brens ofesi matamata ia hahelagaia, taunimanima 45,522 edia vairanai. Ai moale badina guna Portugal ai misinari gaukara idia karaia tadikaka taihu 20 be unai mai anina hebou dekenai idia mai.

Idia hanaia laganidia lalonai, abidadama tadikaka bamoa karana ese ai ia hagoadaia bada. Soun vadivadi ta ai, Tadikaka Theodore Jaracz durua karana amo gau ta lau dibaia. Ai vadivadi henia brens ta dekenai hekwakwanai haida idia davaria, bona Brens Komiti idia gaukara goada unai hekwakwanai idia hamaoromaoroa totona. Idia lalohekwarahi lasi totona, Tadikaka Jaracz ia gwau: “Hari nega ita henia Dirava ena lauma helaga ia gaukara totona.” Lagani haida gunanai, lau bona egu adavana Mary be Brooklyn ai vadivadi henia neganai, ai be Tadikaka Franz bona ma haida ai bamoa. Emai hebamo karana ena dokonai, Tadikaka Franz ai nanadaia ia ese lagani momo lalonai ia karaia hesiai gaukarana do ia herevalaia sisina, ia gwau: “Lauegu hagoadaia hereva be inai: Nega namodia bona dikadia ai, Iehova ena orea badinaia noho. Inai orea sibona be Iesu ese iena hahediba taudia dekenai ia henia hahegani idia badinaia—Dirava ena Basileia ena sivarai namona harorolaia gaukarana unai!”

Lau bona egu adavana be unai ai karaia dainai ai moale. Soun vadivadi negadia ai moalelaia. Inai negadia be nega namona matamata bona buruka taudia ese idia karaia hesiai gaukara dainai idia ai hanamoa totona, bona idia ai hagoadaia Iehova idia hesiai henia noho totona.

Lagani momo idia hanaia vadaeni, bona hari emai mauri lagani be 80 bamona. Mary be gorere idauidau ia haheaukalaia. (2 Kor. 12:9) Ai davaria hekwakwanai ese emai abidadama idia hagoadaia bona durua ai gini goada noho totona. Emai mauri ai laloa lou neganai, ai gwau diba, dala idauidau ai Iehova ena hebogahisi hereadaena ai mamia momokani. *