Lagani 1913 ai egu tamana John Mills ena mauri lagani be 25 neganai New York City dekenai ia bapatiso. Tadikaka Russell be bapatiso tok ia henia. Daudau lasi murinai, egu tamana be Trinidad dekenai ia lao bona unuseniai ia be Baibel ia stadilaia goadagoada taihu, Constance Farmer ia adavaia. Egu tamana ese iena turana William R. Brown ia durua bona “Photo-Drama of Creation” idia hahedinaraia. Ia be tadikaka William ia durua to lagani 1923 ai, tadikaka bona ena adavana be West Africa dekenai idia siaia lao. Egu tama sina be guba helarona idia abia taudia. Idia be Trinidad dekenai edia hesiai gaukara idia karaia.

Ai ibounai be nain, mero ginigunana ena ladana be Rutherford, unai be Watch Tower Bible and Tract Society ena presiden ena ladana. Lau be lagani 1922 December 30 ai lau vara. Bona egu ladana idia gwauraia Woodworth, unai be Clayton J. Woodworth ena ladana. Ia be guna idia gwauraia The Golden Age (hari be Awake!) ena editor. Emai tama sina ese sikuli dekenai ai idia atoa, to ai idia hagoadaia Dirava ena hesiai gaukara lalonai tahua gaudia ai atoa totona. Egu sinana be Baibel siri edia anina ia hahedinaraia goevagoeva diba. Egu tamana be ai dekenai Baibel sivaraidia ia herevalaia neganai, ena vairana bona toana amo ia gwauraia sivarai ia hahedinaraia toho.

Ai dekenai idia hadibaia gaudia edia anina idia vara. Ai memero faiv amo, ai toi sibona be Gilead Sikuli dekenai ai lao. Emai taihudia toi be lagani momo lalonai Trinidad bona Tobago dekenai painia gaukara idia karaia. Egu tama sina edia hadibaia dalana bona edia haheitalai namona dainai, ai be “Lohiabada [Iehova] ena Ruma dekenai idia hadoa audia bamona.” Edia hagoadaia herevadia ese ai idia durua dainai “Dirava ena Ruma lalonai” ai tubu daekau namo herea.​—Sal. 92:13.

 Emai ruma idia gaukaralaia momo, hegeregere, unuseniai painia taudia idia hebou bona nega momo misinari ta Tadikaka George Young, ia be Canada amo, be Trinidad ia vadivadi henia ena sivarai idia herevalaia. Emai tama sina be mai moale ida Tadikaka bona Taihu Brown edia sivarai idia herevalaia, idia be West Africa dekenai idia lao. Edia sivarai ese lau ia hagoadaia dainai egu mauri lagani be ten neganai haroro gaukara lau karaia matamaia.

Unai negai emai magasin ese tomadiho koikoi edia kara, mataganigani ia hahedinaraia bisinesi, bona politikol edia koikoi karadia idia hahedinaraia. Unai dainai, lagani 1936 ai dubu gunalaia taudia edia orea ese Trinidad ena gavana ta idia hamaoroa Watch Tower ena pablikeisen ibounai do idia taravatua totona. To pablikeisen ai hunia bona hehuni ai ai gaukaralaidia ela bona idia ore. Laini dekenai ai raka, haida be basikele ai idia guia bona saini ai huaia, pepapepa bona saini badadia ai dogoatao. Emai grup bona Tunapuna amo idia mai saun motuka ena grup be Trinidad ena daudau gabudia dekenai ai lao haroro. Unai ai moalelaia bada! Unai ese lau ia hagoadaia bada dainai egu mauri lagani be 16 neganai bapatiso lau abia.

Egu tama sina amo lau abia treinini bona lau dibaia ekspiriens idauidau ese lau ia hagoadaia misinari gaukara lau abia hidi totona. Lagani 1944 ai, unai ura ia bada dainai Aruba dekenai lau lao bona Tadikaka Edmund W. Cummings ida lau gaukara hebou. Unai negai ai moale badina lagani 1945 ai taunimanima ten be Memorial dekenai idia mai. Lagani 1946 ai, unai motumotu ai kongrigeisen ginigunana ai hamatamaia.

Unai negai Oris Williams lau haroro henia. Iena hereva amo lau diba ia be iena dubu ai ia dibaia gaudia ia badinaia. To Baibel stadi ia abia dae bona unai amo ia diba Dirava ena Hereva be momokani bona lagani 1947 January 5 ai bapatiso ia abia. Daudau lasi murinai, ai headava. Oris be lagani 1950 November ai painia gaukara ia karaia matamaia. Ai headava murinai emai hesiai gaukara ai habadaia.

Lagani 1955 ai, ai idia boiria Gilead Sikuli ai lao totona. Ai do lao lasi neganai, lau bona Oris be emai moni gaukara ai rakatania, emai ruma bona kohu haida ai hoihoilaia, bona Aruba ai rakatania. Lagani 1956 July 29 ai, Gilead ena klas namba 27 amo ai gradueit bona Nigeria dekenai ai idia siaia lao.

Oris ia gwau: “Iehova ena lauma helaga ese ta ia durua diba misinari gaukara ai ia davaria hekwakwanai ia hanaia totona. Misinari gaukara be egu tahua gauna lasi. Egu ura gauna be ruma ta ai haginia bona natudia ai naria. To egu lalohadai lau haidaua badina lau laloparara sivarai namona harorolaia gaukarana lau karaia haraga be namo. Gilead amo ai gradueit neganai, lau hegaegae vadaeni misinari gaukara lau karaia totona. Bouti badana Queen Mary dekenai ai guia neganai, Tadikaka Knorr ida ia gaukara hebou tadikaka Worth Thornton be ia mai ai ia bamahuta henia. Ai ia hamaoroa ai be Betele dekenai do ai gaukara. Unai lau kamonai neganai, lau hoa. To Betele ai asainmen idauidau lau karaia bona lau moalelaia danu. Lau moalelaia bada gaukarana be reception gaukara. Unai gaukara dainai Nigeria tadikaka taihu ida lau herevahereva diba. Idia momo idia mai neganai, edia toana amo lau itaia idia hesiku, ranu mase, bona idia hitolo. Idia dekenai aniani, ranu bona durua gaudia ma haida henia karana lau moalelaia. Unai ibounai be hesiai gaukara helagadia Iehova dekenai, bona unai ese lau ia hamoalea.” Oibe, emai asainmen idauidau ese dala ia kehoa hesiai gaukara ai habadaia totona.

Lagani 1961 Trinidad ai, ruma bese ida ai aniani hebou neganai, Tadikaka Brown be Africa ena ekspiriens haida ia gwauraia. Bona lau be Nigeria ena haroro gaukara ia bada dalana lau herevalaia. Tadikaka Brown be ena imana be egu pagana dekenai ia atoa bona egu Tamana dekenai ia gwau: “Johnny, oi be Africa dekenai oi lao lasi, to Woodworth be ia lao!” Egu Tamana be lau ia itaia bona ia gwau: “Woodworth oi gaukara goada! Lagani momo lalonai Dirava idia hesiai henia taudia edia hagoadaia herevadia ese lau idia hagoadaia egu haroro gaukara lau karaia namonamo totona.

 Lagani 1962 ai, Gilead Sikuli ena klas namba 37 dekenai lau lao bona hua ten lalonai treinini ma haida lau abia. Nigeria ai brens ofesi ena ovasia Tadikaka Wilfred Gooch be klas namba 38 dekenai ia lao bona England dekenai ia idia siaia lao. Unai dainai lau idia abia hidi Nigeria brens lau naria totona. Tadikaka Brown ena haheitalai bamona, Nigeria tadikaka taihu lau dibaia bona lalokau henia totona, idia noho gabudia momo lau vadivadi henia. Ena be edia kohu be momo lasi, to idia moale bona unai ese ia hahedinaraia moni o kohu ese mauri namona do ia havaraia lasi. Edia mauri dalana lau laloa neganai, lau itaia edia toana be ia goeva, bona hebou dekenai idia mai neganai hemataurai dabua idia hahedokilaia. Hebouhebou dekenai idia mai neganai, idia momo be motuka badadia bona edia gabu ai idia gwauraia bolekaja * amo idia mai. Nega momo unai bamona motuka dekenai toretore ta ia noho, idia ta be: “Ranu sisina be davara badana ai ia lao diba.”

Motuka dekenai ia noho toretore be momokani. Ai ibounai emai gaukara goada karana ese anina namona ia havaraia. Lagani 1974 ai, Nigeria ena pablisa namba ia bada daekau 100,000. United States amo ia be tano ginigunana unai bamona namba ia abia. Emai haroro gaukara ia tubu daekau!

Ena be lagani 1967 ia lao 1970 ai Nigeria ai tuari ia vara, to pablisa ena namba be ia bada daekau. Tuari dainai hua momo lalonai Biafran ai idia noho tadikaka taihu be dala lasi brens ofesi dekenai idia hanaia totona. Unai dainai unai sinavai ai hanaia bona idia dekenai Baibel bona pablikeisen ai abia lao. Matamanai lau sivarailaia bamona, guriguri bona Iehova ai abidadama henia dainai nega momo sinavai ai hanaia.

Unai nega lau laloatao sinavai ai hanaia neganai, tuari taudia, gorere, bona dika gaudia ma haida amo ai naria namonamo. Gavamani ena tuari taudia idia noho gabuna ai hanaia neganai ai laloa momo lasi, to Biafran ai idia noho tuari taudia dekenai ai gari badina ai diba lasi dahaka do ia vara. Hanuaboi ta ai, vanagi ai lau guia bona Asaba amo lau lao Onitsha dekenai bona unuseni amo Enugu dekenai lau lao bona elda taudia lau hagoadaia. Aba dekenai ruma momo ai diari gaudia idia koua unai amo edia inai taudia ese do idia itaia lasi. Unai nega lalonai elda taudia lau vadivadi henia bona lau hagoadaia. Port Harcourt ai, emai hebou be guriguri amo ai koua haraga badina gavamani ena tuari taudia be Biafran ena taoni murimurina ai idia vareai bona idia tuari.

Unai hebou ese Iehova ena lalokau idia dekenai ia hahedinaraia bona danu Keristani gini siri karana bona lalotamona karana dekenai idia ia hagoadaia. Nigeria tadikaka bona taihu be unai nega aukana lalonai idia gini goada. Idia ese ta ta dekenai lalokau idia hahedinaraia bona Keristani lalotamona karana idia goadalaia. Idia ida unai hekwakwanai ai haheaukalaia, bona lau dekenai unai be hahenamo badana!

Lagani 1969 ai, Yankee Stadium, New York ai Intanesinol Hebouhebou ladana “Peace on Earth” ai abia, bona lau be Tadikaka Milton G. Henschel lau durua neganai gau momo lau diba. Unai ese lau ia durua bada badina lagani 1970 ai, Lagos, Nigeria ai Intanesinol Hebouhebou ladana “Men of Goodwill” ai abia. Tuari ia ore murinai, Iehova be ai ia durua dainai unai hebouhebou ai abia. Unai hebouhebou dekenai gado 17 be nega tamona idia hahanaia bona idia mai taudia ibounai be 121,128. Tadikaka Knorr bona Henschel be unai hebouhebou dekenai idia mai. Danu United States bona England amo vadivadi taudia be peleini amo idia mai bona idia itaia hahediba taudia matamatadia 3,775 be bapatiso idia abia. Lau gwau diba egu hesiai gaukara lalonai, unai hebouhebou totona hegaegae karana be bisi bada negana. Pablisa ena namba be ia bada daekau momokani!

Nigeria ai lagani 30 mai kahana sekit naria gaukarana lau karaia bona West Africa ai zoun naria tauna ena gaukara lau karaia danu. Unuseniai ai idia noho misinari taudia idia moale badina idia ta ta ai vadivadi henia bona ai hagoadaia! Idia ai hadibaia ai be idia ai laloa bada. Unai gaukara amo lau dibaia gauna be, taunimanima laloa bada karana ese ta ia durua ia goada bona Iehova ena orea lalonai lalotamona do ia noho totona.

 Iehova ena heduru dainai tuari bona gorere amo idia vara hekwakwanai idauidau ai haheaukalaia diba. Hanaihanai Iehova ena hahenamo ai itaia. Oris ia gwau:

“Ai ruaosi be nega momo malaria gorere ai abia. Nega ta egu tau be ia maserea dainai Lagos ena hospital dekenai ai abia lao. Doketa ese lau ia hamaoroa reana do ia mase, to unai ia vara lasi! Ia noga neganai, ia naria nesi tauna dekenai Dirava ena Basileia ia harorolaia. Gabeai, ai ruaosi be Mr. Nwambiwe ena ura Baibel dekenai ai habadaia totona ia ai vadivadi henia. Ia be hereva momokani ia abia dae bona gabeai Aba dekenai elda tauna ai ia lao. Lau danu momo lau durua, idia haida be Muslim taudia gabeai Iehova hesiai henia taudia ai idia lao. To ai moalelaia bada gauna be Nigeria taudia edia mauri dalana, edia kastom bona edia gado ai dibaia bona idia ai lalokau henidia.”

Lau dibaia gauna ma ta be inai: Tano ma ta ai emai hesiai gaukara ai moalelaia totona, namona be tadikaka taihu ai lalokau henia herevana edia mauri dalana be emai amo ia idau.

Nigeria ena Betele ai lagani momo lalonai hesiai gaukara ai karaia murinai, lagani 1987 ai ai idia abia hidi Caribbean ena motumotu ta St. Lucia dekenai misinari gaukara ai karaia totona. Unai asainmen ai moalelaia to ia be mai ena hekwakwanai idauidau danu. Hegeregere, Africa ai tau tamona be hahine momo ia adavaia, to St. Lucia ai tau bona hahine be idia headava lasi to idia noho hebou sibona. To, Dirava ena Hereva ese emai Baibel stiuden momo ia durua edia mauri ai senisi idia karaia totona.

Emai mauri lagani ia bada dainai, lagani 2005 ai Hakaua Oreana be mai lalokau ida hedikwota Brooklyn, New York, U.S.A. dekenai ai idia siaia. Oris dainai dina ta ta ai Iehova lau tanikiu henia. To lagani 2015 ai ia mase, unai lau laloa neganai lau lalomanoka. Ia lau lalokau henia bada badina ia be hahine namona. Emai headava laganidia 68 lau moalelaia. Ai itaia headava bona kongrigeisen lalonai moale ia noho totona, namona be ta ta ese kwara dagina ai matauraia, dika ai gwauatao heheni, manau karana ai hahedinaraia, bona lauma helaga ena huahua ai hahedinaraia.

Ai lalohisihisi o lalomanoka neganai, Iehova amo heduru ai tahua unai amo emai hesiai gaukara do ai hadikaia lasi. Dina ta ta ai emai lalohadai bona kara ai hamaoromaoroa neganai, ai itaia gau ibounai idia namo. To gabeai do ia vara gauna do ai moalelaia momokani!​—⁠Isa. 60:17; 2 Kor. 13:11.

Trinidad bona Tobago ai, Iehova ese egu tama sina bona ma haida edia gaukara ia hanamoa, hegeregere tomadiho momokani lalonai idia vareai taudia edia namba be 9,892. Aruba ai momo be egu kongrigeisen ginigunana idia durua. Hari unai motumotu ai kongrigeisen 14 idia noho. Nigeria dekenai pablisa taudia edia namba be ia bada daekau 381,398. Bona St. Lucia ena motumotu ai pablisa taudia 783 be Iehova ena Basileia idia harorolaia noho.

Hari egu mauri lagani be 90 bamona. Salamo 92:14 ese Iehova ena hesiai gaukara idia karaia buruka taudia be inai bamona ia herevalaia: “Idia buruka momokani neganai, idia ese huahua do idia atoa noho. Idia be nega ibounai idia goada noho, au raurau matamata idia atoa, bona idia be do idia kakoro diba lasi.” Lau moale badina egu mauri ibounai lalonai Iehova ena hesiai gaukara lau karaia. Egu tama sina amo lau abia treinini ese lau ia hagoadaia Iehova lau hesiai henia totona. Iehova ena lalokau dainai ‘Dirava ena Ruma lalonai, . . . lau tubu daekau namo herea momokani.’​—Sal. 92:13.