1. Iesu ese ena gorere amo ia hanamoa Samaria tauna be edena dala ai tanikiu karana ia hahedinaraia?

TATAU ten be idia ura ta ese idia ia durua. Badina idia be lepera gorerena idia abia, bona idia laloa edia gorere do ia namo diba lasi. To dina ta, daudau amo Hadibaia Tauna, Iesu idia itaia. Ma haida amo idia kamonai Iesu be taunimanima edia gorere idauidau ia hanamoa, unai dainai idia abia dae momokani ia ese edia gorere do ia hanamoa. Unai dainai idia boiboi, idia gwau: “Iesu, Hadibaia Tauna e, ai oi hebogahisi henia!” Bena Iesu ese unai tatau ten edia gorere ia hanamoa. Momokani, Iesu ese idia dekenai ia karaia karana dainai idia moale. To, idia ta, be ia moale sibona lasi, to Iesu dekenai ena tanikiu * herevana ia gwauraia. Unai Samaria tauna be unai kara ese ia hagoadaia dainai “mai gado badana ida Dirava ia hanamoa.”​—Luka 17:12-19.

2-3. (a) Dahaka dainai nega haida tanikiu karana ita hahedinaraia lasi? (b) Inai stadi ai dahaka do ita herevalaia?

² Samaria tauna bamona, ita ura ita dekenai kara namodia idia hahedinaraia taudia ita tanikiu henidia. To nega haida ita laloaboio dainai tanikiu herevana ita gwauraia lasi o karana ita hahedinaraia lasi.

³ Inai stadi ai, iseda kara bona hereva amo tanikiu karana ita hahedinaraia ena badina do ita herevalaia. Danu ita ese Baibel ai tanikiu karana idia hahedinaraia taudia bona unai kara idia hahedinaraia lasi taudia haida edia haheitalai bona tanikiu karana ita hahedinaraia daladia ta ta do ita herevalaia.

4-5. Dahaka dainai tanikiu karana ita hahedinaraia be namo?

⁴ Tanikiu hahedinaraia karana dekenai, Iehova be haheitalai namona. Unai kara ia hahedinaraia dalana ta be, ia idia hamoalea taudia ia hanamodia. (2 Sam. 22:21; Sal. 13:6; Mat. 10:40, 41) Bona Baibel ese ita ia hagoadaia, namona be ‘Dirava ita tohotohoa, badina ita be iena lalokau natudia.’ (Efe. 5:1) Unai dainai tanikiu karana ita hahedinaraia ena badina be, ita ura Iehova ena haheitalai ita tohotohoa.

⁵ Ma haida dekenai tanikiu karana ita hahedinaraia ena badina ma ta mani ita herevalaia. Tanikiu hereva gwauraia o hahedinaraia karana be aniani namona ta bamona​—ma haida ida ita aniani hebou neganai ita moale. Bema ma haida be iseda kara namodia dainai ita idia hanamoa ita moale diba. Unai hegeregerena, bema ma haida dekenai tanikiu karana ita hahedinaraia, do idia moale danu. Do idia mamia ita dekenai idia hahedinaraia kara namodia o ita dekenai idia henia gau namodia ita laloa bada. Unai ita karaia neganai, iseda hetura karana idia ida do ia goada.

6. Edena dala ai oi gwauraia tanikiu herevadia be golo amo idia karaia apolo ena hairai bamona?

⁶ Tanikiu herevana gwauraia o hahedinaraia be mai ena namo. Baibel ia gwau: “Ta ese nega maorona ai ia gwauraia herevana, be siliva disi lalonai idia noho golo apolo bamona.” (Aon. 25:11, NWT) Golo bona siliva amo idia karaia apolo ena hairai mani oi laloa! Danu unai apolo ena davana oi laloa. Bema ta ese oi dekenai unai bamona harihari gauna ta ia henia, emu hemami be edena bamona? Momokani, ma haida dekenai oi gwauraia tanikiu herevadia be unai apolo ena hairai bamona. Mani inai oi laloa: Golo amo idia karaia apolo be ia noho daudau diba. Unai hegeregerena, ma ta dekenai tanikiu herevana oi gwauraia neganai iena mauri ibounai lalonai unai do ia laloaboio lasi.

7. Salamo 27:4 ena hereva bamona, Davida bona salamo torea taudia haida be edena dala ai edia tanikiu karana idia hahedinaraia?

⁷ Dirava ena hesiai taudia gunadia momo be tanikiu karana idia hahedinaraia. Idia ta be Davida. (Salamo 27:4 duahia.) Ia ese tomadiho momokani ia laloa bada bona iena kara amo ena tanikiu karana ia hahedinaraia. Dubu haginia gaukarana durua totona, iena dava bada kohu bona moni ia hariharilaia. Asapa ena bese taudia be salamo eiava Dirava hanamoa anedia idia torea karana amo edia tanikiu karana idia hahedinaraia. Idia torea anena ta lalonai, Dirava idia tanikiu henia bona Iehova ena “hoa karadia” idia moalelaia dalana idia gwauraia hedinarai. (Sal. 75:1) Oibe, Davida bona Asapa ena bese taudia idia ura hahedinaraia Iehova amo idia abia hahenamo idauidau idia laloa bada. Salamo torea taudia bamona, edena dala ai emu tanikiu karana oi hahedinaraia diba?

8-9. Edena dala ai Paulo ese tanikiu karana ia hahedinaraia, bona unai ese dahaka namo ia havaraia?

⁸ Aposetolo Paulo ese iena tadikaka bona taihu ia herevalaia dalana amo iena tanikiu karana ia hahedinaraia. Iena tadikaka bona taihu dainai, iena guriguri lalonai Dirava ia tanikiu henia. Idia ia tore henia negadiai, idia ia hanamoa. Roma karoa 16 ena siri ginigunadia 15 lalonai ia ese iena Keristani tadikaka taihu ibounai 27 edia ladana ia gwauraia. Paulo ese ia hahedinaraia Prisikila bona Akwila be ‘ia dainai kahirakahira edia mauri idia haboioa’ bona ia gwau Fibi be “taunimanima momo ia durua,” Paulo ia durua danu. Paulo ese idia gaukara goada tadikaka taihu ia hanamoa.​—Roma 16:1-15.

⁹ Paulo ia laloparara iena tadikaka taihu be goevadae lasi, to Roma Keristani taudia dekenai ia torea revareva dokona ai, edia kara namodia sibona ia herevalaia. Momokani, Paulo ena revareva be kongrigeisen lalonai idia duahia neganai, tadikaka taihu be goada bada idia abia. Unai dainai idia bona Paulo huanai ia noho hetura karana be ia goada ia lao. Emu tadikaka taihu kongrigeisen ai be oi dekenai hereva namodia idia gwauraia o kara namodia idia hahedinaraia neganai, oi be hanaihanai idia oi tanikiu henia, a?

10. Iesu ese iena murinai idia raka taudia dekenai tanikiu karana ia hahedinaraia dalana amo dahaka ita dibaia?

¹⁰ Iesu be Asia Minor kongrigeisen taudia dekenai ena hadibaia hereva ia siaia neganai, idia ia hanamoa badina iena murinai idia raka taudia be gaukara namona idia karaia. Hegeregere, Tuatira kongrigeisen dekenai ena hereva ia hamatamaia, ia gwau: “Oiemu kara, emu lalokau, emu abidadama, emu hesiai gaukara, bona emu haheauka lau diba. Lau diba danu, hari oi karaia noho karadia ese guna oi karaia karadia idia hereaia.” (Apok. 2:19) Iesu ese edia gaukara idia habadaia dalana ia herevalaia sibona lasi, to edia kara namodia idia goadalaia dainai idia ia hanamoa. Herevana Iesu ese Tuatira dekenai idia noho taudia haida do ia sisiba henia, to hagoadaia herevadia amo iena hereva ia hamatamaia bona hadokoa. (Apok. 2:25-28) Mani inai oi laloa, Iesu be kongrigeisen ibounai edia kwarana. Ia totona ita karaia gaukara dainai ita ia tanikiu henia be gau badana lasi. To mai anina bada gauna be, tanikiu karana ita hahedinaraia be namo. Iesu ese elda taudia dekenai haheitalai namona ia hahedinaraia!

11. Heberu 12:16 ena hereva bamona, Esau ese helaga gaudia be edena bamona ia laloa?

¹¹ Madi, Baibel ese ia sivarailaia taudia haida be tanikiu karana idia hahedinaraia lasi. Hegeregere, Esau ena tama sina be Iehova idia lalokau henia bona matauraia, to ia be helaga gaudia ia laloa bada lasi. (Heberu 12:16 duahia.) Edena  dala ai unai kara ia hahedinaraia? Esau be iena tadina, Iakobo amo aniani ia abia totona iena vara guna ahuna ia hoihoilaia. (Gen. 25:30-34) Unai murinai, Esau be ia karaia abia hidi dainai ia lalohisihisi bada. To ia abia hahenamo ia laloa bada lasi, unai dainai iena vara guna ahuna dainai ia maumau be anina lasi.

12-13. Edena dala ai Israela taudia ese tanikiu karana idia hahedinaraia lasi, bona dahaka ia vara?

¹² Israela taudia be badina momo dainai edia tanikiu karana idia hahedinaraia diba. Iehova ese Aigupito ai Hisihisi Ten ia havaraia murinai, igui hesiai amo Israela taudia ia ruhaia. Bona Dirava ese idia ia gimaia totona Aigupito ena tuari oreana ibounai be Davara Kakakakana dekenai ia hamasedia. Israela taudia be idia moale dainai Iehova hanamoa totona kwalimu anena idia abia. To Dirava ese idia totona ia karaia karana idia laloa bada, a?

¹³ Israela taudia be hekwakwanai momo idia davaria neganai Iehova ese idia totona ia karaia gau namodia ibounai idia laloaboio. Idia be tanikiu karana idia hahedinaraia lasi. (Sal. 106:7) Edena dala ai? Edia maumau karana ese ia hahedinaraia idia be Iehova dekenai idia maumau. Baibel ia gwau: “Israela taudia ibounai ese Mose bona Arona dekenai idia maumau.” (Eso. 16:2, 8) Dirava be ia lalohisihisi bada badina iena taunimanima ese tanikiu karana idia hahedinaraia lasi. Bena gabeai ia peroveta Israela besena ibounai be tano gagaena dekenai do idia mase, to Iosua bona Kaleba be do idia mauri. (Num. 14:22-24; 26:65) Edena dala ai haheitalai dikadia do ita badinaia lasi bona haheitalai namodia ita badinaia diba? Mani ita herevalaia.

14-15. (a) Edena dala ai headava tau bona hahine be ta ta dekenai tanikiu karana idia hahedinaraia diba? (b) Edena dala ai tama sina ese edia natudia idia hadibaia tanikiu karana idia hahedinaraia totona?

¹⁴ Ruma bese ai. Ruma bese lalonai ta ta dekenai tanikiu karana idia hahedinaraia neganai, namo bada idia davaria. Headava tau bona hahine be ta ta dekenai tanikiu karana idia hahedinaraia neganai, edia hetura karana ia goada. Danu do ia auka lasi ta ta edia dika idia gwauatao totona. Tau be iena adavana ena kara bona hereva namodia ia hanamoa sibona lasi, to haida vairanai iena hahine ia hanamoa. (Aon. 31:10, 28) Bona aonega hahinena ese iena tau ena kara namodia dainai ia tanikiu henia.

¹⁵ Tama sina e, edena dala ai emui natudia umui hadibaia diba tanikiu karana idia  hahedinaraia totona? Namona be umui laloatao, emui natudia ese emui hereva bona kara do idia tohotohoa. Unai dainai idia ese umui totona gau ta idia karaia neganai idia umui tanikiu henia. Ma danu, idia umui hadibaia bema haida ese idia totona gau namodia idia karaia, idia dekenai tanikiu herevana idia gwauraia be namo. Emui natudia umui durua unai amo do idia laloparara, tanikiu karana be mai kudouna ibounai ida idia gwauraia be namo, bona unai ese namo bada ia havaraia diba. Hegeregere, hahine matamatana ta, Clary ia gwau: “Egu sinana ena mauri lagani be 32 neganai, egu tamana ese lau bona egu tadidia rua bona sinana ia rakatania. Egu mauri lagani be 32 neganai, egu sinana ese guna ai davaria hekwakwanai ia haheaukalaia dalana lau lalopararalaia. Ia hekwarahi lau bona egu tadina rua ia naria dainai ia lau tanikiu henia. Vanegai sibona lau ia hamaoroa, ia dekenai lau gwauraia herevadia ia laloa bada, bona nega momo unai ia laloatao bona unai ese ia durua bada.”

16. Ma haida dekenai tanikiu karana ita hahedinaraia ena haheitalai ta oi gwauraia.

¹⁶ Kongrigeisen ai. Iseda tadikaka taihu dekenai tanikiu karana ita gwauraia neganai, idia ita hagoadaia. Hegeregere, elda ta Jorge ena mauri lagani be 28, be gorere badana ta ia abia. Hua ta lalonai Keristani heboudia dekenai ia lao lasi. Hebou dekenai ia lao to ia hegeregere lasi hebou ai tok ia henia totona. Jorge ia gwau: “Egu gorere dainai lau hegeregere lasi kongrigeisen ai maduna idauidau lau huaia totona, unai dainai lau mamia lau be anina lasi. To hebou ta murinai, tadikaka ta be lau ia hamaoroa, ia gwau, ‘Lau ura oi lau tanikiu henia badina egu ruma bese totona haheitalai namona oi hahedinaraia. Lagani gunadia ai oi henia tok ese ai ia durua bada. Unai ese emai abidadama ia hagoadaia.’ Iena hereva ese egu kudouna ia hamarerea dainai lau tai. Unai ese lau ia hagoadaia bada.”

17. Kolose 3:15 ena hereva bamona, Iehova ena hariharibada karana dainai edena dala ai ia ita tanikiu henia diba?

¹⁷ Iseda hariharibada Diravana totona. Iehova be ena orea amo gau namodia momo be ita dekenai ia henia. Hegeregere, iseda hebou, magasin bona websait amo hadibaia herevadia ita abia. Reana hebou ai tok ta oi kamonai, eiava magasin ena atikol ta oi duahia o jw brodkastin oi itaia, bona oi sibona dekenai oi gwau, ‘Unai ese lau ia hagoadaia bada.’ Edena dala ai Iehova ita tanikiu henia diba? (Kolose 3:15 duahia.) Dala ta be, unai gau namodia momo be ita dekenai ia henia dainai iseda guriguri lalonai ia ita tanikiu henia.​—Iam. 1:17.

18. Edena dala ma haida ai iseda Kingdom Hall totona tanikiu karana ita hahedinaraia?

 ¹⁸ Iehova ita tanikiu henia dalana ma ta be, iseda tomadiho gabuna ita hagoevaia be namo. Hanaihanai iseda Kingdom Hall ita hagoevaia bona idia dika gaudia ita hanamoa. Bona namona be kongrigeisen ena paua kohudia idia gaukaralaia taudia ese unai kohu idia naria namonamo. Bema iseda Kingdom Hall ita naria namonamo, do idia noho daudau bona gau ibounai do idia noho namonamo. Unai amo moni momo do ia noho tanobada hegegemadai Kingdom Hall ma haida haginia bona hanamoa totona.

19. Sekit naria tauna bona iena adavana edia ekspiriens amo dahaka oi dibaia?

¹⁹ Ita totona idia gaukara goada taudia. Bema tanikiu karana ita hahedinaraia, ita gwauraia herevadia ese ta ia durua diba ia davaria hekwakwanai ia haheaukalaia totona. Sekit naria tauna ta bona ena adavana edia ekspiriens mani ita laloa. Paraka negana ai dina ta haroro gaukara amo idia giroa lou neganai, idia hesiku bada. Unai gabu be ia paraka momokani dainai, taihu be iena kouti ida ia mahuta. Daba ai, iena tau ia hamaoroa ia be hegeregere lasi sekit gaukara ia karaia totona. Unai dina ai, brens ofesi amo revareva ta idia abia bona unai revareva be taihu totona idia siaia. Unai revareva ai iena haroro gaukara bona haheauka karana dainai tadikaka ese ia idia hanamoa. Danu idia hahedinaraia wiki ta ta lalonai noho gabudia idauidau dekenai noho karana be mai ena hekwarahi. Iena tau ia gwau: “Unai revareva ese ia hagoadaia dainai sekit gaukara rakatania lalohadaina ia abia lou lasi. To, nega momo sekit gaukara rakatania lalohadaina lau abia neganai ia ese lau ia hagoadaia.” Unai tadikaka bona iena adavana be lagani 40 bamona lalonai sekit gaukara idia karaia.

20. Dina ta ta ai dahaka ita karaia be namo, bona dahaka dainai?

²⁰ Namona be dina ta ta ai iseda hereva bona kara amo tanikiu karana ita hahedinaraia. Mai kudouna ibounai ida ita gwauraia herevadia bona ita karaia karadia ese, tanikiu idia hahedinaraia lasi taudia huanai ta ia hagoadaia diba. Bona iseda tanikiu hereva gwauraia bona hahedinaraia karana ese iseda hetura karana ma haida ida ia hagoadaia bona unai hetura karana ia noho daudau diba. Bona mai anina bada gauna be unai ita karaia neganai ita be iseda hariharibada Tamana, Iehova ita tohotohoa.