1. Bema singul taihu ta ia ura headava turana ta ia tahua, dahaka henanadai ia henia diba?

KERISTANI taudia ibounai be gunalaia tauna hereadaena, Iesu Keriso, henunai idia noho. To Keristani hahine ta ia headava neganai, ia be goevadae lasi tauna ena kwara dagina henunai ia noho. Nega haida unai ia badinaia be auka. Bema taihu ta ia ura tadikaka ta ia adavaia, namona be sibona ia nanadaia: ‘Dahaka gaudia ese idia hamomokania inai tadikaka be ruma bese kwarana namona ai ia lao diba? Ia be Iehova hesiai henia karana ia laloa bada, a? Bema lasi, dahaka dainai lau laloa ai headava murinai do ia gaukara goada emai tomadiho karana ia hagoadaia totona?’ Danu taihu be sibona do ia nanadaia: ‘Headava lalonai dahaka kara namodia do lau hahedinaraia? Lau be haheauka bona harihari bada tauna, a? Egu hetura karana Iehova ida be ia goada, a?’ (Had. 4:9, 12) Singul ta ia do headava lasi lalonai disisen namodia ia karaia neganai, unai ese do ia durua bona ena headava lalonai do ia moale.

2. Inai atikol lalonai dahaka do ita herevalaia?

² Iseda Keristani headava taihu milioni be edia tau ena kwara dagina matauraia karana dekenai haheitalai namona idia hahedinaraia. Namona be idia ita hanamoa! Ita moale unai abidadama taihudia ida ita gaukara hebou! Inai atikol ai, henanadai toi do ita haerelaia: (1) Headava lalonai hahine be dahaka hekwakwanai idia davaria? (2) Dahaka dainai hahine be abia hidi ia karaia ena tau ena kwara dagina ia matauraia totona? (3) Headava tatau bona hahine ese Iesu, Abigaila, bona Iosepa ena adavana Maria amo dahaka idia dibaia diba?

3. Dahaka dainai headava taudia ibounai be hekwakwanai idia davaria?

³ Headava be Dirava amo ia mai harihari gauna hereadaena, to taunimanima be idia goevadae lasi. (1 Ioa. 1:8) Unai dainai, Baibel ese headava taudia ia hadibaia idia be “tauanina ai hisihisi do idia abia.” (1 Kor. 7:28) Mani hahine ese ia davaria hekwakwanai haida ita herevalaia.

4. Dahaka dainai hahine ia mamia tau ena kwarana henunai ia noho anina be tau ese ia hereaia?

⁴ Reana hahine be ena kastom dainai do ia mamia adavana ena kwarana henunai ia noho ena anina be ena tau ese ia hereaia. United States ai, taihu Marisol ia gwau: “Lau tubu daekau gabuna ai, hanaihanai hahine idia doria gau ibounai dekenai tatau ida do idia hegeregere. Lau diba Iehova ese tatau dekenai kwara dagina ia henia, bona hahine ese do idia badinaia, to tatau ese hahine do idia matauraia danu. Nega haida egu tau ena kwara dagina lau matauraia be auka, badina taunimanima idia gwau unai do lau karaia lasi.”

5. Tatau haida be dahaka lalohadai kereredia idia abia?

⁵ To nega haida, hahine ese ia adavaia tauna do ia laloa tau ese hahine idia hereaia. South America ai, taihu Ivon ia gwau: “Egu gabu ai, tatau idia aniani guna bena hahine be gabeai. Kekeni maragidia be idia nanadu bona mereki idia huria, to memero maragidia be edia sinadia eiava taihudia ese idia hesiai henidia, bona idia hamaoroa ‘idia be ruma ena king.’” Asia ai, taihu Yingling ia gwau: “China ai hereva ta idia gaukaralaia, bona ena anina be hahine idia aonega eiava diba idia abia be anina lasi. Edia maduna be ruma gaukara do idia karaia, bona edia adavana dekenai lalohadai ta do idia gwauraia lasi.” Bema tau ta be ena hahine ia lalokau henia lasi bona Baibel ena sisiba ia badinaia lasi, ena hahine ena mauri be do ia auka. Unai tau be Iesu ia tohotohoa lasi bona Iehova be ia dekenai ia moale lasi.​—Efe. 5:28, 29; 1 Pet. 3:7.

6. Headava hahine be dahaka idia karaia diba edia hetura karana Iehova ida idia hagoadaia totona?

⁶ Atikol 5 ai ita herevalaia bamona, Iehova ia gwau Keristani tatau ese tomadiho, hemami, bona tauanina dalanai edia ruma bese do idia naria. (1 Tim. 5:8) Keristani hahine be idia bisi, to namona be nega idia atoa Baibel idia stadilaia, idia laloa dobu bona mai lalona ibounai ida Iehova idia guriguri henia. Nega haida unai be auka. Momokani, headava hahine be idia bisi dainai idia mamia edia goada ia ore eiava nega be lasi, to gau badana be nega do idia atoa unai gaudia idia karaia totona. Dahaka dainai? Badina Iehova ia ura ita ta ta be ia do ita tura henia bona unai hetura karana do ita hagoadaia noho.​—Kara 17:27.

7. Dahaka ese hahine do ia durua ena tau ia matauraia bona kamonai henia totona?

⁷ Ita laloparara hahine be do ia gaukara goada ena goevadae lasi tau ena kwara dagina ia matauraia totona. To bema Baibel ena hereva kwara dagina dekenai ia lalopararalaia bona ia abia dae, do ia auka lasi Iehova ese ia henia maduna ia huaia totona.

8. Efeso 5:22-24 ena hereva bamona, dahaka dainai Keristani hahine be ena tau ena kwara dagina henunai ia noho?

⁸ Keristani hahine be iena tau ena kwara dagina henunai do ia noho, badina Iehova ese ia hamaoroa unai do ia karaia. (Efeso 5:22-24 duahia.) Hahine be iena guba Tamana ia abidadama henia, badina ia diba  Dirava be lalokau dainai ia hamaoroa unai bamona do ia karaia bona unai ese namo do ia havaraia.​—Deut. 6:24; 1 Ioa. 5:3.

9. Bema taihu be ena tau ena kwara dagina ia matauraia dahaka do ia vara?

⁹ Taunimanima idia laloa hahine be tau henunai idia noho karana ese hahine ia hadikaia. Unai bamona lalohadai dainai hahine momo be Iehova ese ia atoa taravatu idia dadaraia. Iehova be iena natuna hahine ia lalokau henidia, bona idia do ia hadikaia oda herevana ta do ia atoa lasi. Taihu ta ese Iehova ia henia maduna ia hagugurua neganai ena ruma bese lalonai maino do ia havaraia. (Sal. 119:165) Iena adavana, ia sibona, bona natudia be namo do idia davaria.

10. Carol ena hereva amo dahaka ita dibaia?

¹⁰ Hahine ese ena goevadae lasi tau ena kwara dagina ia matauraia dalana amo ia hamomokania, Iehova ia lalokau henia bona ia matauraia. South America ai, taihu Carol ia gwau: “Lau diba egu tau be kerere do ia karaia. Bona lau diba ia kerere neganai, lau kara henia dalana ese do ia hahedinaraia egu hetura karana Iehova ida lau laloa bada eiava lasi. Unai dainai, lau hekwarahi egu tau ena kwarana henunai lau noho totona, badina lau ura egu guba Tamana lau hamoalea.”

11. Dahaka ese Aneese ia durua dika ia gwauatao totona, bona ena hereva amo dahaka ita dibaia?

¹¹ Bema tau be hahine ena hemami bona lalohekwarahi gaudia ia laloa bada lasi, hahine ese tau ena kwara dagina ia matauraia be auka. Mani headava taihu ta ladana Aneese ena kara ita laloa. Ia gwau: “Lau hekwarahi lau badu lasi totona. Lau laloparara ita ibounai be kerere ita karaia. Egu tahua gauna be kerere do lau gwauatao, Iehova ia karaia bamona. Dika gwauatao karana lau hahedinaraia neganai, lalomaino lau abia.” (Sal. 86:5) Dika gwauatao karana ia manadalaia hahinena ese ena tau ena kwara dagina do ia matauraia diba.

12. Baibel lalonai daidia edia haheitalai idia noho?

¹² Haida idia laloa ma ta ena kwara dagina henunai ia noho tauna be manoka tauna. To unai be momokani lasi. Baibel lalonai ma haida edia kwara dagina henunai idia noho goada taudia momo edia sivarai  idia torea. Mani Iesu, Abigaila bona Maria edia sivarai ese ita idia durua dalana ita itaia.

13. Dahaka dainai Iesu be Iehova ena kwara dagina ia matauraia? Herevalaia.

¹³ Iesu be Iehova ena kwara dagina ia matauraia, to ita gwau lasi ia be aonega o diba lasi tauna. Auka lasi dalanai taunimanima ia hadibaia karana ese ia hahedinaraia ia be aonega bada tauna. (Ioa. 7:45, 46) Iehova ese Iesu ena diba ia matauraia bada. Unai dainai guba bona tanobada ia karaia neganai, Iesu ia abia hidi ia ida do ia gaukara hebou. (Aon. 8:30; Heb. 1:2-4) Bona Iesu ia toreisi lou murinai, Iehova ese ‘siahu ia henia, gau ibounai guba ai bona tanobada ai ia naria totona.’ (Mat. 28:18) Ena be Iesu be mai ena aonega, to heduru totona Iehova ia noia. Dahaka dainai? Badina ena Tamana ia lalokau henia.​—Ioa. 14:31.

14. Keristani tatau be Iehova ena haheitalai amo dahaka idia dibaia (a) hahine ia kara henia dalana? (b) Aonega Herevadia 31 ena hereva amo?

¹⁴ Headava tatau idia dibaia gauna. Namo lasi ita gwau Iehova ese hahine be tau ena kwarana henunai ia atoa, badina ia laloa tau ese hahine idia hereaia. Unai be ena lalohadai lasi, badina Iehova ese hahine bona tatau ia abia hidi Iesu ida do idia lohia totona. (Gal. 3:26-29) Iehova ia hahedinaraia ena Natuna ia abidadama henia badina ia dekenai siahu ia henia. Unai hegeregerena, mai ena aonega headava tauna ese iena hahine dekenai maduna haida do ia henia. Baibel ese aonega hahinena ia karaia diba gaudia ia herevalaia. Hegeregere, ruma gaukara ia naria, tano ia hoia bena ma haida dekenai ia hoihoilaia, bona bisinesi ia karaia. (Aonega Herevadia 31:15, 16, 18 duahia.) Ia be hesiai hahinena lasi bona uduna ia koua sibona lasi. To, ena tau ese ia abidadama henia bona ena lalohadai ia kamonai. (Aonega Herevadia 31:11, 26, 27 duahia.) Tau ese ena hahine be unai bamona ia kara henia neganai, hahine be mai moale ida ena kwarana henunai do ia noho.

15. Hahine be Iesu ena haheitalai amo dahaka idia dibaia?

¹⁵ Headava hahine idia dibaia gauna. Ena be Iesu ese gau namodia momo ia karaia, to ia laloa lasi Iehova ena kwara dagina henunai ia noho dainai ia be anina lasi. (1 Kor. 15:28; Fili. 2:5, 6) Unai hegeregerena, Iesu ena haheitalai ia tohotohoa aonega hahinena do ia laloa lasi ena tau ena kwara dagina henunai ia noho dainai ia be anina lasi. Iena tau ia durua badina ia lalokau henia, to unai ia karaia ena badina badana be Iehova ia lalokau henia bona matauraia.

16. 1 Samuela 25:3, 23-28 ai, Abigaila be dahaka hekwakwanai ia davaria? (Rau 1 ena laulau itaia.)

¹⁶ Abigaila ena adavana ena ladana be Nabala. Ia be mataganigani bona hekokoroku tauna bona tanikiu karana ia diba lasi. Unai dainai, bema Abigaila ia ura, ena headava ia hadokoa diba. Bona Davida mai ena tatau do ia koua lasi ena adavana idia alaia totona. To, aonega ia gaukaralaia ena adavana bona ruma bese badana ia gimaia totona. Mani oi laloa, Abigaila be mai gari lasi ida tuari taudia 400 vairanai mai hemataurai ida Davida ia hereva henia. Danu mai ura ida ena adavana ena kerere dainai ia sori. (1 Samuela 25:3, 23-28 duahia.) Davida ia laloparara Iehova ese Abigaila ia gaukaralaia bona sisiba ia henia unai kerere badana ia karaia lasi totona.

17. Headava tatau be Davida bona Abigaila edia sivarai amo dahaka idia dibaia?

¹⁷ Headava tatau idia dibaia gauna. Abigaila be laloa maoromaoro karana ia  hahedinaraia. Davida be mai aonega ida ena sisiba ia kamonai, bona kerere lasi taudia ia alaia lasi. Unai hegeregerena, mai ena aonega headava tau be disisen badadia ia ura karaia neganai, ena hahine ena lalohadai do ia laloa namonamo guna. Reana hahine ena lalohadai ese tau do ia durua disisen maorona ia karaia totona.

18. Headava hahine be Abigaila ena haheitalai amo dahaka idia dibaia?

¹⁸ Headava hahine idia dibaia gauna. Iehova ia lalokau henia bona matauraia hahinena ese ena ruma bese do ia hanamoa, ena be tau ese Iehova ia hesiai henia lasi eiava Iena hakaua herevadia ia badinaia lasi. Dala do ia tahua lasi ena headava ia hadokoa totona. To, hahine ese tau ia matauraia bona ena kwara dagina henunai ia noho karana amo ena tau do ia durua Iehova ia dibaia totona. (1 Pet. 3:1, 2) Ena be tau be hereva momokani lalonai ia vareai lasi, to Iehova be kwara dagina ia matauraia hahinena ia laloa bada.

19. Edena bamona negadiai hahine ese ena tau do ia badinaia lasi?

¹⁹ To, bema Keristani hahine ta be ena tau ese ia hamaoroa Baibel ena taravatu eiava hakaua herevadia do ia utua, do ia kamonai henia lasi. Hegeregere bema ia gwau, ia koikoi, ia henaohenao, eiava Iehova ese ia inai henia karana ta ia karaia. Keristani taudia ibounai, headava taihudia danu, ese Iehova Dirava idia badinaia be namo. Bema taihu ta be ena adavana ese ia hamaoroa Baibel ena taravatu do ia utua, taihu be mai manau bona gari lasi ida ena tau do ia hamaoroa unai do ia karaia lasi.​—Kara 5:29.

20. Edena bamona ita diba Maria be Iehova ia tura henia namonamo?

²⁰ Maria be Iehova ia tura henia namonamo. Ia be Toretore Helagadia ia diba namonamo. Maria be Ioane Bapatiso ena sinana Elisabeta ida ia herevahereva lalonai, ia ese nega 20 bamona Heberu Toretoredia ia gwauraia. (Luka 1:46-55) Mani inai oi laloa: Ena be Maria be Iosepa ida ia maoheni vadaeni, to Iehova ena aneru be Iosepa dekenai ia hedinarai guna lasi. To, aneru be Maria ia hereva henia guna, bona ia hamaoroa ia ese Dirava ena Natuna do ia havaraia. (Luka 1:26-33) Iehova be Maria  ia diba namonamo bona ia abia dae ena Natuna do ia lalokau henia bona ia naria. Bona Iesu ia mase bona guba dekenai ia daekau murinai Maria be Iehova ia do tura henia noho.​—Kara 1:14.

21. Maria ena sivarai amo headava tatau ese dahaka idia dibaia?

²¹ Headava tatau idia dibaia gauna. Mai ena aonega tau ia moale bema ena hahine be Baibel ia diba namonamo. Iena hahine dekenai ia badu lasi eiava ia laloa lasi hahine ia ura ruma bese kwarana ai lao. To, ia laloparara Baibel bona ena hakaua herevadia ia diba namonamo taihu be ena ruma bese ia durua diba. Ena be hahine be sikuli badana ia lao bona tau be lasi, to ruma bese tomadiho bona ena famili ia durua Iehova idia tomadiho henia be tau ena maduna.​—Efe. 6:4.

22. Headava hahine be Maria amo dahaka idia dibaia?

²² Headava hahine idia dibaia gauna. Namona be hahine ia diba ena tau ese ena ruma bese ia hakaua Iehova idia tomadiho henia totona, to hahine be mai ena maduna sibona ena abidadama ia hagoadaia totona. (Gal. 6:5) Danu, namona be hahine ese nega do ia atoa sibona ena stadi ia karaia bona ia laloa dobu totona. Unai ese do ia durua Iehova ia lalokau bona matauraia noho, bona ena tau ena kwara dagina henunai ia noho dainai do ia moale.

23. Edena dala ai kwara dagina idia matauraia hahine ese idia sibona, edia famili bona kongrigeisen idia durua diba?

²³ Edia tau ena kwara dagina idia dadaraia hahine be idia moale lasi. To, Iehova idia lalokau henia hahine be edia tau ena kwara dagina henunai idia noho bona idia moale. Idia be haheitalai namona memero bona kekeni matamatadia totona. Bona edia ruma bese bona kongrigeisen lalonai maino idia havaraia. (Tito 2:3-5) Hari, Iehova idia hesiai henia taudia momo be hahine. (Sal. 68:11) Ita ibounai, tau eiava hahine, be kongrigeisen lalonai gaukara ita karaia diba. Stadi atikol 7 ai ita ta ta ese unai ita karaia diba daladia do ita herevalaia.