Egu tama sina be idia do headava lasi neganai, lagani 1920 lalodiai hereva momokani idia dibaia. Lau be lagani 1939 ai lau vara. Lau do maragi neganai, England dekenai ai noho bona egu tama sina ida Tiokratik Haroro Sikuli dekenai ai lao. Nega ginigunana tok lau henia negana lau laloatao, lau be maua latanai lau gini bona tok lau henia. Unai negai egu mauri lagani be siks.

Haroro gaukara totona egu tamana ese kadi ta dekenai lau totona haroro herevana ia torea. Egu mauri lagani be 8 neganai, nega ginigunana sibona lau haroro. Ruma tauna be egu haroro kadi ia duahia bona maoromaoro “Let God Be True” bukana ia abia neganai, lau moale bona lau heau lao egu tamana lau hamaoroa! Haroro gaukara bona kongrigeisen heboudia lau moalelaia bona egu ura idia habadaia Iehova lau hesiai henia totona.

Egu tamana be lau totona Gima Kohorona sabskripsen ia hoia murinai, egu ura Baibel ena hereva dekenai ia bada ia lao. Post ofesi amo Gima Kohorona ta ta lau abia neganai, maoromaoro lau duahia. Egu abidadama Iehova dekenai ia goada ia lao bona Ia dekenai egu mauri lau gwauhamatalaia.

Lagani 1950 ai New York dekenai lau bona egu tama sina be delegate bamona Theocracy’s Increase Hebouhebou dekenai ai lao. Thursday, August 3 ai, hebouhebou ena sinado be “Missionary Day.” Unai dina dekenai, Tadikaka Carey Barber ese bapatiso ena tok ia henia, gabeai ia be Hakaua Oreana ena memba ta ai ia lao. Iena tok murinai, bapatiso taudia dekenai henanadai  rua ia henia. Lau gini bona lau haere, “Oibe!” Egu mauri lagani be 11 to lau laloparara unai be abia hidi badana. To, ranu lalonai lau diho totona lau gari, badina nahu lau diba lasi. Egu vavana be lau ia bamoa bona ia gwau gau ibounai be do ia namo. Oibe, egu aena be pool ena foloa ia moia lasi. Lau be tadikaka ta amo idia henia lao tadikaka ma ta dekenai, bona ta ese lau ia bapatisoa, bona ma ta ese ranu amo lau ai abia isi. Unai dina badana amo ema bona hari, Iehova be lau dekenai dala maorona ia hadibaia noho.

Sikuli lau rakatania neganai lau ura do lau painia, to egu tisa be lau ia doria sikuli badana lau lao totona. Edia ura lau badinaia bona iunivesiti lau lao. To, lau laloparara bema lau sikuli noho, hereva momokani lalonai do lau goada lasi, unai dainai abia hidi lau karaia sikuli do lau rakatania. Iehova dekenai lau gurigurilaia bona egu tisa taudia dekenai revareva ta lau torea, bona sikuli do lau rakatania ena badina lau hahedinaraia. Iehova lau tabekau henia bona maoromaoro painia gaukaralaia lau karaia.

July 1957 ai, Wellingborough ai ful-taim hesiai gaukara lau hamatamaia. London Betele ena tadikaka lau noidia do lau bamoa painia tadikaka ta do idia abia hidi. Vadaeni, Tadikaka Bert Vaisey be egu tisa ai ia lao, bona ena haroro goadagoada karana ese lau ia durua haroro sediual namona lau karaia totona. Kongrigeisen lalonai idia noho taudia be lau, Tadikaka Vaisey bona lo taihudia siks. Kongrigeisen hebou totona lau hegaegae bona tok lau henia karana ese egu abidadama Iehova dekenai ia hagoadaia, bona haere karana amo egu abidadama lau gwauraia hedinarai.

Ami lalonai lau vareai lasi dainai, dibura ruma ai lau noho murinai, Barbara, spesel painia taihu ta lau hedavari henia. Lagani 1959 ai headava bona mai ura ida ai idia siaia gabudia dekenai ai lao. Gabu ginigunana be, Lancashire, unai be England ena notwest gabuna. Bena January, 1961 ai, London ena Betele dekenai Basileia Evanelia sikuli totona lau idia boiria. Sikuli ena dokonai, lau hoa badina sekit gaukara totona lau idia abia hidi. Birmingham ai, sekit naria tauna ta amo wiki rua treinia lau abia noho lalonai Barbara ia mai, bena gabeai emai asainmen Lancashire bona Cheshire dekenai ai giroa.

August 1962 ai, emai holidei lalonai, brens ofesi amo revareva ta ai abia. Revareva lalonai be Gilead Sikuli ena aplikeisen idia noho! Ai gurigurilaia murinai, lau bona Barbara be aplikeisen ai hahonua haraga bena brens ofesi dekenai ai siaia. Hua faiv murinai, Gilead Sikuli klas namba 38 totona New York dekenai ai lao. Hua 10 lalonai unai sikuli ai karaia.

Gilead Sikuli ai Baibel ena hereva, Iehova ena orea bona iseda tanobada hegegemadai  tadikaka oreana edia sivarai idia hadibaia. Ai be do matamata, to stiuden ma haida amo gau momo ai dibaia. Lau davaria hahenamo ta be dina ta ta ai emai tisa ta, Tadikaka Fred Rusk ida lau gaukara hebou. Ai ia hadibaia hereva namona ta be, bema oi ura ta oi sisiba henia, namona be mai kara maoromaoro ida Baibel amo oi hereva henia. Emai sikuli lalonai tok idia henia tadikaka haida be Nathan Knorr, Frederick Franz, bona Karl Klein. Bona Tadikaka A.  H.  Macmillan ena manau karana amo gau momo ai dibaia. Iena tok lalonai 1914 ia lao 1919 ai Iehova ese ena taunimanima be hahetoho idia davaria neganai idia ia gimaia karana ia herevalaia.

Sikuli ena dokonai, Tadikaka Knorr ese lau bona Barbara ia hamaoroa ai be Africa, Burundi dekenai do idia siaia. Ai ura Burundi ena pablisa ena namba ai diba, unai dainai karaharaga Betele ena laiberi dekenai Yearbook ai sekedia. To ai hoa, badina Burundi ena pablisa namba ta ai davaria lasi! Oibe, Africa dekenai idia do haroro lasi teritori matamata gabuna do ai lao, bona unai gabu ai diba lasi. Ai lalohekwarahi bada! To, ai guriguri bona lalomaino ai abia.

Emai asainmen matamatana ai, gau ibounai be idau, hegeregere weda, kastom, bona gado. Danu, French gado do ai dibaia bona noho gabuna ta do ai tahua. Ai ginidae bena dina rua murinai, Harry Arnott, emai Gilead klas turana be ai ia vadivadi henia bena ena asainmen Zambia dekenai ia lao. Ia ese ai durua bona apatmen ta ai davaria, unai apatmen be emai misinari ruma ginigunana ai ia lao. Daudau lasi murinai, gavamani taudia ese ai idia inai henia matamaia, badina Iehova ena Witnes taudia edia gaukara idia lalopararalaia lasi. Emai asainmen ai moalelaia matamaia lalonai, gavamani taudia ese ai idia hamaoroa, moni gaukara ena gwaumaoro pepana ai abia lasi dainai, do ai noho lasi. Mai hebogahisi ida Burundi ai rakatania bona Uganda dekenai ai lao.

Ai lalohekwarahi badina ai be visa lasi Uganda ai vareai totona, to Iehova dekenai ai tabekau. Unuseniai, Canada painia tadikaka ta ese emai hekwakwanai be gavamani ofesa ta dekenai ia gwauraia. Unai  ofesa ia gwau, hua haida ai noho diba ela bona gwaumaoro pepana ai abia. Unai ese ia hamomokania Iehova be ai ia durua noho.

Inai asainmen matamatana be Burundi amo ia idau. Unuseniai haroro gaukara idia hamatamaia vadaeni, to Witnes taudia ibounai be 28 sibona. Teritori ai English gado idia hereva taudia momo ai davaria. To ai laloparara, kamonai taudia idia goada idia lao totona, edia gado korikorina ta ai dibaia be namo. Kampala dekenai ai haroro matamaia, bona unuseni idia be Luganda gado idia gaukaralaia momo, unai dainai unai gado ai dibaia. Lagani haida murinai unai gado ai diba namonamo, bona unai ese emai haroro gaukara ia durua bada! Bena emai Baibel stadi taudia do idia goada dalana ai lalopararalaia. Danu, idia itaia ai be idia ai laloa bada neganai, edia hemami idia gwauraia hedinarai.

Taunimanima ai durua bona hereva momokani idia dibaia neganai ai moale bada. Ai abia hahenamo ta be ai idia noia, Uganda ai sekit gaukara ai karaia totona. Kenya brens ese ai idia hadibaia, unai tano ena gabu ibounai dekenai painia taudia idia haroro diba gabudia do ai sekea. Nega momo, Iehova ena Witnes taudia idia diba lasi taudia ese mai moale ida ai idia abia dae bona emai aniani idia hegaegaelaia.

Gabeai, loaloa idauna ta lau karaia. Kampala amo trein lau guia bona dina rua murinai Kenya tanona dekenai lau ginidae. Unuseniai, Mombasa ena wofu gabuna amo bouti lau guia bena Seychelles tanona dekenai lau lao. Unai tano be India Ocean dekenai, bona unuseniai motumotu ta ena grup lau vadivadi. Gabeai, 1965 ia lao 1972 lalonai, Seychelles lau vadivadi negadiai Barbara ese hanaihanai lau ia bamoa. Unai nega ai, pablisa be rua sibona, to gabeai grup ta idia lao bena kongrigeisen idia haginia. Loaloa ma haida ai, Eritrea, Ethiopia, bona Sudan tadikaka lau vadivadi henidia danu.

Uganda ai tuari oreana ta ese gavamani edia gaukara ia biagua. Unai nega ai idia vara dagedage karadia ese lau idia hagoadaia inai oda herevana lau badinaia totona: “Kaisara ena gaudia be Kaisara dekenai umui henia.” (Mar. 12:17) Nega ta, idau tano taudia ibounai idia hamaoroa edia gabu kahirakahira ia noho pulisi steiseni dekenai edia ladana do idia rejista. Karaharaga unai ai karaia. Dina haida murinai, Kampala ai lau bona misinari ma ta be motuka amo ai heau noho lalonai, pulisi ese ai idia stopua. Ai gari dikadika! Idia gwau ai be spai taudia bona pulisi steiseni dekenai ai idia abia lao. Ai hamaorodia ai be manau taudia bona misinari gaukara ai karaia bona emai ladana ai rejista vadaeni, to idia kamonai lasi. Bena misinari ruma badinai ia noho pulisi steiseni dekenai ai idia abia lao. Emai gari ia boio badina emai ladana ia rejista ofesa tauna ese ai ia itaia, bona pulisi tauna ia hamaoroa ai do ia ruhaia!

Unai nega lalodiai, nega momo ami taudia be idia kekero bona dala idia koua dainai ai gari. To, hanaihanai ai guriguri bona ai idia dogoatao lasi neganai lalomaino ai mamia. To madi, lagani 1973 ai misinari taudia  ibounai idia oda henia Uganda do idia rakatania.

Ai be asainmen ma ta ai abia, hari unai be West Africa ena tano ma ta Côte d’Ivoire ai lao. Unai be senisi badana ta. Namona be kastom ma ta ai dibaia, French gado do ai hereva bona tano idauidau amo idia mai misinari ida ai gaukara! To, Iehova ena hakaua dalana ai itaia lou, badina kudou maoro taudia be karaharaga sivarai namona idia abia dae. Iehova ai abidadama henia dainai dala namona dekenai ai ia hakaua ai itaia.

Bena daudau lasi Barbara be kensa gorere ia abia. Iena muramura abia totona nega momo Europe dekenai ai lao, bona lagani 1983 ai, ai laloparara emai asainmen Africa dekenai do ai rakatania. Ai ruaosi ai lalohisihisi bada!

London ena Betele dekenai ai noho lalonai, Barbara ena gorere ia bada bona ia mase. Betele famili ese lau idia hagoadaia bada. Headava tau bona hahine ta ese lau idia durua, Iehova lau tabekau henia noho totona. Gabeai Betele ai dina haida ia gaukara taihu ta lau hedavari. Guna ia be spesel painia ta bona ena lalokau Iehova totona ese ia hamomokania ia be taihu goadana. Lagani 1989 ai lau bona Ann ai headava, unai nega amo ai ruaosi be London Betele dekenai ai gaukara.

Lagani 1995 ia lao 2018 ai, hedikwota ese idia siaia tadikaka ena gaukara lau karaia (guna idia gwauraia zoun naria tadikaka), bona tano 60 mai kahana lau vadivadi. Unai vadivadi ta ta lalonai, lau itaia herevana Iehova ena hesiai taudia be dahaka hekwakwanai idia davaria to idia ia hanamoa.

Lagani 2017 ai, emai vadivadi ta ai Africa dekenai lau giroa lou. Lau moale badina nega ginigunana Ann ida Burundi dekenai ai lao, bona ai hoa badina momo be hereva momokani lalonai idia vareai! Guna lagani 1964 ai, ruma-ta-ruma-ta haroro gaukara lau karaia gabuna ai, hari Betele ruma hairaina ta ia gini, bona pablisa taudia 15,500 mai kahana ia naria.

Lagani 2018 lalonai do lau vadivadi tanodia ena lista lau abia neganai lau moale bada. Lista ai ia noho tanona ta be Côte d’Ivoire. Abidjan dekenai ai ginidae neganai, unai be egu hanua dekenai lau giroa lou bamona. Betele ai idia noho tadikaka edia telefon namba lau sekea neganai, lau itaia emai daiutu badinai ia noho tadikaka ena ladana be Sossou. Lau laloatao Abidjan dekenai lau noho neganai, ia be siti ena ovasia gaukara ia karaia. To lasi, unai be tadikaka Sossou ma ta​—iena natuna!

Iehova ese ena gwauhamata ia badinaia. Hekwakwanai idauidau lalonai lau itaia Iehova dekenai ita tabekau neganai, iseda raka dalana ia hanamoa. Hari mai ura bada ida tanobada matamatana ai, do ia doko diba lasi bona ia diari ia lao mauri dala namona ai naria noho.​—Aon. 4:18.