1. Dahaka dainai Iehova ena ruma bese be lalotamona ai idia noho?

ITA MOALE badina Iehova ena ruma bese lalonai ita noho. Dahaka dainai ita be lalotamona bona maino ai ita noho? Badina ita ibounai ita hekwarahi Iehova ese ia atoa kwara dagina ita matauraia totona. Momokani, kwara dagina ena anina ita lalopararalaia neganai, iseda lalotamona karana do ita hagoadaia.

2. Edena henanadai edia haere do ita tahua?

² Inai stadi lalonai, ita ese kongrigeisen lalonai kwara dagina ena maduna do ita herevalaia. Danu, inai henanadai edia haere do ita tahua: Taihu edia maduna be dahaka? Tadikaka ibounai be taihu ibounai edia kwarana, a? Elda taudia edia maduna tadikaka taihu dekenai bona ruma bese kwarana ena maduna be hegeregere, a? Mani taihu ita kara henia daladia ita herevalaia guna.

3. Dahaka ese ita do ia durua iseda taihu edia gaukara ita laloa bada totona?

³ Iseda taihu ita lalodia bada badina idia gaukara goada edia ruma bese idia naria, sivarai namona idia harorolaia, bona kongrigeisen idia durua. Iehova bona Iesu edia lalohadai hahine dekenai ita dibaia neganai, iseda taihu do ita lalodia bada. Danu, aposetolo Paulo ese hahine ia kara henidia dalana ita dibaia ese ita do ia durua.

4. Edena dala ai Baibel ia hahedinaraia Iehova be hahine bona tatau ia lalodia bada?

 ⁴ Baibel ia hahedinaraia Iehova be hahine bona tatau ia lalodia bada. Ia hahedinaraia aposetolo edia negai, Iehova ese lauma helaga be hahine bona tatau dekenai ia henia hoa karadia, hegeregere gado idauidau ai idia hereva totona. (Kara 2:1-4, 15-18) Unai hahine bona tatau be lauma helaga amo ia horodia bona Keriso ida guba ai do idia lohia. (Gal. 3:26-29) Hahine bona tatau danu be tanobada ai mauri hanaihanai do idia abia. (Apok. 7:9, 10, 13-15) Bona hahine bona tatau dekenai maduna ia henia sivarai namona do idia harorolaia bona hadibaia. (Mat. 28:19, 20) Oibe, Kara bukana ese taihu ta ladana Prisikila ena gaukara ia sivarailaia. Ia be ena adavana Akwila ida ia gaukara hebou, diba bada tauna Apolo dekenai hereva momokani idia hadibaia totona.​—Kara 18:24-26.

5. Luka 10:38, 39, 42 hegeregerena, Iesu ese hahine be edena bamona ia kara henidia?

⁵ Iesu ese hahine ia matauraia. Ia be Farisea taudia edia kastom ia badinaia lasi, idia ese hahine idia laloa maragi, idia dekenai Baibel ena hereva idia hadibaia lasi bona taunimanima vairadiai idia hereva henidia lasi. To, Iesu ese hahine bona tatau dekenai mai anina bada hereva momokani ia gwauraia hedinarai. * (Luka 10:38, 39, 42 duahia.) Bona haroro gaukara ai Iesu ese hahine ia abidia dae ia idia bamoa totona. (Luka 8:1-3) Bona Iesu ese hahine ia abia hidi, iena toreisi lou sivaraina be aposetolo taudia dekenai idia gwauraia totona.​—Ioa. 20:16-18.

6. Edena dala ai aposetolo Paulo ia hahedinaraia hahine ia matauraidia?

⁶ Aposetolo Paulo ese Timoteo ia hadibaia hahine ia matauraidia. Ia hamaoroa “hahine badadia oi hereva henidia, oiemu sinana bamona” bona “kekeni matamatadia oi hereva henia, oiemu taihudia bamona.” (1 Tim. 5:1, 2) Paulo ese Timoteo ia durua lo Keristani tauna ai ia lao totona, to ia diba Timoteo be ena sinana bona tubuna hahine ese “Toretore Helagadia” idia hadibaia guna. (2 Tim. 1:5; 3:14, 15) Paulo ese Roma taudia ia tore henia neganai, ena revareva lalonai taihu edia ladana ia torea bona ia hanamodia. Paulo be unai taihu edia kara namodia ia laloa bona edia haroro gaukara namona ia hanamoa.​—Roma 16:1-4, 6, 12; Fili. 4:3.

7. Edena henanadai ita lalodia be namo?

⁷ Paragraf ginigunadia ese idia hahedinaraia, Baibel ia gwau lasi tadikaka be taihu idia hereaia. Iseda taihu be lalokau bona hariharibada karana idia hahedinaraia, bona kongrigeisen lalonai maino bona lalotamona ia noho totona elda taudia ese taihu edia heduru idia laloa bada. To inai henanadai ita laloa be namo. Hegeregere: Dahaka dainai Iehova ia ura taihu ese nega haida ena kwarana do ia koua? Tadikaka sibona ese elda bona hesiai tauna ena maduna idia abia dainai, anina be kongrigeisen lalonai tadikaka ibounai be taihu ibounai edia kwarana, a?

8. Efeso 5:23 hegeregerena, tadikaka ibounai be taihu ibounai edia kwarana, a? Herevalaia.

⁸ Haere be lasi! Tadikaka ta be kongrigeisen lalonai taihu ibounai edia kwarana  lasi, to Keriso be edia kwarana. (Efeso 5:23 duahia.) Ruma bese lalonai tau be hahine ena kwarana. Ia bapatiso vadaeni natuna mero be ena sinana ena kwarana lasi. (Efe. 6:1, 2) Bona kongrigeisen lalonai, elda taudia edia siahu tadikaka taihu dekenai be mai ena hetoana. (1 Tes. 5:12; Heb. 13:17) Sibodia idia noho singul taihu ese edia tama sina bona elda taudia idia matauraia noho be namo. To, kongrigeisen lalonai idia noho tadikaka hegeregerena, idia edia kwarana be tamona, Iesu unai.

9. Dahaka dainai nega haida taihu ese ena kwarana ia koua be namo?

⁹ Iehova ia ura kongrigeisen ena gaukara ia heau namonamo. Unai dainai, Iesu be tatau edia kwarana ai ia halaoa. Bona Dirava ese tatau ia abia hidi kongrigeisen lalonai hahediba bona tomadiho gaukara idia gunalaia totona. Hahine dekenai unai maduna ia henia lasi. (1 Tim. 2:12) Bema badina haida dainai taihu ta ese tadikaka ena gaukara do ia karaia, Iehova ena oda be taihu ese dabua amo ena kwarana do ia koua. * (1 Kor. 11:4-7) Iehova ia ura lasi taihu do ia hahemaraia, to ia ura ia atoa kwara dagina ena hakaua herevana idia badinaia. Hari mani inai henanadai ita laloa: Ruma bese kwarana bona elda taudia edia maduna be dahaka?

10. Dahaka dainai elda ta do ia laloa ia be mai ena maoro kongrigeisen lalonai taravatu ia atoa totona?

¹⁰ Elda taudia be Keriso idia lalokau henia. Bona Iehova bona Iesu ese idia henunai idia atoa “mamoe” idia lalokau henia  danu. (Ioa. 21:15-17) Elda ta be kongrigeisen ia laloa bada dainai, do ia laloa ia be tama ta bamona. Reana do ia laloa bema ruma bese kwarana be mai ena maoro famili gimaia totona taravatu haida ia atoa, elda tauna danu be Dirava ena mamoe gimaia totona taravatu haida do ia atoa. Bona tadikaka taihu haida be reana heduru totona, lo elda taudia dekenai idia lao. To, kongrigeisen elda taudia bona ruma bese kwarana edia maduna be tamona, a?

11. Edena dala ai ruma bese kwarana bona elda taudia edia maduna be ia hegeregere?

¹¹ Aposetolo Paulo ia gwau ruma bese kwarana bona elda tauna edia maduna haida be idia hegeregere. (1 Tim. 3:4, 5) Haheitalai be, Iehova ia ura famili taudia ese tama ena kwara dagina do idia badinaia. (Kol. 3:20) Bona ia ura kongrigeisen taudia ese elda taudia do idia matauraia. Iehova ia ura tama bona elda taudia ese idia henunai idia noho taudia idia durua Ia idia lalokau henia totona. Bona idia biagua taudia idia lalokau henia be namo. Bona tama namona hegeregerena, elda taudia ese idia naria taudia be hekwakwanai idia davaria neganai, idia durudia be namo. (Iam. 2:15-17) Danu, Iehova ia ura elda taudia bona ruma bese kwaradia ese iena hakaua herevadia bona  Baibel “lalonai idia torea gaudia sibona do [idia] badinaia.”​—1 Kor. 4:6.

12-13. Roma 7:2 hegeregerena, edena dala ai ruma bese kwarana ena maduna be elda ena amo ia idau?

¹² To elda taudia edia maduna be ruma bese kwarana edia maduna amo ia idau. Hegeregere, Iehova ese elda taudia dekenai diadi gaukara ia henia, bona kongrigeisen lalonai helalo-kerehai lasi taudia idia kokia diba.​—1 Kor. 5:11-13.

¹³ To, Iehova ese ruma bese ena kwarana dekenai maduna ma ta ia henia bona elda taudia edia amo ia idau. Hegeregere, Iehova ese ruma bese kwarana dekenai maoro ia henia ruma lalonai taravatu do ia atoa idia badinaia totona. (Roma 7:2 duahia.) Hegeregere, tama be mai ena maoro taravatu ia atoa hanuaboi ai ena natudia be edena taim ruma dekenai idia giroa lou totona. Danu, bema ena natudia be unai taravatu idia badinaia lasi, ia be mai ena maoro idia ia matahakani henia totona. (Efe. 6:1) Oibe, ruma bese kwarana namona be famili lalonai taravatu ia do atoa lasi neganai iena hahine ida ia herevahereva guna, badina idia ruaosi be “tauanina tamona.” *​—Mat. 19:6.

14. (a) Mareko 10:45 hegeregerena, dahaka dainai Iehova ese Iesu ia abia hidi kongrigeisen ena kwarana be maoro? (b) Hakaua Oreana ena maduna be dahaka? (Maua itaia: “ Hakaua Oreana Ena Maduna.”)

¹⁴ Mauri davana amo, Iehova ese kongrigeisen taudia ta ta bona Iesu idia abidadama henia taudia ibounai ia hoia.  (Mareko 10:45 duahia; Kara 20:28; 1 Kor. 15:21, 22) Unai dainai, Iehova ese Iesu ia abia hidi iseda mauri davana ia karaia be maoro, badina ia be kongrigeisen ena kwarana. Iesu be iseda kwarana dainai, ia be mai ena siahu taravatu ia atoa ita ta ta, ruma bese ibounai, bona kongrigeisen ese ita badinaia totona. (Gal. 6:2) To Iesu be taravatu sibona ia atoa lasi. Ia be ita ta ta ia ubua bona ia lalokau henia.​—Efe. 5:29.

15-16. Marley bona Benjamin edia hereva amo dahaka oi dibaia?

¹⁵ Taihu be Keriso ese ia abia hidi tadikaka edia hakaua herevadia idia badinaia neganai, idia hahedinaraia Keriso idia matauraia. Taihu momo be United States ai ia noho taihu Marley ena lalohadai idia abia dae. Ia gwau: “Egu maduna headava lalonai bona kongrigeisen lalonai taihu ta bamona be hahenamo badana. Lau be hanaihanai lau hekwarahi Iehova ese ia atoa kwara dagina lau badinaia totona. To egu adavana bona kongrigeisen lalonai idia noho tadikaka be lau idia matauraia bona lau karaia gaudia dainai lau idia tanikiu henia.”

¹⁶ Tadikaka ese taihu idia matauraia neganai, idia hahedinaraia idia be kwara dagina ena gaukara dalana idia lalopararalaia. England ai tadikaka Benjamin, ia gwau: “Lau be kongrigeisen heboudia ai taihu edia haere amo gau momo lau dibaia, stadi karaia dalana bona haroro gaukara hanamoa totona lalohadai namodia idia gwauraia. Idia karaia gaukara be mai anina bada.”

17. Dahaka dainai kwara dagina ena hakaua herevana ita matauraia be namo?

¹⁷ Kongrigeisen lalonai tatau bona hahine, ruma bese kwaradia bona elda taudia ese kwara dagina ena hakaua herevana idia lalopararalaia bona matauraia neganai, maino do ia noho. Mai anina bada gauna be, iseda lalokau guba Tamana, Iehova ita hanamoa.​—Sal. 150:6.