1. Tatau ese kwara dagina idia laloa dalana be dahaka gaudia ese idia biagua diba?

OI DEKENAI inai hereva, “kwara dagina” ena anina be dahaka? Tatau haida be edia ruma bese ena mauri dalana eiava edia kastom hegeregerena edia adavana bona natudia idia kara henia. Europe ai, taihu Yanita ia gwau: “Egu gabu ai, momo idia abia dae, tatau ese hahine idia hereaia bona idia be hesiai hahine sibona.” Bona United States ai, tadikaka Luke ia gwau: “Tama haida ese edia natudia memero idia hadibaia hahine edia hereva be anina lasi bona do idia kamonai henidia lasi.” To, Iehova ia ura lasi tatau ese edia adavana be unai bamona idia kara henia. (Mareko 7:13 hahegeregerea.) Vadaeni, edena dala ai tau be ruma bese kwarana namona ai ia lao diba?

2. Tau be dahaka ia dibaia be namo, bona dahaka dainai?

² Tau ta ia ura ruma bese kwarana namona ai ia lao totona, Iehova ena ura ia dibaia guna be namo. Danu, Iehova ese kwara dagina ia atoa ena badina, bona Iehova bona Iesu edia haheitalai ia tohotoho dalana do ia dibaia. Dahaka dainai? Badina Iehova ese ruma bese kwaradia dekenai siahu haida ia henia, bona ia ura idia gaukaralaia namonamo.​—Luka 12:48b.

3. Korinto Ginigunana 11:3 amo kwara dagina dekenai dahaka ita dibaia?

³ Korinto Ginigunana 11:3 duahia. Unai siri ese Iehova ena guba bona tanobada ruma besena ia hakaua dalana ia herevalaia. Ia be kwarana dainai, iena siahu be bada. Kwara dagina ena gaukara lalonai Iehova ese ma haida dekenai siahu haida ia henia, to edia siahu idia gaukaralaia dalana dekenai do ia hahemaoro henidia. (Roma 14:10; Efe. 3:14, 15)  Iehova ese Iesu dekenai siahu ia henia kongrigeisen ia biagua totona, to Iesu ese ita ia kara henia hegeregerena Iehova ese do ia hahemaoro henia. (1 Kor. 15:27) Iehova ese tau dekenai siahu ia henia danu iena adavana bona natudia ia biagua totona, to idia ia kara henia hegeregerena Iehova bona Iesu ese do idia hahemaoro henia.​—1 Pet. 3:7.

4. Iehova bona Iesu be mai edia siahu dahaka idia karaia totona?

⁴ Iehova be guba bona tanobada famili edia Kwarana dainai, ia be mai ena siahu taravatu ia atoa ena natudia ese do idia badinaia. (Isa. 33:22) Iesu be Keristani kongrigeisen ena kwarana dainai, ia danu be mai ena maoro taravatu do ia atoa kongrigeisen taudia ese idia badinaia totona.​—Gal. 6:2; Kol. 1:18-20.

5. Ruma bese kwarana be dahaka ia karaia diba, to dahaka ia karaia diba lasi?

⁵ Iehova bona Iesu bamona, Keristani ruma bese kwarana be mai ena siahu ruma bese lalonai disisen ia karaia totona. (Roma 7:2; Efe. 6:4) To iena siahu be mai ena hetoana. Hegeregere, namona be ia atoa taravatu ibounai be Baibel ena hakaua herevadia hegeregerena. (Aon. 3:5, 6) Bona ruma bese kwarana ta be siahu lasi ruma bese ma ta totona taravatu do ia atoa. (Roma 14:4) Danu, iena natudia idia tubu daekau bona ruma idia rakatania murinai ia do idia matauraia noho, to iena kwara dagina henunai do idia noho lasi.​—Mat. 19:5.

6. Dahaka dainai Iehova ese kwara dagina ia atoa?

⁶ Iehova be iena ruma bese ia lalokau henia dainai kwara dagina ia atoa. Unai be iena harihari gauna ta. Kwara dagina dainai Iehova ena ruma bese lalonai gaukara be maino bona dala maorona ai idia karaia. (1 Kor. 14:33, 40) Bema Iehova ena ruma bese lalonai kwara dagina be lasi, iena ruma bese be do ia heau namonamo lasi bona idia moale lasi. Hegeregere, do idia diba lasi daika be disisen ginigabena do ia karaia, bona daika ese unai do ia gunalaia.

7. Efeso 5:25, 28 ena anina be, Iehova ia ura tau ese hahine ia biagua auka, a?

⁷ Bema Dirava ese kwara dagina ia atoa be mai ena namo, vadaeni dahaka dainai hahine momo idia mamia edia tau ese idia biagua bona kara auka henidia? Badina tatau momo be Iehova ese ruma bese totona ia atoa taravatu idia dadaraia, bona edia kastom idia badinaia. Eiava edia hahine idia dagedage henia dainai idia mamia idia be mai edia siahu. Hegeregere, tau ese ena hahine do ia biagua auka badina ia ura ma haida do idia gwau ia be “tau korikorina.” Reana do ia laloa iena adavana ia doria lasi ia ia lalokau henia totona, to ia dagedage henia diba unai amo do ia gari henia. Bona unai kara amo ena adavana ia biagua diba. * Unai bamona lalohadai bona kara ese hahine lalokau henia bona matauraia karana ia hadikaia, unai be Iehova ena ura hegeregerena lasi.​—Efeso 5:25, 28 duahia.

8. Edena dala ai tau be ruma bese kwarana namona ai ia lao diba?

⁸ Tau be ruma bese kwarana namona ai ia lao totona, Iehova bona Iesu ese kwara dagina idia gaukaralaia dalana ia tohotohoa be namo. Mani Iehova bona Iesu ese idia hahedinaraia karadia rua ita itaia, bona tama ese ena adavana bona natudia  ia kara henia neganai unai kara ia badinaia dalana do ita itaia.

9. Edena dala ai Iehova be manau karana ia hahedinaraia?

⁹ Manau. Iehova ena aonega be bada, to iena hesiai taudia edia lalohadai ia kamonai danu. (Gen. 18:23, 24, 32) Iena siahu henunai idia noho taudia haida edia lalohadai idia gwauraia neganai ia kamonai. (1 Ki. 22:19-22) Iehova be goevadae, to ia laloa lasi ita ese gau ibounai do ita karaia goevagoeva. To, ena goevadae lasi hesiai taudia ia durua edia gaukara idia hagugurua totona. (Sal. 113:6, 7) Danu, Baibel ese Iehova ia gwauraia “durua tauna.” (Sal. 27:9; Heb. 13:6) King Davida ia laloparara Iehova be ia manau bona ia durua dainai, ia ese unai gaukara badana ia hagugurua diba.​—2 Sam. 22:36.

10. Edena dala ai Iesu be manau karana ia hahedinaraia?

¹⁰ Mani Iesu ena haheitalai ita laloa. Ena be ia be ena hahediba taudia edia Lohiabada bona Biaguna, to edia aena ia huria. Dahaka dainai Iehova ese inai sivarai be Baibel ai ia torea? Taunimanima ibounai bona bese kwaradia ese ena haheitalai do idia badinaia. Iesu ia gwau: “Lau ese umui dekenai dala lau hahedinaraia vadaeni, umui dekenai lau karaia hegeregerena, umui danu unai bamona umui karaia be namo.” (Ioa. 13:12-17) Ena be Iesu be mai ena siahu, ia laloa lasi ma haida ese ia do idia hesiai henia. To, ia ese ma haida ia hesiai henia.​—Mat. 20:28.

11. Iehova bona Iesu edia manau karana amo ruma bese kwarana be dahaka ia dibaia?

¹¹ Ita dibaia gauna. Ruma bese kwarana be dala idauidau ai manau karana ia hahedinaraia diba. Hegeregere, ia laloa lasi hanaihanai ena hahine bona natudia edia kara be do idia goeva. Ena be ena lalohadai idia abia dae lasi, to edia lalohadai ia kamonai. United States ai, taihu Marley ia gwau: “Nega haida lau bona egu tau emai lalohadai be idauidau. To lau mamia lau ia laloa bada bona matauraia, badina egu lalohadai totona ia henanadai bona ia laloa namonamo guna, bena disisen ia karaia.” Unai sibona lasi, to manau tauna be mai ura ida ruma gaukara ia karaia, ena be ena gabu ai taunimanima idia laloa unai be hahine edia gaukara. Unai be hekwakwanai ta. Dahaka dainai? Taihu Rachel ia gwau: “Egu hanua dekenai bema tau ese ena adavana ia durua bona mereki ia huria  eiava ruma ia hagoevaia, iena dekena taudia bona varavara do idia gwau, ia be ‘tau korikorina’ lasi. Do idia laloa ena adavana ia biagua diba lasi.” Bema emu hanua dekenai unai bamona idia laloa, namona be oi laloatao, Iesu be iena hahediba taudia edia aena ia huria, ena be unai be hesiai tauna ena gaukara. Ruma bese kwarana namona be do ia hahedinaraia lasi ia be tau badana bona mai ena siahu, to ia ura ena adavana bona natudia ia hamoalea. Manau karana be mai anina bada, to ruma bese kwarana ese dahaka kara namodia ma haida ia hahedinaraia diba?

12. Iehova bona Iesu be lalokau dainai dahaka idia karaia?

¹² Lalokau. Iehova be lalokau dainai gau ibounai ia karaia. (1 Ioa. 4:7, 8) Mai lalokau ida iseda tomadiho karana durua totona iena Hereva, Baibel bona iena orea amo heduru ia henia. Iena heduru amo ia hamomokania ita ia lalokau henia. To, iseda mauri durua gaudia be edena bamona? Iehova “ese ita dekenai gau momo herea ia henia ita moalelaia totona.” (1 Tim. 6:17) Kerere ita karaia neganai, ita ia matahakani henia, bona ita ia lalokau henia noho. Lalokau dainai Iehova ese mauri davalaia boubouna ia henia. Iesu be ita ia lalokau henia bada dainai, ita totona iena mauri ia bouboulaia. (Ioa. 3:16; 15:13) Iehova bona Iesu edia lalokau abidadama taudia dekenai be gau ta ese do ia hadikaia diba lasi.​—Ioa. 13:1; Roma 8:35, 38, 39.

13. Dahaka dainai tau ese lalokau ia hahedinaraia be gau badana? (Maua itaia: “ Headava Matamata Tauna be Dahaka Ia Karaia Diba Adavana ese Ia Matauraia Totona?”)

¹³ Ita dibaia gauna. Tau be lalokau dainai gau ibounai ia karaia be namo. Dahaka dainai unai be mai anina bada? Aposetolo Ioane ia gwau: “Bema ta ese ena tadikaka [eiava ruma bese], ia itaia diba tauna unai, ia lalokau henia lasi, vadaeni ia itaia lasi Diravana ia lalokau henia diba lasi.” (1 Ioa. 4:11, 20) Anina be iena ruma bese ia lalokau henia tama be Iehova bona Iesu do ia tohotohoa. Ia ese tomadiho, hemami bona tauanina dalanai iena ruma bese do  ia naria. (1 Tim. 5:8) Iena natudia do ia hadibaia bona matahakani henia. Danu, disisen namodia karaia dalana do ia dibaia noho, unai amo Iehova ia hanamoa bona iena ruma bese ia durua diba. Mani unai gaudia ta ta ita itaia, bona ruma bese kwarana ese Iehova bona Iesu ia tohotohoa diba daladia do ita herevalaia.

14. Edena dala ai tama be tomadiho dalanai ena ruma bese ia naria diba?

¹⁴ Tomadiho dalanai ena ruma bese ia naria. Iesu be iena Tamana ia tohotohoa dainai, ia ura ia murinai idia raka taudia ia durua edia abidadama ia goada totona. (Mat. 5:3, 6; Mar. 6:34) Unai hegeregerena, ruma bese kwarana ena maduna ginigunana be iena ruma bese do ia durua edia abidadama ia goada totona. (Deut. 6:6-9) Unai ia karaia totona tama ese ena ruma bese ida Baibel idia duahia bona stadilaia, hebou idia lao, sivarai namona idia harorolaia, bona Iehova ida edia hetura karana idia hagoadaia.

15. Edena dala ai tama ese ena ruma bese taudia edia hemami ia laloa bada?

¹⁵ Ruma bese edia hemami ia laloa bada. Iehova be taunimanima vairanai ena lalokau Iesu totona ia gwauraia hedinarai. (Mat. 3:17) Iesu ese ena hereva bona kara amo iena murinai idia raka taudia dekenai ena lalokau ia hahedinaraia. Idia danu ese edia lalokau ia totona idia gwauraia hedinarai. (Ioa. 15:9, 12, 13; 21:16) Tama ese ena kara amo ia hahedinaraia diba iena adavana bona natudia ia lalokau henia, hegeregere idia ida Baibel ia stadilaia. Danu ia hamaorodia idia ia laloa bada bona lalokau henia, bona bema dala ia kehoa, ma haida vairanai ia hanamodia.​—Aon. 31:28, 29.

16. Tama be dahaka do ia karaia danu, bona dahaka dainai do ia naria namonamo?

¹⁶ Tauanina dalanai iena ruma bese ia naria. Ena be Iehova ese Israela taudia idia kamonai lasi dainai ia panisidia, to tauanina dalanai ia naridia noho. (Deut. 2:7; 29:5) Hari danu tauanina dalanai ita ia naria. (Mat. 6:31-33; 7:11) Iesu danu be ia murinai idia raka taudia ia ubua. (Mat. 14:17-20) Bona gorere taudia momo ia hanamodia. (Mat. 4:24) Tama ese Iehova ia hamoalea totona, tauanina dalanai ruma bese taudia edia dabu gaudia ia henia be namo. To, namona be ia naria namonamo. Namo lasi moni gaukara dekenai nega bada ia haorea, bona ruma bese taudia edia tomadiho dalana bona hemami ia laloa bada lasi.

17. Iehova bona Iesu be edena dala ai ita idia hadibaia bona hamaoromaoroa?

¹⁷ Hadibaia bona hamaoromaoroa. Iehova ese ita ia hadibaia bona hamaoromaoroa badina ia ura ita ia durua. (Heb. 12:7-9) Iesu be ena Tamana bamona, mai lalokau ida ena siahu henunai idia noho taudia ia hadibaia. (Ioa. 15:14, 15) Sisiba aukana ia henia to hebogahisi dalanai unai  ia karaia. (Mat. 20:24-28) Ia laloparara ita be goevadae lasi taudia bona nega momo kerere ita karaia.​—Mat. 26:41.

18. Tama be dahaka do ia laloatao?

¹⁸ Iehova bona Iesu ia tohotohoa tama do ia laloatao iena adavana bona natudia be goevadae lasi. Iena adavana bona natudia dekenai do ia “badu dikadika lasi.” (Kol. 3:19) To, Galatia 6:1 ena hakaua herevana do ia badinaia, bona “mai manau ida” idia do ia hamaoromaoroa, badina ia diba ia danu be goevadae lasi tauna. Iesu hegeregerena, tama ia laloparara iena haheitalai amo ena ruma bese taudia ia hadibaia diba.​—1 Pet. 2:21.

19-20. Bema ruma bese kwarana ia ura disisen ia karaia, edena dala ai Iehova bona Iesu ia tohotohoa diba?

¹⁹ Disisen namodia karaia. Iehova ese disisen ia karaia neganai, haida edia namo ia laloa. Hegeregere, mauri ia karaia neganai, sibona ia laloa lasi, to ia ura ita ese mauri do ita moalelaia. Tau ta ese ia doria lasi iseda kara dika kokia totona, iena Natuna do ia siaia. To mai ura ida, iseda namo totona unai boubou gauna ia henia. Iesu danu be iseda namo totona disisen ia karadia. (Roma 15:3) Hegeregere ia hesiku bada herea, to ena laga-ani negana ia gaukaralaia hutuma ia hadibaia totona.​—Mar. 6:31-34.

²⁰ Ruma bese kwarana namona ia diba disisen maorodia ia karaia be mai anina bada, bona unai maduna ia laloa bada. Bona namo lasi disisen ia karaia kava eiava sibona ena ura ia badinaia. To disisen maorodia ia karaia totona Iehova dekenai ia tabekau. * (Aon. 2:6, 7) Unai dala amo ma haida edia namo ia atoa guna, to sibona ena namo ia laloa lasi.​—Fili. 2:4.

21. Vaira wiki ena stadi ai dahaka do ita herevalaia?

²¹ Iehova ese ruma bese kwaradia dekenai maduna badana ia henia bona ia ura do idia huaia namonamo. To bema tama ia gaukara goada Iehova bona Iesu ia tohotohoa totona ia be ruma bese kwarana namona ai do ia lao. Bona bema iena hahine be ena maduna ia huaia namonamo, edia headava lalonai do idia moale. Hahine ese ena tau ena kwara dagina be edena bamona do ia laloa bona dahaka hekwakwanai ia davaria diba? Vaira wiki ena stadi ese unai henanadai do ia haerelaia.