ISRAELA taudia edia nega ai, tau ena famili bona hahine ena famili ese tau bona hahine do idia headava totona idia lalotamona neganai, tau ena famili ese hahine davana idia karaia. Davana karaia totona animal, moni, o dava bada gaudia ma haida idia henia. Nega haida, ta ia gaukara goada hahine davana ia karaia totona, hegeregere, Iakobo be lagani 7 lalonai Rahela ena tamana totona ia gaukara, unai amo Rahela ia adavaia. (Gen. 29:17, 18, 20) Dahaka dainai hahine davana idia karaia?

Buka ta ia gwau ia gwau: “Tau ena famili ese hahine ena davana idia karaia, badina hahine be ena famili totona gaukara badadia [uma o fama gaukaradia] do ia karaia lou lasi.” Danu, davana idia karaia karana ese tau ena famili bona hahine ena famili huanai hetura karana ia hagoadaia. Bona nega aukadia ai famili ta ta idia durua heheni. Danu, hahine davana idia karaia karana ese ia hamomokania hahine be ena tamana ese do ia naria bona gimaia lou lasi, to ena tau ese do ia naria bona gimaia.

Tau ese hahine davana ia karaia amo ia hahedinaraia lasi ia be gau ta bamona idia hoia o hoihoilaia. Buka ta (Ancient Israel​—Its Life and Institutions) ia gwau: “Israela ai tau ena maduna be hahine ena famili dekenai moni o gau ma haida do ia henia, unai be hegeregere gau ta ia hoia bamona. To tau ese hahine davana ia karaia badina ia laloa unai amo hahine be ena famili totona ia karaia gaukaradia edia davana ia haloua, to hahine davana karaia totona lasi.”

Hari, tano haida ai, taunimanima be hahine davana karaia ena kastom idia badinaia noho. Keristani tama sina be edia natuna ena davana karaia totona gau momo idia noia lasi, unai amo ‘taunimanima ibounai ese edia laloa maoromaoro karana idia itaia.’ (Fili. 4:5; 1 Kor. 10:32, 33) Unai amo idia hahedinaraia idia be ‘moni idia ura henia bada’ lasi o idia mataganigani lasi. (2 Tim. 3:2) Ma danu, namo lasi Keristani tama sina ese davana karaia totona gau momo idia noia, badina unai bamona idia karaia neganai, edia natuna ese do ia adavaia tau be moni haboua totona do ia gaukara noho hahine ena davana ia karaia totona. Eiava tau do ia laloa painia gaukara ia rakatania be namo, unai amo ful-taim moni gaukara ia karaia bena hahine ena davana do ia karaia.

Tano ma haida ai, hahine davana karaia totona taravatu haida idia noho. Bona Keristani tama sina ese unai taravatu idia badinaia. Dahaka dainai? Badina Baibel ia gwau Keristani taudia be “gavamani henunai do idia noho” bona Dirava ena taravatu ia utua lasi taravatudia idia badinaia be namo.​—Roma 13:1; Kara 5:29.