1. Dahaka dainai Iehova ena hakaua dalana ita badinaia be namo? Herevalaia.

 MANI oi laloa oi be uda badana dekenai oi boio. Unuseniai dika oi davaria diba, badina dagedage animal idauidau, gorere idia havaraia manumanu maragidia, bona poisini tubutubu gaudia idia noho, danu dala dikadia dekenai oi moru diba. To do oi moale, badina oi ida ia noho tauna be unai gabu ia diba namonamo dainai, dika amo oi do ia gimaia! Inai tanobada be unai uda badana bamona. Dika gaudia momo ese iseda hetura karana Iehova ida ia hadikaia diba. To ita be mai iseda Hakaua Tauna hereadaena, Iehova. Ia ese dika gaudia amo ita ia gimaia bona tanobada matamata lalonai mauri hanaihanai ena dala dekenai ita ia hakaua lao.

2. Iehova ese edena dala ai ita ia hakaua?

² Iehova ese edena dala ai ita ia hakaua? Dala ginigunana be iena Hereva, Baibel amo ita ia hakaua. Danu, ia ese taunimanima haida ia gaukaralaia ita idia hakaua totona. Hegeregere, ia ese “hesiai tauna mai ena kamonai bona mai ena aonega” ia gaukaralaia iseda abidadama idia hagoadaia gaudia momo ia henia, unai ese ita ia durua abia hidi maorodia ita karaia totona. (Mat. 24:45) Danu Iehova ese abidadama tatau ma haida ia gaukaralaia ita idia hakaua totona. Hegeregere, sekit naria taudia bona kongrigeisen elda taudia ese ita idia hagoadaia bona hakaua herevadia idia henia, hekwakwanai negadiai ita haheauka noho totona. Iehova ita tanikiu henia bada, badina inai nega aukadia bona dokona ia kahirakahira lalonai ita ia hakaua noho! Unai ese ita ia durua nega ibounai Iehova ita hamoalea bona mauri hanaihanai ena dala dekenai ita raka noho.

3. Inai atikol ai dahaka do ita herevalaia?

³ Nega haida do ia auka Iehova ena hakaua dalana ita badinaia  totona, bema goevadae lasi tatau ese unai hakaua dalana idia henia. Dahaka dainai? Badina reana idia henia hakaua herevana be iseda ura hegeregerena lasi. Eiava do ita mamia idia henia hakaua herevana be maoro lasi bona do ita laloa unai be Iehova amo ia mai lasi. Unai bamona negadiai namona be ita abia dae, Iehova be ena taunimanima ia hakaua noho bona unai hakaua herevadia be iseda namo totona. Iseda abidadama ita hagoadaia totona, inai atikol ai point toi do ita herevalaia (1) Baibel negadiai Iehova ese ena taunimanima ia hakaua dalana, (2) hari ita ia hakaua dalana, bona (3) hakaua herevadia ita badinaia neganai namo ita davaria dalana.

IEHOVA ESE ISRAELA BESENA IA HAKAUA DALANA

4-5. Edena dala ai Iehova ese ia hahedinaraia Mose ia gaukaralaia Israela besena ia hakaua totona? (Rau 1 ena laulau itaia.)

⁴ Iehova be Mose ia abia hidi Aigupito amo Israela besena ia hakaua raka lasi totona. Bona idia dekenai hamomokania gauna ta ia hahedinaraia unai amo idia diba, Ia ese Mose ia gaukaralaia noho. Hegeregere, dina ai ori amo idia ia hakaua bona hanuaboi ai lahi amo idia ia hakaua. (Eso. 13:21) Mose ese unai gaudia rua ia badinaia, ia bona Israela besena be Davara Kakakana dekenai ia hakaua lao. To Aigupito taudia ese Israela taudia idia lulua, unai dainai idia gari badina idia laloa do idia hamasedia. Bona idia gwau Mose ese Davara Kakana dekenai idia ia hakaua lao be maoro lasi. To unai be abia hidi maorona, badina Iehova ese Mose ia gaukaralaia unuseni ena taunimanima ia hakaua lao totona. (Eso. 14:2) Bena Dirava ese hoa dalanai idia ia hamauria.—Eso. 14:​26-28.

⁵ Lagani 40 lalonai, Mose ese unai ori ia badinaia taunimanima idia noho lasi gabuna amo Dirava ena taunimanima ia hakaua hanai totona. a Nega ta, Iehova ese Mose ena palai ruma ataiai ori ia atoa, unai amo Israela taudia ese idia itaia diba. (Eso. 33:​7, 9, 10) Unai ori amo Iehova ese Mose ia hereva henia, bena ia henia hakaua herevadia be Mose ese Iena taunimanima dekenai ia gwauraia. (Sal. 99:7) Israela taudia idia diba Iehova ese Mose ia gaukaralaia noho idia ia hakaua totona.

6. Israela taudia be Iehova ena hakaua dalana dekenai dahaka idia karaia? (Numera 14:​2, 10, 11)

⁶ Madi, ena be Iehova ese hamomokania gaudia momo amo ia hahedinaraia Mose ia gaukaralaia noho, to Israela taudia be unai idia abia dae lasi. (Numera 14:​2, 10, 11 duahia.) Nega momo, idia ura lasi abia dae Iehova be Mose amo idia ia hakaua noho. Unai dainai, Iehova ese idia dekenai gwaumaoro ia henia lasi Gwauhamata Tanona dekenai idia vareai totona.—Num. 14:30.

7. Iehova ena hakaua dalana idia badinaia taudia haida edia haheitalai oi gwauraia. (Numera 14:24) (Laulau itaia danu.)

⁷ Israela taudia haida be Iehova ena hakaua dalana idia badinaia. Hegeregere, Iehova ia gwau: “Kaleba . . . be mai kudouna ibounai ida lau ia badinaia noho.” (Numera 14:24 duahia.) Dirava ese Kaleba ia hanamoa, bona Kanana tanona ai ia ura henia gabuna ia henia. (Ios. 14:​12-14) Danu Israela ena uru gabena be haheitalai namona idia hahedinaraia, badina Iehova ena hakaua dalana idia badinaia. Iosua ese Mose ena gabu ia abia bona Israela taudia ia hakaua neganai, “ena mauri ibounai lalonai ia idia matauraia bada.” (Ios. 4:14) Unai dainai, Iehova ese idia ia hanamoa, bona ia gwauhamatalaia tanona dekenai idia ia hakaua vareai.—Ios. 21:​43, 44.

8. King taudia edia negai Iehova ese ena taunimanima ia hakaua dalana oi herevalaia. (Laulau itaia danu.)

 ⁸ Lagani haida murinai, Iehova ese hahemaoro taudia ia abia hidi iena taunimanima idia hakaua totona. Gabeai, king taudia edia nega lalonai, Iehova ese peroveta taudia ia abia hidi ena taunimanima idia hakaua totona. Idia abidadama king taudia be peroveta taudia edia sisiba idia badinaia. Hegeregere, King Davida be mai manau ida peroveta tauna Natana ena sisiba ia abia dae. (2 Sam. 12:​7, 13; 1 Siv. 17:​3, 4) King Iehosapata be peroveta tauna Iahasiele ena hakaua dalana ia badinaia bona Iuda taudia ia hagoadaia, Dirava ena ‘peroveta taudia idia abidadama henia’ totona. (2 Siv. 20:​14, 15, 20) King Hesekaia be ia lalohisihisi neganai, peroveta tauna Isaia ena heduru ia tahua. (Isa. 37:​1-6) Hanaihanai king taudia be Iehova ena hakaua dalana idia badinaia neganai, Iehova ese idia ia hanamoa bona gimaia. (2 Siv. 20:​29, 30; 32:22) Unai dainai, namona be idia diba Iehova ese peroveta taudia ia gaukaralaia noho iena taunimanima idia hakaua totona. To, king taudia haida bona Israela taudia be Iehova ena peroveta taudia idia kamonai henia lasi.—Ier. 35:​12-15.

IEHOVA ESE KERISTANI TAUDIA GINIGUNADIA IA HAKAUA DALANA

9. Iehova ese daidia ia gaukaralaia Keristani taudia ginigunadia ia hakaua totona? (Laulau itaia danu.)

⁹ Iesu ia toreisi lou murinai, Iehova ese Keristani kongrigeisen ia haginia. Bona Keristani taudia ginigunadia be edena bamona ia hakaua? Iehova ese Iesu ia abia hidi Keristani kongrigeisen ena kwarana ai ia lao totona. (Efe. 5:23) To Iesu sibona ese ena hahediba taudia ta ta ia hereva henia lasi. Ia ese aposetolo taudia bona Ierusalema dekenai tau badadia ia abia hidi, gunalaia gaukarana idia karaia. (Kara 15:​1, 2) Danu, elda taudia ia abia hidi kongrigeisen idia hakaua totona.—1 Tes. 5:12; Tito 1:5.

10. (a) Keristani taudia ginigunadia be idia abia hakaua herevadia dainai dahaka idia karaia? (Kara 15:​30, 31) (b) Dahaka dainai idaunegai, haida be Iehova ese ia abia hidi taudia idia abia dae lasi? (Maua itaia, “ Dahaka Dainai Haida be Hamomokania Gaudia Idia Abia Dae Lasi.”)

¹⁰ Keristani taudia ginigunadia be dahaka idia karaia? Idia momo be mai ura ida, idia abia hakaua herevadia idia badinaia. Bona “unai hagoadaia herevana dainai idia moale.” (Kara 15:​30, 31 duahia.) To hari inai negai, Iehova ese ena taunimanima be edena bamona ia hakaua?

 IEHOVA ESE ITA IA HAKAUA DALANA

11. Hari Iehova ese ena taunimanima idia hakaua taudia ia durua dalana oi herevalaia.

¹¹ Hari danu Iehova ese ena taunimanima ia hakaua noho. Baibel bona kongrigeisen ena kwarana amo unai ia karaia noho. Dirava ese taunimanima haida ia gaukaralaia dalana oi itaia, a? Oibe. Hegeregere, lagani 1870 murinai ia vara gauna mani oi laloa. Charles Taze Russell bona ena bamodia idia laloparara lagani 1914 be mai anina bada Dirava ena Basileia totona. (Dan. 4:​25, 26) Unai idia diba, badina Baibel ena peroveta herevadia idia stadilaia. Iehova ese edia tahua gaukara ia durua, a? Oibe. Lagani 1914 ai, tanobada ai idia vara gaudia ese idia hamomokania Dirava ena Basileia ia lohia matamaia. Tanobada Tuarina Ginigunana ia vara murinai, gorere dikadia, tano mareremarere bona hitolo bada ia vara. (Luka 21:​10, 11) Iehova ese unai kudou maoro Keristani tatau ia gaukaralaia iena taunimanima ia durua totona.

12-13. Tanobada Tuarina Iharuana lalonai, tadikaka be haroro gaukara idia habadaia totona dahaka idia karaia?

¹² Tanobada Tuarina Iharuana lalonai, ia vara gauna mani ita laloa. Hedikwota dekenai, tadikaka be Apokalupo 17:8 idia stadilaia murinai, idia laloparara unai tuari ese Aramagedono do ia havaraia lasi, to nega sisina lalonai maino do ia noho, bona unai ese dala do ia kehoa haroro gaukara idia habadaia totona. Toana be unai be nega maorona lasi, to tadikaka be Gilead sikuli idia hegaegaelaia. Unai amo misinari tadikaka taihu idia treinia, tanobada hegegemadai haroro bona hadibaia gaukarana idia karaia totona. Ena be unai tuari ia vara noho, to tadikaka ese tano ma haida dekenai misinari taudia idia siaia. Bona danu, hesiai tauna mai ena kamonai be Course in Theocratic Ministry b ia hegaegaelaia, kongrigeisen lalonai pablisa ta ta ia durua edia haroro bona hadibaia gaukarana idia hanamoa totona. Unai daladia amo, Dirava ena taunimanima idia hegaegae haroro gaukara idia habadaia totona.

¹³ Hari ita diba momokani, Iehova be unai nega aukana lalonai, ena taunimanima ia hakaua. Tanobada Tuarina Iharuana negana amo ema bona hari, tano momo dekenai Iehova ena taunimanima be maino ai sivarai namona idia harorolaia noho. Unai dainai, unai gaukara  be ia bada herea bona anina namona ia havaraia.

14. Dahaka dainai Iehova ena orea bona ia abia hidi elda taudia edia hakaua dalana ita badinaia be namo? (Apokalupo 2:1) (Laulau itaia danu.)

¹⁴ Hari, Hakaua Oreana ena memba taudia be hanaihanai Keriso ena hakaua dalana dekenai idia tabekau. Idia ura tadikaka taihu dekenai idia henia hakaua herevadia ese Iehova ena lalohadai ia hahedinaraia. Bona idia ese sekit naria taudia bona elda taudia idia gaukaralaia kongrigeisen dekenai, unai hakaua herevadia idia henia. c Horoa taudia bona kongrigeisen lalonai idia noho elda taudia ibounai be Keriso ena “imana idibana ai” idia noho. (Apokalupo 2:1 duahia.) Momokani unai elda taudia be goevadae lasi dainai, kerere idia karaia danu. Mose bona Iosua be nega haida kerere idia karaia, bona aposetolo taudia danu. (Num. 20:12; Ios. 9:​14, 15; Roma 3:23) To, Keriso ese hesiai tauna mai kamonai bona horoa elda taudia ia hakaua namonamo, bona unai bamona do ia karaia “ela bona inai nega oromana ena dokona.” (Mat. 28:20) Unai dainai, Iesu ese ia abia hidi taudia edia hakaua dalana ita abidadama henia be mai anina bada.

IEHOVA ENA HAKAUA DALANA ITA BADINAIA NEGANAI NAMO ITA DAVARIA

15-16. Iehova ena hakaua dalana idia badinaia taudia amo dahaka oi dibaia?

¹⁵ Iehova ena hakaua dalana ita badinaia noho neganai, namo do ita davaria. Hegeregere, Andy bona Robyn be hesiai tauna mai ena kamonai ena hakaua dalana idia badinaia bona kohu momo lasi maurina idia noholaia. (Heb. 13:5) Unai dainai, idia hegeregere tiokratik konstraksen gaukaradia idia durua. Robyn ia gwau: “Ai noho rumadia haida be maragi, bona kisini be lasi. Bona egu kamera momo lau hoihoilaia, ena be laulau abia karana lau ura henia. Unai dainai unai gaudia lau hoihoilaia neganai lau tai. To Aberahamo ena adavana, Sara bamona egu lalona lau hadaia lau dadaraia gaudia do lau laloa lasi.” (Heb. 11:15) Unai headava tau bona ena hahine be idia karaia abia hidi dainai dahaka namo idia davaria? Robyn ia gwau: “Ai moale bada, badina ai diba ai karaia gaudia ibounai be Iehova totona. Lau bona egu adavana be tiokratik gaukaradia ai karaia neganai, tanobada matamatana dekenai do ai karaia gaudia ai laloa.” Andy ia gwau: “Ai moale bada badina emai nega bona goada ai henia Iehova ena gaukara ai karaia totona.”

 ¹⁶ Iehova ena hakaua dalana ita badinaia neganai, edena dala ma haida ai namo ita davaria? Taihu ta ladana, Marcia be haisikuli amo ia gradueit murinai, ia ura painia gaukara do ia karaia. (Mat. 6:33; Roma 12:11) Ia gwau: “Sikuli ese skolasip ta idia henia lagani foa iunivesiti dekenai do lau sikuli totona. To lau ura egu nega bona goada lau henia Iehova lau hesiai henia totona. Unai dainai, teknikol sikuli ta dekenai kosi ta lau karaia, unai amo egu painia do ia durua moni gaukara ta lau karaia diba. Egu mauri ai unai be abia hidi be namona. Hari regula painia gaukara lau moalelaia, bona egu moni gaukara ena sediual lau haidaua diba dainai, lau hegeregere Betele dekenai lau heduru, bona hesiai gaukara ma haida lau karaia diba.”

17. Iehova ena hakaua dalana ita badinaia neganai, dahaka namo ma haida ita davaria? (Isaia 48:​17, 18)

¹⁷ Nega haida, orea amo ita abia sisiba ese ita idia gimaia. Hegeregere, moni ura henia bada karana bona Dirava ena taravatu utua karadia dekenai ita naria namonamo. Unai amo, Iehova ena hakaua daladia ita badinaia neganai, namo do ita davaria. Danu lalomamina goevana do ita abia bona hekwakwanai idauidau do ita hanaia. (1 Tim. 6:​9, 10) Unai dainai mai kudouna ibounai ida, Iehova do ita tomadiho henia bona unai ese ita dekenai moale bona maino korikori do ia henia.—Isaia 48:​17, 18 duahia.

18. Dahaka dainai oi ura Iehova ena hakaua dalana oi badinaia?

¹⁸ Ita diba momokani Iehova ese ia abia hidi taudia do ia gaukaralaia, hisihisi badana lalonai ita do idia hakaua ela bona Lagani 1,000 Lohia Negana. (Sal. 45:16) Sibona iseda ura gaudia do ita dadaraia bona unai hakaua dalana do ita badinaia noho, a? Do ia auka lasi unai ita karaia totona bema hari Iehova ena hakaua dalana ita badinaia. Unai dainai, namona be nega ibounai Iehova bona ia abia hidi taudia edia hakaua dalana ita badinaia. (Isa. 32:​1, 2; Heb. 13:17) Mai kudouna ibounai ida iseda Hakaua Tauna, Iehova, ita abidadama henia diba, badina ia ida iseda hetura karana do idia hadikaia gaudia amo ita ia gimaia bona tanobada matamatana ai mauri hanaihanai dalana dekenai ita ia hakaua lao.