To, Iehova ia ura ita naria bona ena nega korikori ai kara ta do ia karaia. Dahaka dainai? Dahaka ese ita do ia durua mai moale ida ita naria totona?

DAHAKA DAINAI IEHOVA IA URA ITA NARIA?

Baibel ia gwau: “Iehova be mai haheauka ida ia naria noho umui ia lalonamo henia totona, bona do ia toreisi umui dekenai hebogahisi ia hahedinaraia totona. Badina Iehova be hahemaoro maoromaoro Diravana. Ia totona mai ura ida idia naria noho taudia be idia moale.” (Isa. 30:18) Isaia ese inai hereva be idia kwara auka Iuda taudia dekenai ia gwauraia. (Isa. 30:1) To idia huanai abidadama taudia haida idia noho bona unai hereva ese idia dekenai helaro ia henia. Danu, unai hereva ese hari, Iehova ena abidadama hesiai taudia dekenai helaro ia henia.

Unai dainai Iehova hegeregerena, namona be mai haheauka ida ita naria. Bona ia abia hidi negana ai, inai nega oromana dikana do ia haorea bona unai dina bona hora ia naria noho. (Mat. 24:36) Unai nega ai do ia hedinarai goevagoeva, Diabolo ena hereva Iehova bona ena hesiai taudia totona be koikoi. Satani bona ia idia badinaia taudia be Iehova ese do ia kokia, to ita dekenai “hebogahisi [do] ia hahedinaraia.”

Hari, Iehova ese iseda hekwakwanai ibounai do ia kokia lasi, to ia gwauhamata ita naria noho lalonai ita moale diba. Isaia ia hereva bamona, ita ura henia gauna ita naria noho lalonai ita moale diba. (Isa. 30:18) Edena dala ai ita moale diba? Inai dala foa ese ita do ia durua.

MAI MOALE IDA ITA NARIA DALANA

Emu mauri ai idia vara gau namodia oi laloa. King Davida be ena mauri ibounai lalonai kara dika momo ia itaia. (Sal. 37:35) To, ia gwau: “Mai regerege lasi ida Iehova totona oi naria bona mai haheauka ida ia totona oi naria. Tau ta be ena palani ia hagugurua neganai, ia dekenai oi lalohisihisi lasi.” (Sal. 37:7) Davida be Iehova ese do ia durua karana ia laloa bada dainai, unai sisiba herevana ia badinaia. Danu, Iehova ese ia dekenai ia karaia gau namodia ia laloa bada. (Sal. 40:5) Ita danu, bema ita dekenai idia vara gau namodia ita laloa bada, bona idia  vara dika gaudia ita laloa momo lasi, unai ese ita do ia durua Iehova dekenai ita naria totona.

Dala idauidau ai Iehova oi hanamoa. Salamo 71 ia torea tauna, Davida, be Iehova dekenai ia gwau: “Lau be do lau naria noho, lau ese oi do lau hanamoa bada.” (Sal. 71, 14) Edena dala ai Iehova ia hanamoa? Ia ese ma haida dekenai Iehova ia herevalaia bona ane amo Iehova ia hanamoa. (Sal. 71:​16, 23) Davida hegeregerena, Iehova dekenai ita naria noho lalonai ita moale diba. Iseda haroro gaukara, iseda turadia bona famili dekenai Iehova ita herevalaia, bona iseda tomadiho anedia amo Ia ita hanamoa. Bema iseda Basileia anena ta oi abia, reana ena hereva ta ta oi laloa dobu bona oi ia hamoalea dalana oi laloa.

Emu tadikaka taihu oi bamoa bona oi do idia hagoadaia. Davida be hekwakwanai ia davaria neganai, Iehova dekenai ia gwau: “Oi idia badinaia taudia vairanai, lau be emu ladana dekenai do lau abidadama, badina unai kara be namo.” (Sal. 52:9) Ita danu, hebou negadiai bona haroro gaukara sibona lasi, to tadikaka taihu ida ita moale hebou neganai, ita idia hagoadaia diba.—Roma 1:​11, 12.

Emu helaro oi hagoadaia. Salamo 62:5 ia gwau: “Lau be mai regerege lasi ida Dirava totona lau naria, Ia be egu helaro ena badina.” Ena be ita laloa inai nega oromana dokona be ia mai haraga lasi, to gau badana be ita abia dae ita naria noho gauna be do ia vara momokani. Namona be ita abia dae Iehova ena gwauhamata ibounai be do idia guguru, ena be ita naria daudau. Iseda helaro ita hagoadaia totona, Baibel ai idia guguru peroveta herevadia, Baibel ena hereva ta ta be lalohadai tamona idia hahedinaraia, bona Iehova be sibona ia herevalaia karana ita stadilaia. (Sal. 1:​2, 3) Danu, Iehova ida iseda hetura karana ita hagoadaia totona, “Dirava ena lauma ena heduru ida [ita] guriguri,” unai amo ena gwauhamata mauri hanaihanai totona do ita naria noho.—Iuda 20, 21.

King Davida bamona, namona be oi abia dae Iehova be ia dekenai idia naria noho taudia ia itaia bona Ena noho hanaihanai lalokauna ia hahedinaraia. (Sal. 33:​18, 22) Mai haheauka ida Iehova oi naria noho totona, emu mauri ai idia vara gau namodia oi laloa, dala idauidau ai Iehova oi hanamoa, emu tadikaka taihu oi bamoa bona oi do idia hagoadaia, bona emu helaro oi hagoadaia.