Egu tama sina be Katolik tomadiho idia badinaia goada. To Baibel amo Iehova ena ladana idia dibaia neganai, Iehova ena Witnes taudia ai idia lao. Tamana be Iesu ena laulau ia koroa karana ia hadokoa. To, kapenta gaukara ia diba dainai, emai ruma ena henuna dekenai Kingdom Hall ginigunana ia karaia, unai be San Juan del Monte, Philippines ena siti badana Manila dekenai.

Lau be 1952 ai lau vara, egu tama sina ese lau, egu kakadia 7, unai be memero foa bona kekeni toi dekenai Iehova idia hadibaia. Lau tubu daekau lalonai, egu tamana ese lau ia hagoadaia dina ta ta ai Baibel ena karoa ta lau duahia totona, bona lau ida iseda pablikeisen momo ia stadilaia. Nega haida, egu tama sina ese sekit vadivadi taudia bona Brens ese ia siaia taudia idia boiria emai ruma dekenai idia noho totona. Unai tadikaka edia ekspiriens namodia idia herevalaia karana ese egu ruma bese ia hagoadaia bada, bona ai ia durua emai mauri ai Iehova ena hesiai gaukara ai atoa guna totona.

Egu tama sina be Iehova idia abidadama henia goada, idia amo gau momo lau dibaia. Egu sinana be gorere dainai ia mase murinai, lagani 1971 ai tamana ida painia gaukara ai karaia hebou. To 1973 ai egu mauri lagani be 20 neganai, egu tamana ia mase. Egu tama sina lau haboioa dainai, lau mamia lau be sibona lau noho. To Baibel ai ia noho helaro be “momokani bona ia goada,” unai ese lau ia durua lalohadai maorona lau abia bona Iehova kahirakahira lau noho totona. (Heb. 6:19) Egu tamana ia mase bona daudau lasi murinai, spesel painia ena asainmen lau abia dae, unai be taoni amo ia daudau motumotu ta ladana Coron, Palawan ena provinsi ai.

Egu mauri lagani be 21 neganai, Coron dekenai lau ginidae. Lau be siti dekenai lau bada dainai, lau itaia motumotu dekenai paua bona ranu be bada lasi bona motuka be momo lasi neganai lau hoa. Unuseniai tadikaka be momo lasi bona painia  turana ta be lasi dainai, nega haida lau sibona lau haroro. Hua ginigunana ai, egu ruma bese lau reaia bada. Hanuaboi ai, guba dekenai hisiu lau itaia lalonai, egu mata ranu do idia diho. Lau mamia egu asainmen do lau rakatania bona do lau giroa lou.

Unai negadiai, Iehova dekenai egu lalohekwarahi ibounai lau gwauraia. Bena Baibel bona iseda pablikeisen amo lau duahia gaudia lau laloa lou. Nega momo Salamo 19:14 lau laloatao. Lau laloparara bema Iehova ena hesiai gaukara bona ena kara namodia lau laloa dobu, ia be “egu Nadi Badana bona egu Hoia Lou Tauna” ai do ia lao. The Watchtower ena atikol ladana “You Are Never Alone” a be lau ia durua bada. Unai lau duahia loulou. Unai be hegeregere, lau be Iehova ida lau noho, bona dala ia kehoa ia lau guriguri henia, lau stadi bona laloa dobu totona.

Coron dekenai lau ginidae bona daudau lasi murinai, lau idia abia hidi elda ta ai lau lao totona. Bona elda be lau sibona dainai, lau ese wiki ena Tiokratik Haroro Sikuli, Hesiai Hebou, Kongrigeisen Buka Stadi, bona Gima Kohorona Stadi lau hakaua matamaia. Bona wiki ta ta ai pablik tok lau henia. Lau be unai gaukara idauidau dekenai lau bisi dainai, sibona lau noho ena hemami ia ore!

Coron ai egu hesiai gaukara lau moalelaia, bona egu Baibel stiuden haida be bapatiso idia abia. To hekwakwanai haida idia vara danu. Nega haida haroro teritori dekenai lau lao totona dina ta bamona lau raka, bona lau ginidae neganai lau diba lasi edeseni do lau mahuta. Danu kongrigeisen ena teritori be mai ena motumotu maragidia momo. Bona nega momo bouti amo unuseni lau lao, ena be hurehure ia bada bona nahu lau diba lasi! Unai nega aukadia ai, Iehova ese lau ia gimaia bona hagoadaia. Gabeai lau laloparara Iehova be lau ia hegaegaelaia asainmen ma ta lau karaia totona.

Lagani 1978 ai, lau idia siaia Papua New Guinea dekenai, ia be Australia ena not kahana ai ia noho. Papua New Guinea ai ororo gabudia be momo, iena bada be kahirakahira Spain bamona. Lau hoa badina unai tano ena popiuleisen 3 milioni mai kahana be gado 800 mai kahana ai idia hereva. To moale gauna be, taunimanima momo be Melanesian Pidgin ai idia hereva diba, unai idia gwauraia Tok Pisin.

Bona nega sisina lalonai English kongrigeisen lau bamoa, unai be Port Moresby dekenai, ia be siti badana. Bena Tok Pisin kongrigeisen dekenai lau idia siaia bona gado lau dibaia matamaia. Klas dekenai lau dibaia gado be haroro gaukara dekenai lau gaukaralaia. Unai ese lau ia durua gado lau dibaia haraga totona. Daudau lasi murinai, Tok Pisin gado dekenai pablik tok ta lau karaia. Lau hoa badina Papua New Guinea dekenai lau ginidae bona lagani ta ia do abia lasi neganai, lau idia abia hidi Tok Pisin gado ena sekit naria gaukara totona. Bona provinsi ta ta ena kongrigeisen lau vadivadi henia.

Kongrigeisen ta ta be gabu daudau dekenai idia noho dainai, sekit hebouhebou momo lau hegaegaelaia bona loaloa momo lau karaia. Matamanai lau mamia lau be sibona, badina lau mai matamata, gado matamata, bona mauri dala matamata. Kongrigeisen ta amo kongrigeisen  ma ta dekenai raka lao be auka, badina ororo badadia bona dala be namo lasi. Unai dainai kahirakahira wiki ibounai lalonai peleini maragidia dekenai lau guia. Nega haida, peleini be ia gaukara namonamo lasi bona lau sibona be peleini dekenai lau guia. Unai bamona negadiai lau gari dikadika, unai be bouti dekenai lau abia hemami hegeregerena!

Taunimanima haida sibona be mai edia fon, unai dainai kongrigeisen momo be revareva amo lau tore henia. Nega momo, lau siaia revareva ia do ginidae lasi neganai, lau ginidae guna, unai dainai haida lau nanadaia Witnes taudia idia noho gabuna idia hadibaia totona. Tadikaka taihu lau davaria neganai, mai lalokau ida lau idia welkam henia bona egu hekwarahi ena badina lau laloatao. Lau ese dala idauidau ai Iehova ena heduru lau mamia, bona egu hetura karana ia ida ia goada.

Motumotu ta ladana Bougainville ai, nega ginigunana lau vadivadi neganai, headava tau bona ena hahine be mai moale ida lau idia hedavari henia, bona idia henanadai, “Ai oi laloatao, a?” Lau laloatao Port Moresby dekenai lau ginidae neganai idia lau haroro henia. Idia ida Baibel stadi lau hamatamaia, bena tadikaka ta lau hadibaia idia do ia stadi henia totona. Hari idia bapatiso vadaeni! Papua New Guinea ai lagani toi lau noho neganai, unai be lau abia hahenamo ta.

Lagani 1978 ai Coron lau do rakatania lasi neganai, taihu namona ta lau dibaia, ena ladana be Adel. Ia be ena natu maragidia rua, Samuel bona Shirley ia naria lalonai, regula painia gaukara ia karaia. Bona danu, ena sinana burukana ia naria. May 1981 ai, Philippines dekenai lau giroa lou, Adel lau adavaia totona. Ai headava murinai, regula painia ai karaia hebou bona ruma bese ai naria.

Ena be lau be mai egu ruma bese, to lagani 1983 ai, lau idia abia hidi lou, Palawan ena provinsi ta ena motumotu ladana, Linapacan dekenai spesel painia lau karaia totona. Lau bona egu ruma bese be unai gabu daudau dekenai ai lao, unuseniai Witnes ta ia noho lasi. Lagani ta bamona murinai Adel ena sinana ia mase. To hesiai gaukara dekenai ai bisi, unai ese ai ia durua emai lalohisihisi ai haheaukalaia totona. Baibel stadi momo ai hamatamaia bona idia ura hebou dekenai idia mai, unai dainai ai sibona ese Kingdom Hall maragina ta ai haginia. Lagani toi murinai, ai moale bada, badina taunimanima 110 be Memorial hebouna dekenai idia mai, unai gabu ai rakatania murinai idia momo be bapatiso idia abia.

Lagani 1986 ai, lau be Culion ena motumotu dekenai idia siaia unai gabu ena komiuniti ta ai lepera gorere taudia idia noho. Unai murinai, Adel idia abia hidi spesel painia gaukara do ia karaia totona. Matamanai, ai gari lepera gorere idia abia taudia ai haroro henia totona. To unuseniai idia noho pablisa ese ai idia hamaoroa, unai gorere taudia be muramura idia abia dainai, gorere do ia hanaia lasi. Unai lepera taudia haida be hebou totona taihu ta ena ruma dekenai idia lao. Unai bamona taudia idia mamia idia be Dirava bona taunimanima ese idia laloa bada lasi, to Baibel amo  idia dekenai iseda helaro namona ai harorolaia be moale gauna. Unai gorere taudia idia kamonai nega ta edia gorere do ia ore neganai idia moale bada.—Luka 5:12, 13.

Edena dala ai Culion dekenai emai natudia be noho dalana idia manadalaia? Lau bona Adel ese Coron amo taihu matamata rua ai boiria, unai amo emai natudia ese hebamo namona idia moalelaia diba. Samuel, Shirley, bona unai taihu matamata rua be idia sibona edia haroro dalana idia moalelaia, idia be natudia momo idia stadi henia, lau bona Adel be unai natudia edia tama sina ai stadi henia. Nega ta, ai ese ruma bese ibounai 11 ai stadi henia. Daudau lasi murinai, ai stadi henia taudia momo be idia goada idia lao dainai, kongrigeisen ta ai hamatamaia!

Matamanai, unai gabu dekenai elda be lau sibona. Unai dainai, brens ese lau idia noia Culion ai idia noho pablisa 8 totona wiki ena hebou do lau hakaua bona hanua ta ladana Marily ai idia noho pablisa taudia 9 totona unai bamona do lau karaia danu, unai hanua be hora toi lalonai bouti amo do oi lao. Unuseniai egu ruma bese ida hebou ai lao murinai, hora momo lalodiai ororo gabudia amo ai raka hanaia, hanua ta ladana Halsey dekenai Baibel stadi ai karaia totona.

Gabeai, Marily bona Halsey ai taunimanima momo be hereva momokani lalonai idia vareai dainai, unai gabu rua dekenai Kingdom Hall ai haginia. Bona Linapacan amo tadikaka taihu bona kamonai taudia be edia kohu idia henia bona konstraksen gaukarana idia durua. Marily ai idia haginia gauna be taunimanima 200 idia helai diba, unai dainai unuseniai hebouhebou badadia ai karaia diba.

Lagani 1993 ai natudia idia bada neganai, lau bona Adel be Philippines ai sekit gaukara ai matamaia. Bena lagani 2000 ai, Hesiai Gaukara Hadibaia Sikulina dekenai lau lao, unai sikuli taudia hadibaia ena treinini lau abia totona. Lau mamia lau hegeregere lasi unai sikuli ena hadibaia tauna ai do lau lao, to Adel be hanaihanai lau ia hagoadaia. Lau ia hadibaia Iehova be lau dekenai goada do ia henia, unai asainmen matamata lau  karaia totona. (Fili. 4:13) Adel be unai ia diba, badina ena be ia gorere, to ena asainmen ia hagugurua noho.

Lagani 2006 ai, Adel be gorere badana ta ia abia (Parkinson’s disease.) Bona ai hoa bada! Lau laloa emai asainmen do ai rakatania, bona Adel do lau naria. To ia gwau, “Egu gorere amo lau ia durua diba doketa ta mani oi tahua, bona lau diba Iehova ese ita do ia durua iseda hesiai gaukara ita karaia noho totona.” Bena lagani siks lalonai Iehova ena hesiai gaukara ia karaia bona ia maumau lasi. Bona ia raka diba lasi neganai, wilisea amo ia haroro. Bona ia hereva diba lasi negana, hebou ai hereva rua o tamona amo haere ia henia. Adel be ena haheauka karana dainai hanaihanai tadikaka taihu amo revareva momo ia abia ela bona 2013 ai ia mase. Lagani 30 mai kahana lalonai abidadama taihu bona egu lalokau turana namona ida lau noho, unai dainai ia mase neganai lau lalohisihisi bona sibona lau noho hemamina lau abia lou.

Adel ia ura egu asainmen do lau karaia noho, unai dainai unai bamona lau karaia. Lau bisi dainai, sibona noho hemamina lau abia lasi. Lagani 2014 ia lao 2017 ai, lau idia abia hidi iseda gaukara idia taravatua tanodia ai, Tagalog-gado kongrigeisen lau vadivadi henia totona. Unai murinai, Taiwan, United States, bona Canada ai Tagalog kongrigeisen lau vadivadi henia. Lagani 2019 ai, India bona Thailand dekenai Basileia Evanelia Sikuli ena Nao gado klas lau hakaua. Unai asainmen ibounai dekenai lau moale bada. Iehova ena hesiai gaukara hagugurua totona lau gaukara goada neganai, egu moale be bada herea.

Egu asainmen lau karaia gabudia ai, lau hedavari henia tadikaka taihu lau lalokau henia, unai dainai ia auka idia lau rakatania totona. Unai bamona negadia ai, Iehova dekenai lau tabekau momokani. Hanaihanai iena heduru lau itaia, unai ese lau ia hagoadaia mai kudouna ibounai ida idia vara senisi lau abia dae totona. Hari, Philippines dekenai spesel painia gaukara lau karaia noho. Lau be egu kongrigeisen matamata lau bamoa noho, idia be ruma bese ta bamona lau idia durua bona naria. Danu, lau moale badina Samuel bona Shirley be edia sinana ena abidadama karana idia tohotohoa noho.—3 Ioa. 4.

Oibe, egu mauri ai hekwakwanai momo lau davaria, idia ta be egu adavana lalokauna ena hisihisi lau itaia, bona ia abia gorere badana dainai ia mase. Danu, noho daladia idauidau lau haheaukalaia. To, lau itaia Iehova be “ita ta ta amo ia daudau lasi.” (Kara 17:27) Iehova ena imana be “ia kwadogi lasi” ena hesiai taudia ia durua bona hagoadaia totona, ena be gunika gabudia ai ita noho. (Isa. 59:1) Egu Nadi Badana, Iehova, be egu mauri ibounai lalonai lau ida ia noho, ia dainai lau tanikiu bada. Bona momokani, lau be nega ta, sibona lau noho lasi.