1-2. Edena dala ai ita be paragraf 1 ese ia herevalaia mero matamata bamona?

 MANI mero matamata ta ita laloa ena tama sina be taga taudia. Nega ta dika badana ta ia vara bona ena tama sina idia mase. Unai mero matamata be ia lalohisihisi bada. To, ia davaria, ena tama sina be moni bada herea idia abitorehai. Mani oi laloa, ia be ena tama sina edia moni ia abia lasi, to edia abitorehai badana do ia haloua. Bona momo idia ura edia abitorehai do ia haloua haraga. To ia hegeregere lasi, unai abitorehai ibounai ia haloua totona.

² Dala haida ai, ita be unai mero matamata bamona. Iseda tama sina ginigunadia, Adamu bona Heva be goevadae taudia bona paradaiso hairaina dekenai idia noho. (Gen. 1:27; 2:7-9) Bona unuseniai, mai moale ida idia noho hanaihanai diba. To gau ta ia vara dainai, Adamu bona Heva idia kara dika. Unai dainai, edia noho gabuna Paradaiso bona mauri hanaihanai ena hahenamo idia haboioa. Edia natudia dekenai dahaka idia henia? Baibel ia gwau: “Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona mase be taunimanima ibounai dekenai  ia hanaia lao, badina idia ibounai be idia kara dika vadaeni.” (Roma 5:12) Adamu ese ita dekenai ia henia hanai gauna be kara dika, unai dainai ita mase. Unai kara dika be abitorehai badana ta bamona bona ta ese ia haloua diba lasi.—Sal. 49:8.

 3. Dahaka dainai iseda kara dika be “abitorehai” bamona?

³ Iesu ese kara dika be “abitorehai” ida ia hahegeregerea. (Mat. 6:12; Luka 11:4) Ita kara dika neganai, unai be hegeregere Iehova dekenai ita abitorehai. Bona ita sibona ese unai abitorehai ita haloua diba lasi. To, ita mase neganai, unai abitorehai ia gwauatao.—Roma 6:7, 23.

 4. (a) Bema ta ese ita ia durua lasi, kara dika taudia ibounai dekenai dahaka do ia vara? (Salamo. 49:7-9) (b) Baibel ai inai hereva “kara dika” be dahaka ia herevalaia? (Maua ladana, “ Kara Dika” itaia.)

⁴ Adamu bona Heva ese idia haboioa gaudia ita abia lou diba, a? Ita sibona ese unai ita karaia diba lasi. (Salamo 49:7-9 duahia.) Bema ta ese ita ia durua lasi, vaira nega ena helaro do ita abia lasi eiava do ita toreisi lou lasi. Momokani, animal hegeregerena, do ita mase bona mauri lou lasi.—Had. 3:19; 2 Pet. 2:12.

 5. Edena dala ai iseda lalokau Tamana ese iseda kara dika ena davana ia haloua? (ena laulau itaia.)

⁵ Atikol ena matamanai ita herevalaia mero matamata ita laloa, bema taga tauna ta ia ura ena abitorehai ibounai ia haloua mero ena hemami be edena bamona? Momokani, do ia moale bada bona unai tauna ena hariharibada karana do ia abia dae. Unai hegeregerena, iseda lalokau Tamana, Iehova, be ita dekenai harihari gauna ta ia henia, unai amo Adamu amo ita abia kara dika ena davana ia haloua diba. Iesu ia gwau: “Dirava ese tanobada ia lalokau henia bada dainai, ena Natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.” (Ioa. 3:16) Danu, unai harihari gauna ese dala ia kehoa Iehova ita tura henia totona.

 6. Inai atikol ai dahaka do ita herevalaia, bona dahaka dainai?

⁶ Edena dala ai unai harihari gauna amo namo ita abia diba bona iseda kara dika eiava “abitorehai” be Iehova ese ia gwauatao? Unai henanadai ena haere be Baibel ai idia noho herevadia amo do ita davaria. Hegeregere, Dirava ida maino ai ita noho, Dirava ida maino karaia, mauri davana, ita ia hoia lou, bona ita ia gwauraia maoromaoro. Inai atikol ai unai hereva ta ta edia anina do ita herevalaia. Bona unai ita laloa dobu neganai, Iehova ena dika gwauatao karana do ita laloa bada.

 TAHUA GAUNA: DIRAVA IDA MAINO AI ITA NOHO

 7. (a) Adamu bona Heva be dahaka gaudia ma haida idia haboioa? (b) Ita be Adamu bona Heva edia natudia dainai dahaka ita karaia be namo? (Roma 5:10, 11)

⁷ Adamu bona Heva idia kara dika neganai, mauri hanaihanai idia abia diba lasi, bona idia be edia Tamana, Iehova, ena inai taudia ai idia lao. Guna, Adamu bona Heva be Dirava ena ruma bese lalonai idia noho. (Luka 3:38) To Iehova idia gwau-edeede henia neganai, ena ruma bese amo idia ia kokia, unai nega ai, idia be natudia idia do havaraia lasi. (Gen. 3:23, 24; 4:1) Ita be edia natudia dainai, Iehova ida maino ai ita noho be namo. (Roma 5:10, 11 duahia.) Anina be, Iehova ida iseda hetura karana ita hagoadaia be namo. Referens ta ia gwau, iniseniai idia gaukaralaia Greek herevana, “maino ai noho” ena anina ma ta be, “emu inai tauna be emu turana ai oi halaoa.” Ita moale badina Iehova ese kara ta ia karaia iena turana ai ita lao totona. Edena dala ai?

DIRAVA IDA MAINO KARAIA

 8. Dirava ese dahaka ia karaia ia ida iseda hetura karana ita hanamoa lou totona?

⁸ Dirava ese dala ia karaia ia ida maino ita karaia totona, unai amo ia ida iseda hetura karana ita hanamoa lou diba. Ia ese unai dala amo Adamu ia haboioa gauna hegeregerena, gau ta do ia henia lou diba. Danu, Keristani Greek Toretoredia ese idia hahedinaraia, Iehova be dala ia karaia ta be iena turana ai ia lao totona.—Roma 3:25.

 9. Iehova be dahaka ia karaia, unai amo Israela taudia edia kara dika ia gwauatao diba?

⁹ Iehova be dala ta ia karaia Israela taudia edia kara dika ia gwauatao totona, unai amo ia ida hetura karana namona idia moalelaia diba. Israela ai, lagani ta ta lalonai Kara Dika Ena Davana Karaia Dinana idia moalelaia. Unai dina ai, hahelaga tauna badana be taunimanima totona animal ia bouboulaia. Animal bouboulaia karana ese Israela taudia edia kara dika ia kokia momokani lasi, badina taunimanima ese animal idia hereaia. To, idia helalo-kerehai Israela taudia be Iehova ese ia gwauraia dalana ai, animal idia bouboulaia neganai, mai ura ida edia kara dika ia gwauatao. (Heb. 10:1-4) Kara Dika Ena Davana Karaia Dinana bona dina ma haida ai idia henia boubou gaudia dainai Israela taudia idia laloparara idia be kara dika taudia bona ta ese edia kara dika ia kokia momokani be namo.

10. Iehova be dahaka ia karaia, taunimanima edia kara dika ia gwauatao momokani totona?

¹⁰ Iehova be dahaka ia karaia taunimanima edia kara dika ia gwauatao momokani totona? Ia ese dala ia karaia ena Natuna lalokauna be “nega tamona ia sibona ia henia, taunimanima momo edia kara dika huaia totona.” (Heb. 9:28) Iesu be “ena mauri ia henia, taunimanima momo edia mauri davana karaia totona.” (Mat. 20:28) Mauri davana be dahaka?

MAURI DAVANA

11. (a) Baibel ena hereva hegeregerena, dahaka dainai ta ese mauri davana ia henia be namo? (b) Daika sibona ese unai mauri davana ia henia diba?

¹¹ Baibel ena hereva hegeregerena, mauri davana ese dala ia kehoa Dirava ida maino ita karaia totona. Iehova ese unai dala amo ita haboioa gauna ia henia lou diba. Edena dala ai? Laloatao, Adamu bona Heva be edia mauri goevana idia haboioa bona do idia mauri hanaihanai lasi. Unai dainai mauri davana be ia boio gauna ida ia hegeregere be namo. (1 Tim. 2:6) Bona tau tamona sibona ese mauri davana ia henia diba, ia  be (1) goevadae; (2) tanobada ai ia mauri hanaihanai diba; bona (3) ia ura bada ita totona ena mauri ia bouboulaia. Unai tauna ena mauri sibona ese ia boio gauna ena davana ia henia diba.

12. Dahaka dainai Iesu be ia hegeregere mauri davana ia henia totona?

¹² Iesu be ia hegeregere mauri davana ia henia totona, mani unai ena badina toi ita herevalaia. (1) Ia be goevadae bona “kara dika ta ia karaia lasi.” (1 Pet. 2:22) (2) Unai dainai, ia hegeregere tanobada dekenai ia mauri hanaihanai totona. Bona (3) ia be mai ura ida ita totona ia mase. (Heb. 10:9, 10) Tau ginigunana Adamu ia do kara dika lasi neganai, ia goevadae hegeregerena, Iesu be goevadae tauna. (1 Kor. 15:45) Unai dainai Iesu be ita totona ia mase neganai, ia hegeregere Adamu ese ia haboioa gauna ia hoia lou totona. (Roma 5:19) Unai dala amo, Iesu be “Adamu ginigabena” ai ia lao. Goevadae tauna ma ta be Adamu ese ia haboioa gauna ia hoia lou be anina lasi. Iesu be “nega tamona sibona” ia mase.—Heb. 7:27; 10:12.

13. Dahaka ese dala ia kehoa Iehova ida hetura karana namona ita moalelaia totona?

¹³ Dahaka ese dala ia kehoa Iehova ida hetura karana namona ita moalelaia totona? Iehova ese iseda dika ia gwauatao totona, dala ta ia hegaegaelaia. Iesu ese ena mauri goevadaena ia bouboulaia, iseda kara dika ena davana ia henia totona.—Efe. 1:7; Heb. 9:14.

NAMO ITA DAVARIA: ITA IA HOIA LOU BONA GWAURAIA MAOROMAORO

14. Dahaka do ita herevalaia, bona dahaka dainai?

¹⁴ Iehova ese ita totona ia karaia gauna dainai dahaka namo ita davaria? Unai henanadai ita haerelaia totona, Baibel ese ia gaukaralaia hereva rua edia anina do ita herevalaia. Unai ese ita do ia durua Iehova ena dika gwauatao karana ena namo ita lalopararalaia totona.

15-16. (a) Baibel ai inai hereva “hoia lou” ena anina be dahaka? (b) Bona iseda hemami be edena bamona?

¹⁵ Baibel ia gwau, mauri davana ese ita ia hoia lou eiava ruhaia. Aposetolo Petero ia gwau: “Umui diba, Dirava ese idia dika diba gaudia, hegeregere siliva bona golo, amo emui sene taudia edia anina lasi mauri dalana amo umui ia ruhaia lasi [anina be “ta ese emui mauri davana ia karaia; umui ia hoia lou.”] To ia ese Keriso ena dava bada rarana amo umui ia ruhaia, unai be ia goeva bona maka ta lasi mamoe natuna ena rara bamona.”—1 Pet. 1:18, 19; ftn.

¹⁶ Mauri davalaia boubouna ese, ita be kara dika bona mase edia igui amo ia ruhaia. (Roma 5:21) Iesu ena dava bada rarana amo ita ia hoia lou dainai, Iehova bona Iesu ita tanikiu henia bada.—1 Kor. 15:22.

17-18. (a) Iehova ese ita ia gwauraia maoromaoro ena anina be dahaka? (b) Edena dala ai unai ese ita dekenai namo ia havaraia?

¹⁷ Baibel ia gwau, Iehova ese ena hesiai taudia ia gwauraia maoromaoro, ena anina be iseda kara dika ia kokia momokani. Ena be Iehova ese unai ia karaia, to ena kara maoromaoro taravatudia ia badinaia. Iehova be iseda kara namodia dainai ita ia gwauraia maoromaoro lasi. Danu, ia be kara dika ia abia dae lasi. To, Iehova be mai ura ida iseda kara dika ia gwauatao, badina Ia bona Iesu ese idia henia mauri davana ita abidadama henia.—Roma 3:24; Gal. 2:16.

¹⁸ Iehova ese ita ia gwauraia maoromaoro neganai, dahaka namo ita davaria? Iesu ese ia gwauraia maoromaoro taudia haida be ia ida guba dekenai do idia lohia bona Dirava ena natudia ai do idia lao. (Tito 3:7; 1 Ioa. 3:1) Edia kara dika ia gwauatao. Unai be hegeregere kara dika ta idia karaia lasi, unai dainai  idia hegeregere, Basileia lalonai idia noho totona. (Roma 8:1, 2, 30) Bona Iehova ese ia gwauraia maoromaoro taudia ma haida be, tanobada ai do idia noho hanaihanai. Iehova ese edia dika ia gwauatao bona ena turana ai idia lao. (Iam. 2:21-23) Bona Aramagedono amo do idia roho mauri hutuma bada taudia be mase diba lasi maurina do idia abia. (Ioa. 11:26) Danu, idia mase vadaeni “kara maoromaoro taudia” bona “kara maoromaoro lasi taudia” be do idia toreisi lou. (Kara 24:15; Ioa. 5:28, 29) Kahirakahira, tanobada ai Iehova idia badinaia taudia ibounai be, “Dirava ena natudia edia ura kwalimu hereadaena do idia abia.” (Roma 8:21) Unai nega ai iseda Tamana, Iehova, ida hetura karana namona do ita moalelaia!

19. Iehova bona Iesu be ita totona idia karaia gauna dainai, dahaka namo ita davaria? (Maua ladana, “ Ita Dekenai Ena Anina be Dahaka?” itaia danu.)

¹⁹ Momokani, iseda mauri be matamanai ita herevalaia mero matamata ena mauri bamona, ia be gau ibounai ia haboioa bona abitorehai badana ia haloua diba lasi. To, ita be Iehova ita tanikiu henia, badina ita ia durua. Ia ese iseda dika ia gwauatao totona, dala ia kehoa unai amo Iesu ese iseda mauri davana ia karaia. Iesu Keriso ita abidadama henia neganai, kara dika bona mase amo ita ia hoia lou eiava ia ruhaia. Iehova ese iseda kara dika ia gwauatao neganai, unai be hegeregere kara dika ta ita karaia lasi. Bona mai anina bada gauna be, iseda lalokau guba Tamana, Iehova ida hetura karana namona ita moalelaia diba.

20. Atikol 32 ai dahaka do ita herevalaia?

²⁰ Iehova bona Iesu ese ita totona idia karaia gaudia ita laloa dobu neganai, idia do ita tanikiu henia bada. (2 Kor. 5:15) Bema idia ese ita idia durua lasi, ita be helaro lasi! Atikol 7 ai haheitalai haida do ita herevalaia, unai ese mauri davana amo namo ita davaria dalana do ia hahedinaraia.