STADI ATIKOL 8
ANE 130 Dika Ita Gwauatao
Iehova Ena Dika Gwauatao Karana Oi Tohotohoa Dalana
“Iehova ese mai kudouna ibounai ida umui ia gwauatao hegeregerena, namona be umui danu be unai bamona umui karaia.”—KOL. 3:13.
STADI ENA BADINA
Inai atikol ai ita ia hahisia tauna ena dika ita gwauatao daladia haida do ita herevalaia.
1-2. (a) Edena bamona negadiai, do ia auka ta ena dika ita gwauatao totona? (b) Denise be edena dala ai dika gwauatao karana ia hahedinaraia?
MA HAIDA edia kara dika oi gwauatao be auka, a? Ita momo be unai bamona, bema ma ta ena hereva eiava kara ese iseda lalona ia hahisia momokani. To, unai hemami ita hanaia diba bona ta ena dika do ita gwauatao. Hegeregere, mani taihu ta ladana Denise, a ese dika gwauatao karana ia hahedinaraia dalana ita laloa. Lagani 2017 ai, Denise bona ena ruma bese be Iehova ena Witnes taudia edia hedikwota matamatana idia vadivadi henia. Bona ruma dekenai idia giroa lou lalonai, motuka ta ese edia motuka ia bampaia. Unai aksiden dainai Denise ia maserea. Bona ia noga neganai, ia kamonai ena natudia be bero bada idia abia bona ena adavana, Brian ia mase. Denise be ia vara gauna ia laloa neganai, ia gwau, “Lau lalohisihisi bada bona daradara.” Gabeai, taihu ia kamonai aksiden ia vara neganai, unai draiva be ia inuinu eiava drag ia ania lasi, bona fon eiava gau ma ta ia itaia lasi. Unai dainai Iehova dekenai maino totona ia guriguri, unai amo ena hemami ia biagua diba.
2 Draiva be taihu ena adavana ia hamasea dainai, pulisi ese idia dogoatao bona kota dekenai idia abia lao. Bema kota idia laloa draiva be ia kerere, dibura ruma dekenai idia atoa diba. To kota ese Denise idia hamaoroa, sivarai maorona ia gwauraia neganai draiva do idia hadiburaia. Denise ia gwau: “Lau mamia ta be egu bero idia turia gauna ia utua bona toto dekenai damena bada herea ia bubua, badina lau be egu mauri ai ia vara sivarai dikana do lau herevalaia.” Wiki haida murinai, Denise be kota dekenai ia helai bona ena ruma bese ia hahisia tauna vairanai ia vara sivaraina do ia herevalaia. Dahaka ia gwau? Denise ese diadi tauna ia noia, unai draiva dekenai hebogahisi do ia hahedinaraia. b Denise ia hereva ore murinai, diadi tauna ia tai matamaia. Ia gwau: “Lagani 25 lalonai diadi gaukara lau karaia neganai, inai kota rumana ai, unai bamona hereva ta lau kamonai lasi. Hisihisi idia davaria taudia edia ruma bese ese lau idia noia lasi, kerere ia karaia tauna dekenai hebogahisi lau hahedinaraia totona. Nega ta lalokau bona dika gwauatao herevadia lau kamonai lasi.”
3. Dahaka ese Denise ia durua dika ia gwauatao totona?
3 Dahaka ese Denise ia durua dika ia gwauatao totona? Ia ese Iehova ena dika gwauatao karana ia laloa dobu. (Mika 7:18) Iehova ese iseda dika ia gwauatao karana ita laloa bada neganai, unai ese ita do ia hagoadaia ma haida edia dika ita gwauatao totona.
4. Iehova ia ura dahaka ita karaia? (Efeso 4:32)
4 Iehova ia ura ma haida edia dika ita gwauatao, ia ese iseda dika ia gwauatao hegeregerena. (Efeso 4:32 duahia.) Ia ura ita noho hegaegae ita idia hahisia taudia edia dika ita gwauatao totona. (Sal. 86:5; Luka 17:4) Inai atikol ai gau toi do ita herevalaia, unai ese ita do ia durua dika ita gwauatao noho totona.
EMU HEMAMI OI LALOA
5. Aonega Herevadia 12:18 hegeregerena, ta ese ita ia hahisia neganai, iseda hemami be edena bamona?
5 Iseda turana namona eiava ruma bese tauna ta ena hereva eiava kara dainai, ita lalohisihisi diba. (Sal. 55:12-14) Nega haida unai lalohisihisi ena hemami be ta ese kaia amo ita ia gwadaia bamona. (Aonega Herevadia 12:18 duahia.) Reana iseda hemami do ita laloa bada lasi. To unai be hegeregere, ta be kaia amo ita ia gwadaia bona bero gabuna amo kaia ita kokia lasi. Unai hegeregerena, bema iseda lalohisihisi ena hemami ita laloa bada lasi, unai ese ita do ia durua lasi.
6. Ta ese ita ia hahisia neganai, dahaka ita karaia?
6 Ta ese ita ia hahisia neganai, ita karaia gauna ginigunana be ita badu. Bona Baibel ese ia hahedinaraia do ita badu, to ia gwau, ita badu noho lasi be namo. (Sal. 4:4; Efe. 4:26) Dahaka dainai? Badina nega momo iseda hemami ese ita ia hakaua kara ta ita karaia totona. Bona badu lasi karana ese namo ia havaraia. (Iam. 1:20) Laloatao, ta ese ita ia habadua neganai do ita badu, to unai badu ita biagua diba.
Ta ese ita ia habadua diba, to abia hidi ita karaia diba do ita badu noho eiava lasi
7. Ta ese ita ia hahisia neganai, edena bamona ita mamia?
7 Ta ese ita ia kara namo henia lasi neganai, unai ese ita ia hahisia. Hegeregere, taihu ta ladana Ann ia gwau: “Lau maragi neganai, egu tamana ese egu sinana ia rakatania bona lau ia naria hahinena ia adavaia. Lau mamia lau ia laloa bada lasi. Bona natudia idia havaraia neganai, lau mamia egu gabu idia abia. Lau tubu daekau neganai, lau mamia ta ese lau ia ura henia lasi.” Taihu ma ta ladana Georgette ena tau be hahine ma ta ida ia loa hebou neganai, ia abia hemami ia herevalaia: “Ai maragi negana amo ai be tura namodia. Bona painia gaukara ai karaia hebou! Lau lalohisihisi bada. Dokonai emai headava ia dika bona ai divos.” Bona taihu ta ladana, Naomi ia gwau: “Lau laloa lasi, egu adavana ese lau do ia hahisia. Unai dainai lau ia hamaoroa ia be hehuni ai ponografi ia itaia neganai, lau mamia lau ia koia bona ia ura henia lasi.”
8. (a) Dahaka dainai ma haida edia dika ita gwauatao be namo? (b) Dika ita gwauatao neganai, dahaka namo ita davaria? (Maua ladana, “ Bema Ta ese Ita Ia Habadua be Edena Bamona?” itaia.)
8 Haida ese ita dekenai idia karaia eiava gwauraia gaudia ita biagua diba lasi, to ita sibona ita biagua diba. Bona ita karaia diba gau namona ta be edia dika ita gwauatao. Dahaka dainai? Badina Iehova ita lalokau henia bona ia ura kara dika ita gwauatao. Bema ita badu noho bona dika ita gwauatao lasi, kerere ita karaia diba bona iseda helt do ita hadikaia. (Aon. 14:17, 29, 30) Mani taihu ta ladana, Christine ena haheitalai ita laloa. Ia gwau: “Lau badu eiava lalohisihisi neganai, lau kiri momo lasi bona aniani maorodia lau ania lasi. Danu, lau mahuta namonamo lasi bona egu hemami lau biagua be auka. Unai dainai egu adavana bona ma haida lau kara namo henia lasi.”
9. Dahaka dainai badu noho karana ita hadokoa be namo?
9 Ena be ita ia hahisia tauna be sori herevana ia gwauraia lasi, to abia hidi ita karaia diba ena dika ita gwauatao totona. Edena dala ai? Matamanai ita herevalaia taihu, Georgette ia gwau: “Nega daudau lalonai egu adavana gunana lau badu henia, to unai kara lau hadokoa. Unai dainai, lalomaino lau abia.” Ita badu noho lasi neganai, unai ese ita ia durua ma haida ita kara namo henia totona. Danu, ita sibona dekenai namo do ita havaraia bona iseda mauri do ita moalelaia lou. (Aon. 11:17) To dahaka do oi karaia, bema emu lalona oi hadaia lasi ta ena dika oi gwauatao totona?
BADU KARANA ITA HADOKOA DALANA
10. Dahaka dainai ita sibona dekenai nega ita henia badu karana ita hadokoa totona? (Laulau itaia danu.)
10 Edena dala ai badu karana oi hadokoa diba? Dala ta be nega oi henia emu hemami ia namo totona. Ta be bero badana ta ia abia dainai, doketa edia heduru ia abia murinai, nega haida lalonai do ia naria, unai amo ena bero do ia namo. Unai hegeregerena, reana nega ia hanaia murinai, mai kudouna ibounai ida ita ia hahisia tauna ena dika ita gwauatao.—Had. 3:3; 1 Pet. 1:22.
Bero ita davaria neganai, ita naria namonamo bona nega ia hanaia lalonai do ia namo, ta ese iseda lalona ia hahisia neganai, unai bamona ita karaia danu (Paragraf 10 itaia)
11. Edena dala ai guriguri karana ese oi ia durua diba, dika oi gwauatao totona?
11 Guriguri amo Iehova ena heduru oi noia, ma haida edia dika oi gwauatao totona. c Matamanai ita herevalaia taihu, Ann be guriguri karana ese ia durua dalana ia herevalaia. Ia gwau: “Emai ruma bese lalonai, emai hereva eiava kara be ia maoro lasi, unai dainai Iehova lau noia ai ta ta emai dika ia gwauatao totona. Bena egu tamana bona ena adavana matamata dekenai, revareva ta lau torea bona idia lau hamaoroa edia dika lau gwauatao.” Ann ia hekwarahi unai ia karaia totona. To ia gwau: “Lau ura Iehova ena dika gwauatao karana lau tohotohoa, unai amo egu tamana bona ena adavana be Iehova do idia dibaia namonamo.”
12. Dahaka dainai Iehova dekenai ita tabekau, to iseda hemami lasi? (Aonega Herevadia 3:5, 6)
12 Iehova dekenai oi tabekau, to emu hemami dekenai lasi. (Aonega Herevadia 3:5, 6 duahia.) Iehova be hanaihanai ia diba dahaka be namo ita totona. (Isa. 55:8, 9) Bona ita do ia noia lasi ita ia hahisia gauna ta ita karaia totona. Unai dainai ita ia hagoadaia dika ita gwauatao neganai, ita abia dae diba unai ese ita dekenai namo do ia havaraia. (Sal. 40:4; Isa. 48:17, 18) To, bema iseda hemami dekenai ita tabekau, ma haida edia dika do ita gwauatao lasi. (Aon. 14:12; Ier. 17:9) Guna ita herevalaia taihu, Naomi, ia gwau: “Matamanai, lau mamia egu adavana be ponografi ia itaia dainai, ena dika lau gwauatao lasi be maoro. Lau gari, dika lau do ia hahisia lou eiava lau ia hahisia karana do ia laloa bada lasi. Bona Iehova be egu hemami ia lalopararalaia. To, unai ese ia hahedinaraia lasi Iehova be egu lalohadai dekenai ia lalotamona. Egu hemami ia diba bona nega ia hanaia murinai, egu badu karana do ia ore, to ia ura dika lau gwauatao.” d
LALOHADAI MAORONA ABIA DALANA
13. Roma 12:18-21 hegeregerena, dahaka ita karaia be namo?
13 Ita ia hahisia bada tauna ena dika ita gwauatao neganai, ita ura lasi ia vara gauna ita herevalaia lou, to namona be gau ma haida ita karaia danu. Bema ita ia hahisia tauna be iseda Keristani tadikaka eiava taihu, iseda tahua gauna be maino ita karaia. (Mat. 5:23, 24) Iseda badu karana ita hadokoa bona iseda lalona ita hadaia hebogahisi ita hahedinaraia bona dika ita gwauatao. (Roma 12:18-21 duahia; 1 Pet. 3:9) Dahaka ese ita do ia durua unai ita karaia totona?
14. Dahaka ita karaia be namo, bona dahaka dainai?
14 Iehova ese ia laloa dalana hegeregerena, ita ia habadua tauna ita laloa be namo. Iehova be taunimanima edia kara namodia ia itaia. (2 Siv. 16:9; Sal. 130:3) Bema oi be ta ena kerere sibona oi tahua, oi be ena kerere sibona do oi laloa. To ta ena kara namodia ita laloa bada neganai, do ia auka lasi ena dika ita gwauatao totona. Hegeregere, tadikaka ta ladana Jarrod ia gwau: “Tadikaka ta ese lau ia hahisia neganai, ena kara namodia momo lau laloa, unai dainai ia auka lasi ena dika lau gwauatao totona.”
15. Dahaka dainai ta oi hamaoroa ena dika oi gwauatao be mai ena namo?
15 Mai anina bada gauna ma ta be, oi ia hahisia tauna oi hamaoroa ena dika oi gwauatao. Dahaka dainai? Matamanai ita herevalaia taihu, Naomi, ia gwau: “Egu adavana be lau ia nanadaia, ‘Egu kara dika oi gwauatao vadaeni, a?’ Lau ura hamaoroa ena dika lau gwauatao, to ia auka. Bena lau laloparara egu kudouna ai, ena dika lau gwauatao momokani lasi. Nega ia hanaia murinai, lau hegeregere ia dekenai inai mai anina bada herevadia lau gwauraia diba, ‘Emu dika lau gwauatao.’ Egu adavana be unai hereva ia kamonai neganai, ia tai. Lau hoa badina ena hemami ia namo bona lalomaino lau abia. Unai murinai, ia lau trast lou bona emai hetura karana ia goada.”
16. Dika gwauatao karana dekenai dahaka oi dibaia?
16 Iehova ia ura ma haida edia dika ita gwauatao. (Kol. 3:13) To, ia auka dika ita gwauatao totona. Bema iseda hemami ita laloa bada bona badu karana ita hadokoa, dika ita gwauatao diba. Bena lalohadai namodia do ita abia.—Maua ladana, “ Dika Ita Gwauatao Daladia Toi” itaia.
DIKA GWAUATAO KARANA ENA NAMO OI LALOA
17. Edena dala ai dika gwauatao karana ese namo ia havaraia?
17 Badina momo dainai, dika ita gwauatao. Mani unai badina haida ita herevalaia. Ginigunana be, iseda hebogahisi Tamana, Iehova ita tohotohoa bona ia ita hamoalea. (Luka 6:36) Iharuana be, ita hahedinaraia ita moale badina Iehova ese iseda dika ia gwauatao. (Mat. 6:12) Bona ihatoina be, iseda helt ia namo bona hetura karana ia goada.
18-19. Dika ita gwauatao karana ese dahaka namo do ia havaraia?
18 Ma haida edia dika ita gwauatao neganai, ita laloa lasi dalanai gau namodia do idia vara. Hegeregere, matamanai ita herevalaia taihu, Denise dekenai ia vara gauna mani ita herevalaia. Taihu ia diba lasi unai negai, aksiden ia havaraia tauna be kota murinai, ia ura sibona do ia hamasea. To, Denise ena dika gwauatao karana ese unai tauna ena kudouna ia hamarerea, unai dainai Iehova ena Witnes taudia ida Baibel ia stadilaia matamaia.
19 Reana do ita mamia, ta ena dika ita gwauatao be mai ena hekwarahi, to unai ese namo do ia havaraia. (Mat. 5:7) Unai dainai, ita gaukara goada Iehova ena dika gwauatao karana ita tohotohoa totona.
ANE 125 “Hebogahisi Taudia be Idia Moale!”
a Ladana haida idia haidaua.
b Unai bamona negadiai, Keristani taudia ta ta be do idia karaia gauna totona, sibona ese abia hidi idia karaia.
c Inai orijinol ane be jw.org dekenai oi itaia, “Forgive One Another,” “Forgive Freely,” bona “Friends Again.”
d Ena be ponografi itaia karana be kara dikana bona lalohisihisi ia havaraia, to unai ese kerere lasi adavana dekenai maoro ia henia lasi ia divos totona.
