HARI inai negai, momo idia ura ma haida ese idia laloa bada be namo? Ena be haida ese idia kara namo henidia, to idia dekenai unai be hegeregere lasi. Sibona laloa bada bona tanikiu lasi karadia be dina gabedia ena toa haida.—2 Tim. 3:2.

Oibe, sibona laloa bada karana be guna ia vara danu. Adamu bona Heva be edia lalona idia hadaia idia sibona ese namo bona dika idia abia hidi totona, idia karaia abia hidi dainai ita ibounai be hisihisi ita davaria. Haheitalai ma ta be Iuda ena King Usaia, ia laloa ia be mai ena maoro dubu helaga dekenai bonana namo muramura do ia gabua, to unai be kerere. (2 Siv. 26:18, 19) Unai hegeregerena, Farisea taudia bona Sadukea taudia idia abia dae, idia be Aberahamo ena bese taudia dainai Dirava ena lalonamo idia abia be namo.—Mat. 3:9.

Ita be sibona idia laloa bada taudia bona hekokoroku taudia huanai ita noho dainai, edia kara ese ita idia hakaua kerere diba. (Gal. 5:26) Reana do ita laloa gau haida dekenai dagi badana ita abia eiava iseda ladana idia hanamoa be namo. Edena dala ai unai bamona lalohadai ita dadaraia diba? Ginigunana be, unai gauna dekenai Iehova ena lalohadai ita abia be namo. Baibel ena hakaua herevadia rua ese ita do idia durua.

Iehova ia diba dahaka ita karaia be namo. Mani inai haheitalai haida ita laloa.

• Iehova ia ura tau ese ena adavana do ia matauraia bona hahine danu ese ena tau ia lalokau henia be namo. (Efe. 5:33) Headava taudia ese mahuta hebou urana be ta ta dekenai sibona idia hahedinaraia be namo. (1 Kor. 7:3) Tama sina be mai edia maoro natudia ese idia kamonai henia totona, bona natudia be tama sina  ese idia durua bona lalokau henia be namo.—2 Kor. 12:14; Efe. 6:2.

• Kongrigeisen lalonai, ita ese elda taudia ita matauraia be namo. (1 Tes. 5:12) To, elda taudia be mai edia maoro lasi edia tadikaka taihu idia biagua totona.—1 Pet. 5:2, 3.

• Dirava ese tanobada ena gavamani dekenai maoro ia henia, takisi davana do idia abia bona edia henunai idia noho taudia ese do idia matauraidia.—Roma 13:1, 6, 7.

Iehova be mai lalokau ida gau momo ia henia. Ita be kara dika taudia dainai, do ita mase be maoro. (Roma 6:23) To, Iehova be ena noho hanaihanai lalokauna dainai ita dekenai hahenamo momo ia henia. (Sal. 103:10, 11) Ia amo ita abia hahenamo ta ta be ena hebogahisi hereadaena dainai ia henia.—Roma 12:6-8; Efe. 2:8.

Tanobada taudia edia lalohadai oi tohotohoa lasi. Reana ita laloparara lasi dalanai, do ita laloa ita be ma haida ita hereaia be namo. Iesu ese ia hahedinaraia unai lalohadai ita abia be auka lasi, bona gaukara taudia edia davana idia abia ena parabole amo unai ia herevalaia. Gaukara taudia haida be daba momokani ai idia matamaia, haida be dina tubu ai, bona haida be hora tamona sibona idia gaukara. Grup ginigunana idia laloa idia ese pei badana idia abia be namo, badina gaukara badana idia karaia. (Mat. 20:1-16) Iesu ese unai parabole amo ia hahedinaraia, namona be ena murinai idia raka taudia idia abia dae Dirava ese idia dekenai ia henia gaudia be hegeregere.

Oi abia gaudia dainai oi tanikiu. To namo lasi oi ura gau ma haida oi abia. (1 Tes. 5:18) Aposetolo Paulo oi tohotohoa, ia be Korinto taudia amo ena dabu gaudia totona ia noinoi lasi, ena be mai ena maoro unai ia karaia totona. (1 Kor. 9:11-14) Namona be ita abia dae ita abia hahenamo ta ta be hegeregere bona gau ma haida ita ura abia lalohadaina ita dadaraia.

Oi manau. Ta be nega ibounai sibona ia laloa bada neganai, do ia ura ma haida ese ia idia laloa bada. Bema ita manau, unai bamona lalohadai do ita abia lasi.

 Peroveta tauna Daniela be manau karana dekenai haheitalai namona ia hahedinaraia. Ia tubu dalana, ena hairai, diba, bona ia karaia diba gaudia dainai, do ia laloa ia be hegeregere dagi bada ia abia bona ma haida ese idia hanamoa. (Dan. 1:3, 4, 19, 20) To Daniela be ia manau, unai dainai Iehova ese ia laloa bada.—Dan. 2:30; 10:11, 12.

Namona be inai tanobada taudia ese idia hahedinaraia noho karadia, sibona laloa bada bona hekokoroku karana ita dadaraia. Bona Iehova ena hebogahisi hereadaena dainai ita dekenai ia henia hahenamo ta ta ita moalelaia.