NEGA ta hekwakwanai ta oi davaria neganai, oi mamia ta ese oi ia durua be namo, a? Ita be “nega aukadia” ai ita noho dainai, ita lalohisihisi diba bona sibona ita noho hemamina do ita abia. (2 Tim. 3:1) To, hekwakwanai idauidau ita davaria neganai, haida ese ita idia durua diba. Baibel ese ia hahedinaraia “hekwakwanai negadia ai” tura korikori ese ita do idia durua bada.”—Aon. 17:17.

Aposetolo Paulo be ena laolao lalonai ia idia bamoa turadia ese idia durua bada. (Kol. 4:7-11) Roma ai Paulo be dibura ruma ai ia noho neganai, gau haida ia karaia diba lasi, unai dainai ena turadia ese ia idia durua. Hegeregere, Epafrodito be Filipi tadikaka taihu ese idia siaia gaudia be Paulo dekenai ia abia lao. (Fili. 4:18) Tukiko ese Paulo ena revareva be kongrigeisen idauidau dekenai ia abia lao. (Kol. 4:7) Paulo be ena turadia ese idia durua dainai, ena hesiai gaukara ia karaia ena be dibura ruma ai ia noho eiava sibona ia noho. Edena dala ai hari inai negai tura namona ai oi lao diba?

Hari inai nega haida be tura korikori ena kara idia hahedinaraia. Spain ai ia noho regula painia taihu ta ese Elisabet dekenai ia hahedinaraia, ia be tura korikorina. Elisabeta ena sinana be kensa gorerena ia abia neganai, unai taihu ese Elisabet dekenai teks meseij amo Baibel siri ia siaia. Elisabet ia gwau: “Unai meseij ese lau ia hagoadaia dainai, dina ta ta ai sibona lau noho ena hemami lau abia lasi.”—Aon. 18:24.

Kongrigeisen lalonai iseda hetura karana ita hagoadaia diba bema iseda tadikaka taihu ita durua. Hegeregere, tadikaka eiava taihu burukana ta be emu motuka amo haroro eiava hebou dekenai oi abia lao diba, a? Bema unai bamona oi karaia, emui herevahereva karana amo ta ta umui hagoadaia diba. (Roma 1:12) To, Keristani taudia haida be idia hegeregere lasi edia ruma idia rakatania totona. Edena dala ai edia tura korikori ai ita lao diba?

Iseda tadikaka taihu haida be edia helt eiava noho dalana dainai hebou dekenai idia lao diba lasi. Tadikaka ta ladana David be unai bamona, badina kensa gorerena ia abia. Hua siks lalonai, muramura (o chemotherapy) ia abia. Unai nega lalonai, David bona ena adavana Lidia be ruma amo hebou totona idia konek.

Kongrigeisen turadia amo dahaka heduru idia abia? Hebou murinai, Kingdom Hall amo haida be nega idia atoa zoom amo David bona Lidia idia hereva henia. Danu, David bona Lidia be haere idia henia neganai, gabeai tadikaka taihu be teks  meseij amo hagoadaia herevadia idia siaia. Dahaka namo ia vara? David bona Lidia idia mamia tadikaka taihu ese idia lalokau henia.

Ruma sibona dekenai idia noho taudia ida ita haroro diba, a? Palani ita karaia diba idia ida ita gaukara hebou totona, unai amo do idia itaia idia ita laloaboio lasi. (Aon. 3:27) Sediual namona ta oi karaia diba idia ida telefon eiava revareva amo umui haroro totona. Ruma sibona dekenai idia noho taudia be zoom amo haroro ena hebou dekenai idia konek diba. David bona Lidia be unai dala idia moalelaia. David ia gwau, “Unai nega kwadogina lalonai haroro grup ena hebou dekenai idia herevalaia gaudia bona guriguri ese ai ia hagoadaia bada.” Danu, nega haida ruma sibona ai ia noho tadikaka eiava taihu oi nanadaia, bema ia hegeregere emu stadi oi abia lao ena ruma dekenai umui stadi totona.

Ruma sibona ai idia noho tadikaka eiava taihu ida gaukara hebou neganai, edia kara namodia ita dibaia bona unai ese iseda hetura karana ia hagoadaia. Hegeregere, unai bamona pablisa ida oi haroro bona oi itaia Baibel idia gaukaralaia dalana amo ta ena kudouna idia hamarerea neganai, unai ese idia ida emu hetura karana do ia hagoadaia. Hesiai gaukara lalonai emu tadikaka bona taihu oi durua neganai, tura matamata do oi davaria.—2 Kor. 6:13.

Paulo be hekwakwanai ia davaria neganai, ena turana Tito ese ia vadivadi henia, unai ese Paulo ena hemami ia hanamoa. (2 Kor. 7:5-7) Unai sivarai amo ita diba, hebogahisi karana be hereva sibona amo lasi, to nega ita atoa idia ida ita noho bona heduru ita henia.—1 Ioa. 3:18.

Russia ai iseda tadikaka bona taihu be ta ta idia durua karana amo haheitalai namona idia hahedinaraia. Sergey bona ena adavana, Tatyana edia ekspiriens mani ita laloa. Pulisi ese edia ruma idia sekea murinai, idia abidia lao do idia nanadaia totona. Tatyana idia ruhaia guna bona ruma dekenai ia lao. Sergey ia gwau: “Tatyana be ruma dekenai ia ginidae neganai, taihu ta be ia dekenai ia vadivadi. Turadia momo idia mai ai idia durua bona emai ruma idia hagoevaia.”

Sergey ma ia gwau: “Lau ese hanaihanai Aonega Herevadia 17:17 lau ura henia, ia gwau: ‘Tura korikori be nega ibounai lalokau ia hahedinaraia, bona hekwakwanai negadia ai ia be tadikaka korikori ta bamona oi ia durua.’ Hari dagedage lau davaria lalonai unai hereva be lau dekenai ia guguru momokani. Iehova be lau dekenai tura namodia ia henia idia be mai gari lasi ida lau idia durua.” a

Hekwakwanai momo do ita davaria dainai, iseda turadia edia heduru ita abia be namo. Bona hisihisi badana lalonai iseda turadia edia heduru do ita abia be gau badana. Unai dainai, hari ita gaukara goada tura korikori ai ita lao totona!—1 Pet. 4:7, 8.