DIANA ena mauri lagani be 80 ia hanaia. Ena adavana be Alzheimer gorere ia abia dainai, gorere taudia idia naria gabuna ai lagani momo ia noho murinai ia mase. Danu ena natuna memero rua idia mase bona ia be breast kensa gorerena ia abia. To, ena kongrigeisen tadikaka bona taihu ese Kingdom Hall bona haroro gaukara ai Diana idia itaia neganai ia be hanaihanai ia moale.

John be lagani 43 mai kahana lalonai sekit naria gaukara ia karaia. Ia be ena hesiai gaukara ia ura henia bada. To, hari sekit naria gaukara ia karaia lasi badina ena varavara ta ia gorere bona ia naria, bona hari kongrigeisen ta ida ia gaukara noho. John idia diba taudia be hebouhebou badadia ai ia idia hedavari henia neganai idia itaia ena kara be ia idau lasi, to ia moale noho.

Edena dala ai Diana bona John idia moale noho? Edena dala ai ia lalohisihisi tauna ia moale diba? Bona edena dala ai ta ia moale noho diba ena be ia ura henia hesiai gaukarana ia rakatania? Baibel be ita ia hadibaia, ia gwau: “Kara maoromaoro tauna be Iehova dainai do ia moale.” (Sal. 64:10) Unai ita lalopararalaia diba bema moale ia havaraia gaudia bona ia havaraia lasi gaudia ita laloa.

To ita diba gau haida ese moale ia havaraia. Idia lalokau heheni mero bona kekeni ta idia headava ita laloa neganai ita moale. Eiava ta be tama sina ta ai ia lao o Iehova ena hesiai gaukara ai asainmen namona ta ia abia? Unai ese ita dekenai moale ia havaraia, badina iseda mauri lalonai ita abia gaudia be Iehova amo idia mai. Ia ese headava ia hamatamaia, unai dala amo natuna ita havaraia diba, bona Keristani kongrigeisen ai ita dekenai gaukara ia henia.

To, moale idia havaraia gaudia haida be idia noho daudau lasi. Headava tau o hahine ta be heudahanai dainai ena adavana ese ia rakatania eiava ia mase. (Ese. 24:18; Hos. 3:1) Natudia haida be edia tama sina bona Dirava idia gwau-edeede henia, reana kongrigeisen amo idia atoa siri. Hegeregere Samula ena natu memero rua be Iehova idia hesiai henia lasi, bona Davida be ena kara dainai ena ruma bese lalonai hekwakwanai momo ia havaraia. (1 Sam. 8:1-3; 2 Sam. 12:11) Momokani unai bamona  gaudia ese lalohisihisi bona lalometau sibona ia havaraia to moale ia havaraia lasi.

Unai hegeregerena, nega haida Iehova ena hesiai gaukara ai asainmen ta ita karaia lasi badina ita gorere, ruma bese ena maduna idauidau, eiava tiokratik dalanai senisi haida idia vara. Edia mauri lalonai unai bamona senisi idia mamia taudia idia gwau, “Guna ai karaia hesiai gaukara ai moalelaia.”

Ita itaia diba ita moalelaia gaudia haida be do idia noho daudau lasi. Unai dainai, iseda mauri lalonai hekwakwanai ia vara neganai do ita moale diba, a? Oibe, badina Samuela bona Davida bona ma haida be idia moale ena be edia mauri lalonai hekwakwanai idia davaria.

Iesu be moale karana ena anina ia diba. Tanobada ai ia do mai lasi neganai, Baibel ia gwau, Iesu ‘be [Iehova] vairana dekenai, ia moale noho nega ibounai.’ (Aon. 8:30) To, tanobada ai ia mai neganai nega haida hisihisi bada ia abia. To Iesu be ena tamana ena ura ia karaia noho dainai ia moale. (Ioa. 4:34) Iesu ia diba hora haida lalonai hisihisi bada do ia abia bona do ia mase, ena hemami be edena bamona? Baibel ia gwau: “Ia be iena vairanai ia noho moalena dainai, hisihisi auna ia haheaukalaia.” (Heb. 12:2) Ita be Iesu ese moale korikori abia daladia rua ia herevalaia amo gau momo ita dibaia.

Nega ta, hahediba taudia 70 be haroro gaukara murinai Iesu dekenai idia giroa lou. Idia moale bada badina hoa karadia idia karaia bona demoni idia lulua. To, Iesu be idia dekenai ia gwau: “Lauma dikadia ese umui idia kamonai henia dainai umui moale lasi, to umui moale badina emui ladana be guba dekenai idia torea vadaeni.” (Luka 10:1-9, 17, 20) Oibe, mai anina bada gauna be: Iehova ena lalonamo abia karana ese iseda asainmen amo ita abia moale ia hereaia. Iehova ese ia moalelaia gauna be​—iena hesiai taudia be mai abidadama ida ia idia hesiai henia.

Nega ma ta ai, Iesu be hutuma ia haroro henidia. Iuda hahine ta be Iesu ena hadibaia dalana ia moalelaia dainai, Iesu ena sinana ia hanamoa. To, Iesu ese unai hahine ia haere henia, ia gwau: “Lasi, Dirava ena hereva idia kamonai bona badinaia taudia be idia moale!” (Luka 11: 27, 28) Natudia ese gau namodia idia karaia dainai tama sina idia moale diba, to iseda hetura karana Iehova ida bona ia ita badinaia karana ese moale bada ia havaraia.

Ita moale bada badina ita diba Iehova ena lalonamo ita abia. Ena be hahetoho be moale gauna lasi, to hisihisi negadiai ita haheauka diba. (Roma 5:3-5) Ma danu, Iehova be ia idia abidadama henia taudia dekenai ena lauma helaga ia henia, bona moale be ena lauma helaga ena huahua ta. (Gal. 5:22) Unai ese ita ia durua Salamo 64:10 ena hereva ita lalopararalaia totona ia gwau: “Kara maoromaoro taudia ese, Lohiabada dainai do idia moale bada.”

Unai ese ia hahedinaraia, dahaka dainai Diana bona John idia moale noho ena be hekwakwanai badadia idia davaria. Diana ia gwau: “Natu ta be ena tama sina ena naria henunai ia noho hegeregerena Iehova be egu heau mauri gabuna ai lau halaoa.” Edena dala ai ia diba Iehova be ia ia lalonamo henia? “Lau mamia Iehova ese lau ia hanamoa badina nega momo mai moale ida haroro gaukara lau karaia diba.” Ena be hari John be sekit gaukarana ia karaia lasi, dahaka ese John ia durua mai moale ida haroro gaukarana ia karaia noho. John ia gwau: “Lagani 1998 ai Hesiai Gaukara Hadibaia Sikulina ena hadibaia tauna ai lau lao negana amo lau mamia sibona egu stadi karana lau karaia momo.” Ma ia gwau: Ia bona ena adavana ese idia karaia senisi be auka lasi badina lagani momo lalonai mai edia lalona ibounai ida Iehova ese ia henia hesiai gaukarana idia karaia. Bona ma ia gwau, ai lalohisihisi lasi to ai moale.”

Ma haida idia mamia Salamo 64:10 ena hereva be momokani. Hegeregere, headava tau bona hahine ta be United States ena Betele ai lagani 30 mai kahana idia gaukara. Gabeai idia ruaosi be spesel painia gaukara totona Betele idia rakatania. Idia gwau: “Oi ura henia gaukarana ta oi rakatania neganai do oi lalohisihisi, to namo lasi hanaihanai oi lalohisihisi.” Edia asainmen matamata idia abia murinai kongrigeisen taudia ida haroro gaukara idia karaia hebou. Unai headava tau bona hahine idia gwau: Ai ura ai karaia gaudia totona Iehova ai guriguri henia. Ai itaia emai guriguri ena haere ai abia karana ese ai ia hagoadaia bona hamoalea. Ai ginidae murinai ai bamoa kongrigeisen ai mai haida be painia gaukara idia karaia hamatamaia, bona ai be Baibel stadi namodia rua ai karaia.”

Momokani, nega haida ita lalohisihisi dainai ita moale be auka. To, Iehova be Salamo 64:10 ena hereva amo ita ia hagoadaia. Bema ita lalomanoka, ita abia dae momokani herevana dahaka hekwakwanai ita davaria, ita diba “Kara maoromaoro taudia ese Lohiabada dainai do idia moale bada.” Oibe, ita be Iehova ena gwauhamata “guba matamata bona tanobada matamata” edia guguru negana ita naria noho. Unai nega ai kara dika do ia ore momokani bona Dirava ena taunimanima ibounai be ‘do idia moale hanaihanai.’​—Isa. 65:17, 18; NWT.

Mani inai oi laloa: Do ita moale badina ita gorere lasi bona dina ta ta ai ita noga neganai ita be mai iseda goada. Herevana guna ita mamia hisihisi be bada, to unai hemami be do ia ore. Baibel ese ita ia hagoadaia ‘kara gunadia be do ita laloa lou lasi, do ita laloaboio momokani.’ Hoa gauna be toreisi lou do ia vara bona iseda lalokau taudia ida do ita hedavari lou. Taunimanima milioni momo edia hemami be Iesu ese ia hatoreaisi lou mauri lagani 12 kekeni ena tama sina edia hemami bamona: “Unai neganai ena tama sina idia moale bada herea.” (Mar. 5:42) Oibe, taunimanima ibounai tanobada ai be “kara maoromaoro” taudia ai do idia lao bona “[Iehova] dainai do idia moale bada” ela bona hanaihanai.