1, 2. Dahaka dainai hesiai gaukara lalonai ita atoa tahua gaudia ita abia hidi neganai, iseda Havaraia Tauna ita kamonai henia be aonega karana? (Laulau ginigunana herevalaia.)

BEMA oi be matamata tauna ta, reana emu vaira negana totona taunimanima amo sisiba momo oi abia vadaeni. Tisa taudia o taunimanima ma haida ese oi do idia hamaoroa sikuli badana ta dekenai oi lao eiava moni gaukara mai ena pei badana oi tahua. To, Iehova be oi dekenai dala idauna ma ta ia hadibaia. Ita diba, ia ura sikuli dekenai oi gaukara goada unai amo oi gradueit murinai oi gaukara diba bona vaira nega ai sibona oi naria. (Kol. 3:23) Emu mauri totona abia hidi haida oi ura karaia neganai, Baibel ena hakaua herevadia oi laloa karana ese oi do ia durua hari inai nega dokona ai Dirava ese ia moalelaia dalana hegeregerena ai oi noho diba.​—Mat. 24:14.

² Namona be oi diba Iehova be gau ibounai ia itaia badina ia diba inai tanobada dekenai dahaka do ia vara bona inai nega ena oromana ena dokona ia diba danu. (Isa. 46:10; Mat. 24:3, 36) Ita ia diba namonamo dainai ia diba dahaka ese ita do ia hamoalea bona dahaka ese ita dekenai lalohisihisi ia havaraia.  Bema taunimanima edia sisiba be Dirava ena Hereva ida ia hegeregere lasi, unai be aonega herevana lasi.​—Aon. 19:21.

3, 4. Sisiba koikoi kamonai henia karana dainai, Adamu, Heva bona edia natudia dekenai dahaka ia vara?

³ Sisiba koikoi amo taunimanima ia koia tauna ginigunana be Satani. Satani be Heva ia hamaoroa bema ia bona ena adavana be sibona edia mauri dalana idia abia hidi do idia moale. (Gen. 3:1-6) To, Satani be sibona ena namo ia laloa bada. Ia ura bada Adamu bona Heva bona edia natudia ese ia do idia tomadiho henia bona Iehova do idia dadaraia. To Satani be gau ta ia karaia lasi idia totona. Iehova be idia ruaosi dekenai gau ibounai​—uma gabu mai ena hairai bona do idia mauri hanaihanai totona tauanina goevana​—ia henia.

⁴ To, Adamu bona Heva ese Dirava idia gwau-edeede henia dainai hekwakwanai badadia idia vara. Tubutubu gauna ta amo flaoaflaoa ta oi utua neganai, do ia noho daudau lasi metairametaira ia kakoro bona do ia mase. Adamu bona Heva edia kara dika dainai edia natudia dekenai unai dika idia davaria. (Roma 5:12) Unai hegeregerena, hari inai negai taunimanima momo be Dirava idia badinaia lasi bona sibona edia ura hegeregerena idia noho. (Efe. 2:1-3) Unai dainai, dahaka ia vara? Baibel ia gwau: “Taunimanima edia aonega, . . . ese Lohiabada ena ura do idia koua diba lasi, lasi momokani.”​—Aon. 21:30.

5. Dirava ena lalohadai taunimanima dekenai be dahaka, bona unai ia vara momokani, a?

⁵ To, Iehova ia diba taunimanima haida bona matamata taudia haida danu ese Ia do idia dibaia bona hesiai henia diba. (Sal. 103:17, 18; 110:3) Dirava ese matamata taudia ia laloa bada! Oi danu be unai matamata tauna ta, a? Bema oibe, Dirava ese oi dekenai ia henia “gau namodia” oi moalelaia noho. (Salamo 103:5 duahia; Aon. 10:22) Ita ese inai “gau namodia” foa do ita herevalaia: Dirava amo idia mai hereva, tura namodia, hesiai gaukara ai tahua gaudia, bona ura kwalimu momokanina.

6. Dahaka dainai Dirava dibaia karana oi laloa bada, bona Iehova be edena dala ai oi ia durua?

⁶ Taunimanima be animal bamona lasi, badina edia Havaraia Tauna idia dibaia diba. (Mat. 4:4) Bema Dirava ita kamonai henia, laloparara do ita abia, do ita aonega bona do ita moale. Iesu ia gwau, “Dirava dibaia totona idia hitolo taudia be idia moale.” (Mat. 5:3) Dirava ita dibaia totona, ia ese Baibel bona “igui hesiai tauna mai ena kamonai bona mai ena kara maoromaoro” amo ia halasia gaudia be ita dekenai ia henia. (Mat. 24:45) Bona Ia ita dibaia daladia idauidau ita moalelaia!​—Isa. 65:13, 14.

7. Dirava amo idia mai hereva edia namo haida be dahaka?

⁷ Dirava amo idia mai hereva ese oi dekenai aonega bona laloa kehoa ia henia, unai ese dala idauidau ai oi do ia gimaia. (Aonega Herevadia 2:10-14 duahia.) Hegeregere, hahediba hereva koikoidia edia idau do oi itaia, ta be Havaraia Tauna ta ia noho lasi lalohadaina. Unai ese oi ia gimaia lalohadai koikoidia, moni bona kohu laloa bada karana ese oi ia hamoalea diba herevana amo. Bona oi do ia durua oi idia hadikaia ura dikadia bona kara dikadia oi dadaraia totona. Unai dainai, namona be Dirava ese ia henia aonega bona laloa kehoa oi tahua noho, idia be dava bada kohu bamona oi laloa! Unai bamona oi karaia neganai, do oi itaia Iehova be oi ia lalokau henia bona emu namo ia laloa bada.​—Sal. 34:8; Isa. 48:17, 18.

8. Bema hari Dirava kahirakahira oi lao, edena dala ai vaira negai namo do oi abia?

 ⁸ Kahirakahira Satani ena tanobada be do ia ore bona Iehova sibona be ita do ia gimaia bona durua. Badina nega ta do ia mai ita ibounai be ia sibona dekenai do ita tabekau! (Hab. 3:2, 12-19) Oibe, hari be nega namona emu guba Tamana kahirakahira oi lao bona emu abidadama ia dekenai oi hagoadaia. (2 Pet. 2:9) Bema unai bamona oi karaia herevana dahaka ia vara, emu hemami be salamo torea tauna ena hemami bamona, ia gwau: “Nega ibounai lau diba, Lohiabada be lau dekenai ia noho. Ia be lau kahirakahira dainai, gau ta ese lau ia hagaria lasi.”​—Sal. 16:8.

9. (a) Ioane 6:44 ena hereva bamona, Iehova be dahaka ia karaia diba? (b) Witnes taudia ma haida ita hedavari henidia ena namo be dahaka?

⁹ Iehova sibona ese kudou-maoro taudia be mai lalokau ida iena orea lalonai ia hakaua vareai diba, unai amo tomadiho momokanina idia badinaia. (Ioane 6:44 duahia.) Bema emu nega ginigunana Iehova ia diba lasi tauna ta oi hedavari henia, ia oi dibaia namonamo, a? Lasi, reana iena ladana bona ena toana sibona oi diba. To nega ginigunana Iehova ia diba tauna ta oi hedavari henia neganai, maoromaoro oi diba unai tauna be Iehova ia lalokau henia. Herevana ena kara, ena tano, ena iduhu, ena kastom oi diba lasi, to ia oi diba bona ia be oi ia diba!

10, 11. Iehova ena taunimanima huanai dahaka oi davaria diba, bona ena namo be dahaka?

¹⁰ Hegeregere, Witnes tauna ta oi hedavari henia neganai, ena be gado idauidau ai umui hereva, to hereva momokani ena “gado goevadaena” umui diba. (Sep. 3:9, NWT) Unai dainai, umui ruaosi be Dirava, iena kara maoromaoro taravatudia, bona vaira nega ena helaro umui abia dae. Ta oi dibaia totona unai gaudia be mai anina bada, unai ese oi do ia durua bona emui hetura karana do ia hagoadaia. Bona unai hetura karana do ia noho daudau diba.

¹¹ Iehova ena orea lalonai tura namodia oi davaria, bona idia be tanobada hegegemadai ai idia noho. Ena be idia ibounai ita diba namonamo lasi, to ita diba idia be iseda turadia! Iehova ena taunimanima sibona huanai unai oi moalelaia diba.

12. Edena mai anina bada tahua gaudia oi atoa diba?

¹² Hadibaia Tauna 11:9–12:1 duahia. Oi ura hagugurua tahua gauna ta eiava tahua gaudia haida oi atoa, a? Reana oi ura dina ta ta ai Baibel ena kahana ta oi duahia. Eiava oi hekwarahi emu hereva bona hadibaia dalana oi hanamoa. Herevana dahaka ia vara, oi karaia gaudia edia namo oi itaia o ma haida ese idia itaia gaudia dainai oi idia hanamoa neganai, emu hemami be edena bamona? Momokani, do oi moale bada. Oi moale badina Iesu bamona, oi sibona emu ura oi atoa lasi, to oi be Iehova ena ura oi karaia.​—Sal. 40:8; Aon. 27:11.

13. Edena dala ai Dirava hesiai henia karana ese pei bada moni gaukara namona bona ladana bada abia karana ia hereaia?

¹³ Iehova hesiai henia gaukarana oi atoa guna neganai, unai gaukara do oi moalelaia bona ia be mai anina bada. Aposetolo Paulo ia gwau: “Do umui gini goada, bona do umui marere lasi, nega ibounai Lohiabada ena gaukara idauidau lalonai do umui bisi, badina umui diba, Lohiabada ena gaukara lalonai emui hekwarahi be hekwarahi kava lasi.” (1 Kor. 15:58) Hari inai negai taunimanima be pei bada moni gaukara idia abia bona ladana bada taudia ai idia lao neganai, toana be idia moale to unai be moale momokani lasi. (Luka 9:25) King Solomona ena haheitalai amo unai ita dibaia.​—⁠Roma 15:4.

14. Solomona ena haheitalai amo dahaka oi dibaia?

¹⁴ Taga bada tauna Solomona ia ura ‘moale ena dala do ia tohoa, moale ese iena mauri do ia hanamoa, o lasi.’ (Had. 2:1-10) Ruma badadia ia haginia, uma gabu mai hairaidia ia karaia, bona ia ura henia gaudia ia tahua danu. Ia karaia gaudia ibounai ese ia dekenai moale ia henia, a? Lasi. Ia sibona ese unai ia gwauraia hedinarai, ia gwau: “Egu imana ena gaukara bada, bona egu hekwarahi ibounai lau laloa, vadaeni egu lalona ia kehoa, idia ibounai be anina lasi.” (Had. 2:11) Unai ese mai anina bada gauna ta ia hadibaia! Bona unai oi laloa bada be namo.

15. Salamo 32:8 ena hereva hegeregerena, dahaka dainai abidadama be mai anina bada, bona ena namo be dahaka?

¹⁵ Taunimanima haida be edia mauri lalonai kerere idia karaia bona unai kerere edia hisihisi idia abia. Iehova ia ura lasi oi dekenai unai do ia vara. Dirava abidadama henia karana be mai anina bada, badina ia ura emu mauri lalonai ia oi atoa guna. Emu abidadama dainai oi abia hidi gaudia oi karaia neganai, do oi lalohisihisi lasi. Oibe, Iehova be “emui gaukara bona iena ladana totona umui hahedinaraia lalokauna, do ia laloaboio lasi.” (Heb. 6:10) Unai dainai, oi gaukara goada emu abidadama oi hagoadaia, abia hidi namodia oi karaia bona do oi itaia emu guba Tamana be emu namo ia laloa bada.​—Salamo 32:8 duahia.

16. Dahaka dainai ura kwalimu ita laloa bada bona mai aonega ida ita gaukaralaia be namo?

¹⁶ Paulo ia gwau: “Iehova ena lauma helaga ia noho gabudia ibounai, ura kwalimu ia noho.” (2 Kor. 3:17) Oibe, Iehova be ura kwalimu ia ura henia bona ia ura unai ura kwalimu oi laloa bada. To, iena ura be mai aonega ida ura kwalimu oi gaukaralaia, unai ese oi do gimaia. Reana matamata taudia haida be ponografi laulau idia itaia o matabodaga karadia idia karaia, spot gadara dikadia lalonai idia vareai, o drag idia ania bona idia inuinu kekero. Reana nega sisina lalonai unai ese idia dekenai moale ia henia. To unai ese gorere dikadia idia havaraia, unai kara dikadia idia manadalaia, eiava  mase ia havaraia diba. (Gal. 6:7, 8) Unai kara dikadia idia karaia matamata taudia idia laloa idia dekenai “ura kwalimu” ia noho, to idia be sibona idia koia.​—Tito 3:3.

17, 18. (a) Edena dala ai Dirava kamonai henia karana be mai ena namo? (b) Edena dala ai Adamu bona Heva ese matamanai idia abia ura kwalimu be hari inai negai taunimanima ese idia abia ura kwalimu amo ia idau?

¹⁷ Taunimanima be Baibel ena kara maoromaoro taravatudia idia badinaia neganai, edia mauri idia naria namonamo. Unai ese ia hahedinaraia iseda mauri lalonai Iehova kamonai henia karana be mai ena namo. (Sal. 19:7-11) Bema mai emu aonega ida emu ura kwalimu oi gaukaralaia​—⁠Dirava ena taravatu bona hakaua herevadia henunai​—⁠Dirava bona emu tama sina dekenai oi hahedinaraia oi be emu ura kwalimu do oi gaukaralaia namonamo. Momokani, Dirava ena ura be iena abidadama hesiai taudia dekenai ura kwalimu do ia henia, unai be Baibel ese ia gwauraia “Dirava ena natudia edia ura kwalimu hereadaena.”​—Roma 8:21.

¹⁸ Adamu bona Heva be unai ura kwalimu idia abia. Eden umana ai, Dirava ese idia dekenai taravatu hida ia henia? Tamona sibona. Unai be au tamona ena huahua idia ania lasi be namo. (Gen. 2:9, 17) Oi laloa unai taravatu be ia auka bona ia metau, a? Lasi! Mani inai oi laloa. Taunimanima be taravatu momo idia atoa bona ma haida idia doria unai taravatu idia dibaia bona badinaia totona.

19. Edena dala ai Iehova bona Iesu ese ita ia hadibaia iseda ura kwalimu ita gaukaralaia?

¹⁹ Iehova be mai aonega ida iena hesiai taudia ia kara henia. Ita dekenai taravatu momo ia henia lasi, to mai haheauka ida lalokau ena taravatu be ita dekenai ia hadibaia. Ia ura iena hakaua herevadia ita badinaia bona kara dika ita inai henia. (Roma 12:9) Iesu be ena Ororo Harorona ai taunimanima idia kara dika ena badina ia herevalaia. (Mat. 5:27, 28) Keriso be Dirava ena Basileia ena King dainai, nega matamata ai ita do ia hadibaia ela bona kara maoromaoro bona taravatu utua karadia edia idau dekenai iena lalohadai do ita abia. (Heb. 1:9) Iesu ese ita do ia hadibaia ela bona iseda tauanina bona lalohadai do ia goevadae. Mani inai laloa, kara dika ena siahu henunai do ita noho lasi. Bena, dokonai Iehova ese ia gwauhamatalaia “ura kwalimu hereadaena” do ita moalelaia.

20. (a) Edena dala ai Iehova ese ena ura kwalimu ia gaukaralaia? (b) Edena dala ai Dirava ena haheitalai ita tohotohoa?

²⁰ Nega matamata ai iseda ura kwalimu do ita moalelaia to ia be mai ena hetoana. Dirava bona ma haida lalokau henia karana ese unai ura kwalimu do ia biagua. Iehova be ita ia noia ia ita tohotohoa totona. Ena be Iehova ena ura kwalimu be mai ena hetoana lasi, to ia be lalokau Diravana dainai mai lalokau ida taunimanima ia kara henia. (1 Ioa. 4:7, 8) Unai ese ia hahedinaraia bema Dirava ena lalokau karana ita tohotohoa, iseda ura kwalimu do ita gaukaralaia namonamo.

21. (a) Davida ena hemami Iehova dekenai be edena bamona? (b) Stadi dokona ai dahaka do ita herevalaia?

²¹ Oi be Iehova ese ia henia “gau namodia” hegeregere, Dirava amo idia mai hereva, tura namodia, hesiai gaukara ai tahua gaudia, bona ura kwalimu momokanina oi moalelaia, a? (Sal. 103:5) Bema emu haere be oibe, reana emu hemami be Davida ena hemami Salamo 16:11 ai, ia guriguri neganai ia gwau: “Mauri dalana be, oi ese lau dekenai oi hedinaraia vadaeni. Oiemu vairana dekenai, lau be mai moale danu lau noho, bona inai moale do ia noho ela bona hanaihanai.” Stadi dokona ai Salamo 16 ai idia noho hereva badadia ma haida do ita herevalaia. Unai ese oi do ia durua mauri dala namo hereana oi moalelaia totona.