1, 2. Tony ena ekspiriens bamona iseda mauri lalonai dahaka senisi ita karaia diba?

TONY be tamana lasi merona. Sikuli ia laloa bada lasi dainai, wikeni ibounai be ena turadia ida muvi idia itaia bona idia ida ia noho. Ia be dagedage merona lasi bona drag ia ania lasi. Bona ia dekenai mauri be anina lasi. Bona ia laloa Dirava ia noho lasi. Bena nega ta Witnes headava taudia ia hedavari henia bona idia dekenai ena daradara bona henanadai ia gwauraia. Ia dekenai buklet rua idia henia, unai ese ia hahedinaraia Dirava ia noho. *

² Unai headava taudia idia giroa lou neganai, Tony ena lalohadai be ia idau. Nega momo unai buklet ia stadilaia dainai buklet ena rau haida be idia lokua bona idia darea. Ia gwau, “Momokani Dirava ta ia noho.” Baibel stadi ia abia dae bona metairametaira ena lalohadai mauri dekenai ia idau. Guna ena sikuli ai maka namodia ia abia lasi, to gabeai sikuli gaukara ia karaia namonamo. Tony ese Baibel ia stadilaia dainai ena hedmasta ia hoa bona ia gwau, “Emu kara be ia idau bona sikuli dekenai maka namodia oi abia noho. Iehova ena Witnes taudia oi bamoa dainai, a?” Tony ia gwau, “oibe,” bena hedmasta ia haroro henia. Ena haisikuli ia haorea bona hari ia be regula  painia gaukara ia karaia bona kongrigeisen lalonai ia be hesiai tauna ta. Hari ia moale badina iena Tamana namo hereana be Iehova.​—Sal. 68:5.

3. Iehova ia ura matamata taudia ese dahaka abia hidi idia karaia?

³ Tony ena ekspiriens ese ia hahedinaraia, Iehova ese ita huanai idia noho matamata taudia ia laloa bada. Iehova ia ura mauri namona umui moalelaia. Unai dainai, umui ia hagoadaia ia gwau: “Oi be eregabe neganai, . . . oi ia karaia Dirava do oi laloa.” (Had. 12:1) Hari inai negai, unai bamona abia hidi karaia totona be mai ena hekwarahi. To, Dirava ena heduru amo unai abia hidi oi karaia diba. Emu matamata negana sibona lasi to emu mauri ibounai lalonai danu. Mani inai oi laloa, Davida be Goliata ia halusia bona Israela taudia be Gwauhamata Tanona idia abia dalana ena sivarai ese ita dekenai gau ta ia hadibaia.

4, 5. Davida be Goliata ia halusia bona Israela taudia ese Gwauhamata Tanona idia abia ena sivarai amo dahaka ita dibaia? (Laulau ginigunana herevalaia.)

⁴ Israela taudia be Gwauhamata Tanona idia lao kahirakahira neganai, Dirava ia gwau lasi tuari totona do idia hegaegae. (Deu. 28:1, 2) To, idia ia hamaoroa iena sisiba herevana idia badinaia bona ia idia abidadama henia. (Ios. 1:7-9) Taunimanima do idia laloa unai sisiba herevana be anina lasi! To, unai sisiba herevana be mai anina bada, badina Iehova ese Israela taudia ia durua tuari ta ta lalonai Kanana taudia idia halusia. (Ios. 24:11-13) Oibe, Dirava oi badinaia totona abidadama be mai anina bada. Idaunegai Dirava ese ma haida ia durua bamona, hari oi do ia durua danu.

⁵ Tuari tauna goadana, Goliata be tuari kohudia ia hahedokilaia bona ena lata be mita 2.9 bamona. (1 Sam. 17:4-7) To, Davida dekenai inai gau rua sibona idia noho: Vilipopo bona iena Dirava Iehova ia abidadama henia. Abidadama lasi taudia idia laloa Davida be ia kavakava. To unai be momokani lasi badina Davida ese Goliata ia halusia.​—1 Sam. 17:48-51.

6. Inai stadi atikol ai dahaka do ita herevalaia?

⁶ Stadi atikol ihatoina ese mauri namona moalelaia daladia foa ia herevalaia. Dirava amo idia mai hereva, Dirava ese ia henia tura korikoridia ita laloa bada, mai anina bada tahua gaudia atoa, bona Dirava ese ita dekenai ia henia ura kwalimu ita gaukaralaia namonamo. Inai stadi atikol ese unai gaudia foa be Salamo 16 ena hakaua hereva ida do ia herevalaia.

7. (a) Dirava amo idia mai hereva ia laloa bada tauna be edena bamona do oi gwauraia? (b) Davida be dahaka ia “abia hidi,” bona dahaka ia vara?

⁷ Dirava amo idia mai hereva ia laloa bada tauna ese Dirava ia abidadama henia bona ena lalohadai ia badinaia. Nega ibounai Dirava ena heduru ia tahua bona ena lalona ia hadaia Dirava ia badinaia totona. (1 Kor. 2:12, 13) Davida be haheitalai namona. Ia gwau: “Lohiabada [Iehova] e, oi lau abia hidi vadaeni.” (Sal. 16:5) Davida be ena hetura karana Dirava ida ia “abia hidi” bona Ia dekenai ia tabekau. (Sal. 16:1) Dahaka ia vara? Ia gwau: “Egu kudouna ia moale.” Oibe, Davida be ena hetura karana Dirava ida ia moalelaia.​—Salamo 16:9, 11 duahia.

8. Moale korikori oi abia totona, dahaka oi karaia diba?

⁸ Edia mauri ai moni bona kohu idia laloa bada taudia be Davida ese ia abia moalena idia mamia diba lasi. (1 Tim. 6:9, 10) Canada ai ia noho tadikaka ta ia gwau: “Moale korikorina be moni bona kohu amo ita abia lasi, to moale korikorina be Iehova Dirava dekenai ita henia harihari gaudia amo ia mai.” (Iam. 1:17) Oibe, emu abidadama Iehova dekenai oi hagoadaia bona ia oi hesiai henia karana ese emu mauri ai anina namona ia havaraia bona moale korikori ia mailaia. Emu  abidadama ia goada totona, dahaka oi karaia diba? Namona be nega oi atoa Baibel oi duahia, ia havaraia gaudia oi laloa dobu, iena lalokau oi totona bona iena kara ibounai oi laloa bada.​—Roma 1:20; 5:8.

9. Davida bamona, edena dala ai Dirava ena Hereva ese oi ia hakaua diba?

⁹ Dirava be mai lalokau ida nega haida ita ia sisiba henia, tama ta be mai ena lalokau ida ena natuna ia sisiba henia hegeregerena. Davida be unai hereva ia abia dae bona ia gwau: “Lohiabada lau hanamoa noho, badina ia ese lau ia hakaua noho dainai, hanuaboi lalonai laloa maoro ese, egu dala lau dekenai ia hadibaia.” (Sal. 16:7) Oibe, Davida be Dirava ena lalohadai ia abia dae dainai unai ese ia hakaua. Bema unai bamona oi karaia, emu lalokau Dirava dekenai do ia bada bona ia do oi badinaia. Oiemu diba hereva momokani dekenai do ia bada. Taihu ta ena ladana Christin ia gwau: “Lau duahia gaudia dekenai tahua gaukara lau karaia bona lau laloa dobu neganai, lau mamia Iehova be lau totona unai gaudia ia torea!”

10. Isaia 26:3 ena hereva hegeregerena, Dirava lalokau henia karana ese dahaka namo ia havaraia?

¹⁰ Bema oi be Dirava oi lalokau henia, ia ese tanobada bona vaira negana ia laloa dalana do oi dibaia bona lalopararalaia. Dahaka dainai Dirava ese oi dekenai unai diba bona laloparara ia henia? Ia ura emu mauri lalonai mai anina bada gaudia oi laloa, mai aonega ida abia hidi oi karaia, bona mai abidadama ida vaira negana oi laloa! (Isaia 26:3 duahia.) United States ai ia noho tadikaka ladana Joshua ia gwau: “Iehova kahirakahira oi lao neganai, do oi diba dahaka be mai anina bada.” Momokani, unai ese moale korikorina ia mailaia!

11. Edena dala ai Davida ese tura korikoridia davaria dalana ia hahedinaraia?

¹¹ Salamo 16:3 duahia. Davida be tura korikoridia davaria dalana ia diba. Ia ese Iehova idia lalokau henia taudia tura henia karana ia moalelaia. Iena turadia ia gwauraia “Lohiabada ena taudia,” idia be kara goevadia idia karaia taudia. Salamo torea tauna ma ta be ena turadia ia herevalaia neganai, ia gwau: “Oi dekenai idia gari taudia, bona oiemu taravatu idia badinaia taudia ibounai be egu turana taudia.” (Sal. 119:63) Stadi atikol ihatoina hegeregerena, tura namodia oi davaria diba. Idia be Iehova idia gari henia bona ia idia badinaia, bona danu edia mauri lagani be idauidau.

12. Dahaka dainai Davida bona Ionatana be tura namodia?

¹² Salamo torea tauna Davida be ena mauri lagani tamona taudia sibona ia tura henia lasi. Davida ena tura namona ta oi laloatao, a? Ia be Ionatana. Davida bona Ionatana edia hetura karana namona be Baibel ese ia sivarailaia. Ionatana ena mauri lagani be 60 bona Davida ena mauri lagani be 30. Dahaka dainai idia be tura namodia? Badina idia ruaosi be Dirava idia abidadama henia, ta ta idia matauraia heheni, bona idia ruaosi be mai gari lasi ida Dirava ena inai taudia idia tuari henia.​—1 Sam. 13:3; 14:13; 17:48-50; 18:1.

13. Edena dala ai tura ma haida oi davaria diba? Haheitalai gwauraia.

¹³ Davida bona Ionatana bamona, Iehova idia lalokau henia bona abidadama henia taudia ita lalokau henia neganai, do ita “moale bada.” Lagani daudau lalonai Dirava ia hesiai henia taihu, Kiera ia gwau: “Lau be tanobada hegegemadai ai lau be mai egu tura idauidau, edia noho daladia bona kastom be idauidau.” Bema unai bamona oi karaia, do oi itaia ita be Baibel bona lauma helaga ese ia hatamonaia tanobada hegegemadai tadikaka oreana lalonai ita noho.

14. (a) Dahaka ese oi do ia durua mai anina bada tahua gaudia oi atoa totona? (b) Edena dala ai matamata taudia haida ese hesiai gaukara ai tahua gaudia atoa karana idia laloa?

¹⁴ Salamo 16:8 duahia. Davida be ena  mauri ai Dirava hesiai henia karana ia laloa bada. Bema Iehova oi hesiai henia bona mai anina bada tahua gaudia oi atoa, emu mauri do oi moalelaia. Tadikaka ta ladana Steven ia gwau: “Tahua gauna ta lau atoa, lau hagugurua, bona egu mauri ai lau karaia senisi lau laloa lou neganai, unai ese lau ia hamoalea.” Tano ma ta ai hesiai gaukara ia karaia Germany tadikaka matamatana ta ia gwau: “Lau buruka neganai lau ura lasi lau laloa egu matamata negana ai lau karaia gaudia be lau sibona totona.” Ai diba oi danu be unai bamona oi laloa. Bema unai bamona oi laloa, emu diba bona goada oi gaukaralaia Dirava oi hanamoa bona ma haida oi durua. (Gal. 6:10) Hesiai gaukara ai tahua gaudia oi atoa, bona Iehova oi guriguri henia unai amo oi do ia durua unai tahua gaudia oi hagugurua totona. Dirava be mai moale ida emu guriguri do ia haerelaia!​—⁠1 Ioa. 3:22; 5:14, 15.

15. Edena bamona tahua gaudia haida oi atoa diba? (Maua ladana “Tahua Gaudia Haida” itaia.)

¹⁵ Dahaka tahua gaudia oi atoa diba? Idia haida be, Keristani kongrigeisen heboudia ai sibona emu hereva dalana amo oi haere, painia gaukara oi karaia, o Betele dekenai oi gaukara diba. Eiava tano ma ta dekenai hesiai gaukara oi karaia totona, gado ma ta oi ura dibaia. Ful-taim hesiai gaukara ia karaia tadikaka ta ladana Barak ia gwau: “Daba ibounai lau noga neganai lau diba mai goada ida Iehova do lau hesiai henia bona lau abia moalena ese gaukara ma ta amo lau abia moalena ia hereaia.”

16. Davida ese Iehova ena kara maoromaoro taravatudia be edena bamona ia laloa bona dahaka dainai?

¹⁶ Salamo 16:2, 4 duahia. Stadi atikol ihatoina ai ita itaia bamona, Dirava ena kara maoromaoro taravatudia bona iena hakaua herevadia ese ita ia durua kara namodia ita ura henia bona kara dika ita inai henia. (Amo. 5:15) Salamo torea tauna Davida ia diba Iehova be gau namodia ibounai ena Badina. Kara namo ia karaia tauna be kara maoromaoro ia laloa bada. Davida ia gaukara goada Dirava ena kara namodia ia tohotohoa totona. Bona Dirava ese ia inai henia karadia ia inai henia danu. Idia ta be, kaivakuku tomadiho henia karana. Unai kara lalonai taunimanima be sibona idia matauraia lasi bona Iehova totona idia hahedinaraia  matauraia karana be tau ta o gau ta dekenai idia henia.​—Isa. 2:8, 9; Apok. 4:11.

17, 18. (a) Davida ese tomadiho koikoi amo idia vara dika be edena bamona ia herevalaia? (b) Edena dala ai taunimanima be “edia hisihisi idia habadaia noho”?

¹⁷ Baibel negadiai, tomadiho koikoi lalonai matabodaga karadia idia karaia. (Hos. 4:13, 14) Taunimanima momo be tomadiho koikoi idia ura henia badina tauanina ena ura dikadia sibona idia hahedinaraia. To unai bamona tomadiho karana ese idia dekenai moale ia mailaia, a? Lasi! Davida ia gwau: “Dirava idauna murinai idia heau taudia ese, edia hisihisi idia habadaia noho.” Kaivakuku dekenai edia natudia idia bouboulaia danu. (Isa. 57:5) Iehova ese unai bamona kara ia inai henia momokani. (Ier. 7:31) Bema oi be unai negai oi noho, do oi moale bema emu tama sina be Iehova idia abidadama henia bona idia badinaia.

¹⁸ Hari inai negai danu, tomadiho koikoi ese headava lasi tau bona hahine idia mahuta hebou eiava tatau (o hahine) idia sihari heheni karana idia gwauraia dika lasi. Baibel negadia amo ema bona hari, unai bamona karadia ese idia havaraia dika be ia idau lasi. (1 Kor. 6:18, 19) Taunimanima be “edia hisihisi idia habadaia noho.” Matamata taudia e, emui guba Tamana umui kamonai henia. Oi abia dae momokani Dirava ese emu namo ia laloa bada. Namona be oi laloatao tauanina ena ura dikadia ese ia havaraia dika be bada herea. (Gal. 6:8) Matamanai ita herevalaia tadikaka, Joshua ia gwau: “Iseda ura kwalimu be iseda ura dalanai ita gaukaralaia diba, to ita gaukaralaia kerere neganai do ita moale lasi.”

19, 20. Iehova idia abidadama henia bona idia badinaia matamata taudia dekenai dahaka hahenamo ia noho?

¹⁹ Iesu be ena hahediba taudia ia hamaoroa: “Bema egu hereva umui badinaia, umui be momokani egu hahediba taudia, bona umui be hereva momokani do umui diba, bona hereva momokani ese umui do ia ruhaia.” (Ioa. 8:31, 32) Unai ese ita be tomadiho koikoi amo ia ruhaia, ita daradaralaia gaudia ia hamaoromaoroa bona Baibel ena hereva ida idia hegeregere lasi gaudia ita dadaraia bona gau ma haida danu. Ita herevalaia vadaeni, ita danu be kahirakahira ‘Dirava ena natudia edia ura kwalimu hereadaena do ita abia.’ (Roma 8:21) Bema oi be Keriso ena hereva o iena hahediba herevadia oi badinaia, hari inai unai ura kwalimu oi mamia diba. Unai amo ‘hereva momokani do oi diba,’ unai sibona lasi to emu mauri lalonai hereva momokani do oi badinaia.

²⁰ Matamata taudia e, Dirava ese ia henia ura kwalimu umui laloa bada. Mai aonega ida unai ura kwalimu umui gaukaralaia, bona emui mauri ai vaira nega totona abia hidi maorodia umui karaia. Tadikaka matamata ta ia gwau: “Emu matamata negana ai mai aonega ida emu ura kwalimu oi gaukaralaia neganai, unai ese oi ia durua abia hidi badadia hegeregere, moni gaukara namona o do oi headava eiava lasi ena abia hidi oi karaia diba.”

21. Edena dala ai “mauri korikorina” ia lao henia dalana do oi badinaia noho?

²¹ Hari inai tanobada dikana ai, taunimanima ese idia gwauraia mauri namona be anina lasi bona namo ta ia havaraia lasi. Ita diba lasi vaira negana ai dahaka do ia vara. (Iam. 4:13, 14) Aonega karana be, “mauri korikorina”​—mauri hanaihanai unai, ia lao henia dalana oi badinaia noho. (1 Tim. 6:19) Dirava ese ita ia doria lasi ia ita hesiai henia totona. Abia hidi be ita ta ta sibona ese do ita karaia. Iehova oi “abia hidi” emu turana ai ia lao. Dirava ese oi dekenai ia henia “gau namodia” ibounai oi laloa bada. (Sal. 103:5) Namona be oi abia dae momokani Iehova ese oi do ia hanamoa bona unai amo oi abia moale be “do ia noho ela bona hanaihanai.”​—Sal. 16:11.