1, 2. Taunimanima momo dekenai inai hereva paradaiso ena anina be dahaka?

UNAI be hebogahisi bada dinana ta. Tano ma haida amo idia mai tadikaka taihu be hebouhebou totona Seoul, Korea dekenai idia lao. Hebou gabuna idia rakatania neganai unuseniai idia noho tadikaka taihu hutuma bada be idia gini bona idia boiboi, idia gwau, “Paradaiso ai do ita hedavari!” Edena bamona paradaiso idia herevalaia?

² Tanobada hegegemadai, taunimanima momo dekenai inai hereva, paradaiso ena anina be idauidau. Haida idia gwau paradaiso be nihi ta sibona. Ma haida idia gwau paradaiso be moale idia davaria gabuna ta. Danu haida dekenai inai hereva paradaiso idia kamonai neganai, idia ese uma gabu namona ta mai ena au badadia momo, animal idauidau bona flaoaflaoa mai hairaidia idia laloa. To oi dekenai Paradaiso ena anina be dahaka? Oi abia dae unai do ia vara momokani, a?

3. Edena Baibel bukana ese paradaiso ia herevalaia?

³ Baibel be guna ia noho paradaiso bona vaira nega ai do ia vara gauna ia herevalaia. Inai hereva Paradaiso be Baibel ena buka ginigunana ai ia hedinarai. Genese 2:8 ia gwau: “Lohiabada Dirava ese uma ta dina ia daekau kahana dekenai ia karaia, ladana Eden [eiava, moale ia havaraia paradaisona, the Catholic Douay Version], bona unai gabu dekenai, ia karaia vadaeni tauna ia atoa, unuseni ia noho.” Heberu revarevadia ese Eden umana ia herevalaia. Eden ena anina be “Moale,” bona unai  hereva ena anina hegeregerena unai uma lalonai do idia noho taudia be do idia moale. Unuseniai aniani bona gabu hairaidia be momo, danu taunimanima bona animal be maino ai idia noho hebou.​—Gen. 1:29-31.

4. Dahaka dainai ita gwau diba Eden umana be paradaiso?

⁴ Heberu gado amo idia hahanaia herevana “uma” be Greek gado ai idia gwauraia pa·raʹdei·sos. Tatau rua M’Clintock bona Strong ese idia torea buka ta ladana, The Cyclopaedia be pa·raʹdei·sos ia herevalaia neganai, ia gwau: “Ia be uma badana ta, mai ena hairai, unuseniai gau ta o tau ta amo dika ta do oi davaria lasi, huahua idia havaraia au idauidau, ranu namona, bona mamoe bona dia be unuseniai idia raka loaloa bona ava idia ania.” Inai Greek tatau rua ese unai idia laloa.​—Genese 2:15, 16 ida hahegeregerea.

5, 6. Edena dala ai Paradaiso ia boio, bona unai dainai taunimanima be dahaka idia laloa?

⁵ Dirava ese Adamu bona Heva be unai bamona paradaiso dekenai ia atoa, to unuseniai idia noho daudau lasi. Dahaka dainai? Dirava idia kamonai henia lasi dainai, idia hegeregere lasi unuseniai idia noho. Unai dainai, idia bona edia natudia be Paradaiso ai do idia noho helarona idia haboioa. (Gen. 3:23, 24) Ena be unuseniai ta ia noho lasi, to unai uma be ia noho ela bona Noa ena nega ai abata badana ia vara.

⁶ Reana haida do idia laloa, ‘Nega ta tau, hahine, bona natudia ese tanobada Paradaisona do idia moalelaia lou, a?’ Hamomokania gaudia haida be dahaka? Bema oi ura emu lalokau taudia ida Paradaiso ai oi noho, dahaka hamomokania gaudia ese emu helaro ia hagoadaia? Dahaka dainai oi abia dae Paradaiso be do ia vara momokani?

7, 8. (a) Dirava ese Aberahamo dekenai dahaka ia gwauhamatalaia? (b) Dirava ena gwauhamata dekenai, Aberahamo be dahaka ia laloa?

⁷ Paradaiso totona idia vara henanadai be iseda Havaraia Tauna ena hereva, Baibel amo haere ita abia diba. Mani Dirava ese ena turana Aberahamo ia hamaoroa herevana ita laloa. Dirava ia gwau Aberahamo ena bese do ia habadaia “kone dekenai noho miri bamona.” Iehova ese Aberahamo dekenai mai anina bada gwauhamatana ia gwauraia: “Tanobada besedia ibounai ese lau dekenai do idia noinoi, idia do lau hanamoa, oiemu tubuna lau hanamodia vadaeni hegeregerena. Inai bamona do idia noinoi, badina be oi ese lauegu oda oi kamonai henia dainai.” (Gen. 22:17, 18) Dirava ese unai gwauhamata herevana be Aberahamo ena natuna bona ena tubuna dekenai ia gwauraia lou.​—Genese 26:4; 28:14 duahia.

⁸ Baibel ia gwau lasi Aberahamo ia laloa taunimanima be guba paradaisona dekenai hahenamo do idia abia. Unai dainai Dirava ia gwau, “tanobada besedia ibounai” do ia hanamoa neganai, ita gwau diba Aberahamo ia diba unai hahenamo be tanobada dekenai do ia vara. Unai gwauhamata be Dirava amo dainai, “tanobada besedia ibounai” be mauri namona do idia moalelaia. To Dirava ena taunimanima dekenai idia vara gaudia haida ese unai ia hamomokania danu, a?

9, 10. Dahaka gwauhamata herevadia ese idia hamomokania vaira negai paradaiso do ia vara?

⁹ Aberahamo ena tubuna ta, Davida, ia gwau, vaira nega ai “kara dika taudia do idia ore.” (Sal. 37:1, 2, 10) To, “manau taudia ese noho gabuna tano do idia abia, do idia helai namonamo, mai moale bona mai maino danu.” Dirava ena lauma helaga ena heduru amo Davida be ma ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Sal. 37:11, 29; 2 Sam. 23:2) Dirava ena ura idia karaia taudia dekenai unai hagoadaia herevana ese edena dala ai idia ia durua? Do idia hamomokania diba kara maoromaoro taudia be tanobada ai do idia mauri hanaihanai, bona Eden uma ai ia vara paradaisona be do ia vara lou.

¹⁰ Lagani haida murinai, idia gwau Iehova idia hesiai henia Israela taudia be Ia bona tomadiho momokani idia dadaraia. Unai dainai Dirava ese Babulonia taudia ia koua lasi ena taunimanima  idia tuari henia, edia noho gabuna idia hadikaia, bona igui hesiai taudia bamona edia gabu dekenai idia abia lao. (2 Siv. 36:15-21; Ier. 4:22-27) To, Dirava ena peroveta taudia idia gwau lagani 70 idia ore murinai, iena taunimanima be edia hanua dekenai do idia giroa lou. Unai peroveta herevadia be idia guguru. To ita dekenai unai be mai anina bada danu. Inai stadi ai peroveta herevadia haida ita herevalaia neganai, tanobada ai do ia vara paradaiso ita laloa be namo.

11. Isaia 11:6-9 be edena dala ai ia guguru, bona edena henanadai do ita laloa?

¹¹ Isaia 11:6-9 duahia. Dirava be peroveta tauna Isaia amo ia gwauhamata, Israela taudia be edia hanua dekenai idia giroa lou neganai, idia be animal o taunimanima edia dagedage karadia dainai do idia gari lasi. Matamata bona buruka taudia be do idia noho namonamo. Oi laloa unai nega be Dirava ese Eden umana ia havaraia negana hegeregerena, a? (Isa. 51:3) Isaia ese ia gwauraia peroveta herevana ai ia gwau tanobada ibounai​—Israela besena sibona ia herevalaia lasi​—be “[Iehova] ena diba maoro dekena amo do ia honu momokani, davara be ranu dekenai ia honu bamona.” Edena nega ai unai do ia vara?

12. (a) Babulonia amo idia giroa lou taudia be dahaka hahenamo idia moalelaia? (b) Dahaka ese ia hahedinaraia Isaia 35:5-10 ena peroveta herevana be vaira nega ai do ia guguru danu?

¹² Isaia 35:5-10 duahia. Isaia ese ia hahedinaraia Babulonia amo idia giroa lou taudia be animal o taunimanima edia dagedage karana dainai do idia gari lasi. Eden umana bamona, sinavai ia aru lao bona tano ia hapariparia dainai edia tano ai au momo ese huahua namodia idia havaraia. (Gen. 2:10-14; Ier. 31:12) To unai peroveta herevana be Israela taudia edia nega sibona ai ia guguru, a? Unai peroveta herevana ia gwau matakepulu, aena dika taudia, bona taia kudima taudia be do idia namo lou. To, Babulonia amo idia giroa lou taudia dekenai unai ia vara lasi. Unai ese ia hahedinaraia Dirava be unai nega ia herevalaia lasi to vaira nega ai gorere ibounai do ia haorea.

13, 14. Edena dala ai Babulonia amo idia giroa lou Israela taudia dekenai Isaia 65:21-23 ena peroveta herevana ia guguru, to edena kahana be gabeai do ia guguru? (Laulau ginigunana herevalaia.)

¹³ Isaia 65:21-23 duahia. Iuda taudia be edia noho gabuna dekenai idia giroa lou neganai, ruma namodia idia davaria lasi; uma bona vine umadia idia dika. To Dirava ese idia ia hanamoa dainai, edia noho dalana ia idau. Idia moale badina sibona edia ruma idia haginia bona idia noholaia diba! Danu aniani idia hadoa bona edia huahua idia moalelaia.

¹⁴ Unai peroveta herevana ese ia hahedinaraia, iseda mauri dinadia be “au edia mauri dinadia” hegeregerena do ia momo herea. Au haida be lagani tausen momo idia noho daudau diba. To taunimanima idia noho daudau totona, idia gorere lasi be namo. Bona bema Isaia ese ia perovetalaia negana lalonai idia noho, idia dekenai unai be moale gauna badina idia be paradaiso ai idia noho! Unai peroveta herevana be do ia guguru!

15. Isaia ese vaira nega ai ia perovetalaia hahenamo haida be dahaka?

¹⁵ Ita herevalaia vadaeni gwauhamata idauidau ese ia hahedinaraia vaira negai paradaiso do ia vara. Animal o taunimanima edia dagedage karadia dainai do idia gari lasi. Matakepulu, taia kudima, bona aena dika taudia be do idia namo lou. Taunimanima be sibona edia ruma do idia haginia bona aniani namodia do idia moalelaia. Au idia noho daudau hegeregerena, do idia mauri daudau. Oibe, Baibel ese ia hahedinaraia unai bamona gaudia be vaira neganai do ia vara. To, reana haida do idia gwau unai peroveta herevadia ese idia hahedinaraia lasi tanobada ai paradaiso do ia vara. Edena bamona do oi haere? Dahaka badina namodia dainai ita abia dae vaira nega ai tanobada ai paradaiso do ia vara? Tau hereadaena, Iesu, ese ia gwauraia herevana ese unai ia hahedinaraia.

16, 17. Dahaka ia vara dainai, Iesu ese Paradaiso ia herevalaia?

¹⁶ Ena be Iesu be kerere ta ia karaia lasi, to kara  dika tauna ta bamona idia hahemaoro henia bona au dekenai idia tauadae ia mase totona, bona Iuda edia raskol taudia rua danu be ena badina ai idia tauadae. Idia do mase lasi neganai, unai raskol tauna ta be ia abia dae Iesu be king bona ia dekenai ia noinoi, “Iesu e, emu Basileia lalonai oi vareai neganai lau oi laloa.” (Luka 23:39-42) Iesu ese unai raskol tauna dekenai ia gwauraia gwauhamata herevana, Luka 23:43 ai be mai anina bada iseda vaira negana totona. Hari inai negai diba bada taudia ese unai siri be inai bamona idia hahanaia: “Oi lau hamaoroa momokani, hari dina oi be lau ida do ita noho Paradaiso ai.” Mani inai hereva “hari dina” oi laloa. Iesu ena hereva anina be dahaka? Unai hereva dekenai momo edia lalohadai be idauidau.

¹⁷ Gado momo ai koma idia gaukaralaia gau ta ena anina idia hahedinaraia namonamo totona. To, Greek revarevadia ai koma bona fulstop idia gaukaralaia momo lasi. Unai dainai reana do ita henanadai: Iesu be ia gwau, “Hari dina, oi lau hamaoroa momokani oi be lau ida Paradaiso ai do ita noho,” a? Eiava ia gwau, “Hari dina oi lau hamaoroa momokani, oi be lau ida Paradaiso ai do ita noho”? Gado hahanaia taudia be reana Iesu ena hereva idia lalopararalaia hegeregerena koma idia atoa, bona hari inai nega ai Baibel momo ai unai do oi itaia.

18, 19. Edena dala ai Iesu ena hereva ita lalopararalaia diba?

¹⁸ Iesu be ia do mase lasi neganai, iena murinai idia raka taudia ia hamaoroa, ia gwau: “Taunimanima ena Natuna be tano lalonai dina toi bona hanuaboi toi do ia noho.” Danu ma ia gwau: “Taunimanima ena Natuna be taunimanima edia imana dekenai do idia atoa, bona do idia hamasea, bena dina ihatoina ai do ia toreisi lou.” (Mat. 12:40; 16:21; 17:22, 23; Mar. 10:34) Aposetolo Petero ese unai sivarai tamona ia gwauraia. (Kara 10:39, 40) Unai dainai Iesu bona unai raskol tauna idia mase neganai, idia be unai dina tamona ai Paradaiso dekenai idia lao lasi. Iesu be dina haida “Mase Gurina [eiava “Hades”]” ai ia noho, ela bona Dirava ese ia hatoreaisi lou.​—Kara 2:31, 32; futnout. *

¹⁹ Unai dainai, Iesu be unai raskol tauna dekenai gwauhamata herevana ia gwauraia neganai, ia gwau: “Hari dina oi lau hamaoroa momokani.” Unai bamona hereva be Mose ena nega ai idia gaukaralaia danu. Ia gwau: “Inai Taravatu, hari dina umui dekenai lau henia gaudia do umui laloaboio lasi.”​—Deu. 6:6; 7:11; 8:1, 19; 30:15.

20. Dahaka ese iseda laloparara Iesu ena hereva dekenai ia durua?

²⁰ Middle East amo Baibel hahanaia tauna ta ese Iesu ena haere be inai bamona ia herevalaia, ia gwau: “Namona be inai hereva ‘hari dina’ be inai bamona ita torea, ‘Hari dina oi lau hamaoroa momokani, oi be lau ida Paradaiso ai do ita noho.’ Unai gwauhamata be unai dina dekenai ia karaia to vaira nega ai do ia guguru. Unai bamona hereva be unai gabu taudia edia hereva dalana, unai dainai ta ese gwauhamata ta ia gwauraia neganai, ia be unai gwauhamata do badinaia.” Danu, lagani 1,600 gunanai inai siri be Syriac gado dekenai inai bamona idia hahanaia: “Amen, hari dina oi lau hamaoroa, oi be lau ida Eden Umana ai do ita noho.” Unai gwauhamata ese ita ibounai ia hagoadaia.

21. Raskol tauna dekenai dahaka ia vara lasi, bona dahaka dainai?

²¹ Unai raskol tauna be ia diba lasi Iesu be ena abidadama aposetolo taudia ida kontraka ta ia karaia idia be ia ida guba Basileia ai do idia lohia. (Luka 22:29) Danu unai raskol tauna be ia bapatiso lasi. (Ioa. 3:3-6, 12) Unai dainai ita diba Iesu ese ia gwauhamatalaia gauna be tanobada ai do ia vara paradaiso ia herevalaia. Lagani haida murinai, aposetolo Paulo be matahanai ta ai ia itaia  tau ta be Lohiabada ese “paradaiso dekenai ia abia lao.” (2 Kor. 12:1-4) Paulo bona abidadama aposetolo taudia be unai raskol tauna bamona lasi, badina idia be Dirava ese ia abia hidi Iesu ida guba Basileia ai do idia lohia. To, Paulo be vaira nega ai do ia vara gauna ta ia herevalaia​—nega vaira ai do ia vara “paradaiso.” * Unai be tanobada ia herevalaia, a? Bona unuseniai do oi noho diba, a?

22, 23. Dahaka helaro oi naria noho?

²² Davida be ia gwau vaira nega ai “kara maoromaoro taudia ese, Dirava ia henidia tano dekenai do idia noho ela bona hanaihanai.” (Sal. 37:29; 2 Pet. 3:13) Davida ia hahedinaraia unai nega ai tanobada ai taunimanima ese Dirava ena taravatu maoromaorodia do idia badinaia. Isaia 65:22 ai inai peroveta herevana ia noho, ia gwau: “Au edia mauri dinadia be momo hegeregerena, lauegu bese taudia edia mauri dinadia be unai bamona.” Unai ese ia hahedinaraia taunimanima be lagani tausen momo do idia mauri diba. Unai oi abia dae a? Oibe, badina Apokalupo 21:1-4 ena hereva hegeregerena, Dirava ese ena taunimanima do ia naria bona tanobada matamatana ai Ia idia hesiai henia taudia dekenai ia gwauhamata “mase be do ia ore.”

²³ Baibel ese ia herevalaia Paradaiso be do ia vara momokani. Ena be Adamu bona Heva ese Eden ai Paradaiso idia haboioa, to ia boio momokani lasi. Dirava ia gwauhamata bamona, tanobada ai do idia noho taudia do ia hanamoa. Dirava ena lauma helaga ena heduru dainai, Davida ia gwau, manau bona kara maoromaoro taudia be tanobada ai do idia noho ela bona hanaihanai. Isaia bukana ai idia noho peroveta herevadia ese ita ia durua do idia vara hahenamo idauidau be mai moale ida ita naria noho. To edena nega ai unai do ia vara? Iesu ese Iuda edia raskol tauna dekenai ia gwauraia gwauhamata ia guguru neganai, unai hahenamo do ia vara. Unai Paradaiso lalonai oi noho diba. Unai nega ai, iseda tadikaka taihu ese Korea ena hebouhebou dekenai idia gwauraia herevana do oi hamomokania: “Paradaiso ai do ita hedavari!”