Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:

Edena dala ai Baibel ese Dirava ena hebogahisi ia hahedinaraia?

Israela taudia be Aigupito ai igui hesiai taudia ai idia lao neganai, Dirava be edia hisihisi ia itaia sibona lasi, to idia davaria hisihisi ia mamia danu. (Eso. 3:7; Isa. 63:9) Dirava ese ita ia karaia dainai, ita ese hebogahisi ita hahedinaraia diba. Herevana nega haida ita laloa Dirava be ita ia laloa lasi bona ita ia hebogahisi henia lasi, to ia ese ita ia hebogahisi henia.​—wp18.3, rau 8-9.

Edena dala ai Iesu ena hadibaia dalana ese taunimanima ia durua inai henia kava karana idia hanaia totona?

Iesu ena negai Iuda taudia momo be ma haida idia inai henia. Iesu be manau karana ena namo bona ta ese ena bese abia isi o heagilaia karana ia herevalaia. Iesu ese ena murinai idia raka taudia ia hamaoroa, idia ibounai be tadikaka bona taihu.​—w18.06, rau 9-10.

Dahaka dainai Mose be Gwauhamata Tanona lalonai ia vareai lasi?

Mose be Iehova ena turana namona ta ai ia lao. (Deu. 34:10) Israela taudia be tano gagaena ai lagani 40 idia noho murinai, nega iharuana idia maumau badina kamepa gabuna ai ranu be lasi. Dirava ese Mose ia hamaoroa nadi badana do ia hereva henia. To, Mose be nadi badana ia botaia. Iehova ia badu badina Mose be Iena hakaua herevadia ia badinaia lasi o unai hoa karana dainai Mose ese Dirava ia hanamoa lasi. (Num. 20:6-12) Namona be unai ese ita ia hadibaia Iehova badinaia karana bona iena ladana hanamoa karana be mai anina bada.​—⁠w18.07, rau 13-14.

Edena dala ai ita be ta ena toana amo ia ita hahemaoro henia diba?

Nega momo taunimanima ese inai gaudia toi, edia matana amo idia itaia gaudia ese idia ia hakaua kerere diba: Bese, taga, bona mauri lagani. Namona be ita ese Dirava ena kara, ta ena toana ia laloa lasi karana unai, ita tohotohoa! (Kara 10:34, 35)​—w18.08, rau 8-12.

Edena dala haida amo buruka Keristani taudia ese ma haida idia durua diba?

Ena asainmen ia idau buruka Keristani tauna ta be Dirava ese ia laloa bada bona gau ma haida ia karaia diba ma haida ia durua totona. Witnes lasi tau o hahine ia durua, manoka taudia ia durua, Baibel stadi ia karaia, bona ena haroro gaukara ia habadaia diba.​—w18.09, rau 8-11.

Hadibaia Gaukara Ena Tulu Idauidau ena maua ai Keristani taudia totona dahaka tulu idauidau idia noho?

Contact kadi bona invateisen idia noho. Auka lasi dalanai herevahereva hamatamaia pepapepa eit, Gima Kohorona bona Noga magasin idia noho danu. Unai maua ai buklet haida, stadi hamatamaia bukadia rua, bona vidio foa, idia ta be Dahaka Dainai Baibel Oi Stadilaia? vidio ia noho danu.​—w18.10, rau 16.

Aonega Herevadia 23:23 ena hereva bamona, edena dala ai Keristani ta ese “hereva momokani ia hoia” diba?

Hereva momokani be moni amo ita hoia diba lasi. To, hereva momokani ita dibaia totona, namona be nega bada do ita atoa bona do ita hekwarahi.​—w18.11, rau. 4.

Hosea ese ena adavana Gomere ia kara henia dalana amo dahaka ita dibaia?

Ena be Gomere be nega momo heudahanai karana ia karaia, to Hosea ese ena dika ia gwauatao bona ia rakatania lasi. Bema Keristani tauna ta ena adavana be ia heudahanai, ia kerere lasi tau o hahine ese ena adavana ena dika ia gwauatao diba. Bema kerere ia karaia lasi headava tau o hahine ia ura ena headava ia hadokoa lasi bona ena adavana ida ia mahuta hebou, badina ta ia noho lasi headava idia hadokoa totona.​—w18.12, rau 13.