Unai gwauhamata amo orea matamatana ta idia haginia, bona idia gwauraia League of Nations. Unai orea ena tahua gauna be “tanobada ibounai lalonai gaukara hebou karana do ia havaraia, unai amo maino bona noho namo do ia vara.” Kerisendom ena tomadiho momo ese League of Nations idia durua. The Federal Council of the Churches of Christ in America ese League of Nations idia durua bona idia gwau, “ia be politikol dalanai, tanobada ai Dirava ena Basileia ia laulaulaia.” Danu, unai orea ese League of Nations idia hanamoa dalana ta be, Paris Peace Conference dekenai edia delegate idia siaia. Delegate ta ia gwau, unai hebou ese “tanobada ena histori lalonai dala matamatana ta ia kehoa.”

Dala matamatana ta ia hedinarai, to unai dala be peace conference hebou idia karaia taudia ese idia hamatamaia lasi. Lagani 1919 ai, haroro gaukara ena dala matamatana ia hedinarai, badina Iehova ese ena taunimanima ia hagoadaia haroro gaukara idia habadaia totona, guna bamona lasi. To, unai ia vara totona, Bible Student taudia ese gau haida idia haidaua be namo.

Saturday, January 4, 1919 idia makaia, lagani ta ta ai Watch Tower Bible and Tract Society ena dairekta matamata idia abia hidi totona. Danu, unai negai, Iehova ena taunimanima ia gunalaia tauna, Joseph F. Rutherford bona tadikaka seven be Atlanta, Georgia, U.S.A. dekenai dibura ruma ai idia atoa. Tadikaka be abia hidi do idia karaia, bema dibura ruma dekenai idia atoa dairekta taudia idia abia hidi lou, eiava idia haidaua.

Tadikaka Rutherford be dibura ruma ai ia noho neganai, orea ena heau dalana vaira nega totona ia laloa. Ia diba, tadikaka haida idia laloa ta idia abia hidi presiden gaukara ia karaia be namo. Unai dainai ia be revareva ta amo idia hebou taudia ia hadibaia Evander J. Coward ese presiden ena maduna ia abia be namo. Rutherford ia gwau, Coward be “lalomanau,” “aonega,” bona “Lohiabada ia badinaia tauna.” To, tadikaka momo idia ura dala ma ta idia badinaia, idia ura hua siks murinai election do idia karaia. Dibura ruma ai idia noho tadikaka idia durua legal team, be unai abia hidi dekenai idia lalotamona. Do idia karaia gaudia idia herevalaia lalonai, tadikaka haida idia lalohisihisi.

 Richard H. Barber ia gwau, gabeai gau ta ia vara unai hekwakwanai idia hamaoromaoroa totona. Tadikaka ta ia toreisi bona ia gwau: “Lau be loea lasi, to taravatu hegeregerena ia vara gauna ita hamaoromaoroa totona, badinaia karana ena taravatu lau diba. Dirava ia ura badinaia karana ita hahedinaraia. Lau abia dae Dirava dekenai iseda badinaia karana ita hahedinaraia totona, namona be election ta ita abia bona Tadikaka Rutherford ita abia hidi lou presiden ai ia lao totona.”​—Sal. 18:25.

Dibura ruma ai ia noho tadikaka ta ladana A. H. Macmillan ia gwau, election dinana murinai, Tadikaka Rutherford be iena dibura ruma ena haba dekenai ia pidipidi bona tadikaka ese Rutherford dekenai idia siaia election ena result be ia dekenai ia henia. Macmillan be unai revareva ia itaia neganai ena anina ia lalopararalaia. Unai revareva ia hahedinaraia, dairekta ibounai be idia haidaua lasi, bona Joseph Rutherford bona William Van Amburgh be edia gaukara idia karaia noho diba. Unai dainai Tadikaka Rutherford be presiden gaukara ia karaia.

Tadikaka eit be dibura ruma ai idia noho lalonai, Bible Student taudia be iseda tadikaka ruhaia totona noinoi pepana (petition) ta idia abia loaloa. Unai tadikaka bona taihu goadadia be taunimanima 700,000 dekenai petition pepana idia henia bona idia sainia. Wednesday, March 26, 1919 ai, petition pepana idia do henia lasi neganai, Tadikaka Rutherford bona tadikaka ma haida be idia ruhadia.

Tadikaka Rutherford be ia idia welkam henia taudia dekenai ia gwau: “Lau abia dae, ia vara gauna ese ita ia durua unai amo nega aukadia totona ita hegaegae diba. . . . Emui gaukara goada karana be dibura ruma amo emui tadikaka umui ruhaia totona lasi. Unai be inai gaukara ibounai ena badina korikorina lasi. . . . Umui gaukara goada karana ena badina be Iehova ena ladana umui hanamoa totona, bona unai bamona idia karaia taudia be hahenamo hereadaena idia abia vadaeni.”

Iseda tadikaka idia davaria hahetoho bona idia vara gaudia ese ia hahedinaraia Iehova be gau ibounai ia hakaua noho. May 14, 1919 ai, kota taudia idia gwau: “Unai tatau eit be dala maorona ai idia hahemaoro henidia lasi, . . . unai dainai kota be edia disisen idia haidaua.” Idia laloa, tadikaka be kerere badadia dainai dibura ruma ai idia atoa, bona bema idia abia hahemaoro idia haidaua lasi, tadikaka be kerere karaia taudia bamona do idia gwauraia. Kerere ma haida dainai tadikaka idia hahemaoro henidia lasi. Unai badina dainai Diadi Tauna Rutherford be taravatu hegeregerena United States ena Supreme Court ai Iehova ena taunimanima ia gimaia, ia idia ruhaia negana amo nega momo unai bamona ia karaia.

Tadikaka Macmillan ia gwau, “Namo lasi ita hesiku bona gau ta ita karaia lasi, bena Lohiabada ia mai bona guba dekenai ita ia abia lao. Ita laloparara namona be dala ita tahua Lohiabada ena ura ita dibaia totona.”

To, iseda tadikaka hedikwota dekenai be lagani daudau lalonai idia karaia gaukara idia hamatamaia lou be auka. Dahaka dainai? Badina tadikaka be dibura ruma ai idia atodia neganai, pablikeisen printaia totona idia gaukaralaia printing plates be idia dika. Unai ese lalomanoka ia havaraia, unai dainai tadikaka haida idia laloa haroro gaukara be ia ore.

Taunimanima be Bible Student taudia ese idia harorolaia Basileia sivaraina idia ura kamonai, a? Unai henanadai haerelaia totona, Tadikaka Rutherford ia ura lecture eiava tok ta ia henia. Taunimanima ibounai idia boiria. Tadikaka Macmillan ia gwau, “Bema unai hebou dekenai ta ia mai lasi do ai diba haroro gaukara ia ore vadaeni.”

Unai dainai Sunday, May 4, 1919, Los Angeles, California ai, ena be Tadikaka Rutherford ia gorere, to mai haheauka ida tok ladana, “Idia Hisihisi Noho Tanobada Taudia Edia Helaro Namona” ia henia. Taunimanima 3,500 bamona idia mai unai tok idia kamonai totona, bona momo idia giroa lou badina helai gabuna be lasi. Murina dinana ai, taunimanima 1,500 ma idia mai. Tadikaka be edia haere idia abia badina taunimanima be idia ura kamonai!

Tadikaka ese gabeai idia karaia gauna ese Iehova ena Witnes taudia idia karaia haroro gaukara ia hahedinaraia ema bona hari.

The Watch Tower August 1, 1919 gauna ese ia hahedinaraia, September lalonai, Cedar Point, Ohio dekenai hebouhebou ta do idia karaia. Missouri amo ia mai Bible Student ta ladana, Clarence B Beaty ia gwau, “Taunimanima ibounai idia ura unuseni idia lao.” Tadikaka bona taihu  6,000 mai kahana be unai hebou dekenai idia mai. Danu, unai hebouhebou dekenai ia vara moale gauna ta be, tadikaka taihu 200 mai kahana be sinavai ta ladana Erie dekenai bapatiso idia abia.

September 5, 1919, hebouhebou ena dina namba faiv ai, Tadikaka Rutherford be tok ladana “Address to Co-laborers” ia henia, bona magasin matamata ta ladana The Golden Age * ia halasia. Unai magasin ese “mai anina bada sivaraidia, bona Baibel ese idia vara noho gaudia ena badina ia herevalaia dalana ia hahedinaraia.”

Bible Student taudia ibounai idia hagoadaia, haroro gaukara ai mai gari lasi ida unai pablikeisen matamata idia gaukaralaia totona. Revareva ta ese gaukara do idia karaia dalana be inai bamona ia herevalaia: “Namona be bapatiso taudia ta ta idia laloatao, hesiai gaukara be hahenamo badana ta, bona hari unai hahenamo idia moalelaia bona idia gaukara goada tanobada ibounai lalonai haroro gaukara idia durua totona.” Taunimanima momo be unai noinoi herevana idia abia dae! December ai, Basileia pablisa goadadia be unai magasin matamata ena sabskripsen 50,000 mai kahana idia abia.

Lagani 1919 ai, Iehova ena taunimanima be edia gaukara dalana idia hanamoa bona goada idia abia. Danu, nega dokona ia herevalaia mai anina bada peroveta herevadia haida be idia guguru. Malaki 3:1-4 ese Dirava ena taunimanima idia goeva karana ena peroveta herevana ia guguru. Iehova ena taunimanima be laulau dalanai “Babulonia Badana” ena igui amo idia ruhaia, bona Iesu ese “igui hesiai tauna mai ena kamonai bona mai ena kara maoromaoro” ia abia hidi. * (Apok. 18:2, 4; Mat. 24:45) Hari, Bible Student taudia idia hegaegae vadaeni, Iehova ia ura do idia karaia gaukarana idia karaia totona.