WEDA ia stadilaia tauna (weather forecaster), be radar image amo ia itaia, lai gubana be haraga momokani taunimanima momo idia noho gabuna ia lao henia noho. Ia be taunimanima edia namo ia laloa dainai, kara haraga nega bada lalonai ia hadibadia unai amo do idia hegaegae.

Unai hegeregerena, Iehova be hari tanobada ai idia noho taudia ia hadibaia noho “lai guba” dikana ta do ia vara, bona unai ese weda ripoti amo ita kamonai sivarai ibounai ia hereaia. Edena dala ai unai ia karaia? Bona dahaka dainai ita gwau diba Iehova be taunimanima dekenai nega ia henia idia hegaegae totona? Haere ita diba totona, Iehova ese idaunegai ia henia hadibaia hereva haida mani ita herevalaia.

Baibel negadiai, Iehova be “lai guba,” eiava hahemaoro karadia idauidau amo iena taravatu idia badinaia lasi taudia ia hahemaoro henidia. (Aon. 10:25; Ier. 30:23) Unai nega ta ta ai, nega bada lalonai idia kamonai lasi taudia ia hadibaia, bona iena taravatu idia badinaia dalana ia hadibaia danu. (2 Kin. 17:12-15; Neh. 9:29, 30) Edia mauri idia ura haidaua taudia ia durua totona, ia ese tanobada ai idia noho abidadama hesiai taudia ia gaukaralaia iena hahemaoro herevadia idia gwauraia, bona unai hereva idia badinaia haraga ena namo idia gwauraia hedinarai.​—⁠Amo. 3:7.

Dirava ese Noa ia gaukaralaia ena hahemaoro herevana ia harorolaia totona. Lagani momo lalonai, ia be mai gari lasi ida iena negai idia noho matabodaga bona dagedage taudia dekenai abata do ia mai ena sivarai ia gwauraia. (Gen. 6:9-13, 17) Danu, Noa ese taunimanima dekenai abata amo idia roho mauri dalana ia hadibaia, unai dainai ia idia gwauraia “kara maoromaoro ia harorolaia tauna.”​—⁠2 Pet. 2:5.

Ena be Noa ia gaukara goada Dirava amo ia abia sivaraina ia harorolaia totona, to taunimanima idia kamonai lasi. Bona abidadama karana idia hahedinaraia lasi. Unai dainai Abata badana “ia mai bona idia ibounai ia abia lao” bona idia mase. (Mat. 24:39; Heb. 11:7) Unai dainai abata ia vara neganai, idia laloparara Dirava ese idaunegai idia ia hadibaia vadaeni.

Nega ma haida ai, Iehova ese nega kwadogina lalonai taunimanima ia hadibaia murinai, iena hahemaoro ia karaia. Danu, idia kamonai lasi taudia dekenai nega bada ia henia edia kara idia haidaua totona. Hegeregere, Aigupito taudia dekenai Hisihisi Ten idia do vara lasi neganai, Dirava ese idia ia hadibaia guna. Haheitalai ta be, Iehova ese Mose bona Arona ia siaia Farao bona ena hesiai taudia dekenai hisihisi namba seven​—⁠medu aisi nadi bamona​—⁠ena hahemaoro herevana idia gwauraia. Unai hisihisi namba seven be murina dinana ai do ia vara dainai, Dirava be idia dekenai nega bada ia henia idia heau mauri totona, a? Baibel ia gwau: “Vadaeni Farao ena hesiai taudia haida sibona Lohiabada ena gadona dekenai idia gari, vadaeni idia ese edia hesiai taudia bona idia edia ubua gaudia idia hakaua vareai ruma dekenai. To Lohiabada ena hereva idia laloa lasi taudia ese edia hesiai taudia bona edia ubua gaudia edia rakatania tano palaka dekenai.” (Eso. 9:18-21) Ia hahedinaraia, Iehova be nega ia henia unai amo iena sisiba idia kamonai taudia be hisihisi do idia abia lasi.

Unai hegeregerena, Farao bona ena hesiai taudia be hisihisi ten ia do matamaia lasi neganai, hahemaoro herevana idia abia. To unai hahemaoro herevana idia abia dae lasi. (Eso. 4:22, 23) Unai dainai edia vara guna natuna memero idia mase. Unai be dika momokani! (Eso. 11:4-10; 12:29) Idia ese unai sisiba herevana idia badinaia diba, a? Oibe! Mose ese do ia vara hisihisi ten be Israela taudia dekenai ia hadibaia, bona edia ruma bese do idia hamauria dalana danu ia hadibaia. (Eso. 12:21-28) Taunimanima hida be Mose ese ia henia hahegani idia badinaia? Ripoti haida ese idia hahedinaraia, taunimanima 3 milioni mai kahana, Israela taudia, Aigupito taudia bona Israela lasi “orea idauidau taudia momo herea,” be Dirava ena sisiba idia badinaia bona Aigupito idia rakatania.​—Eso. 12:38.

Unai haheitalai ese idia hahedinaraia, Iehova be hanaihanai nega bada lalonai taunimanima dekenai ena hahemaoro sisiba ia henia, unai amo nega ia noho idia badinaia totona. (Deu. 32:4) Dahaka dainai Dirava be unai bamona ia karaia? Aposetolo Petero ia hahedinaraia, Iehova “ia ura lasi tau ta ia mase, to ia ura taunimanima ibounai idia helalo-kerehai.” (2 Pet. 3:9) Oibe, Dirava ese taunimanima ia laloa bada. Ia ura do idia helalo-kerehai bona iena hahemaoro ia do karaia lasi lalonai edia mauri idia haidaua.​—Isa. 48:17, 18; Roma 2:4.

Hari inai negai danu, taunimanima ese tanobada ibounai dekenai idia gwauraia noho mai anina bada hadibaia herevana idia kamonai be namo. Iesu be tanobada ai ia noho neganai, ia gwau inai nega oromana be “hisihisi badana” ese do ia hadikaia ore. (Mat. 24:21) Vaira negai do ia vara hahemaoro karana dainai, Iesu be peroveta herevana ta amo ena hesiai taudia dekenai do idia vara gaudia bona do idia itaia gaudia ia hadibaia. Iesu ese hari inai negai idia vara noho mai anina bada gaudia ia herevalaia.​—Mat. 24:3-12; Luka 21:10-13.

Unai peroveta herevana hegeregerena, hari, Iehova ese taunimanima ia hadibaia noho Iena lohia dalana idia badinaia totona. Ia ura kamonai taudia ese hari mauri namona idia moalelaia, bona vaira negai iena kara maoromaoro tanobada matamatana ai hahenamo ma haida do idia moalelaia. (2 Pet. 3:13) Taunimanima ese Iehova ena gwauhamata idia abidadama henia totona, “Basileia ena sivarai namona” ia henia, Iesu ese ia perovetalaia hegeregerena, unai sivarai namona be “tanobada ibounai dekenai do idia harorolaia, unai amo bese ibounai ese idia kamonaia diba.” (Mat. 24:14) Momokani, tano 240 mai kahana dekenai, Dirava idia tomadiho henia taudia be ma haida dekenai unai sivarai namona idia harorolaia noho. Iehova ia ura taunimanima momo ese iena hadibaia herevana idia badinaia, bona iena hahemaoro maoromaoro dinana amo idia roho mauri totona.​—Sep. 1:14, 15; 2:2, 3.

Namo lasi ita laloa Iehova ese taunimanima dekenai nega bada ia henia lasi iena hadibaia hereva idia kamonai bona badinaia totona. Hamomokania gaudia ese idia hahedinaraia, Iehova be hanaihanai nega bada lalonai hadibaia hereva ia henia. To, mai anina bada henanadai be inai: Nega ia do noho lalonai, taunimanima ese Dirava ena hadibaia hereva do idia badinaia, a? Namona be ita, Dirava ena hesiai taudia ese taunimanima momo ita durua, inai nega oromana ena dokona amo idia roho mauri totona.